32 C
Phnom Penh

នគរ​បាល​ប្រឆាំង​ការ​ជួញ​ដូរ​មនុស្ស​ចាប់​ខ្លួន​​ជន​ជាតិ​តៃវ៉ាន់​ពី​បទ​ជួញ​ដូរ​អ្នក​នេសាទ​ទៅ​ប្រទេស​អាហ្វ្រិក

ដោយ ឌឹ ខេមបូឌា ដេលី

បទវិភាគ

កាល​ពី​ថ្ងៃ​សុក្រ​ នគរ​បាល​ប្រឆាំង​ការ​ជួញ​ដូរ​មនុស្ស​របស់​ក្រសួង​មហា​ផ្ទៃ​បាន​ចាប់​ខ្លួន​ស្ត្រី​ជន​ជាតិ​តៃ​វ៉ាន់​ម្នាក់​ដែល​គេ​ជឿជាក់​ថា បានជាប់​​ពាក់​ព័ន្ធ​ក្នុង​ការ​ជួញ​ដូរ​ពលករ​ខ្មែរ​ទៅ​ធ្វើ​ការ​ក្នុង​សភាព​ដូច​ជា​ទាសករ​នៅ​លើ​ទូក​នេសាទ​តា​មឆ្នេរ​សមុទ្រ​អាហ្វ្រិក។

ឧត្តម​សេន​ីយ៍ឯក ប៉ុល ពិធេយ្យ ប្រធាន​នាយក​ដ្ឋាន​ប្រឆំាង​ការ​ជួញ​ដូរ​មនុស្ស​បាន​មាន​ប្រសាសន៍​ថា ​ឈ្មោះ លិន យូស៊ីន (Lin Yu Shin) អាយុ​៥៣​ឆ្នាំ​ម្ចាស់​ក្រុម​ហ៊ុន​នេសាទ​អន្ដរជាតិ​ ចៃអិន អូស៊ិន (Giant Ocean International Fishery and Co.Ltd) ត្រូវ​បានចាប់​ខ្លួន​កាល​ពី​ព្រឹក​ថ្ងៃ​សុក្រ នៅ​ក្នុង​ក្រុង​សៀមរាប​​​។

លោក ប៉ុល​ ពិធេយ្យ​ ​មាន​ប្រសាសន៍​ថា“ ជន​សង្ស័យ​ត្រូវ​បានចាប់​ខ្លួន​តាម​ដី​កា​របស់​សាលាដំបូង​រាជធានី​ភ្នំពេញ​…។​ វា​គឺ​ជា​សំណុំ​រឿង​ធំ​ ហើយ​យើង​កំពុង​សួរ​ចម្លើយ​ជន​សង្ស័យ”។​​​ លោក​បានបន្ថែម​ថា លោក​ពុំ​​​មានតួលេខ​នៅក្នុង​ដៃ​ដែល​បង្ហាញ​ថា តើ​អ្នក​ស្រី​ ស៊ីន បាន​ជួញ​ដូរ​មនុស្ស​ប៉ុន្មាន​នាក់​នោះ​ទេ។

​អង្គការ​ក្រៅ​រដ្ឋាភិបាល​បាន​ប៉ាន់​ប្រមាណ​​​​ថា អ្នកស្រី ស៊ីន ប្រហែល​ជា​បាន​ជួញ​ដូរ​មនុស្ស​​១.០០០​នាក់​ឲ្យ​ទៅធ្វើ​ការ​នៅ​លើ​នាវានៅ​ប្រទេស​អាហ្វ្រិក។​ ​សមាជិក​គ្រួសារ​អ្នក​នេសាទ​ដែល​បាត់​ខ្លួន​បាន​ដាក់​ពាក្យ​បណ្ដឹង​ចំនួន​២០០​ករណី​មក​អង្គការ​សិទ្ធិ​មនុស្ស​ និង​ក្រសួង​ការ​ងារ។​​​

លោក ចូអេល ព្រីស្តុន (Joel Preston​)​ អ្នក​ពិគ្រោះ​យោបល់​នៅ​មជ្ឈមណ្ឌល​អប់​រំ​ច្បាប់​សម្រាប់​សហគមន៍​បាន​មានប្រសាសន៍​ថា ទោះ​បី​ជា​ក្រុម​ហ៊ុន​ចៃអិន​អូស៊ិន បាន​ចុះ​ឈ្មោះ​ជា​មួយ​ក្រសួង​ការ​ងារ​ ក្នុង​នាម​ជា​ទី​ភ្នាក់​ងារ​ជ្រើស​រើស​ពល​ករ​ទៅធ្វើ​ការ​នៅ​ប្រទេស​​ជប៉ុន​ដែល​នៅ​ទី​នោះ​អាច​ទទួល​បាន​ប្រាក់​ខែ​ប្រហែល​២៥០​ដុល្លារ​ក្នុង​មួ​យខែ​ក៏​ដោយ ក៏​ពល​ករ​ខ្មែរ​មួយ​ចំនួន​​បាន​ធ្លាក់​ខ្លួន​ទៅ​ដល់​ប្រទេស​អាហ្វ្រិក​ជំនួស​វិញ​។​

លោក ព្រីស្ដុន បាន​​​លើក​​​ឡើង​​​ថា “ រហូត​មក​​​ទល់​​​នឹង​​​ពេល​​នេះ​​​ យើង​​​បាន​​​​បញ្ជូន​បុរស​​​​​​១៩​​​នាក់​មក​កម្ពុជា​វិញ​​​​ ហើយ​យើង​​​ទទួល​​​បាន​​​បណ្ដឹង​​​​​​ចំនួន​​​៣៤​​​បណ្ដឹង ​​​ប៉ុន្ដែវា​​​​លំបាក​​​ណាស់​​​”។ លោកបាន​​​បន្ថែម​​​ថា​​​បុរស​​​ខ្លះ​​​ត្រូវ​​​បាន​​​ជួយ​​​សង្គ្រោះ​​​ពីនាវា​​​នៅ​​​ក្នុង​​​ប្រទេស​​​សេណេហ្គា​​​ល់​​​ ប្រទេសម៉ូរីស និង​​​ថ្មី​​​នេះ​​​ត្រូវ​​​បាន​​​សង្គ្រោះ​​​ពីកំពង់​​​ផែ​​​នៅ​​​ក្នុង​​​ទីក្រុង​​​​​​ខេប​ថោន នៅ​​​អាហ្រិក​​​ខាង​​​ត្បូង​​​។

​​​លោក​​​បាន​​​មាន​​​ប្រសាសន៍​​​ថា “ បុរស​​​ដែល​​​ត្រូវ​​​បាន​​​​ជួយ​សង្គ្រោះ​មក​វិញ​បាន​​​​និយាយ​ថា នៅ​​​មាន​​​ជន​​​រងគ្រោះយ៉ាង​​​តិច​​​១.០០០​​​នាក់​​​ផ្សេង​​​ទៀត​​”។ លោក​​​បាន​​​បន្ដ​​​ថាមជ្ឈមណ្ឌ​​ល​​​អប់​​​រំ​​​ច្បាប់​​​សម្រាប់​​​សហគមន៍​​​កំពុង​​​តែ​​​ធ្វើ​​​ការ​​​លើ​​​សំណុំ​​​របស់​​​ជន​​​រងគ្រោះ​​​យ៉ាង​​​តិច​​​ចំនួ​​ន​​​៦០​​​នាក់​​​ផ្សេង​​​ទៀត​​​ ដែល​​​ត្រូវ​​​បាន​​​អ្នក​​​ស្រី ស៊ីន យក​​​ទៅ​​​លក់​​មុន​​​ពេល​​​ក្រុមហ៊ុន​​​ចៃអិន​​​អូសិន​​​ត្រូវ​បាន​​​​រដ្ឋាភិបាល​​​បិទ​​​ បន្ទាប់​​​ពី​​​មាន​​​សេចក្តី​រាយការណ៍​​​មួយ​​​ចំនួន​​​ពាក់​​​ព័ន្ធ​​​នឹង​​​ការ​​​ជួញ​​​ដូរ​​​មនុស្ស​​​នោះ​​​។

យោង​​​តាម​​​លោក ព្រីស្ដុន បាន​​​ឲ្យ​​​ដឹង​​​ថា​​​បុរស​​​ចំនួន​​​ពីរនាក់​​​ដែល​​​ត្រូវ​​​បាន​​​​បញ្ជូន​មក​​​វិញ​​​​កាល​ពី​​​ខែមីនា ពី​​​ទីក្រុង​​​ខេបថោន បាន​​​រៀប​​​រាប់​​​ពី​​​លក្ខខណ្ឌ​ពេល​​ធ្វើ​ការ​​​​រយៈពេល​​​ប្រាំបីខែ​​​​​នៅ​​​លើ​​​នាវា​​​ថា ពិត​​​ជា​​​លំបាក​​​ខ្លាំង​​​ណាស់​​​ ហើយ​​​មិន​​​​ទទួល​បាន​ប្រាក់​​​ខែ​​​ឡើយ​​​។

លោក​​​បាន​​​មាន​​​ប្រសាសន៍​​​ថា “ នៅ​​​ពេល​​​ពួកគេ​​​បាន​​​ទៅ​​​ដល់​​​ទូក​​​ ពួក​​​គេបាន​​​ធ្វើ​​​ការ​​​ប្រហែល​​​២០​​​ម៉ោង​​​ក្នុង​​​មួយ​​​ថ្ងៃ​​​ ហើយ​​​ពួក​​​គេ​​​មិន​​​ទទួល​​​បាន​​​អាហារ​​​គ្រប់​​​គ្រាន់​​​ឡើយ​​​។ ពួក​​​គេ​​​ក៏​​​ទទួល​​​រង​​​ការ​​​ធ្វើបាប​​​ ហើយ​​​មិន​​បាន​​​លុយ​​​សោះ​​​​។ លោក​​​បាន​​​បន្ថែម​​​ថា បុរស​​​ដែល​​​ត្រូវ​​​បាន​​​​បញ្ជូន​មក​វិញ​នោះ​​​​​​សុទ្ធ​​​តែ​​​បាន​​​រៀប​​​រាប់​​​ពី​​​លក្ខខណ្ឌ​​​ស្រដៀង​​​ៗ​​​គ្នា។

លោក ព្រីស្ដុន ​​​​លើកឡើង​​​ថា ការ​​​​​បញ្ជូន​​​​ពួកគេ​មក​វិញ​ពិត​​​ជា​​​លំបាក​​​ខ្លាំង​​​ណាស់​​​។ លោក​​​បាន​​​បន្ដ​​​ថា “ ប្រទេស​​​ទាំង​​​នេះ ជា​​​ប្រទេស​​​ដែល​​​គ្មាន​​​កិច្ច​​​សហប្រតិបត្តិការ​​​គ្មាន​​​ទំនាក់​​​ទំនង​​​ និង​​​គ្មាន​​​ការបង្កើត​​​ទំនាក់​​​ទំនង​​​មិត្ត​​​ភាព​​​ឡើយ​​​។ ហើយ​​​ការ​​​​ជួយ​​​សង្គ្រោះ​​​ពួក​​​គេ​​​ ជា​​​ធម្មតា​​​មាន​​​រយៈ​​​ពេល​​​បីថ្ងៃ​​ ពីព្រោះ​​​នាវា​​​របស់​​​បុរស​​​ដែល​​​ត្រូវ​​​បាន​​​គេ​​​ជួញ​​​ដូរ​​​បាន​​​ចេញ​​​ទៅ​​​សមុទ្រ​​​ម្ដង​​​ៗ​​​រយៈ​​​ពេល​​​ប្រាំបី​​​ខែ​​​៕

ប្រែសម្រួល​​​ដោយ ហម សុផាណ្ណា
និង​​​ ស៊ា ស៊ុយឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស