មន្ត្រីគណបក្សប្រជាជនមានប្រសាសន៍ថា នៅក្នុងការបន្តផ្លាស់ប្តូរតួនាទីមន្ត្រីគណបក្សប្រជាជនកម្ពុជាថ្នាក់ខេត្តដ៏មានអំណាចនៅមុនការបោះឆ្នោតជាតិខែកក្កដានេះ លោក ហ៊ុន ណេង អភិបាលខេត្តកពង់ចាម ដែលត្រូវជាបងប្រុសបង្កើតរបស់លោកនាយករដ្ឋន្ត្រី ហ៊ុន សែន នោះ បានលាលែងពីតំណែងរបស់លោកកាលពីម្សិលមិញ ដោយត្រូវជំនួសដោយលោក លន់ លឹមថៃ ដែលធ្លាប់ជាអភិបាលរងខេត្ត។
លោក ហ៊ុន ណេង បានចូលរួមជាមួយលោក ហ៊ុន ម៉ានី កូនប្រុសពៅរបស់លោក ហ៊ុន សែន ដើម្បីឈរឈ្មោះជាបេក្ខជនតំណាងរាស្ត្រគណបក្សកំពុងកាន់អំណាចសម្រាប់អាសនៈនៅក្នុងរដ្ឋសភា។
លោក លន់ លឹមថៃ មានប្រសាសន៍ថា“ ខ្ញុំត្រូវបានតែងតាំងជា អភិបាលខេត្តកំពង់ចាមថ្មីនៅព្រឹកនេះ ហើយឯកឧត្តម ហ៊ុន ណេងជាអភិបាលខេត្តចាស់នឹងក្លាយជាសមាជិកសភាមណ្ឌលកំពង់ចាម”។
លោក លន់ លឹមថៃ បានមានប្រសាសន៍ថា“ លោក ជឹម លាវ អនុប្រធានមន្ទីរផែនការខេត្ត និងលោកស្រី ស៊ី វ៉ាន់ថា អនុប្រធានរដ្ឋបាលខេត្តក៏ត្រូវបានតែងតាំងជាអភិបាលរងខេត្តផងដែរ”។
លោកបានបន្ថែមថា អភិបាលស្រុកថ្មីចំនួនបីរូបក៏ត្រូវបានតែងតាំងនៅក្នុងពិធីនោះផងដែរ។ ការផ្លាស់ប្តូរតួនាទីនេះ គឺជារឿងថ្មីបំផុតនៅក្នុងការផ្លាស់ប្តូរតួនាតី ដែលបានធ្វើឡើង កាលពីពេលថ្មីៗនេះ ដោយ គណបក្សប្រជាជនកម្ពុជា ដើម្បីផ្តល់ឱកាសដល់មន្ត្រីខេត្តឈរឈ្មោះជាសមាជិកសភាសម្រាប់អាណត្តិទី៥របស់រដ្ឋសភា។
សរុបមក អភិបាលខេត្ត-ក្រុងថ្មីៗមួយចំនួនត្រូវបានតែងតាំង នៅក្នុងរាជធានីភ្នំពេញ ខេត្តបន្ទាយមានជ័យ ឧត្តរមានជ័យ កណ្តាល កំពង់ធំ កំពង់ស្ពឺ មណ្ឌលគិរី ស្ទឹងត្រែង សៀមរាបនិងខេត្តកំពង់ចាម ដូច្នេះអតីតអភិបាលខេត្តទាំងនោះអាចឈរឈ្មោះជាបេក្ខជនតំណាងរាស្ត្រនៅក្នុងការបោះឆ្នោតបាន។
លោក សក់ សេដ្ឋា រដ្ឋលេខាធិការក្រសួងមហាផ្ទៃបានមានប្រសាសន៍ថា អ្នកដែលត្រូវបានតែងតាំងថ្មី គឺដើម្បីឲ្យកាន់តំណែងបន្តពីអ្នកជំនាន់មុនៗដែលបានបង្ហាញស្នាដៃរបស់ខ្លួនរួចហើយ។
លោកបានមានប្រសាសន៍ថា “ យើងបានតែងតាំងមន្ត្រីរបស់យើងជាសាធារណៈ យើងមិនបានផ្លាស់ប្តូរកូតាគណបក្សទេ”។
ប៉ុន្តែយោងតាមលោក ឡៅ ម៉ុងហៃ អ្នកវិភាគនយោបាយឯករាជ្យបានឲ្យដឹងថា ការផ្លាស់ប្តូរតួនាទីនេះទំនងជាមិនផ្លាស់ប្តូររបៀបធ្វើការ ដែលខេត្តធ្លាប់បានអនុវត្តឡើយ។
លោកមានប្រសាសន៍ថា “ ការតែងតាំងអភិបាលខេត្ត ឬអភិបាលក្រុងថ្មីៗទាំងនេះគ្រាន់តែជាការផ្លាស់ប្តូរថ្នាក់ដឹកនាំតែប៉ុណ្ណោះប៉ុន្តែកម្មវិធីនយោបាយនឹងនៅដដែលដូចពីមុនអ៊ីចឹង។ តួនាទីសំខាន់ៗភាគច្រើនដឹកនាំដោយគណបក្សប្រជាជនកម្ពុជា ដូច្នេះពួកគេតែងតាំងតែសមាជិករបស់ខ្លួនប៉ុណ្ណោះ”៕
ប្រែសម្រួលដោយ សោម សារុន