29 C
Phnom Penh

សាលា​ដំបូង​ខេត្ត​ព្រះសី​ហនុ​ចោទ​ប្រកាន់​ក្មេង​ស្រី​ម្នាក់​ ពី​បទ​ទូរស័ព្ទ​​​និយាយ​ភូត​កុហក តាម​​វិទ្យុ​អេប៊ីស៊ី

ដោយ ឌឹ ខេមបូឌា ដេលី

បទវិភាគ

មន្ត្រី​តុលាការ​បាន​ឲ្យ​ដឹង​កាល​ពី​ម្សិល​មិញ​​ថា សាលាដំបូង​ខេត្ត​ព្រះ​សី​​ហនុ​បាន​ចោទ​ប្រកាន់​ក្មេង​ស្រី​អាយុ​១៥​ឆ្នាំ​ម្នាក់​ ពី​បទ​និយាយភូត​កុហក​ កាល​ពី​ម្សិលមិញ​ បន្ទាប់​ពី​ក្មេង​ស្រី​នេះ​​បាន​​ហៅ​ទូរស័ព្ទ​ទៅ​ស្ថានីយ​វិទ្យុ​ដ៏​ល្បី​ឈ្មោះ​មួយ​ ដោយ​អះអាង​ថា នាង​ត្រូវ​បាន​គេ​ចាប់​ជំរិត​​​​ ហើយ​កល​ល្បិច​​នេះ​​នាំ​ឲ្យ​នគរបាល​​​​ស្វែង​រក​នាង​​អស់​រយៈ​ពេល​១៩​ម៉ោង​។

លោក រាម ច័ន្ទ​មុន្នី ព្រះ​រាជ​អាជ្ញា​រង​សាលា​ដំបូង​ខេត្ត​ បាន​មាន​ប្រសាសន៍​ថា សិស្ស​អនុ​វិទ្យា​ល័យ​អាយុ​១៥​ឆ្នាំ​ម្នាក់​នេះ បាន​ទូរស័ព្ទ​ទៅ​វិទ្យុ​អេប៊ីស៊ី (ABC) ១០៧.៥​ ដែលជា​ស្ថានីយ​វិទ្យុ​ភាសា​ខ្មែរ​ដ៏​ល្បី​ឈ្មោះ​ ដែល​​ផ្សព្វ​ផ្សាយ​ផ្ទាល់​​ពីបទ​ល្មើស​នានា​ និង​ការ​សង្គ្រោះ​​បន្ទាន់​។​​ កាល​ពី​ថ្ងៃ​អាទិត្យ​ នាង​បាន​ទូេស័ព្ទ​ទៅ​វិទ្យុ​នេះ​ដោយ​​និយាយ​ថា នាង​ត្រូវ​បា​ន​គេ​ចាប់​ជំរិត​​​​ ហើយ​ត្រូវ​ឃុំ​ខ្លួ​ន​ នៅ​កន្លែង​មួយ​ ក្នុង​ខេត្ត​ព្រះសីហនុ​។

លោក​ ច័ន្ទ​មុន្នី បាន​មាន​ប្រសាសន៍​ថា នាង​​ត្រូវ​បាន​ចាប់​ខ្លួន​ កាល​ពី​ថ្ងៃ​ច័ន្ទ និង​ត្រូវ​បាន​តុលាការ​​សាក​សួរ​កាល​ពី​ម្សិល​មិញ​។ លោក​ ច័ន្ទ​មុន្នី បាន​មាន​ប្រសាសន៍​បន្ដ​ថា  “ ក្មេង​ស្រី​នេះ​​បាន​សារភាព​ថា នាង​ក្លែង​បន្លំ​រឿង​មួយ​ថា នាង​ត្រូវ​បាន​ចាប់​ជំរិត​​​​ និង​ឃុំ​ខ្លួន​នៅ​ក្នុ​ង​ផ្ទះ​មួយ​ ក្នុង​ខេត្ត​ព្រះសីហនុ​”។ លោក​បន្ដ​​ថា “ ​ក្មេង​ស្រី​នេះ​ត្រូវ​បាន​ចោទ​​ប្រកាន់​ពី​បទ​និយាយ​ភូត​កុហក​”។

ទោះ​​​ជា​​​យ៉ាង​​​ណា​​​  លោក ច័ន្ទ​មុន្នី​​​​ ​ក៏​​​បាន​​​មាន​ប្រសាសន៍​ផង​​​ដែរ​​​ថា លោក​​សង្ឃឹម​​​​ថា ទោស​នេះ​នឹង​អាច​ស្រាល​ ព្រោះ​ក្មេង​​​ស្រី​នេះ​ គឺ​ជា​អនីតិជន​ ប៉ុន្ដែ លោ​ក​​មាន​​​ប្រសាសន៍​​​​ថា វា​អាស្រ័យ​លើ​ចៅក្រម​។លោក​​​​បាន​មាន​​​​ប្រសាសន៍​បន្ថែម​ថា “ យោង​តាម​ច្បាប់​ ការ​ចោទ​ប្រកាន់​របស់​នាង​អាច​មាន​ទោស​ពីរ​មួយ​ខែ ទៅ​ប្រាំឆ្នាំ​”។

លោក កុល ផល្លី នាយការិយាល័យ​នគរ​បាល​ព្រហ្មទណ្ឌ​ខេត្ត​ បាន​​មាន​ប្រសាសន៍​ថា បន្ទាប់​ពី​វិទ្យុ​អេប៊ីស៊ី​ប្រកាស​អំពី​ដំណឹង​ចាប់​ជំរិត​​​​ក្លែង​ក្លាយ​តាម​រលក​ធាតុអាកាស​នៅ​ម៉ោង​ប្រហែល​ប្រាំ​ល្ងាច​ថ្ងៃ​អាទិត្យ​នោះ​មក​ លោក​ នេត សាវឿន អគ្គ​ស្នង​ការ​នគរបាល​ជាតិ​ បាន​បញ្ជា​​ឲ្យ​មន្ត្រី​របស់​លោក​ស្វែង​រក​ក្មេង​ស្រី​នេះ​។

លោក​ ផល្លី មាន​ប្រសាសន៍​បន្ដ​ថា“ ​បន្ទាប់​​ពី​ការ​ស្វែង​រក​នាង​ទូទាំង​ក្រុង​ព្រះសី​ហនុ​​​អស់​រយៈ​ពេល​ប្រហែល​១៩​ម៉ោង​មក​ នៅ​​​ម៉ោង​ប្រហែល​១២ និង​៣០​នាទី​​ថ្ងៃ​ត្រង់​ កាល​ពី​ថ្ងៃ​ច័ន្ទ យើង​បាន​រក​ឃើញ​ក្មេង​ស្រី​នេះ កំពុង​លេង​ជាមួយ​នឹង​សាច់​ញាតិ​ នៅ​ផ្ទះ​មីង​របស់​នាង​​។

លោក​ ផល្្លី បាន​​​បដិសេធ​មិន​និយាយ​ថា តើ​នគរបាល​បាន​ទៅ​ដល់​ផ្ទះ​របស់​ក្មេង​ស្រី​នេះ​ នៅ​ពេល​ចាប់​ផ្ដើម​ស្វែង​រក​នាង​ ឬ​ក៏​ ថា​តើ​ពួក​គេ​បាន​សាកសួរ​គ្រួសារ​របស់​នាង​ដែរ​ ឬអត់នោះ​ទេ​។ លោក​បាន​​បន្ដ​ថា“ ការ​ស្វែង​​រក​ត្រូវ​បាន​ធ្វើ​ឡើង​ដោយ​ប្រើ​បច្ចេក​ទេស​របស់​​នគរបាល​”។

លោក​​បាន​មាន​ប្រសាសន៍​ថា អំឡុង​ពេល​​​សាក​សួរ​ ក្មេង​ស្រី​​នេះ​បាន​សារភាព​ថា​ អ្វី​ដែល​នាង​និយាយ​គឺ​ជា​រឿង​ភូត​កុហកទាំង​ អស់​ “ នាង​មិន​ស្មាន​ថា ​រឿង​​នោះ​​ទាក់​ទាញ​ការ​យក​ចិត្ត​ទុក​ដាក់​​​ពីសំណាក់​​នគរបាល​​ខ្លាំង​ដូច្នេះ​សោះ”។

លោក​ ផល្លី បាន​មាន​ប្រសាសន៍​បន្ថែម​ទៀត​ថា “ ខ្ញុំ​សំណូម​ពរ​​ឲ្យ​ប្រជា​ពល​រដ្ឋ​ទូ​ទាំង​ប្រទេស​កុំ​ក្លែងបន្លំ​រឿង​ ដែល​បណ្ដាល​ឲ្យ​ខូច​សណ្ដាប់​ធ្នាប់​សង្គម​ និង​ធ្វើ​ឲ្យ​នគរបាល​រវល់។ ការ​ក្លែង​បន្លំ​រឿង​បែប​នេះ គឺរំលោភ​​ច្បាប់ ហើយ​ជន​ល្មេើស​ត្រូវ​តែ​ទទួល​ខុសត្រូវ​ចំពោះ​មុខ​ច្បាប់”៕

ប្រែសម្រួល​ដោយ​​ ហម សុផាណ្ណា

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស