កាលពីថ្ងៃអង្គារ វិទ្យាស្ថានជាតិ ដើម្បីលទ្ធិប្រជាធិបតេយ្យ (NDI) ដែលមានមូលដ្ឋាននៅក្នុងទីក្រុងវ៉ាស៊ីនតោន បាននិយាយការពារលទ្ធផលសវនកម្មរបស់ខ្លួននាពេលថ្មីៗេនះលើបញ្ជីឈ្មោះបោះឆ្នោតសម្រាប់ការបោះឆ្នោតជាតិក្នុងខែកក្កដា និងបានប្រាប់គណៈកម្មាធិការជាតិរៀបចំការបោះឆ្នោតថា ខ្លួនមិនយល់សោះថា ហេតុអ្វីបានជាគេរិះគន់លទ្ធផលសវនកម្មរបស់ខ្លួន។
សវនកម្មដែលបានធ្វើឡើងនៅក្នុងខែមីនា ដោយវិទ្យាស្ថានជាតិ ដើម្បីលទ្ធិប្រជាធិបតេយ្យ គណៈកម្មាធិការអព្យាក្រឹត និងមិនលម្អៀងដើម្បីការបោះឆ្នោត ដោយសេរី និងយុត្តិធម៌ នៅកម្ពុជា (និកហ្វិច) និងមជ្ឈមណ្ឌល
សម្រាប់ការសិក្សាស្រាវជ្រាវជាន់ខ្ពស់បានរកឃើញថា អ្នកបោះឆ្នោតជាងមួយនាក់ក្នុងចំណោមអ្នកបោះឆ្នោត១០នាក់ដែលបានចុះឈ្មោះ នៅក្នុងប្រទេសកម្ពុជា គ្មានឈ្មោះនៅក្នុងបញ្ជី ហើយ៩ភាគរយនៃអ្នកមានឈ្មោះបោះឆ្នោតក្នុងបញ្ជីកាលពីលើកមុន ត្រូវបានគេលុបឈ្មោះចេញពីបញ្ជីដោយ
មិនត្រឹមត្រូវ។
បន្ទាប់ពីការចេញផ្សាយលទ្ធផលសវនកម្មនេះ គណៈកម្មាធិការជាតិរៀបចំការបោះឆ្នោត បាននិយាយថា លទ្ធផលនេះ “ គួរឲ្យសង្ស័យ និងអះអាងថា ខ្លួន “ ពុំមានទំនុកចិត្តលើសវនកម្មលើបញ្ជីឈ្មោះបោះឆ្នោតនេះទេ” ព្រោះសវនកម្មមួយផ្សេងទៀត ដែលបានធ្វើឡើងដោយគណៈកម្មាធិការ ដើម្បីការបោះឆ្នោតដោយសេរី និងយុត្តិធម៌ នៅកម្ពុជា (ខុមហ្វ្រែល) បានរកឃើញលទ្ធផលផ្សេងពីនេះ។
វិទ្យាស្ថានជាតិដើម្បីប្រជាធិបតេយ្យបានលើកឡើង នៅក្នុងសេចក្ដីថ្លែងការណ៍មួយកាលពីថ្ងៃអង្គារថា “ ខុមហ្វ្រែល និងវិទ្យាស្ថានជាតិដើម្បីប្រជាធិបតេយ្យ ព្រមទាំងនិកហ្វិច បានធ្វើការសិក្សាពីរផ្សេងគ្នា ដោយប្រើវិធីសាស្ត្រខុសគ្នា និងគណនាតាមរបៀបផ្សេងគ្នា ដូច្នេះទើបមានលទ្ធផលខុសគ្នា។
សេចក្ដីថ្លែងការណ៍េនះក៏បានលើកឡើងផងដែរថា ខណៈដែលវិទ្យាស្ថានជាតិដើម្បីប្រជាធិបតេយ្យបានធ្វើតេស្ត ដើម្បីចង់ដឹងថា តើមនុស្សដែលមានឈ្មោះនៅលើបញ្ជីឈ្មោះបោះឆ្នោតនោះមានពិតមែន ឬអត់នោះ ខុមហ្វ្រែលមិនបានធ្វើដូច្នេះទេ។
វិទ្យាស្ថានជាតិដើម្បីប្រជាធិបតេយ្យ បានលើកឡើងតាំងពីខែមីនាថា គណៈកម្មាធិការជាតិរៀបចំការបោះឆ្នោតទំនងជាមិនបានយល់អំពីវិធីសាស្ត្រដែលត្រូវបានប្រើប្រាស់សម្រាប់ប្រមូលទិន្នន័យអំពីបញ្ជីឈ្មោះបោះឆ្នោតទេ។
វិទ្យាស្ថាននេះបានបន្ដថា “ ការគណនានោះផ្អែកលើបទដ្ឋានដែលទទួលស្គាល់ជាអន្ដរជាតិ ដែលបង្កើតឡើងដោយស្ថាប័នគ្រប់គ្រងការបោះឆ្នោត”។
បញ្ហាតែមួយគត់ដែលការសិក្សាទាំងពីរបានគណនា គឺភាគរយនៃអ្នកបោះឆ្នោតដែលគិតថា ពួកគេបានចុះឈ្មោះបោះឆ្នោត ប៉ុន្ដែមិនបានឃើញឈ្មោះនៅក្នុងបញ្ជី។ វិទ្យាស្ថានជាតិដើម្បីប្រជាធិបតេយ្យបានលើកឡើងថា ហើយក្នុងករណីនេះ “ លទ្ធផលនៃការរកឃើញក៏បានគិតអំពីកម្រិតកំហុសខាងស្ថិតិដែរ”។
អ្វីដែលអ្នកសង្កេតការណ៍បោះឆ្នោតលើកឡើង គឺបញ្ជីឈ្មោះបោះឆ្នោតមានបញ្ហាដែលគណបក្សសង្គ្រោះជាតិបានអំពាវនាវសុំឲ្យធ្វើបញ្ជីឈ្មោះបោះឆ្នោតសាជាថ្មី និងសុំឲ្យពន្យារពេលការបោះឆ្នោតរហូតដល់ភាព
មិនប្រក្រតីទាំងអស់ត្រូវបានដោះស្រាយ។
យោងតាមបញ្ជីឈ្មោះបោះឆ្នោតផ្លូវការរបស់គណៈកម្មាធិការជាតិរៀបចំការបោះឆ្នោតបានឲ្យដឹងថា ការបោះឆ្នោតនឹងប្រព្រឹត្តទៅនៅថ្ងៃទី២៨ខែកក្កដា ហើយប្រជាពលរដ្ឋចំនួន៩,៦លាននាក់បានចុះឈ្មោះបោះឆ្នោត៕
ប្រែសម្រួលដោយ ហម សុផាណ្ណា