29 C
Phnom Penh

ភូមិ​ប្រមា ជា​ភូមិ​ដែល​​ធ្លាប់​មាន​បញ្ហា​​កន្លង​​មក ឥឡូវ​នេះ​​មាន​ជម្លោះ​ដី​ធ្លី​កើត​ឡើង​ទៀត​​ហើយ​

ដោយ ឌឹ ខេមបូឌា ដេលី

បទវិភាគ

ភូមិ​ប្រមា, ខេត្ត​ក្រចេះ-​មួយ​ឆ្នាំ​បន្ទាប់​ពី​មាន​ការ​ឆ្មក់​ចូល​ដោយ​ទាហាន​ទ្រង់​ទ្រាយ​ធំនៅ​ទីនេះ​ ដែល​បាន​បណ្ដាល​ឲ្យ​ក្មេង​ស្រី​អាយុ​១៤​ឆ្នាំ​ម្នាក់​ស្លាប់ និង​អ្នក​ភូមិ​រាប់​រយ​គ្រួសារ​ត្រូវ​បណ្ដេញ​ចេញ​ពី​ដី​ធ្លី​របស់​ខ្លួន​នោះ​​ នៅ​មាន​​​ស្លាក​ស្នាម​តិចតួច​​នៃ​ជម្លោះ​ដី​ធ្លី​​ដំបូង​ ដែល​បាន​ធ្វើ​ឲ្យ​ភូមិ​ដាច់​ស្រយាល​នេះ​ក្លាយ​ជា​កន្លែង​​គួរ​ឲ្យ​ភ័យ​ខ្លាច​។

ប៉ុន្ដែ ក្រុមហ៊ុន​ថ្មី​មួយ និង​​ដី​សម្បទាន​​សង្គម​កិច្ច​​​ដែល​​រដ្ឋាភិបាល​បានប្រគល់​ឲ្យ​អ្នក​ដែល​ត្រូវ​បណ្ដេញ​ចេញ​ផ្សេង​ៗ​ទៀត នៅ​ក្នុង​ខេត្ត​នេះ កំពុង​តែ​ធ្វើ​ឲ្យ​មាន​បញ្ហា​ថ្មី​ៗ​កើត​ឡើង​នៅ​ក្នុង​តំបន់​នេះ។ ប៉ុន្មាន​ខែ​មុន​ពេល​ទាហាន​ឆ្មក់​ចូល​ភូមិ​ប្រមា​ កាល​ពី​ថ្ងៃ​ទី​១៦ ខែ​ឧសភា ឆ្នាំ​២០១២ អ្នក​ភូមិ​រាប់​រយ​គ្រួសារ​បាន​តវ៉ា​ប្រឆាំង​នឹង​ក្រុមហ៊ុន​ចម្ការ​កៅស៊ូ​ក្នុង​ស្រុក​មួយ​ ដែល​គ្រប់​គ្រង​ដោយ​ក្រុមហ៊ុន​ឯកជន​ឈ្មោះ​ កាសូទីម ដោយសារ​តែ​​មាន​ការ​ចោទ​ប្រកាន់​ថា ក្រុមហ៊ុន​នេះ បាន​លុក​លុយ​ចូល​ដី​ស្រែ​របស់​ពួក​គាត់​។ អ្នក​ភូមិ​ទាំង​នេះ បាន​បិទ​ផ្លូវ​នៅ​ក្បែរ​នោះ​​ជា​ច្រើន​ដង​ ហើយ​​មាន​រយៈ​ពេល​តែ​ពីរខែ​មុន​ពេល​​មាន​ការ​​ដុត​ខ្ទម​មួយ​ដែល​ពួក​គាត់​បាន​ចោទ​ថា ​ក្រុមហ៊ុន​នេះ​​បាន​សាង​សង់​នៅ លើ​ដី​របស់​ពួក​គាត់​។

ដោយ​មាន​ការ​តវ៉ា​ពី​អ្នក​ភូមិ​ជា​ច្រើន​គ្រួសារ​ ដែល​ត្រូវ​គេ​បណ្ដេញ​ចេញជា​យូរ​មក​ហើយ​​ពី​ភូមិ​ប្រមានោះ​ ក្នុង​រយៈ​ពេល​ប៉ុន្មាន​ខែ​ ដែល​មាន​ការ​លំបាក​នេះ​ហាក់​
ដូច​ជា​​មិន​សូវ​មានការ​ចងចាំ​អ្វី​សោះ​​ អំឡុង​​ពេល​ចុះ​ទៅ​​ទី​នោះ​​ កាល​ពី​សប្ដាហ៍​មុន​ លើក​លែង​តែ​បន្ទាយ​​ទាហាន​ថ្មី​មួយ​​ស្ថិត​នៅ​ជាយ​​ទី​ប្រជុំ​ជន​​នោះ​ និង​ទាហាន​ប្លែក​ៗ​មុខជិះ​ម៉ូតូ​​ចល័ត​ចុះ​ឡើង​ នៅ​តាម​ផ្លូវ​​ដី​ធំ​នោះ។ តែ​ផ្ទុយ​ទៅ​វិញ​អ្នក​ភូមិ​នៅ​តំបន់​ដាច់​ស្រយាល​នេះ​ បាន​នាំ​គ្នា​កាប់​ដី​ទាំង​អត់​ធ្មត់​ ដើម្បី​ត្រៀម​ខ្លួន​សម្រាប់​រដូវ​បង្ក​បង្កើន​ផល​ថ្មី​មួយ​ទៀត​។

ប៉ុន្ដែ ជម្លោះ​ដី​ធ្លី​ចាស់​ៗ​កំពុង​ធ្វើ​ឲ្យ​ជម្លោះ​ដី​ធ្លី​ថ្មីកើត​ឡើង​នៅ​ទី​នេះ ដោយ​សារ​តែ​គម្រោង​របស់​ក្រុមហ៊ុន​កសិ​ឧស្សា​ហកម្ម​មួយ​ផ្សេង​ទៀត​ នៅ​ក្នុង​តំបន់​នេះ​ និង​ដោយ​សារ​តែ​រដ្ឋាភិបាល​ខ្លួន​ឯង​ផ្ទាល់​ចង់​ប្រែក្លាយ​ដី​ទំហំ​ជិត​១៩​.០០០​ហិកតា​ នៅ​​ជាយ​​ភូមិ​នេះ ឲ្យ​ទៅ​ជា​ដី​សម្បទាន​​សង្គម​កិច្ច​សម្រាប់​អ្នក​ភូមិ​ជា​ច្រើន​គ្រួសារ​នៅ​ទូទាំង​ខេត្ត​​េនះ​ រួម​ទាំង​អ្នក​គ្មាន​ដី​ធ្លី​ និង​គ្មាន​ទី​ជម្រក​ ដោយ​សារ​តែ​ជម្លោះ​ដី​ធ្លី​ផង​ដែរ។

អ្នក​ភូមិ​ដែល​នៅ​សេសសល់​នៅ​ក្នុង​ភូមិ​ប្រមា ​​លើក​ឡើង​ថា ដី​សម្បទាន​សេដ្ឋកិច្ច​​ទាំង​​ពី​រនេះ បាន​ចូល​ដល់​ដី​ស្រែ​របស់​ពួក​គាត់​។ លោក កាន សុវណ្ណ អ្នក​ភូមិ​ម្នាក់​ក្នុង​ចំណោម​អ្ន​ក​ភូមិ​១០​នាក់​ត្រូវ​បាន​ចាប់​ខ្លួន​​ ​នៅ​ថ្ងៃ​ឆ្មក់​ចូល​​កាល​ពី​ឆ្នាំ​២០១២នោះ និង​ត្រូវ​បាន​ផ្តន្ទា​ទោស​​ រួមជាមួយ​នឹង​លោក​ ម៉ម សូណង់ដូ ម្ចាស់​វិទ្យុ​សម្បុក​ឃ្មុំ ពី​បទ​ប៉ុន​ប៉ង​បង្កើត​ចលនា​អបគមន៍​ នៅ​ក្នុង​ភូមិ​ប្រមា​។

លោក​បាន​មាន​ប្រសាសន៍​ថា ដី​សម្បទាន​​សង្គម​កិច្ច​​ថ្មី​របស់​រដ្ឋាភិបាល​ ធ្វើ​ឲ្យប៉ះ​ពាល់​ដល់​ដី​ទំហំ​បួន​ហិកតា​ ដែល​គ្រួសារ​របស់​លោក​ធ្លាប់​ធ្វើ​ស្រែ​នៅ​ក្នុង​ភូមិ​ប្រមា​អស់​រយៈ​ពេល​ប្រាំបី​ឆ្នាំ​មក​ហើយ​នោះ​។ លោក​បាន​និយាយ​នៅ​ក្នុង​កិច្ច​សម្ភាស​មួយ​កាល​ពី​សប្ដាហ៍​មុន​​នៅ​ក្នុង​ភូមិ​របស់​លោក​ថា “ខ្ញុំ​សង្ឃឹម​ថា ខ្ញុំ​នៅ​តែ​អាច​ធ្វើ​ស្រែ​លើ​ដី​ទំហំ​បួន​ហិកតា​របស់​ខ្ញុំ​ ប៉ុន្ដែ ឥឡូវ​នេះ គេ​នឹង​ឈូស​​ឆាយ​យក​ដី​របស់​ខ្ញុំ​ហើយ​ ហើយ​ខ្ញុំ​គ្មាន​សង្ឃឹម​​ទេ ខ្ញុំ​មិន​ដឹង​ថា នឹង​ត្រូវ​ធ្វើដូច​ម្ដេច ដើម្បី​អាច​​រក​ប្រាក់​មក​ចិញ្ចឹម​គ្រួសារ​របស់​ខ្ញុំ​​បាន​ឡើយ”​​​។

លោក​បន្ថែម​ថា មិន​ដូច​អ្នក​ភូមិ​ជា​ច្រើន​ទៀត​នៅ​ក្នុង​ភូមិ​ប្រមា​ទេ លោក​មិន​​បាន​ឆ្លើយ​ដាក់​លោក ម៉ម សូណង់ដូ នៅ​ក្នុង​រឿង​បង្កើត​ចលនា​អបគមន៍​ដែល​ត្រូវ​បាន​គេ​ចោទ​នេះទេ​​ ហើយ​អង្គការ​សិទ្ធិ​មនុស្ស​បាន​ចាត់​ទុក​រឿង​នេះ​​ថា ជា​រឿង​ប្រឌិតឡើង​​ ដើម្បី​បិទ​បាំង​ការ​បណ្ដេញ​អ្នក​ភូមិ​ចេញ​ពី​ដី​​នេះ​ ហើយ​លោក​ត្រូវ​សាលា​រាជ​ធានី​ភ្នំពេញ​​​ផ្ដន្ទាទោស​ឲ្យ​ជាប់​​ពន្ធនាគារ​រយៈ​ពេល​បី​ឆ្នាំ​ កាល​ពី​ថ្ងៃ​ទី​១ ខែ​តុលា។

ទោះ​ជា​សាលាឧទ្ធរណ៍​ដោះ​លែង​លោកម៉ម សូណង់ដូ​ លោក កាន សុវណ្ណ និង​បុរស​ពីរ​នាក់​ផ្សេង​ទៀត នៅ​ក្នុង​ភូមិ​ប្រមា កាល​ពី​ខែ​មីនា​ក៏​ដោយ ក៏​លោក​ កាន សុវណ្ណ ដែល​បដិសេធ​ថា មិន​ជាប់​ពាក់​ព័ន្ធ​នៅ​ក្នុង​ចលនា​​អបគមន៍ ឬ​នៅ​ក្នុង​ជម្លោះ​ដី​ធ្លី​ជា​មួយ​ក្រុម​ហ៊ុន​កាសូទីម​នោះ​ ឥឡូវ​នេះ​កំពុង​តែ​ប្រយុទ្ធ​​ប្រឆាំង​ ដើម្បី​ដី​ស្រែ​របស់​​គាត់​ដែរ​​។

ចាប់​តាំង​ពី​គ្រឿង​ចក្រ​ឈូស​ឆាយ​ដី​ពីរ​គ្រឿង​ បាន​មក​ដល់​ទីនេះ កាល​ពី​ពីរ​សប្ដាហ៍​​មុន​ ហើយ​បាន​ចាប់​ផ្ដើ​ម​ឈូស​ឆាយ​ដី​ព្រៃ​ខ្លះ​ៗ​នៅ​ក្បែរ​នោះ លោក កាន សុវណ្ណ និង​អ្នក​ភូមិ​ប្រមាណ​៥០​នាក់​ផ្សេង​ទៀត បាន​តវ៉ា​នៅ​​ពេល​ព្រឹកព្រលឹម ស្ទើររៀង​​រាល់​ថ្ងៃ​​ នៅ​ក្នុង​ភូមិ​នេះ។ ក្រុម​អ្នក​បើក​គ្រឿង​ចក្រ​ឈូស​ឆាយ​ បាន​បោះ​ជំរំ​តូច​មួយ​ចម្ងាយ​ពីរ​គីឡូម៉ែត្រ ពី​ផ្លូវ​​ដីដ៏​ធំនោះ​។ ហើយ​ពេល​ទៅ​បំពេញ​ទស្សនកិច្ច​ កាល​ពី​ថ្ងៃ​ពុធ​ អំឡុង​ពេល​ថ្ងៃ​ត្រង់​ ដែលមាន​​ពពក​​ហោះហើរ​យឺត​ៗ អ្នក​បើក​គ្រឿង​ចក្រ​ឈូស​ឆាយ​ប្រហែល​ប្រាំមួយ​នាក់​បាន​ចំណាយ​​ពេល​ឥត​ប្រយោជន៍​ដោយ​នាំ​គ្នា​លេង​បៀ នៅ​ក្រោម​តង់​តូច​មួយ​។

​​ស្លៀក​ពាក់​ក្នុង​ឯកសណ្ឋាន​អាវ​ពណ៌​គគី និង​ខោ​ទាហាន​ប៉ារ៉ា​នោះ​ គឺ​​មេដឹក​នាំ​ក្រុម​ឈ្មោះ​ ចាន់ គង់ មន្ត្រី​បច្ចេកទេស​របស់​មន្ទីរ​នគរូបនីយកម្មដែនដី និង​សំណង់​
ខេត្ត​ក្រចេះ​។ លោក ចាន់ គង់ បាន​មាន​ប្រសាសន៍​ថា រដ្ឋា​ភិបាល​មាន​ផែន​ការ​កាប់​រាន​ដី​ទំហំ​១៨​.៨៣៨​​ហិកតា​ ហើយ​នាំ​អ្នក​ភូមិ​ចំនួន​៣.០០០​​គ្រួសារ​ដែល​គ្មាន​ទី​លំនៅ​ដោយ​សារ​ជម្លោះដី​ធ្លី​​ផ្សេងៗ​ នៅទូទាំង​ខេត្ត​ឲ្យ​មក​រស់​នៅ​ក្នុង​ដី​ដែល​កាប់​រាន​នេះ​។

លោក​បាន​ច្រាន​ចោល​ការ​អះអាង​របស់​អ្នក​ភូ​មិ​ជា​ច្រើន​គ្រួសារ​ដែល​ថា ដី​សម្បទាន​នេះ បាន​ប៉ះពាល់​ដល់​ដី​ស្រែ​ជាយូរ​មក​ហើយ​របស់​អ្នក​ភូមិ​ ហើយ​បា​​ន​មាន​ប្រសាសន៍​ថា ការ​អះអាង​ទាំង​នោះ គឺ​គ្រាន់​តែ​ជា​ការ​ឆ្លៀត​ឱកាស​ ដើម្បី​ចាប់​យក​ដី​ធ្លី ដែល​ខ្លួន​ម​ិន​ធ្លាប់​បាន​ធ្វើ​ស្រែ​ពី​មុន​មក​​ប៉ុណ្ណោះ។ លោក​​លើក​ឡើង​ថា “ លោក​បាន​ឃើញ​ផ្ទាល់​​ភ្នែក​ហើយ​។ តើ​អ្នក​ភូមិ​ទាំង​នេះ​មើល​ទៅ​ដូចជា​អ្នក​​ដែល​ធ្លាប់​រស់​នៅ​ទី​នេះ​អស់​រយៈ​ពេល​ប្រាំបី​ឆ្នាំ​មក​ហើយ​ដែរ​ឬទេ​? ដោយ​សំឡឹង​មើល​ទៅ​កាន់​ដី​ដែល​កាប់​រាន​ លោក​បាន​មាន​ប្រសាសន៍​ថា “ ​ខ្ញុំ​បាន​ពន្យល់​ទៅ​អ្នក​ភូមិ​ទាំង​អស់​​នេះ ប៉ុន្ដែ​ពួក​គាត់​មិន​យល់​ពី​អ្វី​ដែល​ខ្ញុំ​បាន​ពន្យល់​ឡើយ”។

លោក ចាន់ គង់ បាន​មាន​ប្រសាសន៍​ថា លោក​បាន​ដោះ​ស្រាយ​ជាមួយ​អ្នក​តវ៉ា​មួយ​ចំនួន​ ដែល​​ប្រដាប់​ដោយ​ពូថៅ និង​កាំបិត​រួច​ហើយ​ ហើយបាន​លើកឡើងថា ពួក​គេ​ជា​​​មនុស្សប្រមឹក​។ ​ទោះ​បី​ជា​គ្រឿង​ចក្រ​ឈូស​ឆាយ​ទាំង​នេះ មិន​ទាន់​បាន​ឈូស​ឆាយ​ដល់​ដី​ទំហំ​បួន​ហិក​តា​របស់​លោក កាន សុវណ្ណ ដែល​នៅ​ក្បែរ​នោះ​ក្ដី​ តែ​ប្រពន្ធ​របស់​លោកឈ្មោះ ស្រេង ផូ បាន​និយាយ​ថា អាជ្ញាធរ​មូល​ដ្ឋាន​មិន​បាន​អនុញ្ញាត​ឲ្យ​ពួក​គេ​ធ្វើ​ស្រែ​លើ​ដី​នេះ ចាប់​តាំង​ពី​មាន​ការ​ឆ្មក់​ចូល​ កាល​ពី​ឆ្នាំ​មុន
​មក​ម្លេ៉ះ​។

អ្នកស្រី​ ស្រេង​ ផូ​ បាននិយា​យពេល​កំពុង​ឈរ​នៅក្បែរ​ស្រែរបស់ខ្លួនថា​ “ ខ្ញុំនៅតែ​ព្រួយ​បារម្ភ​ ពីព្រោះ​សម្បីតែ​ដីរបស់ខ្ញុំ​នៅ​ទីនេះ ក៏គេមិន​អនុញ្ញាតឲ្យ​ខ្ញុំ​ធ្វើស្រែដែរ​។​ ខ្ញុំព្រួយបារម្ភ​ខ្លាចគេ​យក​ដី​របស់ខ្ញុំ​នៅ​ពេល​អានាគត”។ ពេល​ទាក់ទង​តាម​រយៈទូរស័ព្ទ​ លោក​មេភូមិ​ ជា ជិន​ បានលើកឡើងថា​ នៅ​មាន​ដីស្រែ​ច្រើនជាងនេះ​ទៀត​ កំពុង​ជួប​បញ្ហា​។​លោកបាន​​​មាន​ប្រសាស​ន៍ថា​ បងប្អូន​ខ្មែរ​អុីស្លាម​ជាច្រើន​គ្រួសារ​​ដែល​រដ្ឋាភិបាល​បាន​បញ្ជូន​ឲ្យ​​ទៅរស់នៅក្នុង​ដីសម្បទាន​សង្គម
​កិច្ច​​នៅ​ក្នុង​ភូមិនេះ​​ បាន​កាប់រានដីព្រៃទំហំ​៥៨០​ហិកតា​ ដែល​រដ្ឋាភិបាល​បាន​អនុម័ត​ជាព្រៃ​សហគមន៍​នៅក្នុង​ភូមិនេះ​​ និងជាព្រៃ​ដែល​អ្នក​ភូមិ​ចំនួន​៦០០គ្រួសារ​ពឹងផ្នែក​និង​​​អាស្រ័យ​​​ផល​​​លើនោះ​។​

លោក​លើកឡើងថា “ យើង​បាន​ប្រមែ​​ប្រមូល​អ្នក​ភូមិ​ចំនួន​៥០នាក់​ ទៅទីនោះ​ដើម្បីបញ្ឈប់​បង​ប្អូន​ខ្មែរ​អុីស្លាមកុំឲ្យយក​ពូថៅ​និង​កាំា​បិត​កាប់រាន​ព្រៃតទៅទៀត​”។
ពេល​ទាក់ទង​​កាលពីម្សិលមិញ​ លោក សម សារិទ្ធ​ អភិបាល​ស្រុក​ បាន​អះអាង​ថា ​បងប្អូន​ខ្មែរ​អុីស្លាម​ ជិត​១.០០០គ្រួសារ​មកពី​កន្លែង​ផ្សេង​ៗ​ក្នុង​ខេត្ត​នេះ​ ត្រូវបាន​បញ្ជូន​ទៅ​​តំបន់នោះ​ដើម្បី​​​ឲ្យ​កាន់​កាប់​ដី​នៅក្នុង​ដីសម្បទានសង្គម​កិច្ច​ថ្មីនេះ​”។​

លោក សារិទ្ធ​ បានមាន​ប្រសាសន៍ថា​លោក​បាន​​ចុះ​ទៅ​ភូម​ិ​​នេះ​ដើម្បី​ជួប​​ជាមួយ​អ្នក​ភូមិ​ដែលកំពុង​មានបញ្ហា​ដោយ​ផ្ទាល់​ ប៉ុន្តែលោក បាន​បដិសេធ​មិនធ្វើ​អត្ថាធិប្បាយ​បន្តឡើយ​។​ លោក​មេភូមិបាន​លើកឡើងថា អ្នកភូមិ​ចំនួន​៧៤គ្រួសារ​ផ្សេងទៀត​ក៏បាន​ចោទ​ប្រកាន់​ក្រុម​​ហ៊ុន​ចម្ការ​កៅស៊ូថ្មី​ថា បាន​លុក​លុយ​ចូល​ដីរបស់​ពួកគាត់​នៅក្នុង​តំបន់​នេះ​ផងដែរ។​

លោក ចាន់ គង់​ អ្នកដឹក​នាំ​ក្រុម​កាប់រាន​ព្រៃ​នៅក្នុងដី​សម្បទានសង្គមកិច្ច​នេះ​ បាន​លើកឡើងថា​ លោកមិនបានដឹង​អំពី​ជម្លោះ​នេះទេ ប៉ុន្តែលោកបាន​បញ្ជាក់​ថា មាន​ដី​សម្បទាន​ទំហំ​៥.០០០ហិកតា​ នៅក្នុង​តំបន់​នេះ ត្រូវបាន​កាប់រាន​ដើម្បី​ដាំកៅស៊ូ៕

ប្រែសម្រួល​ដោយ ស៊ា ស៊ុយឈាង​​  ​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស