លោក សុរិយា ស៊ូបេឌី (Surya Subedi) បេសកជនសិទ្ធិមនុស្សរបស់អង្គការសហប្រជាជាតិ បានជួបជាមួយលោក ឈាង វុន តំណាងរាស្ត្រមកពីគណបក្សប្រជាជនកម្ពុជានៅរដ្ឋសភា កាលពីម្សិលមិញ ហើយត្រូវបានប្រាប់ថា លោកនឹងបានទទួលការអនុញ្ញាតឲ្យជួបជាមួយលោកនាយករដ្ឋមន្ត្រី ហ៊ុន សែន អំឡុងដំណើរទស្សនកិច្ចបច្ចុប្បន្ន និងជាលើកទី៩ របស់លោកមកកាន់ប្រទេសកម្ពុជា ។
អំឡុងដំណើរទស្សនកិច្ចរបស់លោក សុរិយា ស៊ូបេឌី កាលពីខែធ្នូឆ្នាំមុន គ្មានមន្ត្រីរដ្ឋាភិបាលណាម្នាក់អនុញ្ញាតឲ្យលោកជួបតាម
សំណើទេ ខណៈលោក ហ៊ុន សែន ប្រកាសថា លោកគ្មានពេលទទួលដំបូន្មានពី “ ជនបរទេស” ឡើយ។ នេះគឺជាសញ្ញាបង្ហាញពីទំនាក់ទំនងប្រេះស្រាំរវាងរដ្ឋាភិបាល និងបេសកជនរូបនេះ។
អំឡុងជំនួបជាមួយលោក ឈាង វុន កាលពីម្សិលមិញ លោក សុរិយា ស៊ូបេឌី បានចាប់ផ្ដើមកិច្ចពិភាក្សា ដោយលើកឡើងថា លោកកោតសរសើរ “ ភាពជាអ្នកដឹកនាំរបស់[លោកហ៊ុន សែន] ដែលបានជួយឲ្យប្រទេសនេះទទួលបាន និងរក្សាបាននូវស្ថិរភាពនយោបាយ”។
លោក ឈាង វុន មានប្រសាសន៍តបថា“ ខ្ញុំសូមអបអរសាទរលោក ព្រោះពេលនេះសម្តេចនាយករដ្ឋមន្ត្រីនៃព្រះរាជាណាចក្រកម្ពុជានឹងជួបជាមួយលោកតាមសំណើ។ លើកនេះ លោកអាចជួបសម្តេចនាយករដ្ឋមន្ត្រីបានហើយ។ សម្តេចនឹងជួបលោកពេល
ត្រឡប់មកពីបរទេសវិញ”។
បញ្ហាដែលលោក សុរិយា ស៊ូបេឌី មានចំណាប់អារម្មណ៍ក្នុងការដោះស្រាយ អំឡុងទស្សនកិច្ចរបស់លោកនាពេលនេះ គឺពាក់ព័ន្ធ
នឹងការកែទម្រង់ប្រព័ន្ធតុលាការ ការបោះឆ្នោតនិងសភា ព្រមទាំងផលប៉ះពាល់នៃសម្បទានដីសេដ្ឋកិច្ចលើសិទ្ធិរបស់ប្រជាពលរដ្ឋ។
នៅក្នុងរបាយការណ៍ឆ្នាំ២០១១ លោក សុរិយា ស៊ូបេឌី បានសម្ដែងការព្រួយបារម្ភថា រដ្ឋសភា “ កំពុងធ្លាក់ចុះ” ពីកន្លែងដែលមានប្រសិទ្ធភាពសម្រាប់ការពិភាក្សាដេញដោល ដោយគណបក្សប្រឆាំង និងគណបក្សតូចៗត្រូវបានចាត់ទុកជាសត្រូវរបស់រដ្ឋាភិបាល ជាជាង “ ដៃគូនយោបាយដែលមានទស្សនខុសគ្នា”។
កាលពីម្សិលមិញ លោក ឈាង វុន បានប្រាប់លោក សុរិយា ស៊ូបេឌី ថា តំណាងរាស្ត្រគណបក្សប្រឆាំងត្រូវបានស្វាគមន៍ឲ្យចូលរួមក្នុងក្រុមការងារផ្សេងៗ និងគណៈកម្មការសភា ប៉ុន្តែពួកគេបានបដិសេធមិនចូលរួមក្នុងអាណត្តិចុងក្រោយដែលបានបញ្ចប់កាលពីថ្ងៃទី១០ ខែឧសភា។
លោក ឈាង វុន ថ្លែងថា“ ខ្ញុំសោកស្តាយណាស់ដែលគណបក្សប្រឆាំងបានបដិសេធមិនចូលរួមក្នុងគណៈកម្មការនានានៃរដ្ឋសភា” ដោយបន្ថែមថាលោកក៏សោកស្តាយណាស់ដែរ ដែលលោក សុរិយា ស៊ូបេឌី ពុំមានឱកាសបានឃើញសកម្មភាពរបស់តំណាងរាស្ត្រ អំឡុងទស្សនកិច្ចរបស់លោក។
លោកស្រី មូរ សុខហួរ តំណាងរាស្ត្រគណបក្ស សម រង្ស៊ី មានប្រសាសន៍ថា គណបក្សប្រឆាំងបានបដិសេធមិនទទួលយកសមាជិកភាពក្នុងជួរគណៈកម្មការសភា ដោយសារតែសំណើរបស់ខ្លួនសុំធ្វើជាប្រធានគណៈកម្មការមួយក្នុងចំណោមគណៈកម្មការទាំងប្រាំបួនរបស់រដ្ឋសភាត្រូវបានបដិសេធ។
លោក សុរិយា ស៊ូបេឌី និងលោក ឈាង វុន ក៏បានពិភាក្សាអំពីច្បាប់រដ្ឋធម្មនុញ្ញស្តីពីការតម្រូវឲ្យមានការរៀបចំសមាជជាតិប្រចាំឆ្នាំរៀងរាល់ខែធ្នូ ដែលមានព្រះមហាក្សត្រជាព្រះប្រធាន និងដែល “ ផ្តល់លទ្ធភាពឲ្យប្រជាពលរដ្ឋបានជ្រាបអំពីបញ្ហាផ្សេងៗពាក់ព័ន្ធនឹងផលប្រយោជន៍ជាតិ និងពាំនាំបញ្ហានិងសំណើជូនរដ្ឋាភិបាលដោះស្រាយ”។
សមាជជាតិមិនដែលត្រូវបានរៀបចំទេ ហើយរដ្ឋាភិបាលបានបញ្ជាក់ថា ខ្លួនមិនឃើញមានសារៈប្រយោជន៍ក្នុងការរៀបចំសមាជនេះឡើយ និងកំពុងមានបំណងធ្វើវិសោធនកម្មរដ្ឋធម្មនុញ្ញដើម្បីកុំឲ្យមានការតម្រូវបែបនេះទៀត។
លោក សុរិយា ស៊ូបេឌី បានប្រាប់លោក ឈាង វុន ថា “ លោកបានផ្ដល់ឲ្យខ្ញុំនូវទស្សនវិស័យយ៉ាងល្អពាក់ព័ន្ធនឹងមូលហេតុដែលសមាជជាតិត្រូវបានបញ្ចូលក្នុងរដ្ឋធម្មនុញ្ញ”។ លោកបានបន្ថែមថា“ កម្ពុជាគឺជាប្រទេសមានអធិបតេយ្យភាព ហើយរដ្ឋសភាមានអំណាចអធិបតេយ្យរបស់ខ្លួន ហើយប្រសិនបើរដ្ឋសភាសម្រេចថា ធ្វើវិសោធនកម្មរដ្ឋធម្មនុញ្ញនោះ ខ្ញុំនឹងទទួលយក”៕
ប្រែសម្រួលដោយ ហម សុផាណ្ណា