លោក ឱម យ៉ិនទៀង ថា ​ប្រេសិត ​​​​​ពិសេស អ.ស.ប. យល់​​​ខុស​ពី​ស្ថាន​ភាព​សិទ្ធិមនុស្ស​នៅ​កម្ពុជា​​​

លោក ឱម យ៉ិនទៀង ប្រធា​​ន​​​គណៈ​កម្មា​ធិការ​​​សិទ្ធិ​​​មនុស្ស​​​របស់​​​រដ្ឋាភិបាល​​​ បាន​​​មាន​​​ប្រសាសន៍​​​កាល​​​ពី​​​ម្សិលមិញ​​​ថា លោក ​សុរិយា
ស៊ូបេឌី (Surya Subedi) ប្រេសិត​​​ពិសេស​​​អង្គការសហ​​​ប្រជាជាតិ​​​ទទួល​​​បន្ទុក​​​សិទ្ធិ​​​មនុស្ស​​​​​មិន​បាន​ដឹង​គ្រប់​ជ្រុង​ជ្រោយ​​អំពី​​ស្ថាន​ភាព​សិទ្ធិ​​​មនុស្ស​​​​នៅ​ប្រទេស​​​កម្ពុជា​​​ទេ ហើយ​​​បាន​​​ប្រើ​​​ឈ្មោះ​​​អង្គការ​​​សហប្រជាជាតិ​​​ ដើម្បី​​​បន្ដ​​​របៀប​​​វារៈ​​​ផ្ទាល់​​​ខ្លួន​​​របស់​​​លោក​​​។

ថ្លែង​​​ទៅ​​​កាន់​​​អ្នក​​​យក​​​ព័ត៌មាន​​​បន្ទាប់​​​ពី​​​កិច្ច​​​ពិភាក្សា​​​រយៈ​​​ពេល​​​ពីរម៉ោង​​​ជាមួយ​​​លោក ​សុរិយា ស៊ូបេឌី នៅ​​​ឯ​​​ទីស្ដីការ​​​គណៈ​​​រដ្ឋ​​​មន្ត្រី​​​លោក ឱម យ៉ិនទៀង​​​ បាន​​​មាន​​​ប្រសាសន៍​​​ថាលោក​​​បាន​​​​ជំរុញ​ឲ្យ​​​ប្រេសិត​​​ពិសេស ​​​ដែល​​​កំពុង​​​បំពេញ​​​បេសកកម្ម​​​លើក​​​ទី​​​៩​​​របស់​​​ខ្លួន​​​ក្នុង​​​គោល​​​បំណង​​​ស្វែង​​​រក​​​ការពិត​​​​​​ស្ដី​​​ពី​​​សិទ្ធិ​​​មនុស្ស​​​ នៅ​​​ក្នុង​​​ប្រទេស​​​កម្ពុជា​​​ បើក​​​ភ្នែក​​ និង​​​ត្រចៀក​​​​របស់​​​លោក​​​​​​​​​​ផង​ កុំ​បើក​​​​​​តែ​​​មាត់​ នៅ​​​ពេល​​​វាយ​​​តម្លៃ​​​ពី​​​​ស្ថាន​ភាព​សិទ្ធិ​​​មនុស្ស​​​ក្នុង​​​ប្រទេស​​​កម្ពុជា​​​។

លោក ឱម យ៉ិនទៀង ទំនង​ជា​បាន​​​មាន​​​ប្រសាសន៍​​​សំដៅ​​​ទៅ​​​លើ​​​ប្រេសិត​​​ពិសេស​​​រូប​​​នេះ​​​ថា “ អង្គការ​សហប្រជាជាតិ​​​​​មាន​​​យន្ដការ​​​ផ្ទាល់​​​ខ្លួន ប៉ុន្ដែ ខ្ញុំ​​​ខ្លាច​​​ក្រែង​​​ថា បុគ្គល​​​មួយ​​​រូប​​​កំពុង​​​តែ​​​ប្រើ​​​ឈ្មោះ​​​របស់​​​អង្គការ​​​សហប្រជាជាតិ​​​ ដើម្បី​​​ធ្វើ​​​អ្វី​​​ដែល​​​ខុស​​​”។ លោក​​​បាន​​​មាន​​​ប្រសាសន៍​​​ថា “ លោក ​សុរិយា​​​ ស៊ូបេឌី បាន​​​លើក​​​ឡើង​​​ថា ការ​​​ផ្ដល់​​​យោបល់​​​របស់​​​លោក​​​គ្មាន​​​បំណង​​​បង្ខំ​​​​ឲ្យ​ធ្វើ​អ្វី​​​នោះ​​​ទេ រដ្ឋាភិបាល​​​អាច​​​ទទួល​​​យក​​​ ឬក៏​​​មិន​​​ទទួល​​​យក​​​ក៏​​​ស្រេច​​​តែ​​​ចិត្ត​​​។ មាត់​​​របស់​​​លោក​​​និយាយ​​​ថា ដូច្នេះ​​​ ប៉ុន្ដែ​​​សកម្មភាព​​​របស់​​​លោក​​​វិញ​​​ គឺ​​​គាប​​​សង្កត់​​​ [រដ្ឋាភិបាល]។

លោក ឱម យុិនទៀង បាន​​​លើក​​​ឡើង​​​ថា​គណៈ​​​កម្មាធិការ​​​សិទ្ធិ​​​មនុស្ស​​​របស់​​​លោក​​​ បាន​​​បញ្ជូន​​​របាយការណ៍​​​ពាក់​​​កណ្ដាល​​​អាណត្តិ​​​ទៅ​​​ឲ្យ​​​ក្រុម​​​ប្រឹក្សា​​​សិទ្ធិ​​​មនុស្ស​​​អង្គការ​​​សហ​ប្រជា​ជាតិ នៅ​​​ក្នុង​​​ទីក្រុង​​​ហ្សឺណែវ​​​កាល​​​ពី​​​ឆ្នាំ​​​មុន​​​ដោយ​​​រៀប​​​រាប់​​​ពី​​​ការ​​​វិវឌ្ឍ​​​​ដែល​​​​ប្រទេស​​​កម្ពុជា​​​សម្រេច​បាន​តាម​​​អនុសាសន៍​​​​​​ចំនួន​​​៩១​​​​ចំណុច​ស្តី​ពី​សិទ្ធិមនុស្ស​​​​​​​ ដែល​​​ប្រទេស​​​កម្ពុជា​បាន​​​​​​ទទួល​​​យក​​​កាល​​​ពី​​​ឆ្នាំ​​​២០០៩​​​។

ទោះ​​​ជាយ៉ាង​​​ណា ​​​លោក ឱម យ៉ិន​​​ទៀង​​​​​​មាន​​​ប្រសាសន៍​​​ថា លោក សុរិយា​ ស៊ូបេឌី មិន​​​បាន​​​​​ចំណាយ​​​ពេល​​​អាន​​​របាយការណ៍​​​នេះ​​​ឡើយ​​​ ហេតុ​​​ដូច្នេះ​​​ហើយ​​​លោក​​​ទំនង​​​ជា​​​លើក​​​ឡើង​​​ម្ដង​​​ទៀត​​​ពាក់​​ព័ន្ធ​​​នឹង​​​អនុសាសន៍​​​សិទ្ធិ​​​មនុស្ស​​​ នៅ​​​ពេល​​​លោក​​​ធ្វើ​​​របាយការណ៍​​​លើក​​​ក្រោយ​​​។

លោក ឱម យ៉ិនទៀង បាន​​​បន្ដ​​​ថា “ ខ្ញុំ​​​បាន​​​ប្រាប់​​​គាត់​ថា ដោយ​​​ផ្អែក​​​លើ​​​របាយការណ៍​​​ស្ដីពី​​​​អនុសាសន៍​​​របស់​​​គាត់​​​​ វា​​​បាន​​​បញ្ជាក់​​​ឲ្យ​​​ឃើញ​​​ថា គាត់​មិន​​​បាន​​​អាន​​​របាយការណ៍​​​ឆ្លើយ​​​​តប​​​របស់​​​យើង​​​ ដែល​​​បាន​​​បញ្ជូន​​​ទៅ​​​ឲ្យ​​​​គាត់​​​​ឡើយ​​​។ របាយការណ៍​​​ដែល​​​យើង​​​បាន​​​ធ្វើ​​​កាល​​​ពី​​​ឆ្នាំ​​​២០១២​​​ ស្ដី​​​ពី​​​សិទ្ធិ​​​មនុស្ស​​​ គាត់​​​​មិន​​​បាន​​​អាន​​​សូម្បី​​​តែមួយ​​​បន្ទាត់​​​​​​ឡើយ​​​”។

លោក​​​បាន​​​មាន​​​ប្រសាសន៍​​​ថា “ ​​​បឹង​​​កក់​​​ ដី​​​សម្បទាន​​​ ការ​​​បោះ​​​ឆ្នោត​​​ និង​​​តុលាការ​​​យើង​​​បាន​​​សរសេរ​​​របាយ​​​ការណ៍​​​​នោះ​មួយ​​​ចំណុច​ម្តង​​​​ៗ​​​ ប៉ុន្ដែ គាត់​បាន​​​សួរ​​​សំណួរ​​​ដដែល​​​ៗ ​ដែល​​​​មាន​​​ន័យ​​​ថា គាត់​មិន​​​បាន​​​អាន​​​មួយ​​​ទំព័រ​​​ ឬក៏​​​មួយ​​​បន្ទាត់​​​ណាឡើយ​​​”។ លោក​​​​​​បន្ត​ថា នៅ​​​ថ្ងៃ​​​នេះគាត់​​​​បាន​​​​​សុំ​​​របាយ​​ការណ៍​នោះ​ពី​ខ្ញុំ​មួយ​​​​​​ច្បាប់​​​ដែលមាន​​​ន័យ​​​ថាគាត់​​​​មិន​​​បាន​​​ទទួល​​​របាយ​​​ការណ៍​​​នោះ​​​ទេ​​​”។

លោក​​​ សុរិយា ស៊ូបេឌី ជា​​​ប្រេសិត​​​​​​ពិសេស​​​​ទី៣​​​របស់​​​អង្គការ​​​សហប្រជាជាតិ និង​​​យ៉ាង​​​ហោច​​​ណាស់​​​ក៏​​​ជា​​​មន្ត្រី​​​សិទ្ធិ​​​មនុស្ស​​​របស់​​​អង្គការ​​​សហប្រជាជាតិ​​​​​ទី​​​៤​​​ ដែល​បាន​​​​ទទួល​​​រង​​​ការ​​​រិះ​​​គន់​​​​ចំពោះ​​​ការ​​​វាយ​​​តម្លៃត្រង់​​​​របស់​​​លោក​​​​អំពី​​​​ស្ថាន​​​ភាព​​​សិទ្ធិ​​​មនុស្ស​​​​​​មិន​​​ល្អ​​​ក្នុង​​​ប្រទេស​​​កម្ពុជា​​​។

លោក​​​ យ៉ាស់​​​ ហ្គាយ (Yash Ghai)  ​សាស្ត្រា​ចារ្យ​​​ច្បាប់​​​ជន​​​ជាតិ​​​កេន​​​យ៉ា ដែល​​​ជា​​​​​​ប្រេសិត​​​ពិសេស​​​មុន​​​​​​លោក​​​ សុរិយា ស៊ូបេឌី បាន​​​លា​​​លែង​​​ពី​​​តំណែង​​​របស់​​​លោក​​​ កាល​​​ពី​​​ខែ​​​កញ្ញា​​​ឆ្នាំ​​​២០០៨ មួយ​​​ឆ្នាំ​​​បន្ទាប់​​​ពី​​​របាយការណ៍​​​មួយ​​​ក្នុង​​​ចំណោម​​​របាយការណ៍​​​មួយ​​​ចំនួន​​​របស់​​​លោក​​​ បាន​​​លើក​​​ឡើង​​​ថា “ ការ​​​​រំលោភ​បំពាន​ដោយ​ចេតនា​និង​​​​ជា​​​ប្រព័ន្ធ​លើ​​​សិទ្ធិ​​​មនុស្ស​​​បាន​​​ក្លាយ​​​ទៅ​​​ជា​​​ចំណុច​​​ស្នូល​​​សម្រាប់​​​ការ​​​កាន់​​​អំណាច​​​របស់​​​រដ្ឋាភិបាល​” ហើយ​​​របាយការណ៍នេះ ក៏​​​បាន​​​លើក​​​ឡើង​​​ដែរ​​​ថា ប្រព័ន្ធ​​​តុលាការ​​​នៅ​​​ក្នុង​​​ប្រទេស​​​កម្ពុជា​​​ខ្វះ​​​ឯករាជភាព​​​។

មន្ត្រីរដ្ឋាភិបាល​​​បាន​​​​​​​រិះ​គន់​​​​ខ្លាំ​​ងៗ​​​ម្ដង​​​ហើយ​​​ម្ដង​​​ទៀត​​​​ចំពោះ​​​​លោក​​​ យ៉ាស់ ហ្គាយ​​​អំឡុង​​​អាណត្តិ​​​រយៈ​​​ពេល​​​បី​​​ឆ្នាំ​​​របស់​​​លោក​​​។ ​លោក​​​នាយក​​​រដ្ឋ​​​មន្ត្រី ហ៊ុន សែន បាន​​​ចាត់​​​ទុក​​​លោក យ៉ាស់ ហ្គាយ ថា ជា​​​មនុស្ស​​​ “ ឈ្លើយ”  “ ភ្លីភ្លើ” និង​​​គ្រាន់​​​តែ​​​ជា​​​ “ ភ្ញៀវ​​​ទេសចរ​​​រយៈ​​​ពេល​​​វែងម្នាក់​​​​” តែ​​​ប៉ុណ្ណោះ​​​។

នៅ​​​ក្នុង​​​លិខិត​​​លាលែង​​​ពី​​​តួនាទីរបស់​​​លោក​​​ លោក យ៉ាស់ ហ្គាយ​​​ បាន​​​លើក​ឡើង​​​​ថា ​​​លោក​​​សង្ឃឹម​​​ថា អ្នក​​​បន្ដ​​​កិច្ច​​​ការ​​​ពី​​​លោក​​​នឹង​​​ទទួល​​​បាន​​​ការ​​​គាំ​​​ទ្រ​​​ច្រើន​​​ពី​​​សំណាក់​​​អង្គការ​​​សហប្រជាជាតិ​​​ និង​​​សហគមន៍​​​អន្ដរជាតិ​​​ហើយ​​​​​​ថា រូប​​​លោក​​​គិត​​​ថា លោក​​​ត្រូវ​​​តែ​​​ការ​​​ពារ​​​ខ្លួន​​​លោក​​​ទប់​​​ទល់​​​​​នឹង​​​ការ​​​រិះ​​​គន់​​​ខ្លាំង​​​ៗ​​​ពី​​​សំណាក់​​​រដ្ឋាភិបាល​​​។

លោក យ៉ាស់ ហ្គាយ​​​ បាន​​​លើក​​​ឡើង​​​នៅ​​​ក្នុង​​​លិខិត​​​របស់​​​លោក​​​ថា “ខ្ញុំ​​​មិន​​​អាច​​​និយាយ​​​​​​ថា ខ្ញុំ​​​ទទួល​​​បាន​​​ការ​​​គាំទ្រ​​​យ៉ាង​​​ច្រើន​​​បែប​​​នេះ​​​ ហើយ​​​នេះ​​​គ្រាន់​​​តែ​​​លើក​​​ទឹក​​​ចិត្ត​​​ដល់​​​លោក ហ៊ុន សែន នាយក​​​រដ្ឋ​​​មន្ត្រីកម្ពុជា​​​ឲ្យ​​​បន្ដ​​​រិះ​​​គន់​​​រូប​​​ខ្ញុំ​​​តែ​​​ប៉ុណ្ណោះ​​​”។ វា​​​ក៏​​​ជា​​​ផ្លូវដ៏​​​​​​រលាក់​​​មួយ​​​សម្រាប់​​​អ្នក​​​មុន​​​លោក យ៉ាស់ ហ្គាយ​​ ដែរ។

លោក​​​ ហ៊ុន សែន បាន​​​ចាត់​​​ទុក​​​លោក ​​​ភិតធើ ​​​ឡឺព្រិច​​​ (Peter Leuprecht) សាស្ត្រា​​​ចារ្យ​​​ច្បាប់​​​អូស្ត្រាលី​​​ ដែល​​​បាន​​​បម្រើ​​​ការ​​​ងារ​​​ជា​​​អ្នក
​​​​ធ្វើ​របាយ​ការណ៍​​​ពិសេស​​​ ចាប់​​​ពី​​​ឆ្នាំ​​​២០០០​​​រហូត​​​ដល់​​​​​​ពេល​​​លោក​​​លាលែង​​​ពីតំណែង​​​កាលពី​​​ឆ្នាំ​​​២០០៥​​​ ថា​​​ជា​​​មនុស្ស​​​ “​​​ភ្លីភ្លើ​​​”។
នៅ​​​ក្នុង​​​របាយការណ៍​​​ជា​​​ច្រើន​​​ដែល​​​ត្រូវ​​​បាន​​​ធ្វើ​​​ឡើង​​​នៅ​​​អំឡុង​​​អាណត្តិ​​​ការ​​​ងារ​​​របស់​​​ខ្លួន​​​ លោក ឡឺព្រិច​​​ បាន​​​លើក​​​ឡើង​​​អំពី​​​ការ​​​បណ្ដេញ​​​ចេញ​​​ដោយ​​​បង្ខំ​​​ និង​​​បាន​​​រៀប​​​រាប់​​​អំពី​​​ការ​​​ជួប​​​ប្រជុំ​​​ជាមួយ​​​ប្រជា​​​ពល​​​រដ្ឋ​​​ដែល​​​​ត្រូវ​បាន​ផ្លាស់​ទី​​​​លំនៅ​​​​ទៅ​​​កាន់​​​ “ទី​​​តាំង​​​ដែល​​​មាន​​​មីន​​​ច្រើន​​​​​​”។
លោក ភិតធើ ឡឺព្រិច ក៏​​​បាន​​​​បញ្ជាក់​ពី “​​​ការ​​​​​​ប្រមូល​​​ផ្ដុំ​​​អំណាច​កាន់​តែ​ខ្លាំង​ឡើង​​​​ នៅ​​​ក្នុង​​​​ដៃ​​​របស់​​​នាយក​​​រដ្ឋ​​​មន្ត្រី​​​ នៅ​​​ពី​​​ក្រោយ​​​របប​​​ប្រជាធិបតេយ្យ​​​ដែល​​​គ្មាន​​​ស្ថិរភាព​​​”។ លោក ហ៊ុន សែន ក៏​​​បាន​​​រិះ​​​គន់​​អង្គការ​​​សហប្រជា​​​ជាតិ​​​ផង​​​ដែរ​​​ នៅ​​​អំឡុង​​​ដំណើរ​​​ទស្សនកិច្ច​​​របស់​​អគ្គលេខាធិការ​​​អង្គការ​​​សហ​​​ប្រជា​​​ជាតិ​​​​លោក បាន គីមូន (Ban Ki-moon)​​​មក​​​កាន់​​​ប្រទេស​​​កម្ពុជា​​​ក្នុង​​​ឆ្នាំ​​​២០១០​​​ ដោយ​​​បាន​​​ស្នើ​​​សុំ​​​ឲ្យ​​​បិទ​​​ការិយាល័យ​​​សិទ្ធិ​​​មនុស្ស​​​របស់​​​អង្គការ​​​សហប្រជាជាតិ​​​នៅ​​​ក្នុង​​​ប្រទេស​​​កម្ពុជា​​​ និង​​​ឲ្យ​​​ដក​​​លោក​​​ គ្រីស​​​្ដូ​ហ្វេ ប៉េសូ ​​​(Christophe Peschoux) ​​​តំណាង​​​​ប្រចាំ​ប្រទេស​របស់​ការិយាល័យ​​​សិទ្ធិ​​​មនុស្ស​​​នេះ​​​ ដែល​លោក​​​​បាន​​​មាន​​​ប្រសាសន៍​​​ថា ជា​​​​អ្នក​នាំ​ពាក្យ​របស់​​គណបក្ស​​​​ប្រឆាំង​​​ ដែល​​​មិន​​​សហការ​​​ជាមួយ​​​រដ្ឋាភិបាល​​​។

កាល​ពី​ខែ​មី​នា​ឆ្នាំ​២០១១​ អង្គការ​សហ​ប្រជា​ជាតិ​បាន​​ផ្ទេរ​​លោក ប៉េសូ ទៅ​ទី​ក្រុង​ហ្សឺណែវ​ ប៉ុន្ដែ​បាន​លើក​ឡើង​ថា វាមិន​មែន​ដោយ​សារ​តែ​សម្ពាធ​របស់​រដ្ឋា ភិ​បាល​ទេ។ កាល​ពីឆ្នាំ១៩៩៧​ លោក​ ហ៊ុន សែន បាន​​ថ្លែង​ថា លោក ម៉ារី រ៉ូប៊ីសុន​ (Marry Robison) ​ឧត្តម​ស្នង​ការ អង្គការ​សហ​ប្រជាជាតិ​ទទួល​បន្ទុក​​សិទ្ធិ​មនុស្ស​បាន​រាយការណ៍​​បំផ្លើស​អំ​ពី​ការ​សម្លាប់​ក្រៅ​​ប្រព័ន្ធ​តុលាការ ដែល​កើត​មាន​បន្ទាប់​ពី​ការ​​ប្រយុទ្ធគ្នា​នៅ​ឆ្នាំ​នោះ​ ​និង​មាន​​រថក្រោះ​ប្រយុទ្ធ​នៅ​​តាម​ដង​ផ្លូវ​ក្នុង​រាជធានី​ភ្នំពេញ។

មាន​ប្រសាសន៍​ដោយ​ខ្លី​ទៅ​កាន់​អ្នក​យក​ព័ត៌​មាន​បន្ទាប់​ពី​កិច្ច​ប្រជុំ​កាល​ពី​ម្សិល​មិញ លោក សុរិយា ស៊ូបេឌី បានប្រាប់​ថា ​លោក​បាន​ពិភាក្សា​ជា​មួយ​លោក ឱម យិុន​ទៀង​ អំពី​ដំណើរ​ការ​ត្រួត​ពិនិត្យ​ជា​សាកល​និង​ទៀង​ទាត់អំពី​សិទ្ធិ​មនុស្ស​នៅ​កម្ពុជា​ដែល​​បាន​​បញ្ចប់​ និង​ធ្វើ​របាយ​ការណ៍​​ទៅ​ក្រុម​ប្រឹក្សា​សិទ្ធិ​មនុស្ស​របស់​អង្គការ​សហ​ប្រជា​ជាតិ​​កាល​ពី​​ខែ​តុលា​រួច​ហើយ​។

លោក​បាន​មានប្រសសន៍​ថា វា “ បាន​កើត​ឡើង​អំឡុង​កិច្ច​ពិភាក្សា” និង​ដោយ​មាន​ជំនួ​យ​ពី​ការិយាល័យ​ឧត្តម​ស្នង​ការ​ទទួល​បន្ទុក​សិទ្ធិ​មនុស្ស​នៅ​កម្ពុជា​ “ ដំណើរ​ការ​នេះ​​កំពុង​​វិវឌ្ឍ​​ទៅ​មុខហើយ​”។​​​​

​ក្រោយ​មក​ ពេល​សួរ​​តាម​​អុីម៉េល​​​អំពី​ការ​​លើក​ឡើង​របស់​លោក ឱម​ យិុន​ទៀង ដែល​ថា​ លោក​កំពុង​​ប្រើ​ប្រាស់​ឈ្មោះ​របស់​អង្គការ​សហ​ប្រជា​ជាតិ​ ដើម្បី​បន្ដ​របៀប​វារៈ​ផ្ទាល់​ខ្លួន​របស់​​លោក​នោះ ​លោក សុរិយា ស៊ូបេឌី មិន​បាន​ឆ្លើយ​តប​ភ្លាម​ៗទេ។​ លោក ឱម​ យិុន​ទៀង ក៏​មាន​បំណង​មាក់​ងាយ​​ការ​ងារ​របស់​លោក សុរិយា ស៊ូបេឌី ផង​ដែរ កាល​ពី​ម្សិល​មិញ ដោយ​បាន​អះ​អាង​ថា បទ​ដ្ឋាន​នៃ​របាយការណ៍​របស់​លោកគឺ “ អន់​ជាង​អាជ្ញា​កណ្ដាលក្នុង​កី​ឡា​បាល់​ទាត់​ នៅ​អឺ​រ៉ុប​ទៅ​ទៀត​”។​​

​នេះ​មិន​មែន​ជា​លើក​ទី​១ទេ ដែល​ លោក​ឱម​ យិុន​ទៀង ​បាន​​រិះ​គន់​​បេស​កកម្ម​ស្វែង​រក​ការ​ពិត​នៅ​កម្ពុជា​របស់​លោក សុរិយា ស៊ូបេឌី​ ដែល​ផ្ដោត​ជា​សំខាន់​​លើ​ផល​ប៉ះ​ពាល់​​ដល់​សិទ្ធិ​មនុស្ស​​​ពាក់​ព័ន្ធ​នឹង​ការ​​​បោះ​ឆ្នោត​ ដី​សម្បទាន និង​ឯក​រាជភាព​របស់​​តុលាការ​។

​កាល​ពី​ខែ​កញ្ញា​ ឆ្នាំ​មុន លោក ឱម​ យិុន​ទៀង បាន​​ធ្វើ​ការ​​រិះគន់​​បន្ទាប់​ពី​​មាន​ការ​វាយ​តម្លៃ​​​ពី​​ស្ថាន​ភាព​​សិទ្ធិមនុស្ស​នៅ​កម្ពុជា​​ពី​សំណាក់​​លោកសុរិយា ស៊ូ​បេឌី ​ហើយ​ការ​វាយ​តម្លៃ​​នោះ​​ត្រូវ​បាន​បញ្ជូន​ទៅ​​ឲ្យ​​ក្រុម​ប្រឹក្សាសិទ្ធិ​មនុស្ស​អង្គការ​សហ​ប្រជាជាតិរួច​ហើយ​។លោក​បាន​ចោទ​ប្រកាន់​ លោក​ សុរិយា ស៊ូបេឌី ថា ​បាន​បម្រើ​គណបក្ស​ប្រឆាំង​និង​ព្យា​យាម​រារាំង​ការ​ងារ​របស់​ប្រព័ន្ធ​តុលា​ការ​ជាតិ​ តាម​រយៈ​ការ​ត្រួត​ពិ​និត្យ​លើ​​ឯករាជភាព​​របស់​​តុលាការ​។​

​កាល​ពីម្សិល​មិញ លោក ឱម​ យិុន​ទៀង បាន​ពិនិត្យ​ប្រធាន​បទរបស់​​គណបក្ស​ប្រឆាំង​ម្ដង​ទៀត​ ដោយ​លើក​ឡើង​ថា របាយ​ការណ៍​របស់​លោក សុរិយា ស៊ូបេឌី ត្រូវ​បាន​ប្រើ​ប្រាស់​ជា​ឧបករណ៍​ប្រឆាំង​នឹង​រដ្ឋា​ភិបាល។ ​លោក​បាន​មាន​ប្រសាសន៍​ថា “ របាយ​ការណ៍​របស់​គាត់​ត្រូវ​បាន​ប្រើ​ប្រាស់​សម្រាប់​ជា​ផល​ប្រយោជន៍​នយោ​បាយ​​របស់​គណ​បក្ស​ប្រឆាំង​”។ លោក​បាន​មាន​ប្រសាសន៍​បន្ដ​ថា “​ ទាំ​ងនោះ​គឺ​ជា​របាយ​ការណ៍​បង្ក​បញ្ហា​មិន​មែន​ជា​របាយ​ការណ៍​​សម្រាប់​​ដោះ​ស្រាយ​បញ្ហា​នោះ​ទេ”។

លោក សុរិយា ស៊ូបេឌី តែង​តែ​និយាយ​ថា បេសកកម្ម​របស់​​លោក​​នៅ​​កម្ពុជា​ ដែល​គ្មាន​​ប្រាក់​ខែ​នោះ​ ​​​​​​ធ្វើ​ឡើង​ដោយ​ឯករាជ្យ​ ហើយ​ថា របាយ​ការណ៍​របស់​​លោក​គឺ​ជា​ការ​ឆ្លុះ​បញ្ចាំង​គ្រប់​ផ្នែក​នៃ​​សង្គម​៕

​ប្រែ​សម្រួល​ដោយ ស៊ា ស៊ុយ​ឈាង
និង​ ហម​ សុផាណ្ណា

© 2013, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.