កាលពីម្សិលមិញ អង្គភាពប្រឆាំងអំពើពុករលួយបានបន្តជំរុញព្រះអង្គម្ចាស់ ស៊ីសុវត្ថិ ធម្មិកោ ឲ្យប្រកាសទ្រព្យសម្បត្តិរបស់ទ្រង់ និងបានច្រានចោលការអះអាងរបស់ទ្រង់ដែលថា ព្រះអង្គត្រូវបានយកធ្វើជាគោលដៅនៃការយាយីដោយសារការសម្រេចព្រះទ័យរបស់ព្រះអង្គក្នុងការចូលរួមជាមួយគណបក្សប្រឆាំង មុនការបោះឆ្នោតជ្រើសតាំងតំណាងរាស្ត្រក្នុងខែកក្កដាខាងមុខនេះ។
ជាការជូនដំណឹងព្រះអង្គថា ទ្រង់មិនទាន់បានប្រកាសទ្រព្យសម្បត្តិនៅក្នុងឆ្នាំនេះតាមច្បាប់ប្រឆាំងអំពើពុករលួយនោះ លោក ឱម យុិនទៀង បានផ្ញើលិខិតមួយច្បាប់ថ្វាយព្រះអង្គម្ចាស់ ធម្មិកោ កាលពីយប់ថ្ងៃច័ន្ទ ដោយរំឮកព្រះអង្គថា ប្រសិនបើទ្រង់មិនគោរពតាមច្បាប់ទេ នោះព្រះអង្គអាចត្រូវបានបញ្ជូនទៅពន្ធនាគារ។ ទោះជាយ៉ាងនេះក្តី ព្រះអង្គម្ចាស់ ធម្មិកោ បានមានបន្ទូលថា ទ្រង់មិនព្រមទទួលយកលិខិតនោះទេ ព្រោះវាពុំមានរូបសញ្ញារបស់អង្គភាពប្រឆាំងអំពើពុករលួយនៅលើស្រោមសំបុត្រ។
ថ្លែងនៅសន្និសីទសារព័ត៌មានមួយ ជាមួយលោក សុរិយា ស៊ូបេឌី ប្រេសិតសិទ្ធិមនុស្សរបស់អង្គការសហប្រជាជាតិប្រចាំប្រទេសកម្ពុជា កាលពីម្សិលមិញ លោក ឱម យុិនទៀង បានចោទប្រកាន់ព្រះអង្គម្ចាស់ ធម្មិកោ ថា បានបញ្ចេញអាកប្បកិរិយាហាក់បីដូចជាទ្រង់ស្ថិតនៅពីលើច្បាប់។
លោក ឱម យុិនទៀង បានចោទសួរថា “ មានមន្ត្រីចំនួន១៤៩រូបនៅព្រះបរមរាជវាំងដែលត្រូវប្រកាសទ្រព្យសម្បត្តិរបស់ខ្លួន ដោយ
អនុលោមទៅតាមច្បាប់ ក្នុងនោះរាប់ទាំងព្រះអង្គម្ចាស់ ធម្មិកោ ផងដែរ។ ចុះហេតុអ្វីបានជាមន្ត្រីចំនួន១៤៨រូបនេះបានប្រកាសទ្រព្យ
សម្បត្តិរបស់ខ្លួនអស់ហើយ នៅតែព្រះអង្គ?។
លោក ឱម យុិនទៀង បានសួរថា “ តើព្រះអង្គធំជាងរដ្ឋសភាឬ? តើព្រះអង្គធំជាងរដ្ឋធម្មនុញ្ញ ឬក្រុមប្រឹក្សាធម្មនុញ្ញឬ?។ ព្រះអង្គចង់ក្លាយជាសមាជិកសភា តើព្រះអង្គធ្វើជាសមាជិកសភាយ៉ាងម៉េចទៅ បើព្រះអង្គមិនទាំងគោរពច្បាប់ដ៏តូចមួយផងនោះ? ព្រះអង្គមានបន្ទូលថា វាជាស្ថាប័នរបស់រាជវង្ស។ តើព្រះអង្គជាព្រះមហាក្សត្រឬ? ព្រះអង្គកំពុងគិតថា ព្រះអង្គកំពុងអង្គុយលើរាជបល័្លង្កហើយ”។
លោក យិុនទៀង ក៏បានបញ្ជាក់ផងដែរថា ការផ្តោតលើព្រះអង្គម្ចាស់ធម្មិកោ គឺជាការអនុវត្តជាធម្មតានូវវិធានមួយដែលជាផ្នែកនៃច្បាប់ប្រឆាំងអំពើពុករលួយ ដែលបានចូលជាធរមានក្នុងឆ្នាំ២០១០។ លោកបានមានប្រសាសន៍ថា “ខ្ញុំធ្វើបែបនេះគឺមិនមែនដើម្បីប្រឆាំងនឹងព្រះអង្គម្ចាស់ ធម្មិកោ ទេ។ ខ្ញុំធ្វើបែបនេះសម្រាប់មនុស្សគ្រប់គ្នា”៕
ប្រែសម្រួលដោយ ចេវ ប៊ុននី