29 C
Phnom Penh

អង្គការ​ពល​កម្ម​អន្តរជាតិនឹង​​ចេញ​ផ្សាយ​ព័ត៌មាន​​ពាក់ព័ន្ធនឹង​រោង​ចក្រ​ដែល​មិន​ស្រប​តាម​បទ​ដ្ឋាន​

ដោយ ឌឹ ខេមបូឌា ដេលី

បទវិភាគ

កម្មវិធី​រោង​ចក្រល្អ​​ប្រសើរ​របស់​អង្គការ​ពល​កម្ម​អន្តរជាតិ​បាន​យល់​ព្រម​ចេញ​ផ្សាយ​ព័ត៌មាន​បន្ថែម​ពាក់ព័ន្ធនឹង​រោង​ចក្រ​កាត់​ដេរ​ ដែល​ម​ិន​គោរព​តាម​បទ​ដ្ឋាន​ការងារ​ ជា​កិច្ច​​ខិត​ខំប្រឹង​ប្រែង​ ធ្វើ​ឲ្យ​រោង​ចក្រ​ទទួល​ខុស​ត្រូវ​​ចំពោះ​សុវត្ថិ​ភាព​​កម្មករ​​របស់​ខ្លួន​។

លោក ម៉ូរីស៊ីអូ ប៊ូស៊ី (Maurizio Bussi)​ប្រធាន​ក្រុម​ការ​ងារ​​សមរម្យ​​ប្រចាំ​អាសីុ​អាគ្នេយ៍​​របស់​​អង្គការ​ពល​កម្ម​អន្តរជាតិ​​ បាន​លើក​ឡើង​តាម​អុីម៉េល​កាលពីថ្ងៃ​អង្គារ​ថា“ កម្មវិធី​រោង​ចក្រ​​ល្អ​​ប្រសើរ​នៅ​កម្ពុជា​នឹង​ចេញ​ផ្សាយ​ព័ត៌មាន​ពាក់ព័ន្ធនឹង​ឈ្មោះ​រោងចក្រ​​មួយ​ចំនួន​ដែល​មិនស្រប​តាម​បទ​ដ្ឋានការ​ងារ​។ យើង​មាន​បំណង​ចេញ​ផ្សាយ​​ព័ត៌​មាន​នេះ​ជា​សាធារណៈ​នៅ​ក្នុង​ឆ្នាំនេះ”។

លោក ប៊ូស៊ី មិន​បាន​និយាយ​ថា តើ​​មាន​ព័ត៌មាន​ប៉ុន្មាន​​ពាក់ព័ន្ធនឹង​រោង​ចក្រ​ ដែល​ត្រូវ​ចេញ​ផ្សាយ​​​នោះទេ។ ទោះជាយ៉ាង​​​ណា​
វិធានការណ៍​​ពិត​ជា​បង្ហាញ​នូវ​ឆន្ទៈ​របស់​អង្គការ​ពល​កម្ម​អន្តរជាតិ​ ក្នុង​ការ​ធ្វើ​ឲ្យ​ប្រព័ន្ធ​បច្ចុប្បន្ន ដែល​មិន​បាន​បង្ហាញ​ឈ្មោះ​រោង​ចក្រ​
ដែល​បំពាន​បទបញ្ញត្តិ​សុវត្ថិ​ភាព​នោះ ឲ្យ​មាន​​តម្លាភាព​ជាង​មុន​។

របាយការណ៍​មួយ​ចេញ​ផ្សាយ​កាលពីខែ​កុម្ភៈ ដោយ​ក្រុម​ស្រាវ​ជ្រាវ​មកពី​សាលា​ច្បាប់​​ស្តែន​ហ្វត​(Stanford Law School) បាន​ចោទ​ប្រកាន់​ថា ការ​ខ្វះ​តម្លាភាព​នៅ​ក្នុង​កម្មវិធី​រោង​ចក្រ​​ល្អ​ប្រសើរ​ពិត​ជា​ធ្វើ​ឲ្យ​បទ​ដ្ឋាន​រោង​ចក្រ​កាត់​ដេរ​ដើរ​ថយ​ក្រោយ​សម្រាប់​កម្មករ​កម្ពុជា បើ​ធៀប​ទៅ​នឹង​សម​ភាគី​របស់​ខ្លួន​នៅ​ក្នុង​ប្រទេស​ចិន ប្រទេស​ឥណ្ឌូណេស៊ី និង​​ប្រទេស​វៀតណាម​។

កាល​ពីដើម​ឆ្នាំនេះ ប្លង់​សេ​​​រោង​ចក្រ​វីង​ស្តាស៊ូ (Wing Star Shoes) របស់​តៃវ៉ាន់​នៅ​ក្នុង​ខេត្ត​កំពង់​ស្ពឺ បាន​បាក់​ធ្លាក់សង្កត់​កម្មករ​វ័យ​ក្មេង​ពីរ​នាក់​​​ស្លាប់។ ហើយ​កាលពីដើម​សប្ដាហ៍​​នេះអាហារដ្ឋាន​​នៅ​ឯរោងចក្រ​កាត់​ដេរ​ថប់វើល​ (Top World​) នៅ​ក្នុង​រាជធានី​ភ្នំពេញ បាន​បាក់​បណ្ដាល​ឲ្យ​កម្មករ​រងរបួស​ចំនួន​២៣​នាក់​។

លោក ប៊ូស៊ី ថ្លែង​ថា បញ្ហា​សំខាន់​ពាក់ព័ន្ធ​នឹង​ការ​បញ្ចេញ​​ព័ត៌​មាន​ជា​សាធារណៈ​នេះ គឺ​ត្រូវ​ធ្វើ​តាម​វិធី​មួយ​ ដែល​ “ ​មាន​អត្ថន័យ​ និង​មាន​ទិស​ដៅ​ច្បាស់​លាស់​ ព្រម​ទាំង​មាន​បទ​ដ្ឋាន​ត្រឹម​ត្រូវសម្រាប់​​ការ​ផ្លាស់​ប្ដូរ​”។ បច្ចុប្បន្ន​នេះ កម្មវិធី​រោង​ចក្រ​ល្អ​​ប្រសើរ​ ជាការ​ងារ​ស្ម័គ្រ​ចិត្ត​​ ហើយ​រោង​ចក្រ​​ជា​ច្រើន​បាន​ចូល​រួម​ក៏​ព្រោះ​តែ​ឈ្មោះ​របស់​ខ្លួន​មិន​ត្រូវ​បាន​ផ្សព្វ​ផ្សាយ​ជា​សាធារណៈនៅ​ពេល​ដែល​បញ្ហា​សុវត្ថិភាព​ត្រូវ​បាន​គេ​រក​ឃើញ។

លោក ប៊ូស៊ី មាន​ប្រសាសន៍​ថា “ យើង​ចង់​ផ្តល់​ឱកាស​​ឲ្យ​រោង​ចក្រ​​ធ្វើ​ជា​ស្ថាបត្យ​ករ​ក្នុង​កា​រកែលម្អ​រោង​ចក្រ​ផ្ទាល់​ខ្លួន​ ប៉ុន្ដែ​​មាន​បញ្ហា​មួយ​ចំនួន ដែល​រោង​ចក្រ​ខ្លះ​មិន​បានធ្វើ​តាម​បទ​ដ្ឋាន​ការ​ងារ​អស់​រយៈ​ពេល​ជា​ច្រើន​ឆ្នាំ​មក​ហើយ​ ហើយ​រោង​ចក្រ​មួយ​ចំនួន​ក៏​មាន​សញ្ញា​បង្ហាញ​ថា ​មាន​ការ​ផ្លាស់​ប្ដូរ​តិច​តួច​បន្ទាប់​ពី​មាន​ការ​ផ្តល់​​​ឱកាស​ឲ្យ​ច្រើន​​”។

ខណៈ​ដែល​​កម្ម​វិធី​រោង​ចក្រ​​ល្អ​ប្រសើរ​​មិន​បាន​ត្រួត​ពិនិត្យ​រោង​ចក្រ​វីង​ស្តាស៊ូ​នោះ រោង​ចក្រ​ថប់​វើល​ ដែល​ផលិត​សម្លៀក​បំពាក​់​​
សម្រាប់​នាំ​ចេញ​ទៅ​សហ​រដ្ឋ​អាមេរិក យីហោ​ហ្គែប (Gap) ត្រូវ​បាន​គេ​ត្រួត​ពិនិត្យ​។

យោង​តាម​លោក ប៊ូស៊ី បាន​ឲ្យ​​ដឹង​ថា សំណង់​ដែល​បាក់ធ្លាក់​កាលពីថ្ងៃ​ច័ន្ទ នៅ​រោង​ចក្រ​នោះ ​អ្នក​ត្រួតពិនិត្យ​របស់​អង្គការ​អាយ​ឡូ បាន​ចាប់​អារម្មណ៍​​តាំង​​ពី​ពីរ​ឆ្នាំ​មុន​មក​ម្លេ៉ះ​ ដែល​នៅ​ពេល​នោះ​ទី​តាំង​​នេះ​ត្រូវ​បាន​ប្រើ​ប្រាស់​សម្រាប់​ធ្វើ​ជា​​កន្លែង​មើល​ថែ​រក្សាកូនៗរបស់​កម្មករ​នៅ​រោង​ចក្រ​នេះ​។

ទោះបីជា​​រោងចក្រ​នេះ​បាន​ប្តូរ​ទីតាំង​​មណ្ឌល​មើល​ថែកូន​របស់​កម្មករ​​នេះ​ហើយ​ក៏​ដោយ​ ក៏​​​គេ​​ឲ្យ​កម្មករ​ប្រើ​​កន្លែង​​នេះ​សម្រាប់​​ទទួល​ទាន​អាហារ​ពេល​សម្រាក​ដែរ​។

លោក ប៊ូស៊ី បានថ្លែង​ថា “ នៅ​ពេល​នេះ​យើង​មិន​ដឹងថា​ ​រោង​ចក្រ​ណាខ្លះ​​ស្ថិត​នៅ​ក្រោម​ការ​ត្រួត​ពិនិត្យ​របស់​កម្មវិធី​រោង​ចក្រ​​ល្អ​ប្រសើរ ដែល​មាន​បញ្ហា​សំណង់​ ដែល​អាច​​បង្កឲ្យ​មាន​របួស​ស្នាម​ដល់​កម្មករ​នោះទេ”។ លោក ដេវីត វេ៉ល (David Welsh) នាយក​ប្រចាំ​ប្រទេស​របស់​មណ្ឌល​សាមគ្គី​ភាព​(Solidarity Center)​ ដែល​ជា​អង្គការ​គាំ​ទ្រ​កម្មករ​ មាន​មូល​ដ្ឋាន​នៅ​សហរដ្ឋ​អាមេរិក ​មាន​ប្រសាសន៍​ថា ខណៈ​ដែល​អង្គការ​ពល​កម្ម​អន្តរជាតិ​សម្រេច​ចេញផ្សាយ​ព័ត៌មាន​បន្ថែម​ពាក់​ព័ន្ធ​នឹង​រោង​ចក្រ​្ ដែល​មិន​ស្រប​តាម​បទ​ដ្ឋាន​ការ​ងារ​គឺ​ជា​ជំហាន​វិជ្ជមាន​មួយ​នោះ កម្មវិធី​នេះ គួរ​តែ​បាន​ធ្វើ​តាំង​ពីមុន​មក​ ដើម្បី​ជៀស​វាង​​ពី​ការ​បិទ​រោង​ចក្រ​។

លោកថ្លែងថា “​ [កម្ម​វិធី​រោង​ចក្រ​​ល្អ​​ប្រសើរ​កាន់​តែមាន​តម្លា​ភាព​ ឬក៏​​អំណាច​ជាច្រើន​ដែល​​ពួកគេ​ចង់​​​បាន​​ដើម្បី​អនុវត្ត​ឲ្យ​រោង​ចក្រ​​ធ្វើ​​ការ​ផ្លាស់​ប្ដូរ​​ ឬក៏​ដាក់​ទោស​​រោង​ចក្រ​ណា​​ដែល​រក​ឃើញ​ថា មិន​បាន​ធ្វើ​ឲ្យ​ស្រប​តាម​បទ​ដ្ឋាន​​នោះ ពួកគេ​ទំនង​ជា​​មិន​​ចង់​​​ស្ថិត​ក្នុង​ប្រទេស​នេះ​​ទៀត​ទេ៕

ប្រែសម្រួល​ដោយ ហម សុផាណ្ណា​ ​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស