មនុស្សប្រហែល២០នាក់ ដែលតវ៉ាឲ្យផ្អាកការបណ្តេញពួកគាត់ចេញពីផ្ទះនៅក្បែរអាកាសយានដ្ឋានអន្តរជាតិភ្នំពេញបានបិទផ្លូវមិនឲ្យមនុស្សចេញចូលអាកាសយានដ្ឋាននេះប្រហែលកន្លះម៉ោងកាលពីម្សិលមិញនៅមុនពេលកងកម្លាំងនគរបាលជាច្រើនបានបំបែកការតវ៉ារបស់ពួកគាត់។
អ្នកស្រុកប្រហែល២០នាក់នៅភូមិថ្មគោលសង្កាត់ចោមចៅបានចូលរួមជាមួយអ្នកតវ៉ាប្រឆាំងនឹងការបណ្តេញចេញចំនួន៣០នាក់មកពីសហគមន៍បឹងកក់និងសហគមន៍បុរីកីឡាដើម្បីបិទផ្លូវចូលអកាសយានដ្ឋាននេះ។នៅទីបញ្ចប់ នគរបាលនិងកងរាជអាវុធហត្ថប្រហែល១០០នាក់បានបង្ខំឲ្យអ្នកតវ៉ាទាំងនេះចាកចេញពីផ្លូវនេះនៅម៉ោងប្រហែល៩និង៣០នាទីព្រឹក។
អ្នកតវ៉ាឈ្មោះ ខាយ សាវី បាននិយាយនៅខាងក្រៅអាកាសយានដ្ឋាននេះថា “ យើងបានមកទីនេះនៅថ្ងៃនេះដើម្បីប្រគល់ញត្តិ
តវ៉ាមួយក្នុងគោលបំណងស្វែងរកដំណោះស្រាយសម្រាប់យើងទាំងអស់គ្នានៅមុនពេលបោះឆ្នោតនាពេលខាងមុខនេះ”។
អ្នកស្រី ច្រាយ នឹម អ្នកស្រុកនៅភូមិថ្មគោលម្នាក់ទៀតបាននិយាយថា “ ខ្ញុំមិនយល់ថាហេតុអ្វីបានជាអាជ្ញាធរប្រើនគរបាលជាច្រើននាក់ឲ្យបញ្ឈប់ការតវ៉ារបស់យើងនៅតាមផ្លូវនេះ ពីព្រោះយើងគ្រាន់តែចង់ប្រគល់ញត្តិមួយទៅឲ្យក្រុមហ៊ុនអាកាសយានដ្ឋានកម្ពុជាដែលធ្វើប្រតិបត្តិការនៅអាកាសយានដ្ឋានបីកន្លែងរបស់ប្រទេសនេះដើម្បីទាមទារឲ្យមានការផ្តល់សំណងសមស្របប្រសិនបើអាជ្ញាធរយកដីរបស់យើងនោះ”។
កាលពីខែកក្កដា អាជ្ញាធរបាននិយាយប្រាប់ប្រជាពលរដ្ឋ១៨២គ្រួសារថា ផ្ទះរបស់ពួកគាត់ស្ថិតនៅតាមផ្លូវសុវត្ថិភាពនៅជុំវិញអាកាសយានដ្ឋាននេះហើយថា អាជ្ញាធរត្រូវការបោសសម្អាតនៅមុនការមកដល់របស់ថ្នាក់ដឹកនាំពិភពលោកសម្រាប់ចូលរួមកិច្ចប្រជុំកំពូលពីរកាលពីចុងឆ្នាំមុន។
កាលពីខែវិច្ឆិកា អ្នកស្រុកទាំងនេះបានធ្វើការតវ៉ានៅមុនដំណើរទស្សនកិច្ចរបស់លោក បារ៉ាក់ អូបាម៉ា (Barack Obama) ប្រធានា
ធិបតីសហរដ្ឋអាមេរិកដោយបានដាក់រូបថតរបស់លោក អូបាម៉ា នៅលើដំបូលផ្ទះរបស់ពួកគាត់ដើម្បីទាក់ទាញចំណាប់អារម្មណ៍
ចំពោះការតវ៉ារបស់ពួកគាត់។ ចាប់តាំងពីពេលនោះមក មិនមានព័ត៌មានណាមួយពាក់ពន្ធនឹងផែនការបណ្តេញចេញនេះពីមន្ត្រីទាំងនេះទេ។
អ្នកស្រុកទាំងនេះបានលើកឡើងថា ពួកគាត់កាន់កាប់ដីរបស់គាត់ដោយស្របច្បាប់ ព្រោះមន្រ្តីមូលដ្ឋានបានទទួលស្គាល់ការទិញលក់ដីនេះ និងការសាងសង់ផ្ទះរបស់ពួកគាត់ជាច្រើនឆ្នាំមកហើយ។ ប៉ុន្តែអាជ្ញាធររាជធានីបានច្រានចោលការអះអាងទាំងនេះដោយនិយាយថា ពួកគាត់សង់ផ្ទះរបស់ពួកគាត់ដោយខុសច្បាប់ដោយមិនទទួលស្គាល់នូវអ្វីដែលមន្រ្តីសង្កាត់និងខណ្ឌបានទទួលស្គាល់ចំពោះការទិញដីរបស់ពួកគាត់និងការសាងសង់ផ្ទះនោះទេ។
លោក សាយ សុខន រដ្ឋលេខាធិការនៃរដ្ឋលេខាធិការដ្ឋានអាកាសចរណ៍ស៊ីវិលបានជួបជាមួយនឹងក្រុមអ្នកតវ៉ាទាំងនេះកាលពីម្សិលមិញ និងបានផ្តល់ដំណឹងដល់ពួកគាត់ថា ការបណ្តេញពួកគាត់ចេញ គឺជាការចាំបាច់ដោយសារតែផ្ទះរបស់ពួកគាត់នៅកៀកផ្លូវរត់របស់យន្តហោះនិងធ្វើឲ្យប៉ះពាល់ដល់សុវត្ថិភាព។
លោក សាយ សុខន បានមានប្រសាសន៍ថា “ រដ្ឋាភិបាលមានការព្រួយបារម្ភអំពីសុវត្ថិភាព ពេលថ្នាក់ដឹកនាំពិភពលោកអញ្ជើញមកបំពេញទស្សនកិច្ចនៅប្រទេសកម្ពុជា”។
លោកបានបដិសេធមិនផ្តល់សេចក្តីលម្អិតអំពីការបណ្តេញចេញដែលមិនទាន់កេើតមានឡើងនេះទេ ប៉ុន្តែបានមានប្រសាសន៍
ថា ទីស្តីការគណៈរដ្ឋមន្រ្តីបានបង្កើតក្រុមការងារមួយដែលមានលោកជាសមាជិកមួយរូប ហើយថាសំណងនឹងត្រូវផ្តល់ឲ្យ ប៉ុន្តែលោកបានបដិសេធមិនផ្តល់សេចក្តីលម្អិតអំពីការផ្តល់សំណងនេះទេ។
លោកបានអះអាងថា ប្រសិនបើផ្ទះទាំងនេះមិនត្រូវបានរុះរើចេញទេ ស្ថាប័នអាកាសចរណ៍ស៊ីវិលអន្តរជាតិអាចដាក់អាកាសយានដ្ឋានអន្តរជាតិភ្នំពេញនៅក្នុងបញ្ជីខ្មៅ៕
ប្រែសម្រួលដោយ ស៊ុំ សុខភុំ