ប្រពន្ធរបស់កម្មករម្នាក់ដែលបានស្លាប់ក្នុងការបាក់ប្លង់សេនៅឯរោងចក្រស្បែកជើងមួយកន្លែងក្នុងខេត្តកំពង់ស្ពឺ កាលពីសប្តាហ៍មុន បានឲ្យដឹងកាលពីម្សិលមិញថា គ្រួសាររបស់ប្ដីខ្លួនបានទទួលសំណងចំនួន៩.០០០ដុល្លារ ហើយបានយល់ព្រមមិនដាក់ពាក្យបណ្តឹងប្តឹងក្រុមហ៊ុននេះទេ។
លោក រឹម សារឿន អាយុ២២ឆ្នាំ ស្ថិតនៅក្នុងចំណោមកម្មករចំនួនពីរនាក់ដែលត្រូវប្លង់សេបាក់រលំសង្កត់ស្លាប់ នៅរោងចក្រស្បែកជើង វីងស្តារ របស់តៃវ៉ាន់ កាលពីថ្ងៃទី១៦ ខែឧសភា ។ អាជ្ញាធរអះអាងថា ការរលំបាក់នេះ គឺដោយសាការសាងសង់ខុសច្បាប់ដែលមិនបានគិតដល់គ្រោះថ្នាក់។
អ្នកស្រី នួន ឆវី ជាភរិយាមេម៉ាយ របស់លោក រឹម សារឿន បាននិយាយថា “ យើងសុខចិត្តទទួលយកសំណងនេះ។ យើងបានទាមទារសំណងចំនួន១០.០០០ដុល្លារ ប៉ុន្តែពួកគេយល់ព្រមឲ្យយើងតែ៩.០០០ដុល្លារប៉ុណ្ណោះ។ យើងមិនចង់ប្តឹងទេ ព្រោះវាត្រូវប្រើពេលយូរ”។ អ្នកស្រីបានបន្ថែមថា រោងចក្រក៏បានចំណាយប្រាក់ចំនួន៦.៥០០ដុល្លារឲ្យអ្នកស្រីយកទៅធ្វើបុណ្យសពផងដែរ។
អ្នកស្រី ឆវី និយាយថា សំណងនេះអាចជួយឲ្យអ្នកស្រីចិញ្ចឹមកូនអាយុ១ខែរបស់ខ្លួនបាន។ អ្នកស្រីបានបន្តថា “ ខ្ញុំនឹងយកប្រាក់នេះទៅចិញ្ចឹមកូនរបស់ខ្ញុំ។ ពេលនេះ ខ្ញុំមិនអាចធ្វើការហត់បានទេ”។
លោក កន វិត ដែលជាឪពុករបស់ជនរងគ្រោះទី២ ឈ្មោះ សឹុម ស្រីតូច អាយុ២២ឆ្នាំ បានឲ្យដឹងថា លោកមិនទាន់បានពិភាក្សាអំពីសំណងជាមួយតំណាងក្រុមហ៊ុននៅឡើយទេ។ លោកបានមានប្រសាសន៍ថា “ យើងនឹងទាមទារសំណងជាង២០.០០០ដុល្លារ។
ប្រសិនបើពួកគេព្រមសង យើងនឹងមិនដាក់ពាក្យបណ្តឹងទេ”។ លោក លី ហួរ តំណាងក្រុមហ៊ុន វីងស្តា បានបញ្ជាក់ថា ពិតជាមានការព្រមព្រៀងផ្តល់សំណងដល់អ្នកស្រី ឆវី មែន ដោយបានអះអាងថា រោងចក្រមិនបានសុំកុំឲ្យគ្រួសារជនរងគ្រោះប្តឹងក្រុមហ៊ុនរបស់លោកទេ។
លោក ដេវ វែល (Dave Welsh) នាយកប្រចាំប្រទេសនៃមណ្ឌលសាមគ្គីភាព ដែលជាអង្គការគាំទ្រសិទ្ធិកម្មករមានមូលដ្ឋាននៅសហរដ្ឋអាមេរិក បានមានប្រសាសន៍ថា ការគណនាសំណងសមស្របសម្រាប់គ្រួសារជនរងគ្រោះ គួរតែផ្អែកលើប្រាក់ខែរបស់កម្មករ ចំនួនឆ្នាំនៃការបាត់បង់សេវា និងការខូចខាត ដែលសរុបទៅមានចំនួនប្រហែល៩៧.០០០ដុល្លារ។ នេះជាការប្រើរូបមន្តដូចគ្នាទៅនឹងរូបមន្តផ្តល់សំណងនៅក្នុងប្រទេសបង់ក្លាដែស ដែរ។
លោកបានបន្តថា “ ការផ្តល់សំណងត្រឹមតែ៩.០០០ដុល្លារដល់គ្រួសាររងគ្រោះក្រីក្រ គឺជាគំរូដ៏អាក្រក់មួយសម្រាប់កម្មករ ហើយមិនមែនសម្រាប់កម្មករក្នុងវិស័យឧស្សាហកម្មកាត់ដេរប៉ុណ្ណោះទេ គឺសម្រាប់កម្មករនៅគ្រប់វិស័យទាំងអស់”។លោកបន្ថែមថា រដ្ឋាភិបាលគួរតែឲ្យរោងចក្រ វីង ស្តារ ទទួលខុសត្រូវចំពោះមុខច្បាប់។
លោកបានបន្តថា “ ម្ចាស់រោងចក្របានបង្ហើបក្នុងសន្និសីទសារព័ត៌មានមួយថា នឹងពុំមានការដាក់ទោសទណ្ឌលើគាត់ទេ។ វាជារឿងគួរឲ្យរកាំចិត្តមួយដែលស្តែងឲ្យឃើញពីភាពអយុត្តិធម៌នៅក្នុងប្រទេសកម្ពុជា”៕
ប្រែសម្រួលដោយ ចេវ ប៊ុននី