លោក សុរិយា ស៊ូបេឌី (Surya Subedi) ប្រេសិតរបស់អង្គការសហប្រជាជាតិទទួលបន្ទុកសិទិ្ធមនុស្ស បានជួបមន្ត្រីជាន់ខ្ពស់នៅក្រសួងយុត្តិធម៌ កាលពីថ្ងៃពុធ និង បានស្នើឲ្យមានការអនុម័តច្បាប់ថ្មីដើម្បីគ្រប់គ្រងប្រព័ន្ធតុលាការរបស់ប្រទេសកម្ពុជា។
លោក ព្រហ្ម សិទ្ធត្រា រដ្ឋលេខាធិការក្រសួងយុត្តិធម៌ បានមានប្រសាសន៍ថា លោកបានជួបអ្នកធ្វើរបាយការណ៍ពិសេសរូបនេះរយៈពេលប្រហែល៤៥នាទី កាលពីរសៀលថ្ងៃពុធ ប៉ុន្តែ ភាគច្រើននៃកិច្ចសន្ទនានេះ បានផ្ដោតតែទៅលើជីវិត គ្រួសារ និងកូនៗរបស់ពួកគាត់តែប៉ុណ្ណោះ ។
លោក ព្រហ្ម សិទ្ធត្រា បានមានប្រសាសន៍ថា “ លោក ស៊ូបេឌី មិនបានសាកសួរយើងច្រើនពីព័ត៌មានថ្មីណាមួយនោះទេ ប៉ុន្តែ លោកបានស្នើសុំឲ្យយើងអនុម័តច្បាប់ថ្មីស្ដីពីការរៀបចំ និងការប្រព្រឹត្តទៅរបស់តុលាការ និងច្បាប់ស្ដីពីលក្ខន្តិកៈចៅក្រម និងព្រះរាជអាជ្ញា”។
លោក ព្រហ្ម សិទ្ធត្រា បានមានប្រសាសន៍បន្ថែមថា “ ច្បាប់ទាំងនេះនឹងត្រូវអនុម័ត បន្ទាប់ពីការបោះឆ្នោត យើងនៅមានចំណុចជាច្រើនទៀតដែលត្រូវពិភាក្សា។យើងបាននិយាយអំពី គ្រួសារ និងការអប់រំរបស់កូនយើង”។
ច្បាប់នេះត្រូវបានតាក់តែងជាយូរមកហើយ។ច្បាប់ទាំងនេះមានចែងនៅក្នុងរដ្ឋធម្មនុញ្ញឆ្នាំ១៩៩៣របស់ប្រទេសនេះ
ប៉ុន្តែច្បាប់ទាំងពីរនេះស្ថិតនៅក្នុងដំណាក់កាលព្រាងនៅឡើយ និងបានបញ្ជូនទៅបញ្ជូនមករវាងក្រសួងយុត្តិធម៌ និងទីស្ដីការគណៈរដ្ឋមន្ត្រី។
បន្ទាប់ពីដំណើរទស្សនកិច្ចរបស់លោក ស៊ូបេឌី កាលពីខែមិថុនា ឆ្នាំ២០១០ លោក បានប្រគល់របាយការណ៍រិះគន់ដ៏ខ្លាំងមួយលើប្រព័ន្ធតុលាការរបស់ប្រទេសនេះទៅក្រុមប្រឹក្សាសិទិ្ធមនុស្សរបស់អង្គការសហប្រជាជាតិដោយផ្តល់អនុសាសន៍ឲ្យមានការធ្វើកំណែទម្រង់ ដើម្បីប្រឆាំងនឹងអំពើពុករលួយ និងការជ្រៀតជ្រែកនយោបាយ។
កាលពីឆ្នាំ២០១១អំឡុងពេលបំពេញបេសកកម្មលើកទី៦របស់លោក នៅប្រទេសកម្ពុជា លោក ស៊ូបេឌី បានចាត់ទុកការធ្វើកំណែទម្រង់នៅក្នុងប្រព័ន្ធតុលាការនេះថាមាន “ ដំណើរការយឺតយ៉ាវខ្លាំងណាស់”។ បន្ទាប់មក កាលពីខែធ្នូ ឆ្នាំ២០១២លោកបានមានប្រសាសន៍ថា ច្បាប់ថ្មីដែលគ្រប់គ្រងប្រព័ន្ធតុលាការ រួមទាំងចៅក្រម និងព្រះរាជអាជ្ញា គឺជាការចាំបាច់ “ ដើម្បីធ្វើឲ្យប្រាកដថា ប្រព័ន្ធតុលាការនេះ អាចធ្វើឲ្យមានការទុកចិត្ត និងទទួលការគោរពពីប្រជាពលរដ្ឋកម្ពុជាគ្រប់ជាន់ថ្នាក់។
លោក សុក សំអឿន នាយកប្រតិបត្តិនៃក្រុមអ្នកច្បាប់ការពារសិទិ្ធកម្ពុជាបានមានប្រសាសន៍ថា ច្បាប់ស្តីពីលក្ខន្តិកៈចៅក្រមគឺជាការចាំបាច់ពីព្រោះច្បាប់នេះនឹងជួយធានាថា ចៅក្រមមានក្រមសីលធម៌ និងធ្វើការងារដោយឯករាជ្យ។
លោក សុក សំអឿន បានមានប្រសាសន៍បន្ថែមថា “ លក្ខន្តិកៈរបស់ចៅក្រមនិងព្រះរាជអាជ្ញានិយាយពីក្រមសីលធម៌របស់ចៅក្រម និងព្រះរាជអាជ្ញា និងការដាក់ពិន័យលើចៅក្រម និងព្រះអាជ្ញា។វាមានសារៈសំខាន់ណាស់ក្នុងការធ្វើឲ្យប្រាកដថា ចៅក្រមនិងព្រះរាជអាជ្ញាត្រូវតែមានក្រមសីលធម៌ និងវិជ្ជាជីវៈខ្ពស់”៕
ប្រែសម្រួលដោយ ស៊ុំ សុខភុំ