29 C
Phnom Penh

ពន្ធនាគារ​ស-២១ បង្កើត​​​ឡើង​​​ដោយ​ការ​​​​សមគំនិត​​​ពី​​​​​​វៀតណាម

ដោយ ឌឹ ខេមបូឌា ដេលី

បទវិភាគ

អ្នក​រួច​ជីវិត​ពី​មន្ទីរ​ឃុំ​ឃាំាង​ទួល​ស្លែង​ក្រោម​​​របប​ខ្មែរ​ក្រហម​ ដែលជាកន្លែង​​​​ក្មេងចាស់ប្រុសស្រី​​​ជា​ង​១២​.០០០​នាក់ ត្រូវ​គេ​សម្លាប់​នោះ បាន​ទាម​ទារ​ឲ្យ​លោក​ កឹម សុខា ប្រធាន​ស្ដីទី​នៃ​គណ​បក្ស​សង្គ្រោះជាតិ សូម​អភ័យ​ទោស​ចំពោះការ​​​​អត្ថាធិប្បាយ​នាពេល​​​ថ្មី​ៗ​​​របស់លោក​​​ ​ដែលថា​​​ គ្មាន​​​កន្លែង​បង្ហូរ​ឈាម​​​ជា​​​​ប្រវត្តិសាស្ត្រ​នេះ។

សមាគម​​ជន​រងគ្រោះ​នៃ​របប​កម្ពុជា​ប្រជា​​ធិបតេយ្យ​ បានទាម​ទារ​ឲ្យ​មាន​ការ​សូមអភ័យ​ទោស​បែប​នេះ នៅ​សន្និសីទ​សារ​ព័ត៌មាន​ដែល​​ធ្វើ​ឡើង​កាល​ពីថ្ងៃ​សៅរ៍ ក្នុង​​បរិវេណ​នៃ​អតីត​មន្ទីរ​ឃុំឃាំង​របស់​ខ្មែរ​ក្រហម ដែលនៅ​ទី​នោះ​​ ពួកគេ​បាន​ចាក់​​ខ្សែអាត់​សំឡេង ដែល​ពួកគេ​និយាយ​ថា ជាសម្តី​​​របស់​​​លោក កឹម សុខា ​កាលពីថ្ងៃ​ទី​១៨​ ខែឧសភា នៅក្នុង​ខេត្ត​ព្រៃ​វែង​ និង​ខេត្ត​តាកែវ។

នៅ​ក្នុង​ខ្សែអាត់​សំឡេង​នោះ លោក កឹម សុខា បាន​ចោទ​ប្រកាន់​វៀតណាម​ថា បាន​ប្រែ​ក្លាយ​​​អតីត​​​អគារ​សាលា​រៀន​នេះ​ទៅ​ជា​មណ្ឌល​ធ្វើ​​​ទារុណកម្ម​ និង​មន្ទីរ​ឃុំ​ឃាំងរបស​​់​​​ខ្មែរ​ក្រហម។

លោក កឹម សុខា បាន​លើក​ឡើង​នៅ​ក្នុង​ខ្សែអាត់​នោះថា “ វៀតណាម​បាន​បង្កើត​កន្លែង​នេះឡើង ដោយ​ប្រើ​រូប​ថត​ [របស់​ជន​រងគ្រោះ​]។ ប្រសិន​បើ​កន្លែង​នេះពិតជា​កន្លែង​របស់​ខ្មែរ​ក្រហម​មែន​ ពួកគេ​ប្រាកដ​ជាវាយ​កម្ទេច​​​​វា​ចោល​​ មុន​ពេល​​ចាក​ចេញ​បាត់​ទៅ​ហើយ”។ លោក កឹម សុខា បាន​បន្ត​ថា “ បងប្អូន​​​​គួរ​តែ​ដឹង​ថា ប្រសិន​បើ​ខ្មែរ​ក្រហម​បាន​សម្លាប់​មនុស្ស​មែន​ តើ​ពួកគេ​សុខចិត្ត​​​ទុក​វា​ដើម្បី​បង្ហាញ​អ្នក​រាល់​គ្នា​ដែរ​​​ឬទេ​​​? ប្រសិន​បើ​ពួកគេដឹង​​​ថា​​​ ខ្លួនឯង​​​​បាន​សម្លាប់​មនុស្ស​ច្រើន​ តើ​​​ពួកគេ​​ទុក​កន្លែង​នេះ​ធ្វើ​អ្វី​?”។

នៅ​ក្នុង​ខ្សែ​អាត់​មួយ​ផ្សេង​ទៀត​ ដែល​​​ត្រូវបាន​​​ផ្សព្វផ្សាយ​​​តាម​គេហ​ទំព័រ​របស់​​ទីស្ដីការ​គណៈ​រដ្ឋមន្ត្រី​​​ សុន្ទរកថា​​​គ្មាន​កាល​បរិច្ឆេទ​ច្បាស់​លាស់​មួយ​​​​​​ដែល​​ត្រូវបាន​​​អះ​អាង​​​ថា ជាអ្វី​​​ដែល​​​លោក​ កឹម សុខា បាន​ធ្វើ​ឡើង​ “ កាលពីពេល​ថ្មីៗ” នៅ​ក្នុង​ខេត្ត​ព្រៃ​វែង ​ក៏​​​មាន​​​ខ្លឹមសារ​​​ដូច​គ្នា​នេះដែរ។

នៅក្នុង​​​ខ្សែអាត់​​​នោះ​​​ លោក កឹម សុខា បាន​លើក​ឡើង​ថា “ ហេតុអ្វី​បាន​ជា​ខ្មែរ​ក្រហម​ល្ងង់​​ដល់​ថ្នាក់​​​ទុក​មន្ទីរ​ឃុំ​ឃាំង​ទួល​​​ស្លែង បន្ទាប់ពី​ពួកគេ​បាន​​​សម្លាប់​មនុស្ស​អស់​ជា​ច្រើន​ ហើយ​រក្សា​វាទុក​​​ធ្វើ​​​ជា​សារមន្ទីរ​ដើម្បី​​បង្ហាញ​ភ្ញៀវ​​​ទេសចរ​ដូច្នេះ។ នេះ​គ្រាន់​​តែ​ជា​ឆាក​សម្ដែង​ប៉ុណ្ណោះ។ ខ្ញុំ​ជឿ​​ថា វា​ត្រូវ​បាន​គេ​រៀប​ចំឡើង​ មែន​ទេ​​​បងប្អូន​​​?”។

គួរ​​​រំឭក​​​ថា​​​ ខណៈ​ដែល​កង​កម្លាំង​កុម្មុយ​នីស​្ត​វៀត​ណាម​ បាន​ផ្ដល់​ឲ្យ​ខ្មែរ​ក្រហម​នូវ​ការ​បណ្ដុះ​បណ្ដាល​ជា​ច្រើន​ និង​ជំនួយ​​​កងទ័ព​​​​ដោយផ្ទាល់​​​ដើម្បី​ទទួលបាន​​​ជ័យ​ជម្នះលើ​រដ្ឋាភិបាលរបស់​​​​លោក លន់ នល់ ក្នុងឆ្នាំ១៩៧៥នោះ ភាគីទាំង​ពីរ​ក៏​បាន​បែកបាក់​​​គ្នា​​​​​វិញ​​​ភ្លាមៗ​​​​ដែរ​​​។ ដោយ​មាន​ជំនួយ​ពីក្រុម​​​ខ្មែរ​ក្រហម​ផ្ដាច់​ខ្លួន​ ទីបំផុត​​​រដ្ឋាភិបាល​កុម្មុយនីស​វៀត​ណាម​ថ្មី ​​​ក៏​​​ផ្ដួល​រំលំ​របប​ខ្មែរក្រហម​​​បាន​​​នៅ​​​ក្នុង​ឆ្នាំ​១៩៧៩ ហើយ​បាន​​​រក្សា​​​កងកម្លាំង​​​កាន់​​កាប់ប្រទេស​កម្ពុជា​រយៈពេល​១០​ឆ្នាំ​ទៀត​។

មន្ទីរ​ឃុំឃាំង​ទួលស្លែង​ ដែល​ខ្មែរ​ក្រហម​ហៅ​ថា មន្ទីរ​ស-២១​ ចាប់តាំង​ពីពេល​នោះមក​​​បាន​ក្លាយ​ជា​សារមន្ទីរ​​​ដែល​មាន​រូប​ថត​អតីត​​​ទណ្ឌិត និង​បាន​​​ក្លាយ​ជាមណ្ឌល​ទេស​ចរណ៍​មួយ​ក្នុង​ចំណោម​មណ្ឌល​ទេស​ចរណ៍​ដ៏​ពេញនិយម​​​ និង​​​​គួរ​ឲ្យ​​​សោក​សង្រេង​​​​បំផុត​​​​ក្នុង​​​ប្រទេស​​​កម្ពុជា​​​។

សារមន្ទីរ​​​​នេះក៏​បាន​ផ្ដល់​នូវ​ភ័ស្តុ​តាង​ជា​ច្រើន ​​​ដែល​​​សាលា​ក្ដី​ខ្មែរ​ក្រហម​បាន​​​ប្រើ​ប្រាស់​​​ ដើម្បី​​​ផ្ដន្ទាទោស​ប្រធាន​ពន្ធនា​គារ​ស-២១ កាំង ហ្គេចអ៊ាវ ហៅ ឌុច ឲ្យ​ជាប់ពន្ធនាគារ​អស់​​​មួយ​ជីវិត កាលពីឆ្នាំ​មុន បន្ទាប់​ពីបាន​កាត់​​​​ឲ្យ​​​ជននេះ​​​ជាប់ទោស​ពីបទ​ឧក្រិដ្ឋកម្ម​​​ប្រឆាំង​​មនុស្ស​ជាតិ​។

អំឡុង​​​សន្និសីទ​សារព័ត៌មាន​មួយ​​​កាល ពីថ្ងៃ​សៅរ៍ លោក​ ជុំ មីុ ប្រធាន​សមាគម​ជន​រង​គ្រោះនៃ​របប​កម្ពុជា​ប្រជា​ធិបតេយ្យ និង​ជា​មនុស្ស​ម្នាក់​ក្នុង​ចំណោម​មនុស្ស​តិចបំផុត​​​ ដែល​បាន​រួច​ជីវិត​ពីមន្ទីរ​ឃុំឃាំង​ទួលស្លែង​ បាន​ឲ្យ​​​ដឹង​​​​ថា លោក​​​បាន​រៀប​ចំ​សន្នីសីទ​សារព័ត៌មាន​នេះឡើង​ដោយ​ខ្លួន​ឯង​ផ្ទាល់​ បន្ទាប់​ពីបាន​ឮ​សុន្ទរកថា​របស់​លោក​ កឹម សុខា តាម​វិទ្យុ​។

លោកបាន​មាន​ប្រសាសន៍​ថា “ វា​បាន​ធ្វើ​ឲ្យ​ខ្ញុំ​ឈឺចាប់​ជាង​ពេល​ណាៗទំាង​អស់​នៅ​ពេល​បាន​​​ឮ​លោក កឹម សុខា ថ្លែង​​​ជា​​​​សាធា​រណៈ​ថា មន្ទីរ​ឃុំឃាំង​ទួល​ស្លែងគ្រាន់​តែ​ជា​ឆាក​ល្ខោន​ និង​ថា ​របប​កម្ពុជា​ប្រជា​ធិបតេយ្យ​​គឺជា​​ល្ខោន​ដែល​រៀប​ចំ​ឡើង​ដោយពួក​​កុម្មុយ​នីស្ត​​វៀត​ណាម​​​​នោះ​​​”។ លោក​បាន​បន្ត​ថា “ នេះ​​​គឺ​​ពិតជា​​​ជា​ការ​​​ប្រមាថ​​​ដល់​​​អ្នក​ដែល​បាន​បាត់​បង់​ជីវិត​អំឡុង​​​​របប​កម្ពុជា​ប្រជា​ធិបតេយ្យ ជា​ពិសេស​គឺ​​​អ្នក​ដែល​បាន​ស្លាប់​ក្នុង​មន្ទីរឃុំ​ឃាំង​ទួលស្លែង​នេះ”។

លោក​​​ ជុំ មីុ​​​ បាន​ទាម​ទារ​ឲ្យ​លោក​ កឹម សុខា មក​កាន់​អតីត​មន្ទីរ​ឃុំឃាំង​នេះ ដើម្បី​សូម​អភ័យ​ទោស​ និង​ដក​​​ពាក្យ​​សម្ដី​របស់​ខ្លួន​វិញ​​​ដោយ​ផ្ទាល់​។  លោកបាន​មាន​ប្រសាសន៍​ថា “ ប្រសិន​បើ​លោក​ កឹម សុខា មិន​មក​សូម​អភ័យ​ទោស​ទេនោះ​​​ ខ្ញុំ​នឹង​ចាត់​វិធាន​ការ​ផ្សេង​ទៀត។ យើង​នឹង​ធ្វើ​បាតុកម្ម​ទ្រង់​ទ្រាយ​ធំ​មួយ​​​នៅឯ​ការិយាល័យ​របស់​គាត់​”។

នៅពេល​​​ទាក់ទងបាន​​​កាលពី​ម្សិលមិញ​​​ លោក កឹម សុខា ​បដិសេធ​មិន​ធ្វើ​អត្ថា​ធិប្បាយ​ពាក់​ព័ន្ធ​នឹង​សម្ដី​របស់​លោក​​​ទេ​​​ ហើយ​ក៏​មិន​បាន​​បដិសេធ​ ឬ​​​ទទួលស្គាល់​​​​ថា តើ​​​លោក​​​​​បាន​​និយាយដូច្នោះមែន​​​ឬ​​​អត់​​​​ដែរ។ លោក កឹម សុខា បាន​មាន​ប្រសាសន៍​ថា “ ខ្ញុំ​គ្មាន​យោបល់​ទេ។ ហើយ​ខ្ញុំក៏​គ្មាន​ការ​ព្រួយ​បារម្ភ​ដែរ។ ខ្ញុំ​បារម្ភ​តែអំពី​ការ​បោះ​ឆ្នោត​ប៉ុណ្ណោះ​”។
​ទោះជា​យ៉ាង​ណា នៅ​ក្នុង​កិច្ច​សម្ភាស​ មួយ​​​ជាមួយ​​វិទ្យុ​អាស៊ីសេរី​​​ កាលពីថ្ងៃ​សៅរ៍​​​ លោក កឹម​ សុខា ហាក់​ដូច​ជាបាន​​​ទទួលស្គាល់​ថា លោក​​​បាន​និយាយ​​​ដូច្នោះ​​​មែន​​​។
លោក​​​​​ថ្លែង​ថា “ នេះគឺ​ជា​អ្វី​ដែល​ខ្ញុំ​បាន​រៀនពី​ប្រវត្តិ​សាស្ត្រ​។ ខ្ញុំ​​ដឹងថា ខ្មែរ​​ក្រហម​មាន​ទំនាក់​ទំនង​​​ខ្លះ​​​​​ជាមួយ​​វៀតណាម។ ដូច្នេះ​​​ ​នេះ​​​គ្រាន់​តែ​ជា​គំនិត​របស់​ខ្ញុំប៉ុណ្ណោះ​​​មិនមែន​​​ជា​​​ការ​​​ចោទប្រកាន់​​​​​​ទេ។ ប៉ុន្ដែ​ ខ្ញុំ​សូម​អភ័យ​ទោស​ប្រសិន​បើ​គំនិតរបស់​ខ្ញុំ​ខុស​​ពី​​​​​ការ​​​យល់ឃើញ​​​របស់​​​អ្នក​ដទៃ​”។

តំណាង​រាស្ត្រ​គណ​បក្ស​​សង្គ្រោះ​ជាតិ​​​​​លោកស្រី​​​ មូរ សុខហួរ​​​ ​ និង​លោក យឹម សុវណ្ណដែល​ជា​បេក្ខជន​ឈរឈ្មោះ​​​ក្នុង​ការ​បោះ​ឆ្នោត​ជាតិ​ក្នុង​ខែ​កក្កដាខាងមុខ​​​នេះ​​​ ​បានឲ្យ​​​ដឹង​​​​ថា ខ្លួន​​​មិន​បាន​ឮសម្ដី​របស់​លោក កឹម សុខាទេ ដូច្នេះ​មិន​អាច​ទទួលស្គាល់​​​​ ឬ​បដិ​សេធសម្តី​​​​ដែល​​​គេ​​​ចោទថា​​​ លោក​​​ កឹម​​​ សុខា​​​ បាន​​​និយាយ​
​​​ពាក់ព័ន្ធ​នឹង​មន្ទីរ​ឃុំឃាំង​ទួលស្លែង​ឡើយ​។

ទោះជា​យ៉ាង​ណា​ លោក យឹម​ សុវណ្ណ​ លើកឡើង​ថា ការ​​​​អះអាងដែល​​​ថា​​​ ​វៀត​ណាម​​បាន​​​ប្រឌិត​​​រឿង​​​​​មន្ទីរ​ឃុំឃាំង​ និង​មណ្ឌល​ធ្វើ​ទារុណកម្ម​ទួល​ស្លែង​ គឺ​​​មិនមែន​ជា​គោល​នយោបាយ​បក្ស​ឡើយ។ លោក​មាន​ប្រសាសន៍​ថា “ វៀត​ណាម​ធ្លាប់​ជួយ​ខ្មែរ​ក្រហម​ ហើយ​ខ្មែរ​ក្រហម​បាន​បង្កើត​មន្ទីរ​ឃុំឃាំង​ទួល​ស្លែង​នេះឡើង។ នេះ​ជាជំហរ​​​របស់​​​គណបក្ស​ខ្ញុំ​”។

លោក​ យឹម សុវណ្ណ ក៏​បាន​សម្តែង​​​ការ​​​យល់​ស្រប​​ផងដែរ​ថា ខ្មែរ​ក្រហម​ជាអ្នក​​​ដែល​​បាន​ចាប់​មនុស្ស​ដាក់​ពន្ធ​នាគារ​ និង​ធ្វើ​ទារុណកម្ម​ពួកគេ​​​​នៅទី​នោះ។
ទោះជាយា៉ងណា​​​ គណ​បក្ស​ប្រឆាំង​ពិត​ជា​​​ធ្លាប់​មាន​ប្រវត្តិ​និយាយ​​​ប្រឆាំង​​វៀតណាម​មែន​។ លោក សម រង្ស៊ី ប្រធាន​គណ​បក្ស​សង្គ្រោះជាតិ ជា​រឿយៗ​តែងបាន​​​​ហៅ​វៀត​ណាមថា​ “ យួន” ដែល​ជា​ពាក្យ​មាក់​ងាយ​​ជន​ជាតិវៀតណាម​​​។

​លោក​ សម រង្ស៊ី តែង​​​បាន​ចោទ​ប្រកាន់រដ្ឋាភិបាល​ថា បាន​គោរព​​​​តាម​បញ្ជា​របស់​វៀត​ណាមហើយ​បច្ចុប្បន្ន​​លោក​​​កំពុង​រស់​នៅនិរទេស​ខ្លួន​ដោយខ្លួន​​​ឯង​ ដើម្បី​គេចពី​​​ទោស​​​ជាប់ពន្ធនាគារ​រយៈ​ពេល​១១​ឆ្នាំក្រោម​​​បទ​​​ចោទប្រកាន់​​​​​​ដែល​លោក​​​​ជឿ​ថា មាន​ហេតុផលនយោ​បាយ​ជុំវិញ​​​ការ​​​ប្រឆាំង​​​របស់​​​លោក​​​ចំពោះ​​​កិច្ច​ចរចា​រវាង​រដ្ឋាភិបាល​កម្ពុជា​​​និង​​​រដ្ឋាភិបាល​​​វៀត​ណាម​ ពាក់ព័ន្ធ​​​នឹង​​​​​​​​ព្រំដែន​មាន​​​ជម្លោះ​​​។

កាលពីថ្ងៃ​សៅរ៍​ លោក​ សុរិយា ស៊៊ូបេឌី (Surya Subedi) ប្រេសិត​សិទ្ធិ​មនុស្ស​របស់​អង្គការ​​សហ​ប្រជា​ជាតិ ដែល​កំពុង​តែ​បំពេញ​ទស្សនកិច្ច​នៅ​ក្នុង​ប្រទេស​កម្ពុជា​ បាន​ប្រាប់​អ្នក​នយោ​បាយ​នៅ​ក្នុង​ប្រទេស​នេះ​​ឲ្យ​ឈប់​  “ យករឿង​​​​ជាតិ​សាសន៍​​​មក​​​កេង​ចំណេញ​​​”​ អំឡុង​​​យុទ្ធនាការ​​​ឃោសនា​​​បោះ​​​ឆ្នោត​។

លោកបាន​មាន​ប្រសាសន៍​ក្នុង​​​​សន្និសីទ​សារព័ត៌មាន​​​​មួយ​​​ថា “ ខ្ញុំ​សូម​ជំរុញ​ភាគី​ពាក់​ព័ន្ធ​ទាំង​អស់​​ឲ្យ​​​បញ្ឈប់​​​ការ​​​​យករឿង​​​ជាតិ​សាសន៍​​​មក​​​កេង​ចំណេញ​​​ដើម្បី​ទទួលបាន​​​ការ​គាំ​ទ្រ​អំឡុង​​​​យុទ្ធនាការ​ឃោសនា​បោះ​ឆ្នោត​របស់​ខ្លួន និង​ឲ្យ​​​រួមគ្នា​​​បោះជំហាន​​​ឆ្ពោះ​ទៅ​រក​​ការ​កសាង​សង្គម​មួយ​ដែល​​​ប្រកប​ទៅ​ដោយ​ការ​អត់​ឱន​​ និង​ការ​​​ចុះ​សម្រុង​គ្នា”។

លោក ឆាំង​ យុ ប្រធាន​មជ្ឈមណ្ឌល​ឯក​សារ​កម្ពុជា​ ដែល​ជា​កន្លែង​ផ្ទុក​ឯក​សារ​សម័យ​​​ខ្មែរ​ក្រហម​ឈាន​មុខ​គេមួយ​​​​នៅ​ក្នុង​ប្រទេស​កម្ពុជា​ បាន​សង្កត់ធ្ងន់​​​​​​ថា ខ្មែរ​ក្រហម​​​ពិតជា​​​​បាន​​​យក​​​​ទួលស្លែង​ធ្វើ​​​ជា​មន្ទីរ​ឃុំឃាំង និង​មណ្ឌល​ធ្វើ​ទារុណកម្ម​ពិត​ប្រាកដ​​​មែន​​​ គ្មាន​អ្វី​គួរឲ្យ​​​សង្ស័យ​ទេ។​​​​​​ លោក​បាន​មាន​ប្រសាសន៍​ថា “ មន្ទីរ​ស-២១​​​​គឺ​ជា​មណ្ឌល​​ឧក្រិដ្ឋ​​កម្ម​​មិន​អាច​ប្រកែក​បាន​របស់​ខ្មែរ​ក្រហម​ ​។វា​ច្បាស់​ខ្លាំងណាស់​”។
លោក ឆាំង យុ បាន​​​បដិសេធ​​​មិនធ្វើ​អត្ថា​ធិប្បាយ​អំពី​មូលហេតុ​ដែល​លោក​ កឹម សុខា យល់ឃើញ​​​ផ្ទុយពីនេះ​​ទេ​​​។​​​ លោកបាន​​​បដិ​សេធ​​​​​​មិននិយាយ​​​ថា​ តើ​​​ ការ​​​ថ្លែងរបស់​​​លោក​​​ កឹម​​​ សុខា​​​ ​​​គឺ​​​​​​​​​ដោយ​ការ​យល់​ច្រឡំ​ពិតប្រាកដ​​​​អំពី​អតីត​កាល​​​ ឬ​ដោយសារ​​​ការ​​​កេង​ចំណេញ​​​​​​នយោ​បាយ​​​​ឡើយ​​​។

លោក ឆាំង យុ បាន​មាន​ប្រសាសន៍​ថា​​​ “ ការថ្លែង​​​របស់​គាត់​​ធ្វើ​ឲ្យ​ខ្ញុំ​នឹក​ឃើញ​ថា អ្វី​ៗអាច​ត្រូវគេ​​​ភ្លេច​​​​ ប្រសិន​បើ​យើង​មិន​រំឭក​សាធារណជន​​​​ឲ្យ​​​បាន​​​ជាប់​​​ជា​​​ប្រចាំ​​​ទេ​នោះ​”​។ លោក​បាន​បន្ថែម​ថា​ “ មាន​ភ័ស្តុ​តាង​ ​​​​​​ច្រើនអនេក​​​ដែល​បង្ហាញ​ថា ទួល​ស្លែង​គឺជា​មណ្ឌល​​ឧក្រិដ្ឋ​កម្ម​របស់​ខ្មែរ​ក្រហម​”៕

(រាយការណ៍​បន្ថែម​ដោយ នៅ វណ្ណារិន​)
ប្រែសម្រួល​ដោយ ហម សុផាណ្ណា​​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស