ប្រេសិត​ពិសេស​អ.ស.ប.ថា ការ​​​ ​តាំង​ចិត្ត​លើ​​​ការ​លើក​កម្ពស់​សិទ្ធិ​ មនុស្ស​កាន់​តែ​មា​ន​ភាព​​រឹង​មាំ​

លោក សុរិយា ស៊ូបេឌី (Surya Subedi) ប្រេសិត​ពិសេស​អង្គការ​សហ​ប្រជាជាតិ​ទទួល​​​​បន្ទុក​សិទ្ធិ​មនុស្ស​​ បាន​បញ្ចប់​បេសកកម្ម​លើក​ទី​៩​របស់​ខ្លួន​ប្រចាំ​ប្រទេស​កម្ពុជា​ កាល​ពី​ថ្ងៃ​សៅរ៍ ដោយ​លើក​ឡើង​ថា ការ​រិះ​គន់​ដែល​លោក​បាន​ទទួល​ រួម​ទាំង​ការ​តវ៉ា​​កាល​ពី​សប្ដាហ៍​មុន​របស់​ក្រុម​និស្សិត​ ដែល​អំពាវ​នាវ​​សុំ​ឲ្យ​មាន​ការ​បញ្ចប់​អាណត្តិ​របស់​លោក​ គឺ​​បាន​ធ្វើ​ឲ្យ​លោក​​មាន​ទឹក​ចិត្ត​ចង់​បន្ដ​ការ​ងារ​របស់​លោក​តទៅទៀត​។

ទោះ​បី​ជា​លោក សុរិយា ស៊ូបេឌី បាន​ចាក​ចេញ​ទៅ​ដោយ​នាំ​យក​ភាព​វិជ្ជមាន​មួយ​ចំនួន​ពី​បេសកកម្ម​រយៈ​ពេល​មួយ​សប្ដាហ៍​របស់​លោក​ក៏​ដោយ ក៏​​​បេសកកម្ម​របស់​លោក​ត្រូវ​បាន​ធ្វើ​ឲ្យ​ខូច​ម្ដង​ទៀត​ ដោយ​សារ​ការ​លើក​ឡើង​មិន​ល្អ​ពី​សមាជិក​រដ្ឋាភិបាល​ ការចោទ​ប្រកាន់​ថា អង្គការ​ប្រព័ន្ធ​ផ្សព្វ​ផ្សាយ​មួយ​ចំនួនត្រូវ​បាន​ណែនាំ​មិន​ឲ្យ​រាយការណ៍​អំពី​ការ​មក​បំពេញ​បេសកកម្ម​របស់​លោក​ និង​​សារ​តែ​ការ​តវ៉ា​របស់​ក្រុម​និស្សិត​ ដែល​ទំនង​ជា​រៀប​ចំ​ឡើង​ដោយ​ចលនា​យុវជន​របស់​គណបក្ស​កាន់​អំណាច​ គឺ​គណបក្ស​ប្រជាជន​កម្ពុជាអំឡុង​ពេល​លោក​ធ្វើ​​បាឋកថា​អំពី​ការ​វិនិយោគ​​នោះ​។

ថ្លែង​នៅ​ឯ​ការិយាល័យ​ឧត្ដម​ស្នង​ការ​ទទួល​បន្ទុក​សិទ្ធិ​មនុស្ស​ប្រចាំ​ប្រទេស​កម្ពុជា​​​កាល​ពី​ថ្ងៃ​សៅរ៍ លោក​ សុរិយា ស៊ូបេឌី បាន​ប្រាប់​អ្នក​យក​ព័ត៌មាន​ថា លោក​ពេញ​ចិត្ត​ចំពោះ​លទ្ធផល​នៃ​កិច្ច​ប្រជុំ​មួយ​ចំនួន​ ដែល​បាន​ធ្វើ​ឡើង​ជា​មួយ​មន្ត្រី​រដ្ឋាភិបាល​ជាន់​ខ្ពស់​ ហើយ​លោក​បាន​លើក​ឡើង​ថា លោក​​​មាន​ទឹក​ចិត្ត​ចំពោះ​​សញ្ញា​​បង្ហាញ​ថា រដ្ឋាភិបាល​កំពុង​តែ​អនុវត្ត​​តាម​អនុសាសន៍​របស់​លោក ជាពិសេស​ពាក់​ព័ន្ធ​នឹង​កំណែ​ទម្រង់​របស់​ប្រព័ន្ធ​តុលាការ​។

លោក សុរិយា ស៊ូបេឌី បាន​លើក​ឡើង​នៅ​ក្នុង​សុន្ទរកថា​ព្រាង​ទុក​ជា​មុន​​ថា  “​មាន​ការ​តវ៉ា​ពីរ​ដែល​រៀប​ចំ​ឡើង​អំឡុង​បេសក​​​កម្ម​របស់​ខ្ញុំ​ ដើម្បី​ប្រឆាំង​នឹង​ការ​ងារ​សិទ្ធិ​មនុស្ស​របស់​ខ្ញុំ​ នៅ​ក្នុង​ប្រទេស​កម្ពុជា​ ប៉ុន្ដែ ការ​តវ៉ា​ទាំង​ពីរ​នេះ​មិន​អាច​រារាំង​ខ្ញុំ​មិន​ឲ្យ​បំពេញ​ការ​ងារ​នៅ​ក្នុង​​អាណត្តិ​របស់​ខ្ញុំ​ ដែល​អង្គការ​សហ​ប្រជា​ជាតិ​បាន​ចាត់​តាំង​ខ្ញុំ​ឲ្យ​មក​ធ្វើ​ការ​នៅ​ក្នុង​ប្រទេស​ក​ម្ពុជា​នោះទេ​”។

លោក​បាន​បន្ថែម​ថា  “ ប្រសិន​បើ​​គេ​​អាន​សេចក្តី​រាយ​ការណ៍​របស់​ប្រព័ន្ធ​ផ្សព្វ​ផ្សាយ​ ការ​តវ៉ា​ទាំង​ពីរ​នេះ​ ហាក់​បី​ដូច​ជា​មាន​ការ​រៀប​ចំ​ ​និង​​ហាក់​ដូច​ជា​បង្ហាញ​ពី​​ទស្សន​របស់​​មនុស្ស​មួយ​ចំនួន​តូច​​នៅ​ក្នុង​ប្រទេស​កម្ពុជា​ ដែល​​មាន​​បំណង​​ធ្វើ​ឲ្យ​ខ្ញុំ​​បរាជ័យ​​។ តែ​ផ្ទុយ​ទៅ​វិញ​ខ្ញុំ​ត្រូវ​បាន​លើក​ទឹក​ចិត្ត​យ៉ាង​ខ្លាំង​ដោយ​សារ​ការ​​​គាំ​ទ្រ​ជា​ច្រើន​ដែល​ខ្ញុំ​ទទួល​បាន​ពី​ប្រជាពល​រដ្ឋ​​ ​គ្រប់​​​ជាន់​ថ្នាក់​អំឡុង​ខ្ញុំ​បំពេញ​ការ​ងារ​នេះដើម្បី​នាំ​មក​នូវ​ភាព​ល្អ​ប្រសើរ​សម្រាប់​ប្រទេស​កម្ពុជា​ និង​សម្រាប់​សន្ដិភាព​យូរ​អង្វែង​ សម្រាប់​​​​​​ប្រជា​ធិបតេយ្យ​ ន​ិង​សម្រាប់​ភាព​រុង​រឿង​ ហើយ​ខ្ញុំ​នឹង​បន្ដ​កិច្ច​ខិត​ខំ​ប្រឹង​ប្រែង​របស់​ខ្ញុំ​បន្ដ​ទៀត​”។

នៅ​ក្នុង​កិច្ច​សម្ភាស​មួយ​បន្ទាប់​ពី​ការ​ថ្លែង​​របស់​លោក​ លោក សុរិយា ស៊ូបេឌី បាន​មាន​ប្រសាសន៍​ថា លោក​មាន​បំណង​ចង់​បន្ដ​​ការ​ងារ​របស់​​លោក​ក្នុង​ប្រទេស​កម្ពុជា​ ហើយ​បាន​លើក​ឡើង​ថា លោក​មិន​ដូច​ជា​បុព្វា​​​ធិ​​​ការ​​​ី​​​​​​របស់​​​​​​​​លោក​នោះ​ទេ​ លោក​នឹង​មិន​ចាក​ចេញ​ពី​តំណែង​របស់​លោក​ដោយ​សារ​តែ​ការ​ប្រឆាំង​​​​ពី​រដ្ឋាភិបាល​ឡើយ​។

លោក​ សុរិយា ស៊ូបេឌី បាន​មាន​ប្រសា​​​សន៍​​​​​សំដៅ​ទៅ​លើ​ការ​តវ៉ា​មួយ​កាល​ពី​ល្ងាច​ថ្ងៃ​អង្គារ​ អំឡុង​ពេល​​ក្រុម​និស្សិត​បាន​បង្ហាញ​បដា​ទាំង​កំហឹង​ទាម​ទារ​ឲ្យ​លោក​បញ្ចប់​អាណត្តិ​របស់​​លោក​នៅ​ក្នុង​ប្រទេស​កម្ពុជា​​ថា“ មនុស្ស​ជា​ច្រើន​ប្រហែល​ជា​គិត​ថា ដោយ​សារ​តែ​ការ​តវ៉ា​នេះ​ធ្វើ​ឲ្យ​ខ្ញុំ​បាក់​ទឹក​ចិត្ត​ ឬក៏​ធ្វើឲ្យ​ខ្ញុំ​រាថយ​។ ប៉ុន្ដែ តាម​ពិត​ទៅ​​ការតាំង​ចិត្ត​របស់​ខ្ញុំ ដើម្បី​ជួយ​ប្រជាពល​រដ្ឋ​នៅ​ក្នុង​ប្រទេស​កម្ពុជា​ គឺ​កាន់​តែ​​មាន​​ខ្លាំង​ឡើងៗ​ អំឡុង​​​​បេសកកម្ម​នេះ​”។

លោក​បាន​បន្ថែម​ថា  “ ប្រជា​ពល​រដ្ឋ​ខ្លះ​បាន​លើក​ឡើង​ថា វា​បាន​ធ្វើ​ឲ្យ​មាន​ការ​ចាប់​អារម្មណ៍​​​ច្រើនក្នុង​ចំណោម​យុវជន​​ចំពោះ​បញ្ហា​ទាំង​នេះ​ ដូច​ជា​ប្រជាធិបតេយ្យ និង​អភិ​​​បាល​កិច្ច​ល្អ​ក្នុង​ប្រទេស​កម្ពុជា​។ ប្រសិន​បើ​នេះ​គឺ​ជា​​​ការ​ពិត​​មែន​នោះ​ វា​គឺ​ជា​ការ​អភិ​​​វឌ្ឍ
​មួយ​ដ៏​គួរ​ឲ្យ​ស្វាគមន៍​។ យុវជន​គួរ​តែ​ចាប់​អារម្មណ៍​លើ​បញ្ហា​ទាំង​នេះ​។ ប្រសិន​បើ​​វា​ដូច្នេះ​មែន​នោះ​ វា​គឺ​ជា​រឿង​គួរ​ឲ្យ​ស្វាគមន៍​”​​​។

លោក សុរិយា ស៊ូបេឌី បាន​មាន​ប្រសាសន៍​​​​ថា ប្រសិន​បើ​អាណត្តិ​របស់​លោក​ដែល​បន្ដ​ជា​រៀង​រាល់​ឆ្នាំ ត្រូវ​បាន​បន្ដ​ទៀត​នោះ​ លោក​​​​
នឹង​នៅ​តែ​កាន់​តំណែង​របស់​​លោក។ លោក​បាន​មាន​ប្រសាសន៍​ថា  “ ប៉ុន្ដែ​ ក្នុង​ពេល​ឥឡូវ​ខ្ញុំ​មិន​ទាន់​ជិនណាយ​នឹង​ប្រទេស​កម្ពុជា​ទេ​”។
លោក យ៉ាស ហ្គាយ (Yash Ghai) សាស្ត្រា​ចារ្យ​ច្បាប់​ជន​ជាតិ​កេន​យ៉ា ដែល​ជា​​​បុព្វា​​​ធិ​​​ការ​​​ី​​​​​​​​​​លោក ​​​ស៊ូបេឌី បាន​ទទួល​រង​ការ​រំលោភ​​​បំពាន​​ខាង​​ពាក្យ​សម្ដី​យ៉ាង​ច្រើន​ពី​មន្ត្រី​រដ្ឋា​​​ភិបាល​ ជា​ពិសេស​លោក​នាយក​រដ្ឋ​មន្ត្រី​ ហ៊ុន សែន អំឡុង​អាណត្តិ​បី​ឆ្នាំ​របស់​លោក​ជា​ប្រេសិត​ពិសេស​។

ដោយ​សារបញ្ហា​បែប​នេះ​ បាន​ធ្វើ​ឲ្យ​លោក​លាលែង​ពី​តំណែង​កាល​ពី​ចុង​ឆ្នាំ​២០០៨​ ហើយ​នៅ​ក្នុង​លិខិត​លាលែ​ង​ពី​តំណែង​របស់​លោក លោក​បាន​រៀប​រាប់​ថា ខ្វះ​ការ​គាំ​ទ្រ​ពី​អង្គការ​សហប្រជាជាតិ​ ខណៈ​លោក​តតាំង​ជាមួយ​រដ្ឋាភិបាល​​ដែល​រារាំង​ដល់​ការ​ងារ​របស់​លោក​នោះ​។
​ដូច​លោក យ៉ាស ហ្គាយ​ ដែរ​​នោះ លោក​ ភីតធើ ឡឺប្រ៊ិច (Peter Leuprecht) សាស្ត្រា​​​ចារ្យ​ច្បាប់​ជន​ជាតិ​អូស្ត្រាលី​​បុព្វា​​​ធិ​​​ការី​​​លោក យ៉ាស ហ្គាយ ក៏​បាន​ចាក​ចេញ​ពី​តំណែង​ដែរ​ បន្ទាប់​ពី​មាន​ទំនាក់​ទំនង​មិន​សូវ​​ល្អ​អស់​រយៈ​ពេល​ប្រាំ​ឆ្នាំ​​ជាមួយ​រដ្ឋាភិបាល​។

ប៉ុន្ដែ លោក សុរិយា​ ស៊ូបេឌី បាន​មាន​ប្រសាសន៍​ថា ការ​រិះ​គន់​បែប​នេះ​ គឺ​គ្រាន់​តែ​ជា​ផ្នែក​មួយ​នៃ​តួនាទី​របស់​ប្រេសិត​ពិសេស​ទទួល​បន្ទុក​ផ្នែក​សិទ្ធិ​នៅ​ក្នុង​ប្រទេស​កម្ពុជា​តែ​ប៉ុណ្ណោះ​ ហើយ​លោក​នឹង​តាំង​ចិត្ត​ជម្នះ​​​ភាព​តាន​តឹង​ដែល​រារាំង​ដល់​បេសកកម្ម​នីមួយ​ៗ​រ​បស់​លោក នៅ​ក្នុង​ប្រទេស​កម្ពុជា​​។

​លោក​បាន​មាន​ប្រសាសន៍​ថា “ការ​ប្រព្រឹត្ត​ចំពោះ​​ខ្ញុំបែប​នេះ​​ និង​ការ​និយាយ​អំពី​​រូប​ខ្ញុំ​បែប​នេះ​​ មិន​មែន​ជា​រឿង​ថ្មី​ ហើយ​វា​មិន​បាន
​ធ្វើ​ឲ្យ​ខ្ញុំ​ភ្ញាក់​ផ្អើល​ឡើយ​។ទំនាក់​ទំនង​រវាង​ប្រេសិត​ពិសេស​ និង​រដ្ឋាភិបា​ល​នៅ​​​​កម្ពុជា គឺ​តែ​ង​តែ​មាន​ភាព​លំបាក​។ ប៉ុន្ដែ ខ្ញុំ​គិត​ថា ខ្ញុំ​គឺ​ជា​មនុស្ស​ម្នាក់​​ដែល​​មាន​ការ​អត់​ធ្មត់​ខ្លាំង​”។

លោក​បាន​បន្ថែម​ថា  “ខ្ញុំ​​​ប្តេជ្ញា​​​ដោយ​​​ផ្ទាល់​ខ្លួន​និង​តាម​វិជ្ជាជីវៈ​​ចំពោះ​​​សិទ្ធិ​មនុស្ស​​​។​ក្នុង​នាម​ជា​មេធាវី​ម្នាក់​​ ភាព​ស្មោះ​ត្រង់​ដំបូង​បំផុត​​របស់​ខ្ញុំ​ គឺនីតិរដ្ឋ ប្រជាធិបតេយ្យ​និង​សិទ្ធិ​មនុស្ស​។ នេះ​ហើយ​ គឺ​ជា​អ្វី​ដែល​ខ្ញុំ​ជឿជាក់។ ហេតុ​ច្នេះ​គោល​ដៅ​ចម្បង​គឺ​ត្រូវ​តែ​ខំ​ប្រឹង​ប្រែង​ឲ្យ​អស់​ពី​សមត្ថភាព​ ក្រោម​​កាលៈទេស​ៈ​បែប​នេះ​​។ អ្វី​ដែល​ខ្ញុំ​កំពុង​ធ្វើ​ គឺ​ការ​ងារ​ឥត​ប្រាក់​ខែ​ ប៉ុន្ដែ​ខ្ញុំ​កំពុង​ធ្វើ​អ្វី​ៗ​សម្រាប់​​​​គោល​ដៅ​ខ្ពស់​​ជាង​​នេះ​។​​​

ក​បន្ថែម​ថា អ្នក​ដែល​មាន​សមត្ថភាព​ អ្នក​ដែល​ត្រូវ​អង្គការ​សហ​ប្រជា​ជាតិ​តែង​តាំង​​មិន​គួរ​រាថយ​ពី​គោល​​​​ដៅ​ដ៏​ខ្ពស់​នេះ​ទេ ពី​ព្រោះ​យើង​ទទួល​រង​ការ​​យាយី​​ និង​កា​រ​បំឭភិត​បំភ័យ​”។ កាល​ពី​សប្ដាហ៍​មុន លោក សុរិយា ស៊ូបេឌី បាន​ជួប​ដាច់​ដោយ​ឡែក​ពី​គ្នា​ជាមួយ​លោក ស ខេង រដ្ឋ​មន្ត្រី​ក្រសួង​មហាផ្ទៃ​ លោក ឱម យិុនទៀង ប្រធាន​គណៈកម្មាធិការ​សិទ្ធិ​មនុស្សកម្ពុជា​ និង​លោក អុឹម សួស្ដី ប្រធាន​គណៈ​​​កម្មា​​​ធិការ​ជាតិ​រៀប​ចំ​ការ​បោះ​ឆ្នោត​​។

លោក​បាន​មាន​ប្រសាសន៍​ថា  “កិច្ច​ពិភា​​​ក្សា​
នេះ​​មាន​ភាព​ស្មោះ​ត្រង់​​ រីករាយ​ និង​ផ្លែផ្កា”​​​។
លោក​បាន​បន្ថែម​ថា “​ពួក​គាត់​​នឹង​ផ្ដល់​ព័ត៌មាន​​
និង​ទទួល​ស្គាល់​​ការ​ខ្វះ​ចន្លោះ​​ ហើយ​​និង​ត្រៀម​ខ្លួន​ធ្វើ​ការ​ជាមួយ​ខ្ញុំ​ក្នុង​រូបភាព​ស្ថាបនា​ ដើម្បី​ដោះ​ស្រាយ​បញ្ហា​​​ដែល​នៅ​សេស​​​សល់​
ពាក់​ព័ន្ធ​នឹង​ការ​ការ​ពារ​សិទ្ធិ​មនុស្ស​ ប្រជា​ធិបតេយ្យ​ និង​ការ​គោរព​​ច្បាប់​ពិត​ប្រាកដ​”។
សេចក្ដី​ថ្លែងការណ៍​របស់​លោក សុរិយា ស៊ូបេឌី បាន​លើក​ឡើង​ថា  “ពាក់​ព័ន្ធ​នឹង​អនុសាសន៍​ដែល​​លើក​ឡើង​នៅ​ក្នុង​របាយ​​​ការណ៍​របស់​ខ្ញុំ​ស្ដី​ពី​មធ្យោបាយ​ពង្រឹង​ឯក​​​រាជ​​​ភាព​ និង​សមត្ថភាព​ប្រព័ន្ធ​តុលាការ​ ខ្ញុំ​បាន​កត់​សម្គាល់​ឃើញ​ថា ការ​អនុវត្ត​តាម​អនុសាសន៍​ទាំង​នេះ​ គឺ​មាន​សភាព​យឺត​យ៉ាវ​ណាស់​”។
សេចក្ដី​ថ្លែងការណ៍​នេះបាន​បន្ដ​ថា
“ ទោះ​ជា​យ៉ាង​ណា​ក៏​ដោយ​ ខ្ញុំ​ត្រូវ​បាន​លើក​ទឹក​ចិត្ត​យ៉ាង​ខ្លាំង​ដោយ​ការ​ធានា​​ចំពោះ​​ខ្ញុំ​​ថា សេចក្ដី​ព្រាង​ច្បាប់​​សំខាន់ៗ​ទាំង​​បី​ស្ដី​ពី​លក្ខន្តិកៈ​​​​
​​​​ចៅក្រម​ និង​ព្រះរាជ​អាជ្ញា​​​​ស្ដី​ពី​ការ​រៀប​ចំ​តុលាការ និង​ស្តី​ពី​​ឧត្ដម​ក្រុម​ប្រឹក្សា​នៃ​អង្គ​ចៅក្រម​ដែល​ជា​ផ្នែក​​នៃ​អនុសាសន៍​សំខាន់​ៗ
​របស់​ខ្ញុំ​ ​ដែល​ជិត​បញ្ចប់​និង​ត្រូវ​លើក​យក​មក​ពិភាក្សា​នៅ​ក្នុង​រដ្ឋ​សភា​ នៅ​ក្នុង​ឆមាស​​ទី​១​​​​​នៃ​ឆ្នាំ​២០១៤”។
លោក​បាន​មាន​ប្រសាសន៍​ថា ខណៈ​ពេល
​លោក​ត្រូវ​បាន​ផ្ដល់​ដំណឹង​អំពី​​ការ​​លំបាក​​នៅ​ក្នុង​ការ​អនុវត្ត​អនុសាសន៍​​មួយ​ចំនួន​របស់​លោក​ស្ដី​ពី​កំណែ​ទម្រង់​រដ្ឋ​សភា​​​​ លោក​ត្រូវ​បាន​លើក​ទឹក​ចិត្ត​ដោយ​ការ​ឆ្លើយ​តប​វិជ្ជមាន​ និង​ឆន្ទៈ​​​ ដើម្បី​ធ្វើ​ឲ្យ​មាន​ការ​ផ្លាស់​ប្ដូរ​​ឲ្យ​បាន​ច្រើន​តាម​ដែល​អាច​ធ្វើ​ទៅ​បាន​។
ការ​​បំពេញ​បេសកកម្ម​នេះ​ត្រូវ​បាន​ធ្វើ​ឡើង​​ត្រឹម​តែ​ពីរ​ខែ​ប៉ុណ្ណោះ​​​​មុន​​ការ​បោះ​ឆ្នោត​ជាតិ​​នៅ​ថ្ងៃ​ទី​២៨ ខែកក្កដា និង​ស្រប​ពេល​ដែល​មាន​ការ​ព្រួយ​បារម្ភ​ពី​អ្នក​ឃ្លាំ​មើល​ការ​បោះ​ឆ្នោត​ឯករាជ្យ ដែល​ថា ការ​បោះ​ឆ្នោត​នេះ​នឹង​មាន​ភាព​យុត្តិធម៌​តិច​តួច​នៅ​ក្នុង​រយៈ​ពេល​២០​ឆ្នាំ​មក​នេះ ចាប់​តាំង​ពី​អាជ្ញាធរ​​បណ្តោះ​អាសន្ន​អង្គការ​សហ​​​ប្រជា​​​ជាតិ​ប្រចាំ​កម្ពុជា​បាន​រៀប​ចំ​ការ​បោះ​ឆ្នោត​ជាតិ​ជា​លើ​ក​ដំបូង​ ចាប់​តាំង​ពី​​ការ​បញ្ចប់​របប​ខ្មែរ​ក្រហម​មក​។
ទោះ​​​ជា​​​យ៉ាងណា​​​ លោក ​​​សុរិយា ​​​ស៊ូបេឌី ​​​បាន​​​មាន​​​ប្រសាសន៍​​​ថា បេសកកម្ម​​​នៅ​​​ក្នុង​​​ប្រទេស​​​កម្ពុជា​​​លើ​ក​​​នេះ​​​ វា​​​ផ្ទុយ​​​គ្នា​​​ស្រឡះ​​​ទៅ​​​នឹង​​​បេសកកម្ម​​​លើក​​​មុន​​​របស់​​​លោក​​​ដែល​​​គ្មានមន្ត្រី​​​រដ្ឋាភិបាល​​​ណា​​​មួយ​​​យល់​​​ព្រម​​​ជួប​​​​​​លោក​​​នោះ​​​។
លោក​​​បាន​​​មាន​​​ប្រសាសន៍​​​នៅ​​​ក្នុង​​​កិច្ច​​​សម្ភាស​​​ថា “ មាន​ល្អ​មាន​អាក្រក់​​​​”។លោក​​​បាន​​​បន្ថែម​​​ថា “ឧទាហរណ៍​​​អំឡុង​​​បេសកកម្ម​​​លើក​​​មុន​​​របស់​​​ខ្ញុំ​​​គ្មាន​​​មន្ត្រី​​​រដ្ឋាភិបាល​​​ណា​​​មាន​​​បំណង​​​ចង់​​​ជួប​​​ខ្ញុំ​​​ឡើយ​​​ ប៉ុន្ដែ សម្រាប់​​​បេសកកម្ម​​​លើក​​​នេះវិញ​​​ ពួក​​​គេ​​​មិនគ្រាន់​​​តែ​​​​ចង់​​​​ជួប​​​​​​ខ្ញុំ​​​ទេ ប៉ុន្ដែ​​​ថែម​​​ទាំង​​​​​​ផ្ដល់​​​ព័ត៌មាន​​​ឲ្យ​​​ខ្ញុំ​​​ថែម​​​ទៀត​​​ ដោយ​​​​និយាយ​ថា​ អនុសាសន៍​​​របស់​​​​​​ខ្ញុំ​​​កំពុង​​​តែ​​​ត្រូវ​​​​បាន​អនុវត្ត​​​ ​​​យក​​​មក​​​ពិភា​​​ក្សា​​​
ហើយ​​​និង​​​កំណត់​​​ពេល​​​វេលា​​​ជាក់​​​លាក់​​​ឲ្យ​​​ខ្ញុំ​​​ផង​​​ដែរ​​​​។​​បែប​នេះ​​​​​ធ្វើ​​​ឲ្យ​​​ខ្ញុំ​​​មាន​​​អារម្មណ៍​​​ពេញ​​​ចិត្តថា​ ​​​ការ​​​ងារ​​​របស់​​​ខ្ញុំ​​​កំពុង​​​​​​ចូល​​​រួម​​​ចំណែ​​​ក​​​នៅ​​​ក្នុង​​​ប្រទេស​​​កម្ពុជា​​​​​​”។
លោក​​​បាន​​​លើកឡើង​​​ថា លោកមិន​​​ច្បាស់​​​​​​
ទេ​​​ថា ហេតុអ្វី​​​បាន​​​ជា​​​មាន​​​ការ​​​ផ្លាស់​​​ប្ដូរ​​​បែប​​​នេះ ប៉ុន្ដែ​​​វា​​​ទំនង​​​ជា​​​​​​​​​មាន​​​ការ​​​យល់​​​ឃើញ​​​ថា
រដ្ឋាភិបាល​​​នឹង​​​ទទួល​​​បាន​​​ផល​​​ប្រយោជន៍​​​ច្រើន​​​ ប្រសិន​​​បើ​​​ខ្លួន​​​សហការ​​​នោះ​​​។
លោក​​​បាន​​​មាន​​​ប្រសាសន៍​​​ថា “​​​ទោះ​​​បី​​​ជា​​​ពួក​​​គេ​​​ព្យាយា​​ម​​​រារាំង​​​ និង​​​រំខាន​​​ខ្ញុំ​​​យ៉ាង​​​ណា​​​ក៏ដោយ​​​ ខ្ញុំ​​​នៅ​​​តែ​​​រក្សា​​​ឯករាជភាព ​​​សត្យា​​​នុម័ត
និង​​​អព្យាក្រឹត​​​ភាព​​​របស់​​​ខ្ញុំ​​”។ លោក​​​បាន​​​បន្ថែម​​​ថា ប្រហែល​​​ជា​​​មាន​​​ការ​​​ទទួល​​​ស្គាល់​​​យ៉ាង​​​ខ្លាំង​​​អំពី​​​ការ​​​ងារ​​​ដែល​​​ខ្ញុំ​​​បា​​​ន​​​ធ្វើ​​​នៅ​​​ទី​​​នេះ គឺ​​​​ជា​​​ការ​​​ងារ​​​ដែល​​​​មាន​ប្រយោជន៍។ បើ​​​គ្មាន​​​ការ​​​សហការ​​​ទេ​​​ គេ​​​មិន​​​អាច​​​ជួយ​​​រដ្ឋាភិ
បាល​​​មាន​​កេរ្តិ៍ឈ្មោះ​​​​​នៅ​​​ក្នុង​​​សហគមន៍​​​អន្ដរជាតិ​​​បាន​​​នោះ​​​ទេ​​​។ ហេតុ​​​ដូច្នេះ​​​នៅ​ពេល​​​
​នេះ​​​​ពួក​​​គេ​​​​ហាក់​ដូច​ជា​​​​សម្រេច​ចិត្ត​​សហការ​​​​ជាមួយ​​​ខ្ញុំ​​​​ហើយ”៕
ប្រែសម្រួល​​​ដោយ ស៊ា ស៊ុយឈាង

© 2013, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.