30 C
Phnom Penh

លោក ហ៊ុន សែន ​សុំ​​ឲ្យ​មាន​ច្បាប់​​ ប្រឆាំង​នឹង​អ្នក​ដែល​បដិសេធ​ថា​​​ គ្មាន​ឧក្រិដ្ឋ​កម្ម​របប​ខ្មែរ​ក្រហម​

ដោយ ឌឹ ខេមបូឌា ដេលី

បទវិភាគ

កាល​ពី​ម្សិលមិញ​ លោក​នាយក​រដ្ឋ​មន្ត្រី​ ហ៊ុន សែន  ​បាន​​រិះ​គន់​​លោក កឹម សុខា ប្រធាន​​ស្ដី​ទី​របស់​គណបក្ស​ប្រឆាំង​ចំពោះ​​ការ​អះ​អាង​​របស់​លោក​នា​ពេល​ថ្មី​ៗ​​នេះ​​ថា អំពើ​ឃោរឃៅ​របស់​ខ្មែរ​ក្រហម នៅ​គុក​​ទួល​ស្លែង​ត្រូវ​បានប្រឌិត​​ឡើង​ដោយ​វៀតណាម​ ហើយ​លោក​បាន​អំពាវ​នាវ​ឲ្យ​មាន​ច្បាប់​ថ្មី​មួយ​​ដើម្បី​​ដាក់​ទោស​ដល់​អ្នក​ដែល​បដិសេធ​ថា ​របប​ ប៉ុល ពត​ មិន​បាន​ប្រព្រឹត្ត​បទ​ឧក្រិដ្ឋ។

កាល​ពី​ថ្ងៃ​សៅរ៍​ សមាគម​ជន​រង​គ្រោះ​ក្នុង​របប​កម្ពុជា​ប្រជាធិបតេយ្យ​បាន​ចាក់​ផ្សាយ​ខ្សែអាត់​សំឡេងរបស់​ប្រធាន​ស្ដី​ទី​គណបក្ស​សង្គ្រោះ​ជាតិរូប​នេះ​ ដែល​បាន​អះអាង​ថា មន្ទីរ​ឃុំឃាំង​ទួល​ស្លែង​ត្រូវ​បាន​ “ ​​ប្រឌិត​ឡើង​” ដោយ​វៀតណាម​ បន្ទាប់​ពី​ពួក​គេ​បាន​ផ្ដួល​រំលំ​របប​ខ្មែរ​ក្រហម​ ក្នុង​​ឆ្នាំ​១៩៧៩​។

ពាក្យ​សម្ដី​នេះ​បាន​ធ្វើ​ឲ្យ​មាន​ប្រតិកម្ម​​ទាំង​​កំហឹង​​​ពី​សំណាក់​មនុស្ស​មួយ​ចំនួន ​ដែល​រួច​ជី​វិត​ពី​មន្ទីរ​ឃុំ​ឃាំង​នេះ​​ និង​​បាន​ទាម​ទារ​ឲ្យ​លោក​ កឹម សុខា សូម​​អភ័យ​ទោស​ពួក​គេ​ដោយ​ផ្ទាល់​ បើ​មិន​ដូច្នេះ​ទេ​ពួកគាត់​​នឹង​ធ្វើ​បាតុកម្ម​ប្រឆាំង​នឹង​លោក កឹម សុខា។

នៅ​ឯ​ពិធី​សម្ពោធ​​សមិទ្ធ​ផល​​នៅ​ឯ​វត្ត​លង្កា​ក្នុង​រាជ​ធានី​ភ្នំពេញ​ លោក​ ហ៊ុន សែន បាន​ចោទ​ប្រកាន់​លោក កឹម សុខា ថា​ បាន​រំឭក​អំពី​មន្ទីរ​ឃុំ​ឃាំ​ង​ទួល​ស្លែង​ ដើម្បី​ផល​ប្រយោជន៍​នយោបាយ​ ហើយ​ថា ការ​សូម​អភ័យ​ទោស​​​ចំពោះ​អ្នក​ដែល​រួច​ជីវិត​ពី​មន្ទីរ​ឃុំ​ឃាំង​នេះ​ពីរបីនាក់​ គឺ​មិន​ទាន់​គ្រប់​គ្រាន់​នោះ​ទេ​។

លោក​នាយក​រដ្ឋ​មន្ត្រី​បាន​មាន​ប្រសាសន៍​ថា “ ​សម្ដី​ទាំង​នេះ​​គឺ​ដូច​គ្នា​​នឹង​សម្ដី​របស់ ខៀវ សំផន ដែល​លើក​ឡើង​អំឡុង​កិច្ច​ពិភាក្សា​ត្រីភាគី​អ៊ីចឹង​។ ខៀវ សំផន បាន​លើក​ឡើង​ថាលលាដ៍​ក្បាល​ជន​រង​គ្រោះ​ក្រោម​របប​ខ្មែរ​ក្រហម​នៅ​ប្រទេស​កម្ពុជា​ គឺ​​ជាសប្ប​និម្មិត​​”។

លោក ហ៊ុន សែន បាន​មាន​ប្រសាសន៍​សំដៅ​ទៅ​លើ​មេ​គុកទួល​ស្លែង​ដែល​ត្រូវ​បាន​សាលាក្ដី​ខ្មែរ​ក្រហម​ ផ្ដន្ទាទោស​កាល​​ពី​ឆ្នាំ​មុន​ឲ្យ​ជាប់​ពន្ធនាគារ​អស់​មួយ​ជីវិត​ ដោយ​សារ​តែ​អំពើ​ឃោរឃៅ​ ដែល​មេ​គុក​រូប​នេះ​​បាន​ប្រព្រឹត្តនៅ​ឯ​មន្ទីរ​ឃុំ​ឃាំង​ទួល​ស្លែង​នេះថា “ សម្ដី​ដែល​និយាយ​ដូច្នេះ​​ មិន​មែន​ជា​​សម្ដី​លើក​ទី១​ទេ។ នៅ​ឯ​មន្ទីរ​ឃុំ​ឃាំង​ទួលស្លែង ឌុច គឺជា​ជន​ក្លាហាន ​​ហើយ​ហ៊ាន​ទទួល​ខុស​ត្រូវ​​ចំពោះ​សកម្មភាព​របស់​ខ្លួន​ទៀត​ផង​ ប៉ុន្ដែ ​ដើម្បី​ចំណេញ​នយោបាយ​លោក [កឹម សុខា] បែរ​ជា​ចាត់​ទុក​បញ្ហា​នេះ​ជា​ល្បែង​”។

ដោយសំអាង​លើ​ឧទាហរណ៍​​អំពី​បណ្ដា​ប្រទេស​អឺរ៉ុប​ ដែល​បាន​ដាក់​ទោស​​​ចំពោះ​អ្នក​និយាយ​​ថា ហីុត្លេរមិន​​សម្លាប់​​មនុស្ស​នោះ​  លោក ហ៊ុន សែន បាន​អំពាវ​នាវ​ឲ្យ​មាន​ច្បាប់​ថ្មី​មួយ​ ដើម្បី​បញ្ឈប់​ការ​បដិសេធ​ថា​គ្មាន​​បទ​ឧក្រិដ្ឋ​​របស់​របប​ខ្មែរ​ក្រហម​។ ​ពេល​​បែរ​ទៅ​​លោកស្រី ឃួន សុដារី​ អនុប្រធាន​រដ្ឋ​សភា​ដែល​នៅ​លើ​វេទិកាដែរ​នោះ​ លោក​ ហ៊ុន សែន បាន​សុំ​​ឲ្យ​លោក​ស្រី​ជួយ​ជំរុញ​ឲ្យ​សភា​អនុម័ត​ច្បាប់​នេះ​មុន​ការ​បោះ​ឆ្នោត​ជាតិ​ថ្ងៃ​ទី​២៨ ខែកក្កដា។

លោក​បន្ដ​​​ថា “​ សូម​ពិភាក្សា​​​ជាមួយ​នឹង​តំណាង​រាស្ត្រ​គណបក្ស​ប្រជាជន​កម្ពុជា​ឲ្យ​ព្រាង​ច្បាប់​ថ្មី​នេះ​​ជា​បន្ទាន់​ដើម្បី​​ផ្ដន្ទាទោស​អ្នក​ដែល​និយាយ​ជា​សាធារណៈ​ថា ខ្មែរ​ក្រហម​​​​មិន​បាន​សម្លាប់​មនុស្ស​ និង​ថា គ្មាន​កន្លែង​ធ្វើ​ទណ្ឌកម្ម​​ដូច​ជា​មន្ទីរ​ឃុំ​ឃាំង​ទួលស្លែង​​។ យើង​​​​គួរ​តែ​បង្កើត​ច្បាប់​ថ្មី ដូច​នៅ​ក្នុង​ប្រទេស​​​អឺរ៉ុប​ ដើម្បី​​ដាក់​ទោស​អ្នក​ដែល​និយាយ​ថា គ្មាន​របប​ប្រល័យ​ពូជ​សាសន៍​ខ្មែរ​ក្រហម​​​​​”។

​កាល​ពី​ថ្ងៃ​អាទិត្យ លោក​ កឹម សុខា បាន​ជំទាស់​មិន​ព្រម​បញ្ជាក់​ ឬក៏​បដិសេធ​​ពាក្យ​សម្ដី​របស់​លោក​ពាក់​ព័ន្ធ​នឹង​មន្ទីរ​ឃុំ​ឃាំង​ទួល​ស្លែង​នោះទេ​ ហើយ​កាល​ពី​​​​ម្សិលមិញ​មិន​អាច​ទាក់​ទង​បាន​ទេ​។

នៅ​ក្នុង​សេចក្ដី​​ប្រកាស​​មួយ​កាល​ពី​ម្សិលមិញ​ គណបក្ស​សង្គ្រោះ​ជាតិ​មិន​បាន​បដិសេធ​​ការ​ពិត​នៃ​ពាក្យ​សម្ដី​របស់​លោក កឹម សុខា ទេ​ ប៉ុន្ដែ គណបក្ស​នេះ​បាន​ចោទ​ប្រកាន់​រដ្ឋាភិបាល​ថា​ បាន​បំផ្លើស​ពាក្យ​សម្ដី​របស់​លោក កឹម សុខា ​។
គណបក្ស​េនះ​លើក​ឡើង​ថា “ ​លោក កឹមសុខា មិន​ដែល​បដិសេធ​ថា គ្មាន​ការ​ធ្វើ​ទណ្ឌ​កម្ម​និង​ការ​សម្លាប់​ប្រជា​ពល​រដ្ឋ​ខ្មែរ​ពី​សំណាក់​ខ្មែរ​ក្រហម​ នៅ​ឯ​មន្ទី​រឃុំ​ឃាំង​ទួល​ស្លែង​នោះ​ទេ​។ លោក កឹម សុខា បាន​ថ្កោល​ទោស​​​របប​ប្រល័យ​ពូជ​សាសន៍​ខ្មែរ​ក្រហម​ដោយ​ចំហព្រោះ​លោក​ខ្លួន​លោក​​​ផ្ទាល់​​​​ និង​គ្រួសារ​របស់​លោក​ ក៏​ជា​ជន​រង​គ្រោះ​ក្នុង​​របប​នេះ​ដែរ​”។

សេចក្ដី​ប្រកាស​​នោះ​បាន​បន្ដ​ថា “ ​ជាង​នេះ​ទៀត​នោះ​ មាន​អ្នក​នយោ​បាយ​​ឱកាស​និយម​មួយ​ចំនួន​បាន​ប្រើ​ប្រាស់​ពាក្យ​សម្ដី​របស់​លោក កឹម សុខា ដើម្បី​ផ្សព្វ​ផ្សាយ​បំផ្លើស​និង​បង្ក​ឲ្យ​មាន​ការ​ភាន់​​​ច្រឡំ។កលល្បិច​បែប​នេះ​មិន​មែន​ជា​លើក​ទី​១​នោះ​ទេ​”។

លោក ឆាំង យុ ប្រធាន​មជ្ឈមណ្ឌល​​ឯក​សារ​​កម្ពុជា​ដែល​ជា​កន្លែង​រក្សា​ឯកសារ​នៃ​របបខ្មែរ​​ក្រហម​ឈាន​មុខ​គេ​ក្នុង​ប្រទេស​កម្ពុជា​ មាន​ប្រសាសន៍​ថា លោក​ កឹម សុខា អាច​ក្លាយជា​​ឧបករណ៍​នយោបាយ​ដ៏​ប្រសើរ​សម្រាប់​គណ​បក្ស​កាន់​អំណាច​ មុន​ពេល​បោះ​ឆ្នោត​ជាតិ​ក្នុង​ខែ​កក្កដា​។ ប៉ុន្ដែ ការ​បន្ទោស​វៀត​ណាម​​​​ចំពោះ​បទ​ឧក្រិដ្ឋ​របស់​​របប​ខ្មែរ​ក្រហម​បែប​នេះ​ មិន​មែន​ជា​​​​រឿង​​ថ្មី​នោះ​ទេ​។

លោក​បានបន្ថែម​ថា “ នេះ​គឺ​ជា​ផ្នែក​មួយ​នៃ​ការ​សន្ទនា​អំពី​របប​ខ្មែរ​ក្រហម​”។ លោក​ ឆាំង យុ បាន​បន្ដ​ថា “ ពួក​គេ​ជឿ​ជាក់​ថា ប្រជា​ពលរដ្ឋ​កម្ពុជា​​ គឺ​ជា​ជន​ស្លូត​ត្រង់ និង​មិន​អាច​ប្រព្រឹត្តបទ​ឧក្រិដ្ឋ​គួរ​ឲ្យ​ភ័យ​ខ្លាច​បែប​នោះ​ទេ”។
​លោកបាន​មាន​ប្រសាសន៍​សំដៅ​លើ​ ការ​សិក្សា​អំពី​ប្រវត្តិសាស្ត្រ​​​របស់​ជន​សើរើនិយម​ដែល​បាន​បន្ទោស​វៀតណាម​ពី​បទ​ឧក្រិដ្ឋ​នៃ​របប​ ប៉ុល ពត ថា “ ពួក​គេ​ស្រាវ​ជ្រាវ​រក​អ្វី​ដែល​​ពួក​គេ​អាច​ប្រើ​ប្រាស់​ ដើម្បី​ [បក​ស្រាយ] អំពី​បទ​ឧក្រិដ្ឋ​ដែល ប៉ុល​ ពត​ ​បាន​ប្រព្រឹត្ត”។

តំណាង​រាស្ត្រ​គណបក្ស​ប្រឆាំង​ និង​លោក​សុន ឆ័យ បេក្ខជន​មក​ពី​គណបក្ស​សង្គ្រោះ​ជាតិ​​បាន​ហៅ​គំនិត​របស់​លោក ហ៊ុន សែន ដែល​អំពាវ​នាវ​ឲ្យ​មាន​ច្បាប់​ថ្មី​ប្រឆាំង​នឹង​អ្នកបដិ​សេធ​ចំពោះ​បទ​ឧក្រិដ្ឋ​នៃ​របប​ខ្មែរ​ក្រហម​នោះ​​ថា “ ជា​រឿង​គួរ​ឲ្យ​ចង់​សើច​” ហើយ​មាន​ប្រសាសន៍​ថា វា​នឹង​នាំ​ឲ្យ​មានការ​​​​បំពាន​អំណាច​។

លោក​​មាន​ប្រសាសន៍​ថា “ លោក ហ៊ុន​ សែន មិន​មែន​ធ្វើ​ការ​ដើម្បី​​​ជំរុញ​ឲ្យ​មាន​ការ​គោរព​​ច្បាប់​ក្នុង​ប្រទេស​នេះ​ទេ។​ គាត់​កំពុង​​ជំរុញ​ឲ្យ​មាន​​អំណាច​​ផ្តាច់​ការ…​ប្រឆាំង​នឹង​សេរី​ភាព​នៃ​ការ​បញ្ចេញ​មតិ”។

គណបក្ស​ប្រឆាំង​បាន​វាយ​ប្រហារ​លោក ហ៊ុន សែន ចំពោះ​ទំនាក់​ទំនង​​ជិត​ស្និទ្ធ​​​​​ជាមួយ​នឹង​​វៀតណាម​ ដែល​បាន​ជួយ​លើក​បន្តុប​រូប​គាត់​ និង​មេ​ដឹក​នាំ​ជាន់​ខ្ពស់​របស់​គណបក្ស​ប្រជា​ជន​កម្ពុជា​​​​​​​​​​​​​​​​​​​​​​​​​​​​​​​​​​​​ផ្សេង​ទៀត​ឲ្យ​មាន​អំណាច​​បន្ទាប់​ពី​​បាន​ផ្ដួល​រំលំ​របប​ខ្មែរ​ក្រហម​។ ទោះ​បី​ជា​មាន​ ឬគ្មាន​ច្បាប់​ថ្មី​នេះ​ក៏ដោយ លោក​ សុន ឆ័យ ​មាន​ប្រសាសន៍​ថា រដ្ឋាភិបាល​មាន​ការ​អត់​ឱន​តិច​តួច​ណាស់​ចំពោះ​អ្នក​រិះ​គន់​​ប្រទេស​ជិត​ខាង​​នៅ​ភាគ​ខាង​កើត​ និង​អតីត​អ្នក​ផ្ដល់​ផល​ប្រយោជន៍​ឲ្យ​ខ្លួន​។

លោក​បាន​មាន​ប្រសាសន៍​ថា “ ប្រសិន​បើ​អ្នក​ណា​ម្នាក់​ធ្វើ​អ្វី​មួយ​រំខាន​ដល់​ផល​ប្រយោជន៍​វៀតណាម ជន​នោះ​នឹង​ត្រូវ​គេ​ដាក់​ទោស​ មាន​លោក សម រង្ស៊ី [ប្រធាន​គណ​បក្ស​សង្គ្រោះ​ជាតិ] ជា​ឧទាហរណ៍​ស្រាប់​។​ រឿង​មួយ​ដែល​យើង​ដឹង​ច្បាស់​នោះ​គឺ លោក​នាយក​រដ្ឋ​មន្ត្រី​មិនចង់​ឲ្យ​នរណា​ម្នាក់​បើក​មាត់​របស់​ខ្លួន​ និយាយ​អំពី​​រឿង​ដែល​គាត់​មិន​ចូល​ចិត្ត​នោះ​ទេ​”។

លោក សម រង្ស៊ី ត្រូ​វ​បា​ន​ផ្តន្ទា​​​ទោស​​ឲ្យ​ជាប់​​ពន្ធ​នា​គា​រ​​រយ​ៈ​ពេល​​សរុប​​១១ឆ្នាំ​ក្នុងឆ្នាំ​​២០០៩ និង​​ឆ្នាំ​២០១០​ ពី​បទ​ដក​បង្គោល​​​តម្រុយ​​​​ព្រំ​ដែន​ និង​បង្ហោះ​​ផែ​ន​ទី​​អ​ំ​ពី​​​តំ​បន់​នោះ​​នៅ​តា​ម​​អុីនធើ​ណិត​។ លោក​ចាត់​​ទុ​ក​​កា​រ​ផ្តន្ទា​ទោស​នេះ​ថា​ជា​​រឿ​ង​នយោ​បា​យ​ ហើយ​​លោក​រស់​​នៅ​​ប្រទេស​​ក្រៅ​​ដើម្បី​​គេច​​ពី​​​​ទោស​ជាប់​ពន្ធ​នា​គារ​។

​​លោក ឡៅ ម៉ុង​ហៃ ​អ​្នក​វិភាគ​នយោ​បា​យ​ឯក​រាជ្យ​ ថ្លែង​​​ថា ទ​ំ​នាក់ទ​ំ​នង​​​ជិត​ស្និទ្ធ​​​​​​របស់​លោក​ ហ៊ុន សែ​ន ​ជាមួ​យ​​វៀត​ណាម គឺ​​​ជា​កា​រ​​​ទទួល​ខុស​ត្រូវ​ខាង​នយោ​បា​យ​​សម្រាប់​​នា​យក​រដ្ឋ​មន្ត្រី​ ​ហើយ​លោក​បា​ន​បន្តទៀតថា ច្បាប់​សម្រាប់​ដាក់​ទោស​អ្នក​ដែល​​បដិសេធ​​​ថា​​គ្មាន​ឧក្រិដ្ឋ​កម្ម​​​របស់​ខ្មែរ​ក្រហម​​ អាច​នាំ​​ឲ្យ​មាន​ការ​ប្រើ​ប្រាស់​ដោយ​​​​មិន​ត្រឹម​​​​ត្រូវ​ដើម្បី​ទ​ប់​ស្កាត់​សេរី​ភាព​ក្នុង​កា​រ​​បញ្ចេញ​មតិ។

​លោ​ក​បា​ន​លើក​ឡើង​​អ​ំ​ពី​​ច្បាប់​​ដែល​អាច​​​ប្រើ​បាន​នេះ​​ថា “ វា​​អា​ច​​​ធ្វើ​ឲ្យ​មាន​ការ​រើស​​អើង​។យើង​ចាំ​បាច់​ត្រូ​វ​​​ជជែ​ក​ដេញ​ដោល​​អំ​ពី​ច្បាប់​នេះ​ ​ពី​ព្រោះ​​យើង​មាន​​​ចិត្ត​​​ចង់​ធ្វើ​នៅ​​​​ពេល​នេះ​ ដូ​ច្នេះ​​ខ្ញុំ​​​ដឹង​ច្បាស់​​ថា ​វា​​មិន​មែន​​ជា​​ច្បាប់​​ល្អ​​នោះ​ទេ​” ប្រ​សិ​ន​បើ​​ប្រញាប់​​​ប្រញាល់​​​អ​នុម័តក្នុ​ង​​​​ប៉ុន្មា​ន​សប្តាហ៍​ខាង​មុខ​នេះ​នោះ​។

​អ​ង​្គ​កា​រ​សិទ្ធិ​មនុស្ស​​​ចោទ​ប្រកាន់​​រដ្ឋា​ភិបាលជា​​ទៀង​ទាត់​​​​ថា​ ការ​ប្រើ​​ច្បាប់​​មា​ន​ស្រាប់មិន​ត្រឹម​ត្រូ​វ​​ ស្តី​ពី​កា​រ​​បរិ​ហារ​កេរ្តិ៍ និង​ផ្សព្វផ្សាយ​​ព័ត៌​មា​ន​មិន​ពិត​ ដើម្បី​ទប់​ស្កាត់​​មិន​ឲ្យ​មាន​កា​រ​​​ជជែក​​ដេញ​ដោល​​ជា​សាធា​រណៈ​​ស្រ​ប​ច្បាប់​រួចហើយ​។

​លោក ម៉ុង​ហៃ បា​ន​​លើក​ឡើង​ថា រដ្ឋា​​ភិ​បាល​មា​នច្បាប់​​សំ​ខាន់​​ជាង​នេះ​ច្រើន​ណាស់​ដែល​មិន​ទាន់​​អនុម័ត​​​ ​ដូច​ជា​ច្បាប់​ស្តី​ពី​លក្ខន្តិកៈចៅក្រម​ ដែ​លមា​ន​បំ​ណង​ពង្រឹង​​ឯក​រាជ​ភាព​​របស់​តុ​លា​កា​រ។ ​លោក ឆាំ​ង យុ នៅ​មជ្ឈមណ្ឌល​​ឯក​សារ​កម្ពុជា ​បា​ន​លើក​ឡើង​ថា ជំនួស​ឲ្យ​ការ​ដាក់​​ទោស​​​ជ​ន​ទាំង​ឡាយ​ណា​​​ដែល​មា​ន​ទស្សន​បែប​នេះ​​ជា​មួយ​នឹង​​ច្បាប់​ថ្មី​មួ​យ លោក​បាន​​​ស្នើ​ឲ្យ​​ប្រើ​​កម្មវិធី​សិក្សា​​នៅ​តាម​សា​លា​​រៀន​ និង​សាលា​ក្តី​​ឧក្រិដ្ឋ​កម្ម​សង្គ្រាម​​​ខ្មែរ​ក្រហម​ដែល​កំ​ពុ​ង​តែ​​ដំណើរ​ការ​​េនះ​​ ដើម្បី​ជំរុញ​ឲ្យ​​មាន​ការ​ទទួល​ស្គាល់​​ការ​​​ពិត​​​អ​ំ​ពី​​របប​ ប៉ុល ពត​។ ​លោក​បា​ន​ថ្លែ​ង​ថា “ យើង​គួរតែ​ប្រើ​​ធ​ន​​​ធាន​​ទាំ​ង​​អស់​នេះ​​ដើម្បី​អប់​រំ​​​សា​ធារ​ណ​ជន។​ជំនួស​ឲ្យ​ការ​ដាក់​​ទោស​ ​គួរ​តែ​អប់​រំ​​​ពួក​គេវិញ​។ ​ធ្វើ​ដូច្នេះ​ប្រហែ​ល​ជាវិធី​ប្រសើរ​​ជា​ង​”៕

ប្រែ​សម្រួល​ដោ​យ ហម សុផាណ្ណា និង ចេវ ប៊ុននី​​​​​​​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស