29 C
Phnom Penh

ទាហាន​​ថៃបាញ់សម្លាប់អ្នកកាប់ឈើម្នាក់​​​ និងធ្វើឲ្យ​​​បីនាក់ទៀតរង​​​របួស ពេល​ឆ្លង​ដែន​ចូល​កាប់​ឈើ

ដោយ ឌឹ ខេមបូឌា ដេលី

បទវិភាគ

នគរបាល​​​មូលដ្ឋាន បាន​​​ឲ្យ​​​ដឹង​​​កាល​​​ពី​​​ម្សិល​មិញ​​​ថា កង​​​កម្លាំងសន្តិសុខថៃ បាន​​​បាញ់​សម្លាប់​​​​បុរស​​​ខ្មែរ​​​ម្នាក់​​​ទៀត ដែលបាន​​​ឆ្លងព្រំដែន​​​ចូល​​​​ក្នុង​​​ប្រទេសថៃ​​​កាប់ឈើ​​​ដោយ​​​ខុសច្បាប់ ​កាល​ពីថ្ងៃសៅរ៍ និង​​​បាន​​​បាញ់​​​​ឲ្យរបួស​​​បី​​​នាក់​​​ផ្សេង​​​ទៀត។

លោក កែវ តាន់ អធិការនគរបាល​​​ស្រុក​ត្រពាំងប្រាសាទ ខេត្តឧត្ដរមាន​​​ជ័យ ​បាន​មាន​ប្រសាសន៍ថា សាកសព​​​បុរស​​​នេះ​​​ស្ថិត​​​ក្នុង​ទឹកដីថៃ​​​នៅ​​​ឡើយ ហើយ​ថា មនុស្ស​បី​នាក់​ដែលត្រូវរបួស​​​ ត្រូវបាន​​​បញ្ជូន​​​ទៅ​​​ព្យាបាល​​​របួស​​​ដោយសារ​​​​គ្រាប់កាំភ្លើងនៅ​មន្ទីរ​ពេទ្យ​បង្អែក​​​មួយ​​​នៅប្រទេស​​​កម្ពុជា។

កាលពីម្សិលមិញ គេហទំព័រ​​​របស់​​​នគរបាល​ជាតិ បាន​​​បញ្ជាក់អត្តសញ្ញាណ​​​អ្នក​ស្លាប់​នេះ​​​ មានឈ្មោះ បូ បូរ័ត្ន​​​ អាយុ​​​២៨​​​ឆ្នាំ។​ប្រទេស​កម្ពុជា បាន​​​អះអាងថា កងកម្លាំងថៃបាន​​​បាញ់​សម្លាប់​​​ពលរដ្ឋខ្មែរ​​​៤៥នាក់ ក្នុង​កាលៈ​ទេសៈ​ស្រដៀង​គ្នា​នេះ​ កាលពីឆ្នាំ​​​២០១២។

ក្រុមមន្ត្រីមកពីប្រទេស​​​ទាំង​​​ពីរ បាន​​​ជួប​ប្រជុំគ្នានៅ​ក្រុងប៉ោយប៉ែត កាល​ពីថ្ងៃ​ទី៨ ​ខែឧសភា និងបានព្រមព្រៀងគ្នា​​​បង្កើត​​​ការ​​​ដើរល្បាតរួមគ្នា​​​នៅតាម​​​បណ្ដោយ​​​ព្រំដែន​​​នេះ ដើម្បីបញ្ឈប់​​​កំុឲ្យ​​​មានការ​​​បាញ់សម្លាប់​បែប​​​នេះ​​​ទៀត។

ប៉ុន្តែ បន្ទាប់ពីកិច្ចប្រជុំអន្តរក្រសួង​​​មួយ​​​ស្ដីពី​​​បញ្ហា​​​ព្រំដែន​​​នៅរាជធានីភ្នំពេញ​​​កាលពីម្សិលមិញ លោក ឡុង វិសាឡូ រដ្ឋលេខាធិការ​​​​ក្រសួងការបរទេស ដែលដឹកនាំ​​​កិច្ចប្រជុំនៅ​ក្រុង​​​ប៉ោយប៉ែត ​​​មាន​ប្រសាសន៍ថា ​​​ពេល​​​នេះ​ការ​​​ដើរ​​​ល្បាត​​​រួមគ្នាមិន​​​ទាន់​ដំណើរ​ការ​​​ទេ។

លោកបានមានប្រសាសន៍ថា នៅពេល​​​នេះ “ យើង​​​នឹងដើរ​​​ល្បាត​​​នៅ​​​ខាង​​​យើង​​​ហើយភាគីថៃ ​​​ដើរល្បាត​​​ខាង​​​​​​ថៃ ប៉ុន្តែ យើង​​​នឹង​​​សហការ​​​គ្នា​​​”។

នៅឯកិច្ចប្រជុំកាលពីម្សិលមិញ មន្ត្រី​​​ជាន់​​​ខ្ពស់​ក្រសួង​​​​ក៏បានពិភាក្សា​​​គ្នា​​​ផងដែរ​​​អំពី​លិខិត​​អនុញ្ញាត​រយៈពេល​​​ខ្លីសម្រាប់​ប្រជា​ពលរដ្ឋ​​​ខ្មែរ​​​ចូល​ទៅ​ធ្វើការនៅ​​​ប្រទេស​ថៃ ​ការ​បោស​​​សម្អាតគ្រាប់មីន​​​នៅតាមព្រំដែន​​​នេះ និង​ផែន​ការ​សម្រាប់​​​តំបន់សេដ្ឋកិច្ចថ្មី​​​នៅខេត្ត​​​កោះកុង និងក្រុងប៉ោយប៉ែត ៕

ប្រែសម្រួលដោយ ស៊ុំ សុខភុំ

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស