អាជ្ញាធរអូស្ត្រាលីបានឲ្យដឹងកាលពីម្សិលមិញថា ខ្លួនស្ទាក់ចាប់បានថ្នាំញៀនមេតំហ្វេតាមីន៨,៥គីឡូក្រាមដែលដឹកតាមជើងហោះហើរមួយចេញពីប្រទេសកម្ពុជាកាលពីសប្តាហ៍មុន។
សេចក្តីប្រកាសព័ត៌មានរួមមួយមកពីនគរបាលសហព័ន្ធអូស្ត្រាលី (AFP) និងទីភ្នាក់ងារការពារព្រំដែននិងគយអូស្ត្រាលីលើកឡើងថា ស្ត្រីជនជាតិនូវែលសេឡង់អាយុ៤១ឆ្នាំម្នាក់ត្រូវបានចោទប្រកាន់ពីបទនាំគ្រឿងញៀនចូល បន្ទាប់ពីគ្រឿងញៀនណាកូទិកត្រូវបានរកឃើញនៅក្នុងវា៉លិសរបស់គាត់។
នៅក្នុងករណីថ្មីនេះដែលបង្ហាញពីតួនាទីរបស់ប្រទេសកម្ពុជាថាជាកន្លែងឆ្លងកាត់និងពេលខ្លះជាកន្លែងផលិតគ្រឿងញៀនសម្រាប់អ្នករត់ពន្ធថ្នាំញៀននោះ សេចក្តីប្រកាសព័ត៌មាននេះបានលើកឡើងថាថ្នាំមេតំហ្វេតាមីន៨,៥គីឡូក្រាមត្រូវបានរកឃើញនៅក្នុងវា៉លិសពីរដែលបានមកដល់អាកាសយានដ្ឋានអន្តរជាតិ ដាវីន (Darwin) តាមជើងហោះហើរ មួយពីប្រទេសកម្ពុជាកាត់តាមប្រទេសសិង្ហបុរីកាលពីថ្ងៃសុក្រសប្តាហ៍មុន។
សេចក្តីប្រកាសនេះបានលើកឡើងថា“ អំឡុងពេលធ្វើការត្រួតពិនិត្យវា៉លិសទាំងពីរមន្ត្រីគយនិងមន្ត្រីការពារព្រំដែនអូស្ត្រាលីបានធ្វើការវិភាគ ដែលផ្តល់លទ្ធផលវិជ្ជមានថា ជាគ្រឿងញៀនណាកូទិក ពិតមែន”។
នៅក្នុងវ៉ាលិសទាំងពីរ គេបានរកឃើញមានកញ្ចប់ទទេប្រាំពីរ ជាមួយនឹងសារធាតុពណ៌សថ្លាព្រឿងៗ លាក់នៅក្នុងទ្រនាប់ខាងក្រោយ ហើយការធ្វើពិសោធរកឃើញថា វាជាមេតំហ្វេតាមីន។
បន្ទាប់មកនគរបាលបានរកឃើញថា ស្ត្រីជនជាតិនូវែលសេឡង់ម្នាក់ដែលមានឈ្មោះនៅក្នុងសារព័ត៌មានក្នុងស្រុកថា ប៊ែរណាឌីន ព្រីន (Bernadine Prince)ជាម្ចាស់វ៉ាលិសទាំងនេះនិងបានមកដល់តាមជើងយន្តហោះមួយផ្សេង
ទៀតពីកម្ពុជាកាត់តាមប្រទេសសិង្ហបុរីកាលពីថ្ងៃព្រហស្បតិ៍មួយថ្ងៃមុនវ៉ាលិសទាំងនេះ។
សេចក្ដីប្រកាសព័ត៌មាននេះបានឲ្យដឹងថា “ មន្ត្រីនគរបាលសហព័ន្ធអូស្ត្រាលីបានអនុវត្តដីកាចាប់ខ្លួននៅសណ្ឋាគារមួយកន្លែងនៅទីក្រុងដាវីន ក្រោយមកស្រ្តីនេះស្ថិតនៅតំបន់ពាណិជ្ជកណ្ដាលទីក្រុងដាវីន”។ សេចក្ដីប្រកាសនេះបានឲ្យដឹងទៀតថា ស្រី្តនេះត្រូវបាននគរបាលសាកសួរមុនពេលចោទប្រកាន់។
សេចក្តីរាយការណ៍មួយដែលចេញផ្សាយនៅលើគេហទំព័ររបស់កាសែត ឌឹ ហេរ័ល សាន់ (The Herald Sun)ជាកាសែតប្រចាំថ្ងៃ ដែលមានមូលដ្ឋាននៅទីក្រុងមែលប៊ន បានរាយការណ៍ថា អ្នកស្រី ព្រីន នឹងចូលខ្លួនទៅ
តុលាការម្តងទៀតនៅថ្ងៃពុធ ដើម្បីស្ដាប់សវនាការសុំនៅក្រៅ ឃំុហើយរឿងក្តីនេះនឹងត្រូវជំនុំជម្រះនៅខែសីហា។
ជនសង្ស័យនេះអាចមានទោសជាប់ពន្ធនាគារយៈពេល១០ឆ្នាំនិងពិន័យជាប្រាក់ជាង៣៤០.០០០ដុល្លារអូស្ត្រាលីឬប្រហែល៣២៨.០០០ដុល្លារសហរដ្ឋអាមេរិក។
សេចក្តីរាយការណ៍នេះបានឲ្យដឹងថា“ រដ្ឋអាជ្ញាបានប្រាប់តុលាការនេះថា នគរបាលមកពីប្រទេសអូស្ត្រាលី នូវែលសេេឡង់កម្ពុជា និង ប្រទេសកេនយ៉ា ជាប់ពាក់ព័ន្ធនៅក្នុងការសើុបអង្កេតនេះ”។
គេមិនទាន់ដឹងច្បាស់ថា តើគ្រឿងញៀននេះត្រូវបានផលិតនៅក្នុងប្រទេសកម្ពុជាឬក៏មានជាប់ពាក់ព័ន្ធជាមួយនឹងប្រទេសកេនយ៉ានៅក្នុងរឿងនេះឬយ៉ាងណានោះទេ។
លោក អិុន សុង អនុប្រធានអង្គភាពប្រឆាំងគ្រឿងញៀននៅនាយកដ្ឋានប្រឆាំងគ្រឿនញៀនរបស់ក្រសួងមហាផ្ទៃមានប្រសាសន៍ថា លោកមិនបានដឹងអំពីករណីនេះទេ ប៉ុន្តែមានប្រសាសន៍ថា នគរបាលកម្ពុជានឹងស្វែងរកព័ត៌មានពីប្រទេសអូស្ត្រាលី។
“ ប្រសិនបើនគរបាលអូស្ត្រាលីសហការជាមួយនឹងនគរបាលប្រឆាំងគ្រឿនញឿនរបស់យើងនៅទីនេះ យើងនឹងទទួលបានព័ត៌មានខ្លះឬក៏ការសារភាពពីជនសង្ស័យនេះ ហើយយើងនឹងធ្វើការសើុបអង្កេត”៕
ប្រែសម្រួលដោយ ស៊ុំ សុខភុំ