កាលពីម្សិលមិញ បុគ្គលិកប្រមាណជា៦០នាក់ ដែលធ្វើការនៅកាស៊ីណូ ណាហ្គាវើល (NagaWorld) បាននាំគ្នាធ្វើបាតុកម្មនៅខាងមុខកាស៊ីណូនេះ ដើម្បីទាមទារឲ្យអ្នកគ្រប់គ្រងអនុវត្តតាមកិច្ចព្រមព្រៀងរបស់ខ្លួន កាលពីខែកុម្ភៈ ដែលបានយល់ព្រមទទួលយកមនុស្សចំនួនបួននាក់ ដែលត្រូវបានបណ្តេញ កាលពីដើមខែនោះ ដោយសារមានការចោទប្រកាន់ថា បានផ្តល់ទឹកសុទ្ធឲ្យអតិថិជនដោយមិនគិតប្រាក់ ឲ្យចូលធ្វើការវិញ។
បន្ទាប់ពីមានការតវ៉ាអស់រយៈពេលប្រាំមួយថ្ងៃ ដែលបានទាក់ទាញមនុស្សឲ្យមកចូលរួមតវ៉ារហូតដល់ចំនួន១.០០០នាក់ជារៀងរាល់ថ្ងៃមក កាលពីខែកុម្ភៈ ក្រសួងការងារបានប្រកាសជូនដំណឹងថា កាស៊ីណូនេះបានយល់ព្រមទទួលយកបុគ្គលិក ដែលត្រូវបានបណ្តេញចេញឲ្យចូលធ្វើការងារនៅកន្លែងដើមវិញ។ក៏ប៉ុន្តែ សុខ ណារិទ្ធិ ជាអ្នកតវ៉ាម្នាក់
ក្នុងចំណោមអ្នកតវ៉ាទាំងអស់បាននិយាយថា អ្នកគ្រប់គ្រងមិនបានធ្វើតាមកិច្ចព្រមព្រៀងទេ។
ណារិទ្ធ បានឲ្យដឹងថា ក្រុមខ្លួនក៏កំពុងតែបន្តលើកយកការទាមទាររបស់ខ្លួនកាលពីខែកុម្ភៈផងដែរ ដែលបានទាមទារឲ្យកាស៊ីណូនេះដំឡើងប្រាក់ឈ្នួលអប្បបរមាប្រចាំខែរបស់ខ្លួនពីចំនួន៨០ដុល្លារឲ្យដល់ចំនួន១៥០ដុល្លារក្នុងមួយខែ ហើយទាមទារឲ្យដំឡើងប្រាក់ខែរបស់ខ្លួនប្រចាំឆ្នាំ ដើម្បីឲ្យស្របតាមអតិផរណា។
សុភ័គ្រ ហែម អ្នកគ្រប់គ្រងជាន់ខ្ពស់ទទួលបន្ទុកទំនាក់ទំនងព័ត៌មានរបស់កាស៊ីណូណាហ្គាវើល បានឲ្យដឹងថា រូបគាត់មិនបានដឹងអំពីការតវ៉ា កាលពីម្សិលមិញនេះ ហើយមិនបានដឹងថា តើបុគ្គលិកទាំងបួននាក់ ដែលត្រូវបានបណ្តេញចេញនោះ ត្រូវបានឲ្យចូលធ្វើការវិញហើយ ឬយ៉ាងណានោះទេ ក៏ប៉ុន្តែ គាត់បានបន្ថែមទៀតថា ក្រុមហ៊ុនកំពុងតែពិចារណាអំពីការទាមទារកាលពីដំបូងរបស់ក្រុមអ្នកតវ៉ានៅឡើយ៕
ប្រែសម្រួលដោយ ហួង កុកទៀន