28 C
Phnom Penh

ក្រុម​ហ៊ុន​វៀត​ណាម​ និង​ឥណ្ឌា​បើក​ដំណើរ​ការ​គម្រោង​ផលិត​ស្ករ​ស​ និង​ថាម​ពលនៅ​ខេត្ត​ក្រចេះ​

ដោយ ឌឹ ខេមបូឌា ដេលី

បទវិភាគ

គម្រោង​វិនិយោគ​មួយ ​ដែល​គាំ​ទ្រ​ដោយ​​ប្រទេស​វៀតណាម ​និង​ប្រទេស​ឥណ្ឌា​ ដើម្បី​ផលិត​ស្ករស​ អេតាណុល ​និង​ថាម​ពល​ ដែល​មាន​ទំហំ​ទឹក​ប្រាក់​វិនិយោគ​ជាង​៩០​លាន​ដុល្លារ បាន​ចាប់​ផ្ដើម​បើក​ធ្វើ​ប្រតិបត្តិការ​នៅ​ក្នុង​ខេត្ត​ក្រចេះ​ នេះបើ​យោង​តាម​មន្ត្រី​មួយ​រូប​ និង​សេចក្ដី​រាយការណ៍​ព័ត៌មាន​មួយ។

លោក​ ស ​ចំរុង ​អភិបាល​ខេត្ត​ក្រចេះ​បាន​មាន​ប្រសាសន៍​ថា កាល​ពី​ថ្ងៃ​អាទិត្យ​ លោក​ឧបនាយក​រដ្ឋ​មន្ត្រី ​យឹម ​ឆៃលី ​បាន​ទៅ​ធ្វើ​ជា​ធិបតី​នៅ​ក្នុង​ពិធី​បើក​សម្ពោធ​កន្លែង​បើក​​គម្រោង​នៅ​លើ​ផ្ទៃ​ដី​ទំហំ​៧.០០០​ហិកតា​នៅ​ក្នុង​ឃុំ​អូរ​គ្រៀង ​ស្រុក​សំបូរ ​ខេត្ត​ក្រចេះ​។

គម្រោង​វិនិយោគ​នេះ​នឹង​មាន​ដាំ​អំពៅ​នៅ​លើ​ផ្ទៃ​ដី​មួយ​ផ្នែក​ធំ​ ព្រម​ទាំង​សាង​សង់​រោង​ចក្រ​ ដើម្បី​ផលិត​ស្ករស​ និង​អេតាណុល​ ដែល​ដើរ​ដោយ​រោង​ចក្រ​ថាម​ពល​មួយ​នៅ​ក្នុង​បរិមាណ​នោះ​ ​ដែល​មាន​កម្លាំង​២៦​មេហ្គា​វ៉ាត់​ នេះ​បើ​យោង​តាម​លោក​ ស ចំរុង​។

លោក​ថ្លែងថា​ “ ​វា​ជា​រឿង​​ដ៏​ល្អ​មួយសម្រាប់​សេដ្ឋកិច្ច​។​ កម្មករ​កម្ពុជា​ប្រមាណ​ជា​៦០០​នាក់​អាច​ធ្វើ​ការ​នៅ​ទីនេះ​បាន​” ហើយ​លោក​បាន​បន្ថែម​ថា វិនិយោគិន​របស់​គម្រោង​នេះ​មក​ពី​ប្រទេស​វៀតណាម ​និង​ប្រទេស​ឥណ្ឌា​។

សេចក្តី​រាយការណ៍​មួយ​នៅ​លើ​គេហ​ទំព័រ​របស់​វិទ្យុ​សំឡេង​វៀតណាម​(Voice of Vietnam)បាន​ឲ្យ​ដឹង​ថា​ ក្រុមហ៊ុន​ ដែល​អនុវត្តគម្រោង​នេះ​មាន​ឈ្មោះ​ថា​ កាម៉ាដេនូ​ វែន​ឆ័រ​ ខេមបូឌា លីមីត​ធីត​ (Kamadhenu Ventures Cambodia Limited)។​

ក្រុម​ហ៊ុន​ កាម៉ាដេនូ​ វែនឆ័រ​ ខេមបូឌាលីមីត​ធីតមាន​ការិយាល័យ​មួយ​ក្នុង​រាជ​ធានី​ភ្នំពេញ​​ ក៏​ប៉ុន្ដែ​កាល​ពី​ម្សិលមិញ​ គេមិនអាច​ទាក់​ទង​តំណាង​​ក្រុមហ៊ុន​នេះ​បាន​ទេ​។

សេចក្ដី​រាយការណ៍​ដដែល​នេះ​បាន​ឲ្យ​ដឹង​ ដោយ​មានខ្លឹមសារ​ដូច្នេះ​ថា​ “ ​រោង​ចក្រ ​ដែល​ត្រូវ​បាន​ចាត់​ទុក​ជា​គម្រោង​វិនិយោគ​បរទេស​ធំបំផុត​មួយ​ក្នុង​ចំណោម​គម្រោង​បរទេស​ធំជាង​គេ​បំផុត​នៅ​ក្នុង​ប្រទេស​កម្ពុជា​ មាន​ទំហំ​
ទឹក​ប្រាក់​វិនិយោគ​សរុប​ប្រមាណ​ជា​​៩០,៧​លាន​ដុល្លា​រ ដោយ​ទឹក​ប្រាក់​វិនិយោគ​ចំនួន​២៥,៣​លា​ន​ដុល្លារ​ជា​របស់​ក្រុមហ៊ុន​ កាម៉ាដេនូ វែនឆ័រ​ ខេមបូឌា លីមីត​ធីត ហើយ​​ទឹក​​ប្រាក់​វិនិយោគ​ចំនួន​៦៥,៤​លាន​ដុល្លារ​ទទួល​បាន​មក​ពី​​ធនាគារ​វិនិយោគ​និង​អភិ​វឌ្ឍន៍​វៀតណាម​។

វិទ្យុ​សំឡេង​វៀត​ណាម​បាន​ឲ្យ​ដឹង​ថា​ រោង​ចក្រ​នេះ​ត្រូវ​បាន​គេ​រំពឹង​ថា ​នឹង​អាច​ផលិត​ស្ករ​ស​បាន​៣.៥០០​តោន​ និង​អេតាណុល​ចំនួន​៣០.០០០​លីត្រ​ក្នុង​មួយ​ថ្ងៃ​៕

 ប្រែសម្រួល​ដោយ ហួង កុកទៀន​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស