កាលពីម្សិលមិញ លោកនាយករដ្ឋមន្ត្រី ហ៊ុន សែន បានប្រគល់វិញ្ញាបនបត្រដល់អាចារ្យ និងអាចារិនីចំនួន៣.៧០០នាក់ ហើយបន្ទាប់មកបានអំពាវនាវឲ្យប្រជាពលរដ្ឋកម្ពុជាទាំងអស់ទៅបោះឆ្នោតក្នុងការបោះឆ្នោតជ្រើសតាំងតំណាងរាស្ត្រនៅថ្ងៃទី២៨ ខែកក្កដាខាងមុខនេះ។
ថ្លែងអំឡុងពិធីមួយនៅមជ្ឈមណ្ឌលកោះពេជ្រ ក្នុងរាជធានីភ្នំពេញ លោក ហ៊ុន សែន ក៏បានសន្មតថា ការស្តារជំនឿលើព្រះពុទ្ធសាសនាឡើងវិញ ក្រោយសម័យខ្មែរក្រហមជាស្នាដៃរបស់គណបក្សប្រជាជនកម្ពុជារបស់លោកផងដែរ។
លោកបានមានប្រសាសន៍ថា “ ដើម្បីឲ្យការបោះឆ្នោតមានលក្ខណៈសេរី និងយុត្តិធម៌យើងត្រូវរក្សាបរិយាកាសដែលពោរពេញដោយសុខសន្តិភាពនិងស្ថិរភាពសង្គម និងនយោបាយ នៅមុននិងក្រោយការបោះឆ្នោត។ខ្ញុំសូមអំពាវនាវដល់ជនរួមជាតិ គ្រូបង្រៀន សិស្ស និស្សិត ជាពិសេសគឺអាចារ្យ និងអាចារិនីឲ្យទៅចូលរួមក្នុងការបោះឆ្នោតទាំងអស់គ្នា”។
លោក ហ៊ុន សែន បានបន្តថា នៅពេលគណបក្សប្រជាជនកម្ពុជារបស់លោកបានចូលកាន់អំណាច ដោយមានការចូលរួមពីអ្នកផ្តាច់ខ្លួនពីខ្មែរក្រហម ដែលក្រោយមកបានវិលទៅផ្តួលរំលំពួកគេវិញក្នុងឆ្នាំ១៩៧៩នោះ ប្រទេសកម្ពុជាមានព្រះសង្ឃតែប្រាំពីរអង្គប៉ុណ្ណោះ។
លោក ហ៊ុន សែន បានមានប្រសាសន៍បន្ថែមទៀតថា “ ប៉ុន្តែនៅពេលនេះ កម្ពុជាមានព្រះសង្ឃសរុបទាំងអស់៥៣.២៥៧អង្គ
និងវត្តអារាមចំនួន៤.៥៥៣។ ដោយឡែកក្នុងសុន្ទរកថាកាលពីពេលថ្មីៗនេះ លោក ហ៊ុនសែន បានលើកឡើងថា ការផ្តល់មូលនិធិសម្រាប់ការសាងសង់វត្តថ្មីៗ នឹងបញ្ចប់នៅពេលលោកចាញ់ឆ្នោត។ លោកក៏បានព្រមានអំពីភាពវឹកវរជាទូទៅក្នុងសង្គមផងដែរ ប្រសិនបើគណបក្សរបស់លោកចាញ់ឆ្នោត។
វិញ្ញាបនបត្រដែលត្រូវបានចែកក្នុងពិធីកាលពីម្សិលមិញនេះ គឺជាវិញ្ញាបនបត្រទទួលស្គាល់អាចារ្យ និងអាចារិនី ដែលបានបញ្ចប់វគ្គបណ្តុះបណ្តាលអំពីការរៀបចំពិធីបុណ្យប្រពៃណីផ្សេងៗ៕
ប្រែសម្រួលដោយ ចេវ ប៊ុននី