អ្នកភូមិជាងមួយពាន់នាក់នៅក្នុងខណ្ឌឫស្សីកែវ រាជធានីភ្នំពេញ បានចុះហត្ថលេខាលើញត្តិមួយដើម្បីសម្តែងការតវា៉ចំពោះការរុះរើឈាបនដ្ឋាននៅលើដីមួយកន្លែង ដែលត្រូវបានបម្រុងទុកសម្រាប់គម្រោងអភិវឌ្ឍន៍អចលនទ្រព្យដ៏ធំមួយ។
យោងតាមលិខិតចុះថ្ងៃទី២៥ខែមេសាឆ្នាំ២០១២ ដែលទីស្តីការគណៈរដ្ឋមន្ត្រីបានផ្ញើជូនក្រសួងធម្មការនិងសាសនា បានឲ្យដឹងថា ទីតាំងនេះត្រូវបានប្រគល់ឲ្យក្រុមហ៊ុនអភិវឌ្ឍន៍ អេង កាំង រួចហើយ។ ប៉ុន្តែ អ្នកភូមិនៅក្នុងតំបន់នេះបានជំទាស់នឹងការវាយកម្ទេចឈាបនដ្ឋាននេះអស់រយៈពេលជិតមួយឆ្នាំមកហើយ ដោយបានលើកហេតុផលថា ពួកគាត់ចង់រក្សាដីនេះទុកសម្រាប់ការសាងសង់សាលារៀនថ្មីមួយវិញ។
លោក សៅ សារឿន អាយុ៥៥ឆ្នាំបានឲ្យដឹងថា ពេលនេះមានអ្នកភូមិចំនួន១.០០២នាក់ហើយដែលបានផ្តិតមេដៃលើញត្តិប្រឆាំងនឹងគម្រោងអភិវឌ្ឍន៍នេះ។ លោក សៅ សារឿន បានមានប្រសាសន៍ថា “ យើងទាំងអស់គ្នាមិនជំទាស់នឹងការរុះរើនេះទេ ប៉ុន្តែយើងចង់ទុកដីឲ្យវត្តនេះសាង
សង់សាលារៀនមួយសម្រាប់ក្មេងជំនាន់ក្រោយ”។ លោកបានបន្ថែមថា ញត្តិនេះមិនទាន់បានផ្ញើជូនទីស្ដីការគណៈរដ្ឋមន្ត្រី និងក្រសួងធម្មការនិងសាសនានៅឡើយទេ ព្រោះអ្នកភូមិចង់ប្រមូលស្នាមមេដៃឲ្យបានច្រើនថែមទៀត។
ឈាបនដ្ឋាននេះស្ថិតនៅមុខវត្តខ្ទរតាមបណ្តោយផ្លូវជាតិលេខ៦អានៅលើដីដែលមានទំហំប្រហែល២៩,៤៤២ម៉ែត្រក្រឡាក្នុងសង្កាត់ព្រែកលៀប ហើយត្រូវបានកសាងឡើងក្នុងឆ្នាំ១៩៩៩។ យោងតាមលិខិតមួយច្បាប់ដែលត្រូវបានចុះហត្ថលេខាដោយលោក ប្រាក់ សុខុន រដ្ឋលេខាធិការទីស្តីការគណៈរដ្ឋមន្ត្រី បានឲ្យដឹងថា ឈាបនដ្ឋានថ្មីនេះនឹងត្រូវសាងសង់ឡើងវិញនៅចម្ងាយប្រហែល៥គីឡូម៉ែត្រពីទីតាំងចាស់។
លិខិតនេះមានខ្លឹមសារថា “ ក្រុមហ៊ុនអភិវឌ្ឍន៍ អេង កាំង ត្រូវសាងសង់ឈាបនដ្ឋានមួយ ហើយបន្ទាប់ពីសាងសង់រួច យើងនឹងប្រគល់ទីតាំងចាស់ឲ្យក្រុមហ៊ុន អេង កាំង កាន់កាប់ដើម្បីធ្វើការអភិវឌ្ឍ”។ លិខិតនេះមានខ្លឹមសារបន្ថែមថា ក្រុមហ៊ុនអេង កាំង នឹងចំណាយប្រាក់ជាង៥០០.០០០ដុល្លារ ដើម្បីសាងសង់ឈាបនដ្ឋានថ្មីនេះ។
គួររំឭកថា សាលារាជធានីភ្នំពេញបានចេញបម្រាមមិនឲ្យមានការបូជាសពនៅកណ្ដាលរាជធានីភ្នំពេញទេ ដោយសារការព្រួយបារម្ភអំពីបញ្ហាសុខភាព ហើយកាលពីឆ្នាំ២០១០បានចេញបញ្ជាឲ្យមានការបិទឈាបនដ្ឋានចុងក្រោយទាំងបួនកន្លែងក្នុងវត្តនៅកណ្ដាល
រាជធានីនេះ។
ក្រុមហ៊ុនអភិវឌ្ឍន៍ អេង កាំង មិនអាចទាក់ទងសុំការអត្ថាធិប្បាយបានទេ។ទោះជាមានការជំទាស់ពីអ្នកភូមិយ៉ាងណាក៏ដោយ ក៏ការសាងសង់ឈាបនដ្ឋានថ្មីនេះហាក់ដូចជាបានដំណើរការរួចទៅហើយ។ លោក ព្រាប មុន្នី ជាចៅសង្កាត់ បានលើកឡើងថា ឈាបនដ្ឋានថ្មីដែលមានទីតាំងស្ថិតនៅខាងលិចវត្តបាក់ខែងក្នុងសង្កាត់តែមួយនេះ ត្រូវបានសាងសង់រួចរាល់ប្រហែល៧០ភាគរយហើយ។
លោក ព្រាប មុន្នី បានមានប្រសាសន៍ថា “ នេះគឺជាសេចក្តីសម្រេចរបស់រដ្ឋាភិបាល ព្រោះឈាបនដ្ឋានចាស់នេះស្ថិតនៅកៀកនឹងផ្លូវពេក ហើយរដ្ឋាភិបាលបានប្រគល់ទីតាំងនៃឈាបនដ្ឋានចាស់នេះឲ្យក្រុមហ៊ុនធ្វើការអភិវឌ្ឍ”។
លោក ង៉ែត ចាន់បូ អនុប្រធាននាយកដ្ឋានទទួលនិងដោះស្រាយពាក្យបណ្តឹងនៃក្រសួងធម្មការនិងសាសនា បានលើកឡើងថា លោក
បានទទួលបទបញ្ជាពីទីស្តីការគណៈរដ្ឋមន្ត្រីឲ្យបិទឈាបនដ្ឋាននេះដោយសារបញ្ហាផ្សែងពុលបណ្ដាលមកពីការបូជាសព។ លោក ង៉ែត ចាន់បូ បានមានប្រសាសន៍បន្ថែមថា “ យើងបានទទួលបទបញ្ជាពីទីស្ដីការគណៈរដ្ឋមន្ត្រីឲ្យរុះរើឈាបនដ្ឋាននេះ ព្រោះឈាបនដ្ឋាននេះបង្កផលប៉ះពាល់
ដល់បរិស្ថាន”៕
ប្រែសម្រួលដោយ ស៊ុំ សុខភុំ