កាលពីម្សិលមិញ អតីតបុគ្គលិកជាង១០០នាក់របស់ក្រុមហ៊ុនបម្រើសេវាកម្មទូរស័ព្ទចល័តក្ស័យធនមួយ គឺក្រុមហ៊ុន អឹមហ្វូន (Mfone) បានធ្វើដំណើរមកពីខេត្តចំនួនបី ដើម្បីនាំគ្នាធ្វើការតវ៉ា នៅខាងក្រៅទីស្នាក់បិទទ្វារបស់ក្រុមហ៊ុននេះ ដែលស្ថិតនៅតាមបណ្តោយមហាវិថីព្រះមុនីវង្ស នៅរាជធានីភ្នំពេញ ដើម្បីទាមទារឲ្យក្រុមហ៊ុនបម្រើសេវាទូរស័ព្ទចល័តមួយនេះបើកប្រាក់បំណាច់របស់ពួកគាត់។
លោក សុខ សំផន ជាវិស្វករមួយរូប ដែលត្រូវបានជួលឲ្យមកបម្រើការងារដោយក្រុមហ៊ុន អឹមហ្វូន បានឲ្យដឹងថា បុគ្គលិកនៅរាជធានីភ្នំពេញ ព្រមទាំងបុគ្គលិកមកពីខេត្តកំពត ខេត្តកំពង់ចាម និងខេត្តកំពង់ស្ពឺ កំពុងតែនាំគ្នាទាមទារឲ្យក្រុមហ៊ុន ថៃខម ភីអិលស៊ី (ThaiCom Plc.) ជាក្រុមហ៊ុនអាណាព្យាបាលរបស់ក្រុមហ៊ុនបម្រើសេវាទូរស័ព្ទចល័ត អឹមហ្វូន ទទួលខុសត្រូវ ហើយបើកប្រាក់បំណាច់ឲ្យពួកគាត់។
លោក សុខ សំផន បានឲ្យដឹងដូច្នេះថា“ នេះគឺជាថ្ងៃទី២ហើយ ដែលយើងធ្វើការតវ៉ា ដើម្បីទាមទារឲ្យក្រុមហ៊ុន អឹមហ្វូន បើកប្រាក់បំណាច់ ពីព្រោះយើងត្រូវការជាចាំបាច់នូវការបើកប្រាក់បំណាច់ឲ្យ ដោយយោងទៅតាមច្បាប់ [ការងារ]”។
លោក ទេព ថា អតីតអ្នកគ្រប់គ្រងខាងបច្ចេកទេសរបស់ក្រុមហ៊ុន អឹមហ្វូន នៅខេត្តកំពត បានឲ្យដឹងថា តំណាងរបស់ក្រុមហ៊ុនបានសន្យាផ្តល់ចម្លើយឲ្យដឹងពីការបើកប្រាក់បំណាច់នៅខែនេះ ក៏ប៉ុន្តែ ឥឡូវនេះពួកគេពន្យារពេលកិច្ចប្រជុំនោះរហូតដល់ខែកក្កដា។ លោក ទេព ថា បាននិយាយឲ្យដឹងដូច្នេះថា “ យើងនឹងធ្វើការតវ៉ានៅថ្ងៃស្អែកទៀត ប្រសិនបើអភិបាលរបស់ក្រុមហ៊ុន អឹមហ្វូន មិនមានដំណោះស្រាយឲ្យពួកយើងទាំងអស់
គ្នាទេនោះ”។
នឹម សូលីដា អតីតវិស្វកររបស់ក្រុមហ៊ុន អឹមហ្វូន ដែលឥឡូវនេះកំពុងតែធ្វើជាតំណាងឲ្យបុគ្គលិកទាំងអស់ បានឲ្យដឹងថា បច្ចុប្បន្ន បុគ្គលិកចំនួន១.០៩២នាក់របស់ក្រុមហ៊ុន អឹមហ្វូន នៅទូទាំងប្រទេសកម្ពុជា កំពុងតែរង់ចាំឲ្យក្រុមហ៊ុនបើកប្រាក់បំណាច់របស់ពួកគាត់ ដែលមានចំនួនប្រមាណជា៤,៤៤លានដុល្លារ។
លោក អុក រី អភិបាលរបស់ក្រុមហ៊ុន អឹមហ្វូន ដែលត្រូវបានតែងតាំងសាលាដំបូងរាជធានីភ្នំពេញ ដើម្បីដោះស្រាយលើបញ្ហាបំណុលរបស់ក្រុមហ៊ុននេះ បានមានប្រសាសន៍ឲ្យដឹងថា ទ្រព្យសម្បត្តិរបស់ក្រុមហ៊ុន អឹមហ្វូននៅមិនទាន់លក់ដាច់នៅឡើយទេ ទាល់តែអាចលក់ទ្រព្យសម្បត្តិទាំងនេះដាច់ ទើបអាចមានប្រាក់យកមកបើកឲ្យអតីតបុគ្គលិករបស់ក្រុមហ៊ុនបាន។