កាលពីម្សិលមិញ សាលាដំបូងរាជធានីភ្នំពេញបានបើកសវនាការជំនុំជម្រះរឿងក្តីរបស់មនុស្សបួននាក់ដែលជាប់ចោទពីបទប្រើប្រាស់គ្រឿងញៀន និងលក់ថ្នាំញៀនមេតំហ្វេតាមីនជាង១៥0.០០០គ្រាប់ ។
លោកចៅក្រម ឆាយ វីរៈ មានប្រសាសន៍ថា ឈ្មោះ ឡាប រស្មី អាយុ៣៤ឆ្នាំ ម៉េង រតនា អាយុ៣៦ឆ្នាំ និងឈ្មោះ អួន សាមៀន អាយុ១៩ឆ្នាំ ត្រូវបានចាប់ខ្លួនដោយឡែកពីគ្នាកាលពីខែកញ្ញាឆ្នាំមុន និងត្រូវបានចោទប្រកាន់ពីបទប្រើប្រាស់ និងជួញដូរថ្នាំញៀនមេតំហ្វេតាមីន។ លោកបានបន្ថែមថា ឈ្មោះ តាំងហាក់លី អាយុ៣៤ឆ្នាំ ដែលជាផ្នែកនៃបណ្តាញនេះដែរ ត្រូវបានចោទប្រកាន់កំបាំងមុខ។
ខណៈជនឈ្មោះ រស្មី សារភាពថា ខ្លួនពិតជាបានយកថ្នាំញៀនមេតំហ្វេតាមីនចំនួន១៩០គ្រាប់ទៅឲ្យអ្នកទិញម្នាក់នៅក្នុងខណ្ឌ៧មករាមែននោះ រូបគេនិយាយថា ខ្លួនគ្រាន់តែជាឈ្មួញកណ្តាលប៉ុណ្ណោះ។
ជននេះនិយាយថា “ ខ្ញុំបានយកថ្នាំញៀនមេតំហ្វេតាមីនចំនួន១៩០គ្រាប់ពីឈ្មោះ ភាព។ ខ្ញុំមិនមែនជាឈ្មួញកណ្តាលទេ ប៉ុន្តែឈ្មោះ ភាព បានឲ្យប្រាក់ខ្ញុំ៣០ដុល្លារឲ្យយកវាទៅឲ្យអ្នកប្រើគ្រឿងញៀនម្នាក់ ហើយវាមិនមែនជារបស់ខ្ញុំទេ”។
ស្ត្រីជាប់ចោទឈ្មោះ សាមៀន ដែលត្រូវបានចាប់ខ្លួនជាមួយថ្នាំញៀន១៥០.០០០គ្រាប់នោះ បាននិយាយថា ខ្លួនក៏គ្រាន់តែជាអ្នកយកគ្រឿងញៀនឲ្យគេដែរ។ ស្ត្រីរូបនេះនិយាយថា “ ការងារខ្ញុំគឺប្រមូលប្រាក់ពីអ្នកទិញ ប្រហែល៣០០ដុល្លារ”។ ចំណែកឈ្មោះ រតនា វិញបានអះអាងថា ខ្លួនមិនទាំងដឹងថា មានថ្នាំញៀននៅជាប់ខ្លួនផងទេ ពេលត្រូវបានចាប់ខ្លួន។ លោក សុខ លួងមេធាវីរបស់ជនសង្ស័យ បានសុំឲ្យតុលាការសម្រាលបទចោទប្រកាន់លើកូនក្តីរបស់លោកព្រោះពួកគេគ្រាន់តែជាអ្នកប្រើប្រាស់គ្រឿងញៀន មិនមែនជាអ្នកជួញដូរទេ។សាលក្រមនឹងប្រកាសនៅថ្ងៃទី៧ ខែមិថុនា៕
ប្រែសម្រួលដោយ ចេវ ប៊ុននី