29 C
Phnom Penh

លោក​ ហ៊ុន សែន និងបក្ស​ប្រឆាំង​មិន​​​យល់​​​ស្រប​​​លើ​​​លទ្ធផល​នៃ​ការ​ស្ទង់មតិ​

ដោយ ឌឹ ខេមបូឌា ដេលី

បទវិភាគ

កាល​ពីម្សិលមិញ លោក​នាយក​រដ្ឋ​មន្ត្រី​ ហ៊ុន សែន បាន​មាន​ប្រសាសន៍​ថា វិទ្យាស្ថាន​សាធារណរដ្ឋ​អន្តរជាតិ​ ដែល​មាន​មូលដ្ឋាន​នៅ​សហ​រដ្ឋ​អាមេរិក បាន​បញ្ចេញ​ឲ្យ​គណ​បក្ស​ប្រជាជន​កម្ពុជា​នូវ​​​លទ្ធផល​សម្ងាត់​​ពី​​ការ​ស្ទង់​មតិ​ កាល​ពីខែ​មករា​ក្នុង​ចំណោម​អ្នកមាន​សិទ្ធិ​បោះ​ឆ្នោត​ចំនួន​២.០០០​នាក់  ដែល​​បង្ហាញ​ថា ​អ្នក​បោះ​ឆ្នោត​៧៧​ភាគរយ​នឹង​បោះ​ឆ្នោត​ឲ្យ​គណបក្ស​ប្រជាជន​កម្ពុជា​ ឬក៏​ទំនង​ជា​បោះ​ឆ្នោត​ឲ្យ​គណ​បក្ស​កាន់​អំណាច​របស់​លោក​ នៅ​ក្នុង​ការ​បោះ​ឆ្នោត​ជាតិ​ ​ខាង​មុខ​នេះ​។

​នៅ​ក្នុង​សុន្ទរកថា​​នៅ​ឯ​ពិធី​​បញ្ចុះ​​​ខណ្ឌ​សីមា​​នៅ​ក្នុង​ខេត្ត​កំពង់ចាម លោក​នាយក​រដ្ឋមន្ត្រី​បាន​មាន​ប្រសាសន៍​ថា មួយ​សប្ដាហ៍​បន្ទាប់ពី​វិទ្យា​ស្ថាន​សាធារ​ណរដ្ឋ​អន្តរជាតិ​ចេញ​ផ្សាយ​ជា​សាធារណៈ​នូវ​​របាយការណ៍​មួយ​​ ដែល​រក​ឃើញ​ថា ៧៩​ភាគរយ​នៃ​ប្រជា​ពលរដ្ឋ​​ខ្មែរ​​​​​ជឿថា ប្រទេស​នេះ​កំពុង​​ដើរក្នុង​​​​​​ទិស​ដៅ​ត្រឹម​ត្រូវនោះ​ វិទ្យាស្ថាន​សាធា​រណ​រដ្ឋ​អន្តរជាតិ​​ក៏បាន​ផ្ដល់​តួលេខ​បន្ថែម​ដល់​គណបក្ស​នយោបាយ​នីមួយៗ​អំពី​កម្រិត​នៃ​ការ​គាំទ្រ​របស់​ខ្លួន ក្នុង​ចំណោម​អ្នក​ឆ្លើយ​សំណួរ​​ក្នុង​ការ​ស្ទាបស្ទង់​មតិ​ផង​ដែរ។

លោក ហ៊ុន សែន បាន​មាន​ប្រសាសន៍​​ថា “ គណ​បក្ស​ដទៃ​ក៏​ទទួល​បាន​លទ្ធផល​របស់​ខ្លួន​ដែរ។ នេះ​គឺជា​សំណួរ​លេខ​១៣​ ៖ តើ​​បង​ប្អូនបោះ​ឆ្នោត​ឲ្យ​គណបក្ស​ប្រជា​ជន​កម្ពុជា​ទេ? ចម្លើយ​គឺ​៖ ៤៨​ភាគ​រយ​នឹង​បោះ​ឆ្នោត​ឲ្យ២៨​​​ភាគ​រយ​ទំនង​ជា​បោះឆ្នោត​ឲ្យ​​៧​ភាគ​រយ​ទំនង​ជា​មិន​បោះ​ឆ្នោត​ឲ្យ​ទេ​ ហើយ​១៥​ភាគ​រយ​នឹង​មិន​បោះ​ឆ្នោត​ឲ្យ​តែ​ម្ដង​ ចំណែក​ឯ​​១​ភាគរយ​ទៀត​និយាយ​ថា ពួកគេ​មិន​ដឹង​ទេ”។ លោក​បាន​បន្ត​ថា “ ដូច្នេះ ប្រជា​ពល​រដ្ឋ​ដែល​នឹង​បោះ​ឆ្នោត​ឲ្យ​ និង​ទំនង​ជា​បោះ​ឆ្នោត​ឲ្យ​គណបក្ស​ប្រជា​ជនកម្ពុជា​​សរុប​ទាំង​អស់​មាន​ចំនួន​​៧៧​ភាគរយ ហើយ​មាន​តែ​២២​ភាគ​រយ​ប៉ុណ្ណោះ ដែល​នឹង​មិន​បោះ​ឆ្នោត​ឲ្យ​ ឬ​ទំនងជា​មិន​បោះ​ឆ្នោត​ឲ្យ[គណបក្ស​ប្រជា​ជន​កម្ពុជា​]”។

លោក​ យឹម សុវណ្ណ អ្នក​​ពាក្យ​គណបក្ស​សង្គ្រោះ​ជាតិ បាន​មាន​ប្រសាសន៍​កាល​ពី​ម្សិល​មិញ​ថា ​​​គណ​បក្ស​ប្រឆាំង​ទទួល​បាន​​របាយការណ៍​មួយ​​​ស្រដៀង​គ្នា​នេះ​ពី​វិទ្យា​ស្ថាន​សាធារណរដ្ឋ​អន្តរជាតិ​ ដែល​បង្ហាញ​លទ្ធផល​ខុស​គ្នា​ស្រឡះ។

លោក យឹម សុវណ្ណ បាន​មាន​ប្រសាសន៍​ថា “ ខ្ញុំ​ទទួល​បាន​ [លទ្ធផល​នៃ​ការ​ស្ទង​់មតិ​ពី​វិទ្យាស្ថាន​សាធារណរដ្ឋ​អន្តរ​ជាតិ​] នា​ពេលថ្មីៗ​នេះ។ [លទ្ធផល​] បង្ហាញ​ថា ៥៤​ភាគរយ​នៃ​ប្រជា​ពល​រដ្ឋ​ដែល​បាន​ស្ទង់​មតិ​នឹង​បោះ​ឆ្នោត​ឲ្យ​គណ​បក្ស​សង្គ្រោះ​ជាតិ ហើយ​៣០​ភាគរយ​នឹង​មិន​បោះ​ឆ្នោត​ឲ្យ​ [គណ​បក្ស​សង្គ្រោះ​ជាតិ]ទេ ចំណែក​ ​៣​ភាគរយ​ទៀត​ឆ្លើយ​ថា មិន​ដឹង​”។

លោក យឹម​ សុវណ្ណ បាន​បន្ត​ថា “ ខ្ញុំ​មិន​ដឹង​ថា [លោក ហ៊ុន សែន] បាន​លទ្ធ​ផល​នៃ​ការ​ស្ទង់​មតិ​នេះ​មក​ពីណា​ទេ។​ ការ​អះអាង​របស់​គាត់​គឺ​គ្រាន់​តែ​ធ្វើ​កុំ​ឲ្យ​​សកម្ម​ជន​ និង​ថ្នាក់​ដឹក​​នាំ​គណបក្ស​របស់​គាត់​​ភ័យ​ខ្លាច​ [​ចាញ់​ឆ្នោត​] ប៉ុណ្ណោះ​”។

លោក ចេសុន ស្មាត​ (Jason Smart) នាយក​ប្រចាំ​ប្រទេស​របស់​វិទ្យា​ស្ថាន​សាធារណរដ្ឋ​អន្តរជាតិ​ ​មាន​ប្រសាសន៍​​ថា វិទ្យា​ស្ថាន​សាធា​រណរដ្ឋ​អន្តរជាតិ​​បាន​រក្សា​ទុក​ស្ថិតិ​ផ្ទៃ​ក្នុង​អំពី​ជម្រើស​​នៃ​ការ​បោះ​ឆ្នោត​របស់​ប្រជា​ពល​រដ្ឋ​​​​ប៉ុន្តែ​មិន​ដែល​បាន​ចេញ​ផ្សាយ​ស្ថិត​ិ​ទាំង​នេះ​​ឲ្យ​គណបក្ស​ណាមួយ​ដឹង​​ឡើយ​។ លោក​បាន​មាន​ប្រសាសន៍​ថា “ យើង​មាន​តួលេខ​​​តាម​ដាន​ផ្ទៃ​ក្នុង ប៉ុន្ដែ​យើង​មិន​បាន​ផ្សព្វផ្សាយ​ឲ្យ​គណ​បក្ស​ណាមួយ​ដឹង​​ទេ។ យើងជួប​ជាមួយ​គណ​បក្ស​ទាំង​អស់​មែន ប៉ុន្ដែ យើង​មិន​បាន​ចែក​រំលែក​ព័ត៌មាន​នេះ​ជាមួយ​ពួកគេ​ទេ​”។

នៅ​ពេល​សួរ​ថា តើ​តួលេខ​ដែល​លើក​ឡើង​ដោយ​លោក ហ៊ុន សែន និង​លោក យឹម សុវណ្ណ នោះ​ បាន​ឆ្លុះ​បញ្ចាំង​ពី​​លទ្ធ​ផល​នៃ​​ការ​រក​ឃើញ​របស់​វិទ្យា​ស្ថាន​សាធា​រណ​រដ្ឋ​​អន្តរជាតិ​ដែរ​ ឬ​អត់​នោះ​​ លោក ចេសុន ស្មាត
បាន​មាន​ប្រសាសន៍​ថា លោក​មិន​ដឹង​ទេ។

អំឡុង​​ពេល​​ថ្លែង​សុន្ទរកថា​កាលពី​ម្សិល​មិញ លោក ហ៊ុន សែន ក៏​មាន​ប្រសាសន៍​ផង​ដែរ​ថា បន្ទាប់ពី​ពិនិត្យ​​លទ្ធផល​នៃ​ការ​ស្ទង់​មតិ​របស់​វិទ្យា​ស្ថាន​សាធារណរដ្ឋ​អន្តរជាតិ ដែល​ក្នុង​នោះ ប្រជា​ពលរដ្ឋ​ចំនួន​៧៩​ភាគរយ​បាន​ឆ្លើយ​គាំទ្រ​ នៅ​ពេល​សួរ​អំពី​ភាព​ជា​អ្នក​ដឹក​នាំ​របស់​គណបក្ស​របស់​លោក ដោយ​លើក​ឡើង​អំពី ហេដ្ឋារចនាសម្ព័ន្ធ​ជា​ច្រើន​​ និង​ការ​កាត់​បន្ថយ​ភាព​ក្រី​ក្រ​​នោះ​ លោក​ចង់​ដឹង​ថា ហេតុ​អ្វី​បាន​ជា​ប្រជា​ពល​រដ្ឋ​ជិត​មួយ​ភាគ​បួន​​នៅ​តែ​មិន​ជឿ​លើ​​សមត្ថ​ភាព​ដឹក​នាំ​​របស់​​គណ​បក្ស​កាន់​អំណាច​​ក្នុង​ការ​ដឹក​នាំ​ប្រទេស​​ក្នុង​ទិស​ដៅ​​ត្រឹម​ត្រូវ​។

លោក​បាន​សួរ​ថា “ ​ចំពោះ​​ប្រជា​ពល​រដ្ឋ​ចំនួន​២១​ភាគរយ ដែល​បាន​និយាយ​ថា យើង​​មិន​បាន​ដើរ​​តាម​ទិស​ដៅ​ត្រឹម​ត្រូវ​នោះ យើង​​ត្រូវ​តែ​ពិនិត្យ​មើល​ថា តើ​មូល​ហេតុ​​អ្វី។ តើ​​ពួកគាត់​​ព្រួយ​បារម្ភ​​ពី​​អ្វី​?”។

យោង​តាម​របាយការណ៍​របស់វិទ្យា​ស្ថាន​​​សាធារណរដ្ឋ​អន្តរ​ជាតិ បាន​ឲ្យ​ដឹង​ថា ប្រជា​ពល​រដ្ឋ​ចំនួន​២១​ភាគ​រយ បាន​និយាយ​ថា ពួកគាត់​​មិន​គិត​ថា ប្រទេស​នេះ​កំពុង​តែ​ដើរ​​​ក្នុង​​ទិស​ដៅ​ត្រឹម​ត្រូវ​នោះ​ទេ គឺ​ដោយ​សារ​តែ​អំពើ​ពុក​រលួយ ការ​ចាប់​យក​ដី ភាព​ក្រីក្រ និង​បក្ខពួក​និយម​៕

(រាយការណ៍​បន្ថែម​ដោយ Colin Meyn)
ប្រែ​សម្រួល​ដោយ​ ហម សុផាណ្ណា​​​​​​​​​​​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស