មន្ត្រីយោធាកម្ពុជាម្នាក់បាននិយាយកាលពីម្សិលមិញថា កាលពីសប្តាហ៍មុន ទាហានថៃបានបាញ់ទៅលើអ្នកកាប់ឈើខុសច្បាប់ជាជនជាតិខ្មែរ ដោយបណ្តាលឲ្យខ្មែរពីរនាក់ស្លាប់ និងបួននាក់ទៀតរងរបួស។
លោកឧត្តមសេនីយ៍ត្រី លី ច័ន្ទតារា អនុប្រធានការិយាល័យការពារព្រំដែននៃកងយោធភូមិភាគ៤មានប្រសាសន៍ថា ទាហានថៃបានបាញ់ជនជាតិខ្មែរទាំងនេះ បន្ទាប់ពីពួកគេឆ្លងដែនដោយខុសច្បាប់កាលពីថ្ងៃសៅរ៍នៅម៉ោង៨យប់ នៅច្រករបៀងអានសេះ ក្នុងស្រុកជាំក្សាន ខេត្តព្រះវិហារ។
លោកឧត្តមសេនីយ៍ឯក ច័ន្ទតារា បានមានប្រសាសន៍ថា “ ទាហានថៃបានបាញ់ស្លាប់អ្នកកាប់ឈើជាខ្មែរពីរនាក់ បួននាក់រងរបួសស្រាល និងប្រាំមួយនាក់ទៀតត្រូវបានចាប់ខ្លួននៅក្នុងទឹកដីថៃ”។លោកមានប្រសាសន៍ថា មនុស្សបួននាក់ ដែលបានរត់គេចខ្លួនរួចទាំងរងរបួសស្រាល បានវិលត្រឡប់មកដល់កម្ពុជាវិញហើយ និងបានរាយការណ៍អំពីការបាញ់ប្រហារនេះប្រាប់អាជ្ញាធរ។
លោកឧត្តមសេនីយ៍ត្រី ច័ន្ទតារា បានថ្លែងថា អត្តសញ្ញាណរបស់ជនរងគ្រោះនៅមិនទាន់ស្គាល់នៅឡើយទេ ហើយនៅមិនទាន់ច្បាស់ថាមនុស្សប្រាំមួយនាក់ដែលត្រូវបានចាប់ខ្លួន បានរងរបួសដែរឬអត់នោះទេ។
លោកបានមានប្រសាសន៍ថា “ សាកសពអ្នកស្លាប់ កំពុងរក្សាទុកនៅក្នុងមន្ទីរពេទ្យមួយនៅក្នុងខេត្តស៊ីសាកេត។ យើងកំពុងទាក់ទងជាមួយថៃដើម្បីបញ្ជូនសាកសពមកវិញ។
ផ្ទុយនឹងសេចក្តីរាយការណ៍របស់លោកឧត្តមសេនីយ៍ត្រី ច័ន្ទតារា លោកឧត្តមសេនីយ៍ត្រី សំ បុប្ផារ័ត្ន មេបញ្ជាការកងយោធពលខេមរភូមិន្ទប្រចាំខេត្តព្រះវិហារ បដិសេធថា គ្មានហេតុការណ៍ណាមួយបានកើតឡើងទេ។
ទោះជាយ៉ាងណា លោក ជុង ហួត មេឃុំជាំក្សាន្ត បានមានប្រសាសន៍ថា លោកបានដំណឹងអំពីករណីនេះ។
លោកបានបន្តថា “ អាជ្ញាធរតែងតែអប់រំប្រជាពលរដ្ឋកុំឲ្យប្រថុយនឹងគ្រោះថ្នាក់ដោយការឆ្លងដែនខុសច្បាប់ទៅកាប់ឈើ ប៉ុន្តែអ្នកខ្លះមិនស្តាប់ទេ”។ លោកបានបន្ថែមថា អ្នកកាប់ឈើភាគច្រើនជាជនចំណាកស្រុកមកពីកន្លែងផ្សេងៗទូទាំងប្រទេស ដើម្បីស្វែងរកឈើគ្រញូងដែលមានតម្លៃ។
លោកបន្តថា “ អាជ្ញាធររបស់យើង កំពុងធ្វើការយ៉ាងសកម្មដើម្បីទប់ស្កាត់ពួកគេ”។ ដោយសារតម្រូវការខ្ពស់ក្នុងប្រទេសចិន សម្រាប់ផលិតគ្រឿងសង្ហារិម ឈើគ្រញូងអាចលក់បានតម្លៃរាប់ពាន់ដុល្លារក្នុងមួយម៉ែត្រគូប។
តាមសេចក្តីរាយការណ៍ថា ទាហានថៃបានបាញ់សម្លាប់អ្នកកាប់ឈើជាខ្មែរយ៉ាងតិចប្រាំមួយនាក់ហើយនៅឆ្នាំនេះ។ កាលពីដើមខែនេះ មនុស្សចំនួនបួននាក់បានបាត់ខ្លួន នៅពេលទាហានថៃបាញ់ប្រហារទៅលើក្រុម
អ្នកកាប់ឈើនៅតាមព្រំដែន ជិតខេត្តឧត្តរមានជ័យ។ ក្នុងឆ្នាំ២០១២ ខ្មែរចំនួន៤៥នាក់ត្រូវបានកងកម្លាំងព្រំដែនថៃបាញ់សម្លាប់ពេលស្វែងរកកាប់ឈើនៅតាមព្រំដែន៕
ប្រែសម្រួលដោយ ចេវ ប៊ុននី