កាលពីម្សិលមិញ សាលាដំបូងរាជធានីភ្នំពេញ បានផ្តន្ទាទោសអតីតអនុប្រធានការិយាល័យនគរបាលទេសចរណ៍ក្រសួងមហាផ្ទៃម្នាក់ ឲ្យជាប់ពន្ធនាគាររយៈពេល២៩ឆ្នាំពីបទចែកចាយ និងរក្សាទុកសារធាតុគីមី និងសម្ភារសម្រាប់ផលិតថ្នាំញៀនមេតំហ្វេតាមីនចំនួន៣៤តោន។
លោកស្រី ចាំង ស៊ីណាត ប្រធានចៅក្រមជំនុំជម្រះបានមានប្រសាសន៍ថា “ សាលាដំបូងបានសម្រេចចេញសាលក្រមផ្តន្ទាទោសឈ្មោះ កាំង សុវណ្ណារ៉ា ឲ្យជាប់ពន្ធនាគាររយៈពេល២៩ឆ្នាំ និងបង្គាប់ឲ្យជននេះបង់ប្រាក់ពិន័យ៨០លានរៀល”។
អតីតមន្ត្រីនគរបាលអាយុ៤៧ឆ្នាំរូបនេះត្រូវបានចាប់ខ្លួន កាលពីថ្ងៃទី១៤ ខែកក្កដា ឆ្នាំ២០១២ នៅរាជធានីភ្នំពេញ ប្រហែលពីរសប្តាហ៍ បន្ទាប់ពីកងរាជអាវុធហត្ថបានឆ្មក់ចូលកសិដ្ឋានចិញ្ចឹមជ្រូកមួយកន្លែងនៅខេត្តកំពង់ស្ពឺ ដែលគាត់បានជួលបន្ទាប់ពីអ្នកភូមិបានប្តឹងអំពីការឆួលក្លិនគីមីដ៏ខ្លាំងនៅក្នុងតំបន់នោះ។
អំឡុងពេលធ្វើសវនាការរបស់គាត់កាលពីដើមខែនេះ លោក កាំង សុវណ្ណារ៉ា បាននិយាយថា ធុងទាំងនោះគឺជាធុងដាក់ទឹកជ្រលក់ ដែលគាត់គ្រោងនាំចេញឲ្យបុរសជនជាតិចិនសញ្ជាតិកាណាដាម្នាក់ ។ កាលពីម្សិលមិញ លោកស្រី ជាតិ សុខា មេធាវីរបស់ឈ្មោះ កាំង សុវណ្ណារ៉ា បានអះអាងជាថ្មីម្តងទៀតថា កូនក្តីរបស់លោកស្រីមិនមានទោសទេ។
លោកស្រី ជាតិ សុខា បានមានប្រសាសន៍បន្ថែមទៀតថា “ កូនក្តីរបស់ខ្ញុំមិនអាចទទួលយកសាលក្រមនេះបានទេ។ ខ្ញុំនឹងពិភាក្សាជាមួយនិងលោក កាំង សុវណ្ណារ៉ា បន្ថែមទៀតហើយយើងនឹងរៀបចំប្តឹងឧទ្ធរណ៍”៕
ប្រែសម្រួលដោយ ស៊ុំ សុខភុំ