អ្នកភូមិបានឲ្យដឹងថា កាលពីថ្ងៃពុធ អ្នកភូមិជនជាតិភាគតិចព្នង នៅខេត្តមណ្ឌលគិរី បានបញ្ឈប់ និងឃាត់ខ្លួនអ្នកក្រៅភូមិចំនួន១១នាក់ ដែលពួកគាត់បានតាមទាន់ពេលកំពុងកាប់ឈើខុសច្បាប់នៅក្នុងតំបន់នោះ។
អ្នកភូមិនិយាយថា ខ្លួនបានធ្វើសកម្មភាពដោយខ្លួនឯង ក្នុងការបញ្ឈប់អ្នកកាប់ឈើមួយក្រុម ដែលត្រូវបានគេជួលឲ្យកាប់រំលំដើមឈើនៅលើដីរដ្ឋទំហំ១.០០០ហិកតានៅឃុំប៊ូស្រា ស្រុកពេជ្រាដា បន្ទាប់ពីមិនមាន
ការជួយធ្វើអន្តរាគមន៍ពីអាជ្ញាធរ។
លោក ឃុត ចាន់រ៉ា ប្រធានសហគមន៍ព្រៃឈើ ពូលូ ជាក្រុមមួយរបស់ជនជាតិភាគតិចព្នង ដែលដើរល្បាតដើម្បីការពារព្រៃនេះ ព្រោះជាព្រៃដែលពួកគាត់ពឹងផ្អែកសម្រាប់ជីវភាពរស់នៅជាប្រពៃណីរបស់ពួកគាត់នោះ បានមានប្រសាសន៍ថា អ្នកកាប់ឈើទាំងនេះ បានរានព្រៃកាប់ឈើប្រហែល១០០ហិកតា ចាប់តាំងពីដើមខែនេះមក។
លោក ឃុត ចាន់រ៉ា បានមានប្រសាសន៍ថា “ កាលពីថ្ងៃពុធ យើងរឹបអូស បានរណារយន្ដពីរគ្រឿង កាំបិត និងពូថៅមួយចំនួនពីមនុស្ស១១នាក់”។ លោក ឃុត ចាន់រ៉ា បានមានប្រសាសន៍ថា បន្ទាប់មក អ្នកភូមិទាំងនេះបានឃាត់ខ្លួនមនុស្សទាំង១១នាក់នេះ ដែលបានសារភាពថា ខ្លួនត្រូវបានគេនាំមកពីខេត្តកំពង់ចាម រយៈពេលប្រហែល១ម៉ោង។
លោកមានប្រសាសន៍ថា “ ពួកគេត្រូវបានដោះលែងនៅថ្ងៃដដែលនោះ បន្ទាប់ពីយើងបានព្រមានពួកគេកំុឲ្យត្រឡប់មកវិញម្ដងទៀត”។ លោក ឃុត ចាន់រ៉ា បានមានប្រសាសន៍ថាអ្នកភូមិ ចាប់បានក្រុមអ្នកកាប់ឈើនៅលើដីនេះបីលើករួចមកហើយនៅខែនេះ និងបានរាយការណ៍អំពីអ្នកកាប់ឈើទាំងនេះទៅអាជ្ញាធរ ដែលមិនបានចាត់ការអ្វីសោះ។លោកមានប្រសាសន៍ថា “ យើងទាំងអស់គ្នាបាននាំគ្នាមកបញ្ឈប់សកម្មភាពកាប់ឈើខុសច្បាប់នៅពេលនេះ ពីព្រោះអាជ្ញាធរធ្វើមិនដឹងមិនឮចំពោះសំណើរបស់យើង”។
អ្នកកាប់ឈើ ដែលត្រូវបានចាប់ខ្លួន ទាំងអស់បាននិយាយប្រាប់អ្នកភូមិថា ពួកខ្លួនត្រូវបានអ្នកជំនួញក្នុងស្រុកមិនស្គាល់ឈ្មោះម្នាក់ជួលពួកគេម្នាក់២០.០០០រៀលក្នុងមួយថ្ងៃ។ លោក ជ្រីវ ធី អាយុ៤៣ឆ្នាំ អ្នកភូមិម្នាក់ទៀតបាននិយាយថា“ យើងបានឃើញឈើរាប់រយដើមដួលនៅក្នុងព្រៃនេះ ដោយឈើមួយដើមៗមានប្រវែងចន្លោះពី៥ម៉ែត្រ ទៅ១២ម៉ែត្រ និងមានមុខកាត់ប្រហែលពី៥០ទៅ៦០សង់ទីម៉ែត្រ”។
លោក ងួន សារ៉ាន់ អភិបាលស្រុកបានបដិសេធថា អាជ្ញាធរមិនបានធ្វើមិនដឹងឮចំពោះពាក្យបណ្តឹងរបស់អ្នកភូមិអំពីការកាប់ឈើនេះទេ ប៉ុន្ដែបានទទួលស្គាល់ថា ក្រុមមន្ត្រីគ្រាន់តែបានទៅតំបន់នេះនៅពេលដែលអ្នកភូមិបានរាយការណ៍អំពីការកាប់ឈើនេះជាលើកទី៤ប៉ុណ្ណោះ ។
លោកមានប្រសាសន៍ថា “ យើងមិនដែលធ្វើមិនដឹងមិនឮចំពោះសំណើរបស់អ្នកភូមិទាំងនេះទេ ប៉ុន្ដែអ្នកកាប់ឈើទាំងនោះបានរត់គេចខ្លួនចូលក្នុងព្រៃពេលយើងទៅដល់”។ “ ខ្ញុំបានបង្គាប់ឲ្យមន្ត្រីមូលដ្ឋានរបស់ខ្ញុំ
ធ្វើរបាយការណ៍ស្ដីពីទំហំដីព្រៃសហគមន៍នេះ និងវាលកប់ខ្មោចរបស់ជនជាតិភាគតិចព្នង ដើម្បីផ្ដល់ការការពារចំពោះអ្នកភូមិទាំងនេះ”៕
ប្រែសម្រួលដោយ ស៊ុំ សុខភុំ