កាលពីម្សិលមិញ សាលាដំបូងរាជធានីភ្នំពេញបានផ្តន្ទាទោសអតីតក្រឡាបញ្ជីរបស់ខ្លួនម្នាក់ដាក់ពន្ធនាគាររយៈពេលបួនឆ្នាំកន្លះ ពីបទរំលោភលើសេចក្តីទុកចិត្ត និងក្លែងបន្លំឯកសារ បន្ទាប់ពីរូបគាត់ត្រូវបានរកឃើញពិរុទ្ធភាពជុំវិញការទទួលប្រាក់ចំនួន២៥០.០០០ដុល្លារពីអ្នកជំនួញម្នាក់ជាថ្នូរនឹងការពន្លឿននិងបញ្ចប់សវនាការមួយដោយជោគជ័យ។
លោក គ្រួច បូរ៉ាត់ អាយុ៤០ឆ្នាំ ត្រូវបានចាប់ខ្លួនកាលពីខែតុលា និងត្រូវបានចោទប្រកាន់ពីបទទទួលប្រាក់នោះពីឈ្មោះ សួន លី ដើម្បីពន្លឿនរឿងក្តីមួយ ពាក់ព័ន្ធនឹងជម្លោះក្នុងការរកស៊ីរបស់គាត់។ នៅពេលជម្លោះនេះត្រូវបានដោះស្រាយរួចក្រៅប្រព័ន្ធតុលាការ លោក លី ចង់បានប្រាក់របស់ខ្លួនពីក្រឡាបញ្ជីនោះវិញ ប៉ុន្តែមិនបានទទួលឡើយ ជាហេតុធ្វើឲ្យលោកដាក់ពាក្យបណ្តឹង ដែលបានឈានដល់ការចាប់ខ្លួនក្រឡាបញ្ជីឈ្មោះបូរា៉ត់ នេះ។
លោក ស៊ិន វិសាល ប្រធានក្រុមប្រឹក្សាជំនុំជម្រះ បានមានប្រសាសន៍ថា “តុលាការសម្រេចផ្តន្ទាទោសឈ្មោះ គ្រួច បូរ៉ាត់ ដាក់ពន្ធនាគាររយៈពេលបួនឆ្នាំកន្លះ និងបង្គាប់ឲ្យជននេះប្រគល់ប្រាក់ឲ្យជនរងគ្រោះវិញ”។
គួររំឭកថា លោក បូរ៉ាត់ ធ្លាប់ធ្វើការក្រោមឱវាទរបស់ចៅក្រម កែ សាខន នៅពេលលោកទទួលប្រាក់សគុណដ៏ច្រើននោះ ហើយអំឡុងសវនាការជំនុំជម្រះកាលពីថ្ងៃទី៩ ខែមេសា អតីតក្រឡាបញ្ជីរូបនេះអះអាងថា ថ្វីដ្បិតតែខ្លួនបានទទួលយកប្រាក់២៥០.០០០ដុល្លារនោះក៏ពិតមែន ប៉ុន្តែលោកត្រូវបានបង្គាប់ឲ្យធ្វើដូច្នេះដោយចៅក្រម សាខន ដែលបានចុះហត្ថលេខាលើឯកសារទាំងអស់ពាក់ព័ន្ធនឹងការបង់ប្រាក់នេះ។
លោក បូរ៉ាត់ បានផ្តល់សក្ខីកម្មថា នៅពេលដែលលោក លី ទារប្រាក់របស់ខ្លួនវិញលោកចៅក្រម សាខន បាននិយាយថា លោកនឹងសងប្រាក់ឲ្យអ្នកជំនួញរូបនោះវិញ។
លោកចៅក្រម សាខន ដែលត្រូវបានផ្ទេរទៅសាលាដំបូងខេត្តតាកែវ កាលពីដើមឆ្នាំនេះ បានឆ្លើយតបថា លោកមិនស្គាល់លោក លី ទេ ហើយមិនបានចុះហត្ថលេខាលើឯកសារទាក់ទងនឹងប្រាក់នោះឡើយ។ អំឡុងសវនាការជំនុំជម្រះ ចៅក្រម សាខន អះអាងថា លោកបានបង្គាប់ឲ្យក្រឡាបញ្ជីរបស់លោកបញ្ចូលប្រាក់របស់លោក លី ទៅក្នុងគណនីធនាគាររបស់សាលាដំបូងរាជធានី ប៉ុន្តែ លោក បូរ៉ាត់ មិនបានធ្វើដូច្នេះទេ ហើយក្រោយមកបែរជាចោទលោកថា មិនបានប្រគល់ប្រាក់នោះទៅវិញ។
លោកបានមានប្រសាសន៍កាលពីម្សិលមិញថា “សាលក្រមនេះផ្តល់យុត្តិធម៌ដល់រូបខ្ញុំហើយ ព្រោះលោក បូរ៉ាត់ បានយកប្រាក់នោះ រួចបានចោទប្រកាន់ខ្ញុំខុសពីការពិត”។
លោក ម៉េ វណ្ណាឌី មេធាវីចុងចោទមិនបានឡើងសវនាការដើម្បីស្តាប់ការប្រកាសសាលក្រមកាលពីម្សិលមិញទេ ប៉ុន្តែនៅពេលទាក់ទងបានតាមទូរស័ព្ទ លោកបាននិយាយថា លោកមិនដឹងថា តើកូនក្តីរបស់លោកនឹងប្តឹងឧទ្ធរណ៍ជំទាស់នឹងសាលក្រមនេះឬយ៉ាងណាឡើយ។
លោក ម៉េ វណ្ណាឌី បានមានប្រសាសន៍ថា “ពេលនេះ គាត់កំពុងស្ថិតនៅក្នុងពន្ធនាគារព្រៃស ហើយរឿងប្តឹងឧទ្ធរណ៍ឬអត់នោះ គឺស្រេចតែគាត់ទេ។ ប៉ុន្តែសាលក្រមនេះ មិនយុត្តិធម៌ឡើយ ព្រោះតុលាការបានផ្តន្ទាទោសគាត់ ដោយគ្មានការសើុបអង្កេតឲ្យបានគ្រប់គ្រាន់សោះ”៕
ប្រែសម្រួលដោយ ចេវ ប៊ុននី