កម្មវិធីជាតិទប់ស្កាត់ជំងឺគ្រុនឈាម បានឲ្យដឹងកាលពីម្សិលមិញថា កុមារ១៥នាក់បានស្លាប់ដោយសារជំងឺគ្រុនឈាមនៅក្នុងរយៈពេល១៩សប្តាហ៍ដំបូងនៃឆ្នាំនេះ ខណៈដែលជំងឺដែលឆ្លងពីសត្វមូសនេះបានចម្លងទៅមនុស្ស ចំនួន២.៥២៧នាក់អំឡុងរយៈពេលដូចគ្នានេះ។
លោក ង៉ាន ចន្ថា នាយកកម្មវិធីជាតិទប់ស្កាត់ជំងឺគ្រុនឈាមបានសម្តែងការសោកស្តាយចំពោះការស្លាប់កុមារទាំង១៥នាក់ ប៉ុន្តែលោកបញ្ជាក់ថា ចំនួនអ្នកស្លាប់នេះបានថយចុះ បើប្រៀបធៀបនឹងរយៈពេលដូចគ្នានេះកាលពីឆ្នាំមុន ដែលនៅពេលនោះ កុមារ១៧នាក់បានស្លាប់ និងមនុស្ស៣.៦៥១នាក់បានឆ្លងជំងឺនេះ ហើយស្ថានភាពនេះបានប្រសើរជាងឆ្នាំ២០០៧ឆ្ងាយណាស់ ដែលនៅពេលនោះកុមារ៥៧នាក់បានស្លាប់នៅទូទាំងប្រទេសក្នុងរយៈពេល១៩សប្តាហ៍ដំបូង។
លោក ង៉ាន ចន្ថា មានប្រសាសន៍ទៅកាន់សិស្សវិទ្យាល័យប្រហែល១.២០០នាក់ដែលបានចូលរួមការដើរក្បួនពីវិទ្យាល័យចតុមុខទៅកាន់សួនច្បារមុខវត្តបទុម ដើម្បីលើកកម្ពស់ការយល់ដឹងពីជំងឺគ្រុនឈាមនេះថា “ ទោះបីជាយើងដឹងថា ករណីឆ្លងជំងឺគ្រុនឈាមកំពុងថយចុះក៏ដោយ ក៏យើងនៅតែត្រូវយកចិត្តទុកដាក់ចំពោះការទប់ស្កាត់ជំងឺគ្រុនឈាមកុំឲ្យមានការផ្ទុះឡើងថ្មីទៀតដែរ។
លោក ង៉ាន ចន្ថា បានមានប្រសាសន៍ថា “ [ជំងឺគ្រុនឈាម] បានថយចុះ៤៦ភាគរយអំឡុងរយៈពេល១៩សប្តាហ៍ដំបូងនៃឆ្នាំនេះ បើប្រៀបធៀបនឹងរយៈពេលដូចគ្នានេះកាលពីឆ្នាំ២០១២”។ហើយលោកបានអរគុណដល់មន្ត្រីសុខាភិបាល និងឪពុកម្តាយចំពោះការខំប្រឹងប្រែងការពារកូនៗរបស់ខ្លួនកុំឲ្យមូសខាំ និងលុបបំបាត់កន្លែងមូសពង។
មូសដែកគោលមានក្រឡាឆ្នូតសខ្មៅងាយចំណាំណាស់ ហើយវាជាភ្នាក់ងារចម្លងជំងឺគ្រុនឈាម វាពងនៅកន្លែងមានទឹកដក់ ជាពិសេសនៅតំបន់ជាយក្រុង និងជុំវិញផ្ទះ និងកសិដ្ឋានជាដើម។
លោក ង៉ាន ចន្ថា បានមានប្រសាសន៍ថា បច្ចុប្បន្ននេះបុគ្គលិកកម្មវិធីជាតិគ្រប់គ្រងជំងឺគ្រុនឈាមកំពុងចែកថ្នាំ អាបែត សម្រាប់សម្លាប់សត្វមូសចំនួន១៤០តោនទូទាំងប្រទេស ក្នុងកិច្ចខិតខំប្រឹងប្រែងដើម្បីលុបបំបាត់កន្លែងមូសពង ជាពិសេសនៅតាមអាង និងពាងទឹកតាមផ្ទះក្នុងតំបន់ជនបទ៕
ប្រែសម្រួលដោយ សោម សារុន