កាលពីថ្ងៃសៅរ៍ លោកនាយករដ្ឋមន្ត្រី ហ៊ុន សែន បានថ្លែងប្រាប់បុគ្គលិកសុខាភិបាលនិងបណ្ដាអង្គការក្រៅរដ្ឋាភិបាលផ្នែកសុខាភិបាលថា ពួកគេកំពុងតែខ្ជះខ្ជាយថវិការបស់ខ្លួនលើយុទ្ធនាការផ្សព្វផ្សាយអំពីការបំបៅកូនដោយទឹកដោះនៅតាមតំបន់ជនបទ ព្រោះថា ៩៩ភាគរយនៃម្ដាយនៅតាមតំបន់ទាំងនោះ បានបំបៅកូនដោយទឹកដោះរួចទៅហើយ។
ថ្លែងទៅកាន់និស្សិត បុគ្គលិកអង្គការក្រៅរដ្ឋាភិបាល និងមន្ត្រីរដ្ឋាភិបាលរាប់ពាន់នាក់នៅមជ្ឈមណ្ឌលកោះពេជ្រ ក្នុងរាជធានីភ្នំពេញ ក្នុងឱកាសប្រារព្ធទិវាកុមារអន្តរជាតិ លោក ហ៊ុន សែន បានលើកឡើងថា តំបន់ដែលគួរឲ្យព្រួយបារម្ភពិតប្រាកដនោះ គឺតំបន់ក្រុង ដែលគ្រួសារនានាមានប្រាក់ចំណូលគ្រប់គ្រាន់សម្រាប់ទិញអាហារបំប៉នជំនួស ដូចជាម្សៅទឹកដោះគោទៅវិញទេ។
លោក ហ៊ុន សែន បានសួរអ្នកចូលរួមក្នុងពិធីនេះមុនពេលឆ្លើយដោយខ្លួនឯងថា“ ហេតុអ្វីចាំបាច់មានយុទ្ធនាការបំបៅកូនដោយទឹកដោះនៅតាមតំបន់ជនបទ? តើប្រជាពលរដ្ឋនៅតាមតំបន់ជនបទមានលទ្ធភាពទិញទឹកដោះគោឲ្យកូនរបស់ខ្លួនដែរឬទេ? តាមពិត ពួកគាត់គ្មានប្រាក់គ្រប់គ្រាន់សម្រាប់ទិញទឹកដោះគោទេ សូម្បីតែអ្នកធ្វើយុទ្ធនាការខ្លួនឯងហ្នឹងក៏គ្មានលទ្ធភាពទិញផង”។
លោក ហ៊ុន សែន បានបន្តថា អង្គការនានា ដែលធ្វើការខាងផ្នែកសុខាភិបាលយល់មិនច្បាស់អំពីស្ថានភាពជាក់ស្តែងនៅក្នុងប្រទេសកម្ពុជាទេ។
លោកបានមានប្រសាសន៍ថា “ បណ្ដាដៃគូផ្ដល់ជំនួយរបស់យើងមិនយល់ពីស្ថានភាពភូមិសាស្ត្រច្បាស់លាស់ទេ។ ប្រជាពលរដ្ឋ៩៩ភាគរយនៅតាមតំបន់ជនបទបានបំបៅកូនដោយទឹកដោះរួចទៅហើយ។ អ្វីដែលពួកគាត់ត្រូវការ គឺប្រាក់សម្រាប់ចិញ្ចឹមខ្លួនឯង ដើម្បីឲ្យមានទឹកដោះបំបៅកូន”។
កាលពីម្សិលមិញ ខណៈដែលបុគ្គលិកសុខាភិបាលយល់ស្របថា ការបំបៅកូនដោយទឹកដោះនៅតាមតំបន់ជនបទបានក្លាយជារឿងធម្មតាទៅហើយនោះ ពួកគេក៏បានលើកឡើងផងដែរថា យុទ្ធនាការបំបៅកូនដោយទឹកដោះនៅតែមានសារៈសំខាន់នៅពេលអប់រំស្ត្រីជាម្ដាយឲ្យមានការយល់ដឹងពីរបៀបបំបៅកូនឲ្យបានត្រឹមត្រូវ។
លោក ស៊ិន សុមុន្នី នាយកប្រតិបត្តិអង្គការមេឌីកាំ (Medicam) ជាសម្ពន្ធអង្គការក្រៅរដ្ឋាភិបាលដ៏ធំមួយដែលធ្វើការងារពាក់ព័ន្ធនឹងវិស័យសុខាភិបាលនោះ មានប្រសាសន៍ថា “ យុទ្ធនាការនេះ គឺមិនត្រឹមតែផ្សព្វផ្សាយអំពីការបំបៅកូនដោយទឹកដោះដំបូងសុទ្ធប៉ុណ្ណោះទេ”។
លោកបានមានប្រសាសន៍បន្ថែមទៀតថា “ ឧទាហរណ៍ ប្រជាពលរដ្ឋខ្មែរតែងមានជំនឿថា កូឡូស្ទ្រូម [ទឹកដោះដំបូងរបស់ម្ដាយអំឡុងពេលពពោះចាស់ខែ] មានផលអាក្រក់សម្រាប់ទារក ដូច្នេះពួកគាត់ក៏ច្របាច់វាចោល។ ប៉ុន្តែ តាមពិតទារកត្រូវការបៅដោះក្នុងរយៈពេល២៤ម៉ោងដំបូង ព្រោះវាមានអង្គបដិប្រាណ ដែលជួយការពារទារកទើបនឹងកើតពីជំងឺផ្សេងៗ”។
លោកបានបន្ថែមថា លើសពីនេះទៅទៀតម្ដាយជាច្រើនមិនបំបៅកូនដោយទឹកដោះសុទ្ធតែមួយមុខនោះទេ គឺពួកគាត់ឲ្យកូនបៅទឹក ឬទឹកដូង ដែលអាចកាត់បន្ថយសារធាតុបំប៉នដ៏ចាំបាច់ និងបង្កើនហានិភ័យនៃការឆ្លងជំងឺផ្សេងៗ។
អស់រយៈពេលជាច្រើនឆ្នាំមកនេះ អង្គការយូនីសេហ្វ អង្គការសុខភាពពិភពលោក និងអង្គការក្រៅរដ្ឋាភិបាល ដែលធ្វើការពាក់ព័ន្ធនឹងវិស័យសុខាភិបាល បានដំណើរការកម្មវិធីផ្សព្វផ្សាយអំពីអត្ថប្រយោជន៍នៃការបំបៅកូនដោយទឹកដោះ ដើម្បីទប់ទល់នឹងការចុះខ្សោយនូវសារធាតុបំប៉ន ដូចជា ការធ្វើឲ្យកុមារកម្ពុជាលូតលាស់យឺតយ៉ាវខុសពីប្រក្រតីជាដើម។
យោងតាមអង្គការយូនីសេហ្វ បានឲ្យដឹងថា អត្រានៃការបំបៅកូនដោយទឹកដោះសុទ្ធបានកើនឡើងពី១១ភាគរយក្នុងឆ្នាំ២០០០ ដល់៧៤ភាគរយក្នុងឆ្នាំ២០១០។ ប៉ុន្តែ អង្គការ University Research Corporation ដែលជាអង្គការសុខាភិបាលមួយមានមូលដ្ឋាននៅសហរដ្ឋអាមេរិក បានលើកឡើងថា ទោះជាយា៉ងណាក៏នៅតែមានភាពចាំបាច់ក្នុងការបន្តយុទ្ធនាការអប់រំអំពីបញ្ហានានា ដូចជាការបំបៅកូនដោយទឹកដោះជាដើម ព្រោះ២៨ភាគរយនៃកុមារកម្ពុជាក្រោមអាយុ៥ឆ្នាំ មានទម្ងន់ស្រាលខុសប្រក្រតី ហើយ៤០ភាគរយមានកម្ពស់ទាបមិនសមនឹងវ័យរបស់ខ្លួន។ នេះជាសញ្ញាបង្ហាញពីការខ្វះអាហារូបត្ថម្ភ៕
ប្រែសម្រួលដោយ តែម សុខុម