បណ្តាអង្គការសិទ្ធិមនុស្សក្នុងប្រទេសកម្ពុជា បានដាក់ពាក្យបណ្ដឹងក្នុងទីក្រុងបាងកកប្រទេសថៃ ប្តឹងក្រុមហ៊ុនចម្ការអំពៅថៃទី២ដែលមានទំនាក់ទំនងរកស៊ីជាមួយឧកញ៉ាពាណិជ្ជកម្ម លី យុ៉ងផាត់ ដែលរងការចោទប្រកាន់ថាបានដណ្តើមផ្ទះសំបែង និងដីធ្លីពីកសិករក្រីក្ររាប់រយគ្រួសារ។
អង្គការសិទ្ធិមនុស្សលីកាដូ និងអង្គការសមធម៌កម្ពុជាបានដាក់ពាក្យបណ្ដឹងទៅគណៈកម្មការជាតិទទួលបន្ទុកសិទ្ធិមនុស្សរបស់រដ្ឋាភិបាលថៃ កាលពីថ្ងៃទី២៧ ខែឧសភាប្ដឹងក្រុមហ៊ុន មីតផូល (Mitr Pohl)ជួសមុខឲ្យប្រជាពលរដ្ឋចំនួន៦០២គ្រួសារក្នុងខេត្តឧត្តរមានជ័យ ដែលនិយាយថា ចម្ការចំនួនបីរបស់ក្រុមហ៊ុននេះបានបណ្ដេញពួកគាត់ចេញពីលំនៅដ្ឋាននិងដីធ្លីរបស់ពួកគាត់។
ការដាក់ពាក្យបណ្ដឹងនេះកើតមានឡើងបន្ទាប់ពីមជ្ឈមណ្ឌលអប់រំច្បាប់សម្រាប់សហគមន៍ ជាអង្គការជំនួយផ្នែកច្បាប់ក្នុងស្រុក បានដាក់ពាក្យបណ្ដឹងស្រដៀងគ្នាទៅគណៈកម្មការសិទ្ធិមនុស្សថៃ ក្នុងឆ្នាំ២០១០ប្តឹងក្រុមហ៊ុនស្ករស ខុនគែន (Khon Kaen)របស់ថៃ ដែលក៏ធ្លាប់មានទំនាក់ទំនងជាមួយនឹងលោក លី យុ៉ងផាត ដែរ ថាបានបណ្ដេញប្រជាពលរដ្ឋរាប់រយគ្រួសារចេញពីដីធ្លីរបស់ពួកគាត់នៅក្នុងខេត្តកោះកុង។នៅក្នុងរបាយការណ៍បឋមមួយកាលពីឆ្នាំមុន គណៈកម្មការសិទ្ធិមនុស្សថៃ បានលើកឡើងថា ក្រុមហ៊ុននេះបានរំលោភបំពានសិទ្ធិរបស់គ្រួសារទាំងនេះ។ គ្រួសារទាំងនេះក៏កំពុងតែប្ដឹងក្រុមហ៊ុនចម្ការអំពៅដ៏ធំ ថេត អ៊ែន លីល (Tate & Lyle)របស់ចក្រភពអង់គ្លេសមានមូលដ្ឋាននៅក្នុងទីក្រុងឡុងដ៍ផងដែរ ចំពោះការទិញស្ករសដែលក្រុមហ៊ុនខុនគែន បានដាំនៅក្នុងចម្ការទាំងនោះ។
អង្គការសិទ្ធិមនុស្សនានាបានចោទប្រកាន់ក្រុមហ៊ុនមីតផូល ថា បានទន្ទ្រានយកដីធ្លីរបស់ប្រជាពលរដ្ឋជាង២.០០០គ្រួសារ ចាប់តាំងពីរដ្ឋាភិបាលបានសម្បទានចម្ការចំនួនបីដែលមានផ្ទៃដីសរុបប្រហែល២០.០០០ហិកតា ក្នុងក្រុងសំរោង និងស្រុកចុងកាលកាលពីឆ្នាំ២០០៧ដល់ក្រុមហ៊ុននេះមក។
លោក អ៊ាង វុទ្ធី នាយកប្រតិបត្តិអង្គការសមធម៌កម្ពុជាបានមានប្រសាសន៍ កាលពីម្សិលមិញថា ប្រជាពលរដ្ឋជាច្រើន បានរើលំនៅដ្ឋានចេញពីទីនោះហើយចាប់តាំងពីពួកគាត់បាត់បង់ដីធ្លីរបស់ខ្លួនមក។
លោក អ៊ាង វុទ្ធី បានមានប្រសាសន៍ថា ក្នុងចំណោមប្រជាពលរដ្ឋចំនួន៦០២គ្រួសារ ដែលបានចូលរួមដាក់ពាក្យបណ្ដឹងមានជាង២០០គ្រួសារហើយដែលបានបាត់បង់លំនៅដ្ឋានរបស់ខ្លួន ដោយលំនៅដ្ឋានមួយចំនួនត្រូវបានបុគ្គលិកក្រុមហ៊ុនចម្ការអំពៅ និងកងកម្លាំងសន្ដិសុខរដ្ឋដុតបំផ្លាញ ឬប្រើគ្រឿងចក្រឈូសកម្ទេចចោល។
លោក អ៊ាង វុទ្ធី បានមានប្រសាសន៍ថា “ ប្រជាពលរដ្ឋផ្សេងៗទៀតបានបាត់បង់ដីចម្ការឬព្រៃសហគមន៍របស់ខ្លួន ដូច្នេះពួកគាត់ចង់បានដីរបស់ពួកគាត់ត្រឡប់មកវិញ ឬប្រាក់សំណង់ពីក្រុមហ៊ុននេះ”។
លោកបានមានប្រសាសន៍ថា ប្រជាពលរដ្ឋតិចតួចគ្រួសារណាស់ ដែលទទួលបានប្រាក់សំណងពីរបីរយដុល្លារ ដែលពួកគាត់មិននឹកស្មានដល់ថាទទួលបានតែប៉ុណ្ណឹង។
អង្គការសិទ្ធិមនុស្សក៏បានចោទប្រកាន់ក្រុមហ៊ុនចម្ការអំពៅទំាងនេះថា បានសម្លាប់សត្វពាហនៈ និងលួចផលដំណាំរបស់ពួកគាត់ផងដែរ។ នគរបាល និងកងរាជអាវុធហត្ថបានរងការចោទប្រកាន់ថា បានវាយដំកសិករនិងគំរាមកំហែងប្រើអំពើហិង្សាឬចាប់ខ្លួនពួកគាត់។ អ្នកភូមិពីរនាក់បានជាប់ពន្ធនាគាររយៈពេលពីរឆ្នាំរួចទៅហើយ ក្រោមបទចោទប្រកាន់ថា បានកាប់ឆ្ការព្រៃរដ្ឋ។ អ្នកខ្លះទៀតបានរត់គេចខ្លួនដោយសារការភ័យខ្លាចគេចាប់ខ្លួន ហើយមិនដែលត្រឡប់មកវិញឡើយ។
លោក ថុន ណុល អភិបាលក្រុងសំរោងបានអះអាងថា លោក លី យ៉ុងផាត់ គឺជាប្រធានក្រុមហ៊ុនបុត្រសម្ព័ន្ធ មីតផូល ទាំងបីដែលធ្វើប្រតិបត្តិការចម្ការអំពៅទាំងនេះ ប៉ុន្តែបានបដិសេធមិនលើកឡើងថា តើគាត់មានភាគហុ៊នប៉ុន្មាននៅក្នុងក្រុមហ៊ុនចម្ការអំពៅនោះទេ។ លោកបានបង្វែរសំនួរទាក់ទិននឹងការបណ្ដេញប្រជាពលរដ្ឋចេញទៅលោក វ៉ាត ថារិន ប្រធានគណៈកម្មាធិការដោះស្រាយវិវាទប្រចាំខេត្តដែលសុំមិនបំភ្លឺ។
ចំណែកតំណាងក្រុមហ៊ុនមីត ផូល និងលោក លី យ៉ុងផាត់ វិញមិនអាចទាក់ទងបានទេ៕
ប្រែសម្រួលដោយ ហម សុផាណ្ណា