នគរបាលបាននិយាយថា សាកសពអ្នកនេសាទអាយុ៥០ឆ្នាំម្នាក់នៅខេត្តកំពង់ចាម ត្រូវបានប្រទះឃើញអណ្តែតនៅក្នុងបឹងមួយនៅក្នុងឃុំល្វា ស្រុកកោះសូទិនកាលពីយប់ថ្ងៃសុក្រ បន្ទាប់ពីគាត់ត្រូវបានរន្ទះបាញ់។
ឈ្មោះ អង្គ វុទ្ធី បានចេញទៅនេសាទខណៈដែលភ្លៀងធ្លាក់ខ្លាំងកាលពីយប់ថ្ងៃសុក្រ ហើយនៅពេលមិនឃើញគាត់ត្រឡប់មកផ្ទះវិញ គ្រួសាររបស់គាត់បានស្វែងរកគាត់និងបានប្រះទះឃើញសាកសពរបស់គាត់។ ពួកគេបានផ្តល់ដំណឹងប្រាប់អាជ្ញាធរ ដែលបានស្រង់យកសាកសព និងធ្វើកោសល្យវិច័យ ហើយបានរកឃើញថា គាត់ស្លាប់ដោយសាររន្ទះបាញ់។
លោក ឈីវ ស៊ីណូ នាយប៉ុស្តិ៍នគរបាលឃុំ បានមានប្រសាសន៍ថា “ យើងបានពិនិត្យសាកសព និងបានរកឃើញថា គាត់ត្រូវបានរន្ទះបាញ់ ព្រោះសម្លៀកបំពាក់របស់គាត់ឆេះអស់ ហើយរាងកាយរបស់គាត់ឆេះខ្លោច”។
រន្ទះបាញ់មនុស្សស្លាប់ កើតមានជាទូទៅទៅហើយនៅតំបន់ជនបទដាច់ស្រយាល អំឡុងរដូវភ្លៀងនោះ ដែលជនរងគ្រោះភាគច្រើនជាអ្នកនេសាទ និងកសិករ។
អំឡុងរយៈពេលបួនខែដំបូងនៃឆ្នាំនេះ មានមនុស្សចំនួន៣៤នាក់ហើយបានស្លាប់ដោយសាររន្ទះបាញ់ ជាការកើនឡើងខ្ពស់បើធៀបនឹងរយៈពេលដូចគ្នាកាលពីឆ្នាំមុន ដែលមានមនុស្សចំនួន២៥នាក់ត្រូវបានរន្ទះបាញ់ស្លាប់៕
ប្រែសម្រួលដោយ ចេវ ប៊ុននី