យោងតាមទិន្នន័យដែលត្រូវបានបង្ហោះលើគេហទំព័ររបស់អគ្គនាយកដ្ឋានពន្ធនាគារ បានឲ្យដឹងថា អ្នកទោសសរុប៤៨៥នាក់មកពីពន្ធនាគារនៅតាមបណ្ដាខេត្តនានាត្រូវបានដឹកជញ្ជូនមករាជធានីភ្នំពេញ ដើម្បីឡើងសវនាការនៅសាលាឧទ្ធរណ៍ក្នុងរយៈពេលប្រាំខែដំបូងនៃឆ្នាំនេះ ហើយអ្នកទោសជាច្រើននាក់នៅមិនទាន់ត្រូវបានបញ្ជូនត្រឡប់ទៅពន្ធនាគារដើមរបស់ខ្លួនវិញទេ។
គេហទំព័រនេះមានការបញ្ជាក់ថា“ បន្ទាប់ពីត្រូវបានជំនុំជម្រះទោសរួចរាល់ ទណ្ឌិតទាំងនោះត្រូវបានបញ្ជូនទៅមណ្ឌលកែប្រែ៣ ដើម្បីជៀសវាងបញ្ហាផ្ទុកអ្នកទោសលើសចំណុះនៅតាមពន្ធនាគារនានា។ ចំណែកអ្នកទោស ដែលកំពុងរង់ចាំសាលដីកាពីសាលាឧទ្ធរណ៍នៅឡើយនោះនៅមិនទាន់ត្រូវបានបញ្ជូនទៅពន្ធនាគារដើមវិញឡើយ”។
កាលពីសប្តាហ៍មុន អង្គការសិទ្ធិមនុស្សលីកាដូ បានឲ្យដឹងតាមរយៈរបាយការណ៍មួយថា នាយកដ្ឋានពន្ធនាគារបញ្ជូនអ្នកទោស ដែលមានឱកាសបានឡើងសវនាការនៅសាលាឧទ្ទរណ្ធ៍រួចហើយនោះ ទៅពន្ធនាគារដើមរបស់ខ្លួននៅតាមបណ្តាខេត្តវិញ មានន័យថា ពួកគេត្រូវស្ថិតនៅកាន់តែឆ្ងាយពីក្រុមគ្រួសាររបស់ខ្លួន។
លោក គុយ ប៊ុនសន អគ្គនាយកនៃអគ្គនាយកដ្ឋានពន្ធនាគារ បដិសេធមិនធ្វើអត្ថាធិប្បាយអំពីចំនួនអ្នកទោស ដែលត្រូវបានបញ្ជូនទៅពន្ធនាគារដើមរបស់ខ្លួនវិញ បន្ទាប់ពីបានឡើងសវនាការនៅសាលាឧទ្ធរណ៍ហើយទេ។
ប៉ុន្តែ លោកបានទទួលស្គាល់ថា ចំនួនអ្នកទោសលើសចំណុះក្នុងពេលបច្ចុប្បន្ននេះ គឺជាបញ្ហាដ៏ធំមួយនៅមណ្ឌលកែប្រែ១ ក្នុងរាជធានីភ្នំពេញ ហើយថា អ្នកទោស១០០នាក់
នឹងត្រូវបានផ្ទេរទៅមណ្ឌលកែប្រែ ៣ នៅខេត្តកំពង់ចាមវិញ នាសប្តាហ៍ក្រោយនេះ។
អង្គការសិទ្ធិមនុស្សលីកាដូបានឲ្យដឹងថាមណ្ឌលកែប្រែ ៣ ដែលត្រូវបានចាត់ទុកថា ជាពន្ធនាគារមានការការពារសន្តិសុខខ្ពស់បំផុត និងតឹងរុឹងបំផុតនោះ កំពុងផ្ទុកអ្នកទោសលើសចំណុះដល់ទៅ១៩១ភាគរយស្រាប់ទៅហើយ៕
ប្រែសម្រួលដោយ ស៊ុំ សុខភុំ