ប្រជាពរដ្ឋប្រហែល២០០នាក់ដែលចូល រួមប្រារព្ធទិវារបរិស្ថានពិភពលោកបានប្រមូលផ្តុំគ្នាកាលពីម្សិលមិញនៅមុខរដ្ឋសភាដើម្បីប្រគល់ញត្តិមួយស្នើសុំឲ្យរដ្ឋាភិបាលបញ្ឈប់ការកាប់បំផ្លាញព្រៃឈើរបស់ប្រទេសកម្ពុជា។
ដោយពាក់របាំងមុខរូបគោ ឆ្មាព្រៃ និងសត្វទីទុយ សមាជិកសហគមន៍ព្រៃឈើ មួយក្រុម និងអ្នកការពារបរិស្ថានជាច្រើននាក់បានចោទរដ្ឋាភិបាលថា មិនយកចិត្តទុកដាក់ចំពោះព្រៃឈើ ដោយការផ្តល់ដីសម្បទានសេដ្ឋកិច្ចទៅឲ្យក្រុមហ៊ុនដែលពាក់ព័ន្ធទៅនឹងការកាប់ឈើខុសច្បាប់។
លោក ថេង សាវឿន អ្នកសម្របសម្រួលរបស់សហគមន៍កសិករកម្ពុជា មានប្រសាសន៍ដល់ឧកញ៉ាថា“ កាលពីពេលមុនប្រជាពលរដ្ឋចូលទៅក្នុងព្រៃខ្លាចសត្វខ្លា ប៉ុន្តែនៅពេលនេះពួកគាត់ចូលព្រៃខ្លាចឧកញ៉ាទៅវិញ និងខ្លាចក្រុមហ៊ុនរបស់ពួកគេវាយធ្វើបាបពួកគាត់”។
របាយការណ៍មួយ ដែលចេញផ្សាយដោយអង្គការស្បៀងអាហារពិភពលោក បានឲ្យដឹងថា ប្រទេសកម្ពុជា បានបាត់បង់ព្រៃឈើរបស់ខ្លួនប្រហែលមួយភាគបួន នៅក្នុងរយៈពេល៤០ឆ្នាំមកនេះ បណ្ដាលមកពីការអភិវឌ្ឍដ៏ឆាប់រហ័ស និងតម្រូវការឈើនៅប្រទេសចិន។
ប្រព័ន្ធផ្សព្វផ្សាយរដ្ឋក៏បានរាយការណ៍ឲ្យដឹងផងដែរថា លោកនាយករដ្ឋមន្ត្រី ហ៊ុន សែន បានមានប្រសាសន៍ថា គម្របព្រៃទំហំ ១,៥លានហិកតា ត្រូវបានប្រើសម្រាប់ដីសម្បទានសេដ្ឋកិច្ច ហើយនៅមានគម្របព្រៃ៩,៥លានហិកតា នៅសល់ក្នុងប្រទេសនេះ។ ប៉ុន្តែ ដោយសារដីសម្បទានសេដ្ឋកិច្ច ទំហំ១,២លានហិកតា ត្រូវបានប្រគល់ទៅឲ្យក្រុមហ៊ុនចម្ការកៅស៊ូនោះ លោក ហ៊ុន សែន បានមានប្រសាសន៍ថា តាមពិតការផ្ដល់ដីទាំងនេះ គឺជាគម្របព្រៃទេ។
លោក ថេង សាវឿន បានមានប្រសាសន៍ថា ប្រជាពលរដ្ឋបានប្រមូលផ្តុំគ្នាម្តងទៀតនៅឆ្នាំនេះ ព្រោះញត្តិមួយស្រដៀងគ្នានេះដែលបានប្រគល់ជូនរដ្ឋសភាកាលពីឆ្នាំ២០១២នោះ មិនបានទទួលការឆ្លើយបតទេ។ពេលឈរនៅក្បែរក្រុមអ្នកតវ៉ាដែលកាន់បដាមានខ្លឹមសារថា “ រស់នៅក្នុងពណ៌បៃតង រស់នៅក្នុងភាពសប្បាយរីករាយ” និង “ បញ្ឈប់ការកាប់បំផ្លាញព្រៃឈើ” នោះលោកបានមានប្រសាសន៍ថា “ រដ្ឋសភាមិនបានបំពេញកាតព្វកិច្ចរបស់ខ្លួនដើម្បីបញ្ឈប់ការកាប់បំផ្លាញព្រៃឈើទេ”។
លោក ថេង សាវឿន បានមានប្រសាសន៍ថា “ យើងបានសង្កេតឃើញថា ក្រុមហ៊ុនដែលទទួលបានដីសម្បទានសេដ្ឋកិច្ចកំពុងបង្កឲ្យមានការបំផ្លិចបំផ្លាញព្រៃឈើយ៉ាងខ្លាំងដែលធ្វើឲ្យប៉ះពាល់ដល់បរិស្ថាន”។
លោក វ៉ន ប៉ាវ ដែលបានចូលរួមនៅក្នុងការធ្វើបាតុកម្មនេះ បាននិយាយថា គន្លឹះក្នុងការបញ្ឈប់ការកាប់បំផ្លាញព្រៃឈើ គឺត្រូវធ្វើតាមច្បាប់ស្ដីពីការវាយតម្លៃលើផលប៉ះពាល់ដល់បរិស្ថានឲ្យបានត្រឹមត្រូវ នៅមុនអនុញ្ញាតឲ្យមានគម្រោងកសិកម្ម ទ្រង់ទ្រាយធំ។
លោក វ៉ន ប៉ាវ និយាយថា “ យើងជំរុញឲ្យរដ្ឋាភិបាលត្រួតពិនិត្យការវាយតម្លៃពីផលប៉ះពាល់ដល់បរិស្ថាន មុនពេលផ្តល់ដីសម្បទានទៅឲ្យក្រុមហ៊ុនដែលរកសីុកាប់ឈើ”៕
(រាយការណ៍បន្ថែមដោយ Denise Hruby)
ប្រែសម្រួលដោយ ស៊ុំ សុខភុំ