មន្ត្រីពន្ធនាគារ និងមន្ត្រីតុលាការនិយាយថា កាំង ហ្គេកអ៊ាវ ហៅ ឌុច អតីតប្រធានពន្ធនាគារស-២១ របស់ខ្មែរក្រហម ត្រូវបាននាំខ្លួនកាលពីម្សិលមិញទៅបន្ទប់ដែលសាងសង់ជាពិសេសមួយក្នុងពន្ធនាគារខេត្តកណ្តាលដើម្បីអនុវត្តទោសជាប់ពន្ធនាគារមួយជីវិតរបស់គាត់ ពីបទឧក្រិដ្ឋកម្មប្រឆាំងមនុស្សជាតិ។
ទណ្ឌិតជាប់ទោសឧក្រិដ្ឋកម្មសង្គ្រាមវ័យ៧០ឆ្នាំ ដែលត្រូវបានអង្គជំនុំជម្រះតុលាការកំពូលរបស់សាលាក្តីខ្មែរក្រហមផ្តន្ទាទោស កាលពីថ្ងៃទី៣ ខែកុម្ភៈ ឆ្នាំ២០១២នោះ ត្រូវបាននាំខ្លួនពីមន្ទីរឃុំឃាំងនៅអង្គជំនុំជម្រះវិសាមញ្ញក្នុងតុលាការកម្ពុជាទៅកាន់ពន្ធនាគារខេត្តកណ្តាល នៅវេលាមោង៧និង៥០នាទីព្រឹក។
គាត់ត្រូវបានដឹកទៅផ្ទះថ្មីរបស់គាត់តាមរថយន្តពណ៌ខ្មៅ និងកញ្ចក់ខ្មៅមួយគ្រឿង ដោយមានការអមពីបុគ្គលិកសន្តិសុខប្រដាប់អាវុធចំនួនបីរថយន្តវ៉ែន។
លោក ចាត ស៊ីនាង ប្រធានពន្ធនាគារមានប្រសាសន៍ថា បន្ទប់ឃុំឃាំងថ្មីមួយត្រូវបានសាងសង់សម្រាប់ ឌុច តាមសំណើពីព្រះរាជអាជ្ញានៅតុលាការឧក្រិដ្ឋកម្មសង្គ្រាមនេះ។
លោក ស៊ីនាង មានប្រសាសន៍ថា“ យើងនឹងឃុំឃាំងគាត់ក្នុងបន្ទប់ដាច់ដោយឡែកមួយ ដែលសាងសង់សម្រាប់តែគាត់ម្នាក់ប៉ុណ្ណោះ។ បន្ទប់ឃុំឃាំងរបស់គាត់ គឺល្អណាស់ ដែលក្នុងនោះមានគ្រែ និងពូកមួយ និងមានបន្ទប់ទឹកឯកជនមួយមានការផ្គត់ផ្គង់ទឹកគ្រប់គ្រាន់។
ថ្វីបើមានការឃុំខ្លួនគាត់ក្នុងបន្ទប់ពិសេសបែបនេះក៏ដោយ ក៏លោក ស៊ីនាង បានថ្លែងថា “ ប៉ុន្តែគ្មានការគាំពារពិសេសណាមួយចំពោះគាត់ទេ។ គាត់ស្លៀកពាក់ឯកសណ្ឋានអ្នកទោស និងអនុញ្ញាតឲ្យចេញក្រៅបន្ទប់ពីរដងក្នុងមួយថ្ងៃ ដូចអ្នកទោសឯទៀតដែរ”។
ពេលស្នើសុំព័ត៌មានលម្អិតអំពីទំហំបន្ទប់ឃុំឃាំងថ្មីនោះ លោក ស៊ីនាង គ្រាន់តែមានប្រសាសន៍ថា “ បន្ទប់នោះមានបង្អួចធំមួយសម្រាប់ខ្យល់” ចេញចូល។
លោកបានបន្ថែមថា“ បន្ទប់ឃុំឃាំងរបស់ឌុច ធំល្មមសម្រាប់គាត់ ហើយបន្ទប់នេះមិនដែលឃុំខ្លួនអ្នកទោសទេពីមុនមក”។
រយៈពេល២០នាទី បន្ទាប់ពីបិទទ្វារដែកពណ៌បៃតងនៃបន្ទប់ឃុំឃាំង ឌុច កាលពីម្សិលមិញ ការិយាល័យសហព្រះរាជអាជ្ញារបស់សាលាក្តីនេះបានចេញសេចក្តីប្រកាសព័ត៌មានមួយថា មន្ត្រីមួយក្រុមបានទៅត្រួតពិនិត្យបន្ទប់ថ្មីរបស់ ឌុច មុនពេលផ្ទេរគាត់។
សេចក្តីប្រកាសព័ត៌មាននេះ បានឲ្យដឹងថា“ បុគ្គលិកការិយាល័យសហព្រះរាជអាជ្ញាបានទៅមើលពន្ធនាគារខេត្តកណ្តាល កាលពីខែមិថុនា ឆ្នាំ២០១២ និងខែឧសភា ឆ្នាំ២០១៣ និងបានពិនិត្យបន្ទប់សម្រាប់ឃុំឃាំង កាំង ហ្គេកអ៊ាវ”។
“ ខណៈដែលមានការទទួលស្គាល់ស្ថានភាពពន្ធនាគារក្នុងស្រុក សហព្រះរាជអាជ្ញាបានសន្និដ្ឋានដោយផ្អែកលើការសង្កេតរបស់ខ្លួនថា បន្ទប់សម្រាប់ ឌុច នឹងការពារផលប្រយោជន៍របស់គាត់បានល្អបំផុត”។
សេចក្តីប្រកាសព័ត៌មាននេះបន្ថែមថាសំណើសុំផ្ទេរ ឌុច ទៅពន្ធនាគារខេត្តកណ្តាលនេះ ត្រូវបានធ្វើឡើងកាលពីថ្ងៃទី២១ ឧសភាដែលនៅពេលនោះ ព្រះរាជអាជ្ញាបានស្វែងរកការសន្យាពីអគ្គនាយកដ្ឋានពន្ធនាគារថា កន្លែងនិងស្ថានភាពនៃការឃុំខ្លួន កាំង ហ្គេកអ៊ាវ នឹងមិនធ្វើឲ្យប៉ះពាល់គាត់ អំឡុងពេលគាត់ជាប់ឃុំ។
ដើមឡើយ ឌុច ត្រូវបានផ្តន្ទាទោសឲ្យជាប់ពន្ធនាគាររយៈពេល៣៥ឆ្នាំ ដោយសាលាក្តីឧក្រិដ្ឋកម្មសង្គ្រាមខ្មែរក្រហមក្នុងឆ្នាំ២០១០ ប៉ុន្តែត្រូវបានបង្កើនដល់ទោសអស់មួយជីវិត បន្ទាប់ពីមានបណ្តឹងជំទាស់ទៅតុលាការកំពូលនៃសាលាក្តីខ្មែរក្រហមកាលពីឆ្នាំមុន។
តាមរយៈតួនាទីរបស់គាត់ជាប្រធានមន្ទីរឃុំឃាំង ស-២១ ឌុច ត្រូវបានចាត់ទុកថាជាអ្នកទទួលខុសត្រូវចំពោះការស្លាប់មនុស្សយ៉ាងតិច១២.២៧២នាក់។ ពេលប្រកាសសេចក្តីសម្រេចរបស់ខ្លួន អង្គជំនុំជម្រះតុលាការកំពូលលើកឡើងថា ឌុច មានតួនាទីកណ្តាលនៅមន្ទីរស-២១ រួមទាំងការបញ្ជាឲ្យគេធ្វើទារុណកម្ម និងសម្លាប់អ្នកទោសជាប្រព័ន្ធ៕
(រាយការណ៍បន្ថែមដោយ Lauren Crothers)
ប្រែសម្រួលដោយ ចេវ ប៊ុននី