សហជីពកម្មករនៅខាងជំទាស់ចំនួនពីរបានបន្តសកម្មភាពដៀមដាមដាក់គ្នាទៅវិញទៅមក កាលពីម្សិលមិញ។ ភាគីនីមួយៗ បានស្តីបន្ទោសភាគីម្ខាងទៀត រឿងករណីប៉ះទង្គិចគ្នាដោយអំពើហិង្សា រវាងកម្មកររោងចក្រដែលធ្វើកូដកម្ម និងក្រុមនគរបាល នៅឯរោងចក្រកាត់ដេរមួយក្នុងខេត្តកំពង់ស្ពឺកាលពីថ្ងៃច័ន្ទ ជាហេតុនាំឲ្យមនុស្សប្រាំបីនាក់ត្រូវបានចាប់ខ្លួន។
សហជីពសេរីកម្មករ ដែលហៅកាត់ថា FTU បានដឹកនាំកូដកម្មទាមទារប្រាក់ឈ្នួលខ្ពស់ជាងមុន នៅរោងចក្រកាត់ដេរ សាប្រ៊ីណា (ខេមបូឌា) ហ្គាមែន អិមអេហ្វជី ខប [Sabrina (Cambodia) Garment MFG Corp.] ដែលជារោងចក្រកាត់ដេរសម្លៀកបំពាក់ សម្រាប់ផ្គត់ផ្គង់ឲ្យក្រុមហ៊ុន សម្លៀកបំពាក់កីឡាដ៏ធំមួយនៅសហរដ្ឋអាមេរិក គឺក្រុមហ៊ុន ណៃ។ សកម្មភាពដឹកនាំកូដកម្មនេះ បានប្រព្រឹត្តទៅនៅស្រុកសំរោងទង តាំងពីថ្ងៃទី២១ខែឧសភា។ កាលពីថ្ងៃច័ន្ទ មនុស្សប្រាំបីនាក់ដែលពាក់ព័ន្ធនិងសហជីពសេរីកម្មករ ត្រូវបានចាប់ខ្លួន និងចោទប្រកាន់បន្ទាប់ពីកម្មករជាច្រើននាក់បាននាំគ្នា សម្រុកចូលបរិវេណរោងចក្រកាត់ដេរនេះ។
សម្ព័ន្ធសហជីពប្រជាថិបតេយ្យ កម្មករកាត់ដេរកម្ពុជា ដែលហៅកាត់ថា CCAWDU ហើយសមាជិកភាគច្រើន ជាកម្មករកាត់ដេរនៅរោងចក្រ សាប្រ៊ីណា ក៏ប៉ុន្តែមិនបានគាំទ្រ កូដកម្មនេះទេនោះ បានសន្និសីទសារព័ត៌មានមួយកាលពីម្សិលមិញ ដើម្បីជំទាស់ទៅនឹងសេចក្តីអះអាងរបស់សហជីពសេរីកម្មករ ដែលបានលើកឡើងថា ខ្លួនបានញុះញង់ឲ្យមានអំពើហិង្សាកើតឡើង។
លោក គង់ អាទិត្យ អនុប្រធានសម្ព័ន្ធសហជីព CCAWDU បានមានប្រសាសន៍ថា “ [កាលពីថ្ងៃច័ន្ទ] [សមាជិក] សម្ព័ន្ធសហជីពសេរីកម្មករប្រហែល១០០នាក់ បានផ្លោះរបង នៅផ្នែកខាងស្តាំងនៃរោងចក្រ ហើយបានបើកទ្វារខាង។ បន្ទាប់មក ពួកគេបានបើកទ្វារខាងមុខ និងប្រើប្រាស់ដំបូង និងចំពាម ដើម្បីវាយប្រហារមកលើយើង”។ លោកបានលើកឡើងបន្ថែមថា នៅក្នុងហេតុការណ៍តវ៉ាដោយឡែកមួយ កាលពីថ្ងៃទី២៧ខែឧសភា សហជីពសេរីកម្មករបានបង្ខំកម្មករ៣.០០០នាក់ ឲ្យចេញពីរោងចក្រ ដើម្បីនាំគ្នាតវ៉ា។
លោកបានថ្លែងបន្តថា “ យើងប្រហែលជាដាក់ពាក្យប្តឹងពួកគេ [សហជីពសេរីកម្មករ] ប្រសិនបើពួកគេនៅតែផ្សព្វផ្សាយព័ត៌មានដែលធ្វើឲ្យកេរ្តិ៍ឈ្មោះរោងចក្រ”។ សម្ព័ន្ធសហជីព CCAWDU ក៏បានផ្តល់ខ្សែអាត់វីដេអូខ្លីមួយ ដែលបង្ហាញសកម្មភាពកម្មកររត់ចូលក្នុងរោងចក្រ ដោយមានដំបូង និងចំពាមដោយបានអះអាងថា ពួកគេគឺជាតំណាងសហជីពសេរីកម្មករ។
សហជីពសេរីកម្មករ ជាថ្មីម្តងទៀតបានបដិសេធថា ខ្លួនមិនបានពាក់ព័ន្ធនឹងអំពើហិង្សាកាលពីម្សិលមិញនេះទេ ហើយបានចោទប្រកាន់គូបដិបក្ខរបស់ខ្លួនថា បានកែច្នៃខ្សែអាត់វីដេអូនេះ។ លោក ពេជ្រ ពណ្ណរាយ អ្នកនាំពាក្យសហជីពសេរីកម្មករ បានថ្លែងថា “ វីដេអូនេះត្រូវបានកែច្នៃដោយ CCAWDU”។ រោងចក្រ សាប្រ៊ីណា និងសមាគមរោងចក្រកាត់ដេរនៅកម្ពុជាហៅកាត់ថា GMAC បានចេញសេចក្តីថ្លែងការណ៍ ដែលមានខ្លឹមសារហាក់ដូចជាដាក់ការស្តីបន្ទោស ទៅលើសហជីពសេរីកម្មករ។ សេចក្តីថ្លែងការណ៍ចុះហត្ថលេខាដោយលោក ស៊ូសាន ចេន (Susan Chen) ប្រធានរោងចក្រ សាប្រ៊ីណា មានខ្លឹមសារថា កូដកម្មនេះ “ មិនស្របតាមនីតិវិធីច្បាប់ទេ”។ សេចក្តីថ្លែងការណ៍នេះមានខ្លឹមសារបន្តទៀតថា “ កាលពីថ្ងៃទី២៧ ខែឧសភា និងម្តងទៀត នៅថ្ងៃទី៣ ខែមិថុនា ខាងតវ៉ា [សហជីពសេរីកម្មករ] បានចូលទៅក្នុងរោងចក្រ ដោយមានដំបងដែក និងចំពាមឈើ ហើយបានគំរាមបុគ្គលិកដែលកំពុងធ្វើការ បន្ទាប់មកបានបំផ្លិចបំផ្លាញទ្រព្យសម្បត្តិរោងចក្រ”។ សេចក្តីថ្លែងការណ៍របស់ GMAC “ កូដកម្មត្រូវបានរៀបចំដោយសហជីពមួយចំនួនតូច ជាពិសេសនៅកន្លែងដែល [កិច្ចព្រមព្រៀងចរចាសមូហភាព] ចូលជាធរមាន”៕
ប្រែសម្រួលដោយ កង សុធា