34 C
Phnom Penh

​សមាគម​ជន​រងគ្រោះក្នុង​របប​ខ្មែរ​ក្រហម​​ស្វះស្វែង​ដក​ប្រធាន​​​បច្ចុប្បន្ន​របស់​ខ្លួនចេញ​ពីតំណែង

ដោយ ឌឹ ខេមបូឌា ដេលី

បទវិភាគ

យោង​តាម​សេចក្តី​ថ្លែង​ការ​ណ៍ របស់​​សមា​​គមតស៊ូ​មតិ​ក្នុង​ស្រុក​​មួយ​បាន​ឲ្យ​ដឹង​ថា សមា​គម​​ដែល​តំណាង​ឲ្យ​អ្នក​រួច​ជីវិត​ពី​របប​ខ្មែរ​ក្រហម​​នេះ​ កំពុង​​ស្វះ​ស្វែង​ដក​​ប្រធាន​របស់​ខ្លួន​គឺ​លោក ជុំ មុី ដោយសារ​តែ​គាត់​បាន​យក​​ការងារ​របស់​​សមាគម​នេះ​​ទៅ​ធ្វើ​​​នយោ​បាយ​​តាមរយៈ​ការ​ដឹកនាំ​ការ​តវ៉ា​ដ៏ធំ​មួយ​ កាលពី​ថ្ងៃអាទិត្យ​ ប្រឆាំង​នឹង​លោក​ កឹម សុខា មេដឹក​នាំ​​​គណបក្ស​ប្រឆាំង​។

លោក ជុំ មុី បាន​អំពាវ​នាវ​ឲ្យ​មាន​ការ​តវ៉ា​ ដើម្បី​ទាម​ទារ​ឲ្យ​លោក​ កឹម សុខា ប្រធាន​ស្តី​ទី​គណបក្ស​សង្គ្រោះ​ជាតិ​សូម​អភ័យ​ទោស​ចំពោះ​ពាក្យ​សម្តី​របស់​គាត់​ ដែល​បាន​អះ​អាង​ថា វៀតណាម​បាន​ប្រឌិត​ភ័ស្តុតាង​​ថា​ ខ្មែរ​ក្រហម​បាន​ដាក់​ពន្ធនាគារ​ និង​ធ្វើ​ទារុណ​កម្ម​​ប្រជាពលរដ្ឋ​ជា​ច្រើន​ពាន់​នាក់​នៅ​ឯ​គុក​ទួល​ស្លែង។

លោក ជុំ មុី ដែល​ជា​អ្នក​រួច​ជីវិត​ពី​គុក​ទួល​ស្លែង​ក្នុង​ចំណោម​អ្នក​រួច​ជីវិត​ពីរ​បី​នាក់​នោះ​ បាន​​អះ​អាង​ថា​ សមាគម​ជន​រងគ្រោះ​​នៃ​របប​​កម្ពុជា​ប្រជាធិបតេយ្យ​ ដែល​​មាន​លោក​ជា​ប្រធាន​នោះ មិន​​បាន​ពាក់​ព័ន្ធ​នៅ​ក្នុង​ការ​តវ៉ា​ប្រឆាំង​នឹង​លោក​ កឹម សុខា នោះ​ទេ។

លោក ជុំ ម៉ី ដែល​បាន​​មាន​ប្រសាសន៍​ថា រដ្ឋាភិបាល​មិន​បាន​នៅ​ពី​ក្រោយ​ខ្នង​ការ​តវ៉ា​ដែល​គាត់​ដឹកនាំ​នោះ​ បាន​និយាយ​គាំទ្រ​ដល់​គណបក្ស​ប្រជាជន​កម្ពុជា​របស់​លោក​នាយក​រដ្ឋមន្ត្រី​ ហ៊ុន សែន អំឡុង​ពេល​តវ៉ា​ ខណៈ​ពេល​ដែល​អាជ្ញាធរ​​មូលដ្ឋាន​បាន​ផ្គត់​ផ្គង់​ថ្លៃ​​ធ្វើ​ដំណើរ​​ និង​បដា​ឲ្យ​អ្នក​ដែល​ចូល​រួម​ការ​តវ៉ា​កាលពី​ថ្ងៃ​អាទិត្យ​។​

នៅ​ក្នុង​សេចក្ដី​ថ្លែង​ការណ៍​មួយ​ចុះ​កាល​បរិច្ឆេទ​ថ្ងៃ​សៅរ៍ និង​ទទួល​បាន​កាលពី​ម្សិល​មិញ បាន​ឲ្យ​ដឹង​ថា សមាគម​ជន​រង​គ្រោះ​នៃ​របប​កម្ពុជា​ប្រជាធិបតេយ្យ​​ហៅ​សមាគម​ក្សេមក្សាន្ត​បាន​លើក​ឡើង​ថា ទង្វើ​​របស់​លោក ជុំ ម៉ី​ បាន​ធ្វើ​ឲ្យ​ប៉ះពាល់​ដល់​ការ​ប្ដេជ្ញា​ចិត្ត​របស់​សមាគម​នេះ​ក្នុង​ការ​​រក្សា​អព្យាក្រឹត​​ភាព ក្នុង​​រឿង​​នយោបាយ​។

សមាគម​នេះ ​លើក​ឡើង​នៅ​ក្នុង​សេចក្ដី​ថ្លែង​ការណ៍​ដដែល​ ដែល​​មាន​ការ​យល់​ព្រម​ពី​​​សមាជិក​ជាន់​ខ្ពស់​ប្រាំ​បួន​រូប​​លើក​លែង​តែ​​​លោក ជុំ ម៉ី ថា“ ទង្វើ​​របស់​លោក ជុំ ម៉ី នេះ គឺ​​ផ្ទុយ​ពី​ស្មារតី​របស់​សមាគម​ ដែល​មាន​បំណង​ស្វែង​រក​យុត្តិធម៌​​ឲ្យ​ជន​រង​គ្រោះ​តាម​រយៈ​តុលាការ ដើម្បី​​ជួយ​បន្ធូរ​​ការ​ឈឺ​ចាប់​របស់​​ជន​​រង​គ្រោះ បង្រួប​បង្រួម​មាតុភូមិ​ និង​ប្រឆាំង​រាល់​ការ​ប៉ុន​ប៉ង​ណាមួយ​ដើម្បី​​ធ្វើ​ឲ្យ​​ប្រទេស​​ជា​តិ​បែក​បាក់​”។

សេចក្ដី​ថ្លែង​ការណ៍​នេះ​ បាន​បន្ថែម​ទៀត​​ថា“ សមាគម​ក្សេមក្សាន្ត​​មិន​ត្រូវ​ជាប់​ពាក់​ព័ន្ធ​នឹង​នយោបាយ​ទេ និង​ត្រូវ​នៅ​​ជា​អព្យា​ក្រឹត​គ្រប់​កាលៈទេសៈ​ទាំង​អស់។ ដូច្នេះ​ហើយ គណៈកម្មាធិការ​ប្រតិបត្តិ​របស់​សមាគម​ក្សេម​ក្សាន្ត​បាន​សុំ​ឲ្យ​លោក​ ជុំ មីុ ពិចារណា​​ឡើង​វិញ​អំពី​តួនាទី​របស់​គាត់ ដើម្បី​​រក្សា​​​មិត្ត​ភាព​​​ដែល​សមាជិក​​សមាគម​ក្សេម​ក្សាន្ត​ទាំង​អស់​គ្នា​មាន​រហូត​មក​ទល់​ពេល​នេះ​”។

សេចក្ដី​ថ្លែង​ការណ៍​​បន្ត​ថា សមាគម​នឹង​កោះ​ប្រជុំ​ ដើម្បី​បោះ​ឆ្នោត​ជ្រើស​រើស​ប្រធាន​​​​​ថ្មី​ជំនួស​លោក​ ជុំ មីុ ប៉ុន្តែ​មិន​​បាន​និយាយ​ថា នឹង​បោះ​ឆ្នោត​​នៅ​ពេល​ណា​នោះ​ទេ។​​​​​​​​

គ្មាន​មន្ត្រី​ណា​ម្នាក់​​នៅ​ក្នុង​ចំណោម​មន្ត្រី​ទាំង​ប្រាំ​បួន​រូប ដែល​ចុះហត្ថលេខា​នៅ​លើ​សេច​ក្ដី​ថ្លែង​ការណ៍​នេះ​អាច​ទាក់​ទង​សុំ​ការ​ធិប្បាយ​​បាន​ទេ។

លោក ជុំ មុី ដែល​មាន​អាយុ​៨៣ឆ្នាំ  បាន​មាន​ប្រសាសន៍​កាលពី​ម្សិល​មិញ​ថា លោក​ពុំ​មាន​បំណង​លាលែង​ពី​តំណែង​ដោយ​ស្ម័គ្រ​ចិត្ត​ទេ​ ប៉ុន្តែ​លោក​ក៏​មិន​ប្រឆាំង​ដែរ ​​ប្រសិន​បើ​សមាជិក​គណៈ​កម្មាធិការ​ប្រតិបត្តិ​​ផ្សេង​​ទៀត​​​​​បោះ​ឆ្នោត​​ដក​គាត់​ចេញ​នោះ​។

លោក​​មាន​ប្រសាសន៍​ថា “ ប្រសិន​បើ​​គេ​​បោះ​ឆ្នោត​ទម្លាក់​​ខ្ញុំ​ អំឡុង​កិច្ច​ប្រជុំ​របស់​សមា​គម​នេះ ខ្ញុំ​សប្បាយ​ចិត្ត​នឹង​ចាក​ចេញ”។ លោក​បន្ថែម​ថា លោក​ក៏​នឹង​បរិច្ចាគ​ប្រាក់​ចំនួន​៤០០​ដុល្លារ ឲ្យ​ទៅ​​អតីត​សហ​ការ​ី​​របស់​គាត់​​ផង​ដែរ នៅ​ពេល​ដែល​គាត់​ចាក​ចេញ​។

លោក ជុំ មីុ ដែល​ធ្វើ​ជា​​ជាង​ម៉ាសីុន​​​ឲ្យ​​រដ្ឋា​ភិបាល​អស់​រយៈ​ពេល​១៤​ឆ្នាំ ហើយ​ពេល​នេះធ្វើ​ការ​ឲ្យ​លោក ម៉ុង រិ​ទ្ធី សមាជិក​ព្រឹទ្ធ​សភា​មក​ពី​គណ​បក្ស​​ប្រជា​ជន​ និង​ជា​សេដ្ឋី​ពាណិជ្ជកម្ម​នោះ ​នៅ​តែ​បន្ត​អះអាង​ថា រដ្ឋា​ភិបាល​មិន​បាន​លូក​ដៃ​ ​នៅ​ក្នុង​ការ​តវ៉ា​កាល​ពី​ថ្ងៃ​អាទិត្យ​នោះ​ទេ។

នៅ​ក្នុង​សេច​ក្តី​ថ្លែងការណ៍​របស់​ខ្លួន កាល​​ពី​ម្សិល​មិញ គណ​បក្ស​សង្គ្រោះ​ជាតិ​នៅ​តែ​​ប្រកាន់​គោល​ជំហរ​របស់​ខ្លួន​ថា លោក កឹម សុខា​​ មិន​ដែល​ចោទ​ប្រកាន់​ប្រទេស​វៀត​ណាម​​ថា​ បាន​​ប្រឌិត​​ឧក្រិដ្ឋកម្ម​នៅ​ឯ​គុក​ទួល​ស្លែង​នោះ​ទេ​ ហើយ​ថា ប្រធាន​ស្តី​ទី​របស់​​គណ​បក្ស​​នេះ​ក៏បាន​ទទួល​ស្គាល់​ពេញ​ទំហឹង​ថា ខ្មែរ​ក្រហម​​ជា​អ្នក​ទទួល​ខុស​ត្រូវ​ចំពោះ​ឧក្រិដ្ឋ​​កម្ម​នេះ​។

គណបក្ស​សង្គ្រោះ​ជាតិ​បាន​ចោទ​រដ្ឋា​ភិបាល​ថា បាន​​កាត់​ត​ខ្សែ​អាត់​សំឡេង​របស់​លោក កឹម សុខា ដែល​បង្ក​ឲ្យ​មាន​បញ្ហា​ចម្រូង​ចម្រាស និង​​ចោទ​ថា​ បាន​ប្រើប្រាស់​លោក ជុំ មីុ​ ឲ្យ​​រៀប​ចំ​ការ​តវ៉ា​ កាល​ពី​ថ្ងៃ​អាទិត្យ​​េនះ​ ដែល​រដ្ឋាភិបាល​បដិសេធ​​ថា​​ ខ្លួន​មិន​បាន​ពាក់ព័ន្ធ​នោះទេ៕
ប្រែ​សម្រួល​ដោយ ហម សុផាណ្ណា

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស