នគរបាលនិយាយថា បុរសជនជាតិនីហ្សេរីអាយុ៣៨ឆ្នាំម្នាក់ត្រូវបានចាប់ខ្លួនកាលពីយប់ថ្ងៃសៅរ៍នៅអាកាសយានដ្ឋានអន្តរជាតិភ្នំពេញបន្ទាប់ពីជនេនះត្រូវបានប្រទះឃើញនាំថ្នាំមេតំហ្វេតាមីន ឬម៉ាទឹកកក ជិតបីគីឡូក្រាម។
យោងតាមលោក អុិន សុង អនុប្រធានអង្គភាពមួយ នៅនាយកដ្ឋានប្រឆាំងគ្រឿងញៀន របស់ក្រសួងមហាផ្ទៃ បានឲ្យដឹងថា ជនសង្ស័យឈ្មោះ ចន អ៊ូកាឈី អូនយីនយេ(John Ukachi Onyinye) ត្រូវបានឃាត់ខ្លួន បន្ទាប់ពីការឆែកឆេរមួយដោយនគរបាលច្រកអាកាសយានដ្ឋាននិងនគរបាលប្រឆាំងការជួញដូរគ្រឿងញៀនបានរកឃើញថ្នាំញៀនប្រហែល២,៧គីឡូក្រាម លាក់ក្នុងថតមួយក្នុងវ៉ាលិស និងក្នុងទ្រនាប់ជើងរបស់ជនសង្ស័យរូបនេះ។
លោក អិុន សុង បានបន្តថា “ ជនសង្ស័យជាអតីតអ្នកធ្លាប់រស់នៅក្នុងរាជធានីភ្នំពេញ ដែលបានចាកចេញជាងមួយឆ្នាំមកហើយ ដូច្នេះគាត់អាចមានដៃគូនៅក្នុងរាជធានី”។
លោក ឈួ គឹមនី ប្រធាននគរបាលច្រកព្រំដែនអាកាសយានដ្ឋានថ្លែងថា នេះជាគោលការណ៍ឆែកឆេរអីវ៉ាន់អ្នកដំណើរ ដែលមកដល់អាកាសយានដ្ឋានពីតំបន់អាហ្វ្រិក។
លោក គឹមនី មានប្រសាសន៍ថា “ យើងសង្ស័យជននេះ នៅពេលជើងហោះហើររបស់អាកាសចរណ៍ ក្វាតា QR-602 បានមកដល់ កាត់តាមក្រុង ដូហា នៅវេលាម៉ោង១០និង៣០នាទីយប់ ដូច្នេះយើងឆែកឆេរជននេះហើយបានរកឃើញថ្នាំញៀនមេតំហ្វេតាមីនឬម៉ាទឹកកកនេះតែម្តង”៕
ប្រែសម្រួលដោយ ចេវ ប៊ុននី