29 C
Phnom Penh

លោក កឹម សុខា ចោទ​​​គណ​​​បក្ស​​​​​​​ប្រជាជន​កម្ពុជា​ថា ប្រើ​ល្បិច​ស្មោកគ្រោក​​​រារាំង​លោក

ដោយ ឌឹ ខេមបូឌា ដេលី

បទវិភាគ

ក្នុង​ការ​វិវឌ្ឍ​ ដែល​កាន់តែ​មានភាព​ជូរចត់​​ហួសពី​ការស្មាន​មួយ ​មុន​ថ្ងៃ​បោះ​ឆ្នោត​ជាតិ​នា​​​ខែ​​​​ក្រោយ​ លោក កឹម សុខា មេដឹកនាំ​គណ​​​​​​បក្ស​ប្រឆាំង​បានបើក​​សន្និ​សីទ​កាសែត​មួយ​​​​ដោយ​ចោទ​ប្រកាន់​គណបក្ស​ ប្រជា​ជន​កម្ពុជា​ថា​​​បាន​ធ្វើ​យុទ្ធនាការប្រើ​​ល្បិច​ស្មោក​គ្រោក​​​​​ ខណៈ​​​ស្ត្រី​ម្នាក់​ស្រាប់​តែ​បង្ហាញ​ខ្លួន​ ហើយ​អះអាង​ថា ជា​ស្រី​កំណាន់​ដែល​ត្រូវ​លោក​ កឹម ​​​សុខា បោះ​បង់​ចោល និង​បន្សល់​ទុក​នូវ​ភាព​ឈឺ​ចាប់​អស់​រយៈ​ពេល​ជា​យូរ​មក​ហើយ​។

ស្ត្រី​ឈ្មោះ កែវ សុផាណ្ណារី អាយុ​៤១​ឆ្នាំ​នេះ​ ត្រូវ​បាន​ទូរទស្ស ន៍​អប្សរា​ ដែល​គ្រប់​គ្រង​ដោយ​គណបក្ស​កាន់​អំណាច​របស់​លោក ​​​ហ៊ុន សែន សម្ភាស​ជា​លើក​ដំបូង​កាល​​​​ពី​ដើម​ខែ​នេះ​ អំពី​ទំនាក់​ទំនង​លួច​លាក់​របស់​ខ្លួន​​ជា​មួយ​លោក កឹម សុខា​។

រឿង​ស្រី​កំណាន់របស់​លោក កឹម សុខា នេះ​គឺ​ជាការ​វិវឌ្ឍថ្មី​បំផុត​ដែល​បាន​​ធ្វើ​ឲ្យ​ កេរ្ដិ៍​ឈ្មោះ​របស់​មេដឹកនាំ​គណបក្ស​ប្រឆាំង​រូប​នេះ​ជួប​នឹង​បញ្ហា។

កាល​ពី​ខែ​មុន​ រដ្ឋាភិបាល​បាន​ចេញ​ផ្សាយ​ខ្សែ​អាត់​សំឡេង​របស់​​លោក​ កឹម សុខា ដែល​​បាន​លើក​ឡើង​ថា គុក​ទួល​ស្លែង​របស់​ខ្មែរ​ក្រហម​​ ក្នុង​ទីក្រុង​ភ្នំពេញ​​ ត្រូវ​បាន​ប្រឌិត​ឡើង​ដោយ​ប្រទេស​វៀតណាម។

លោក កឹម សុខា ប្រធាន​ស្ដីទី​គណបក្ស​សង្គ្រោះ​ជាតិ​ បាន​បើក​សន្និសីទ​សារព័ត៌មាន​​នៅ​ទី​ស្នាក់​ការ​​បក្ស កាល​ពី​ម្សិលមិញ​ ដោយ​បាន​​ចោទ​ប្រកាន់​គណបក្ស​ ប្រជាជន​កម្ពុជា​ថា បាន​លួច​ប្រមែ​ប្រមូល​មនុស្ស​ ជា​ច្រើន​ក្រុម​​ នៅ​ក្នុង​ខេត្ត​កំពត និង​ខេត្ត​តាកែវ ដោយ​​​​សម្ងាត់​ក្នុង​រយៈ​ពេល​ប៉ុន្មាន​ថ្ងៃ​ចុង​ក្រោយ​នេះ មក​​រំខាន​យុទ្ធនាការ​ឃោនា​របស់​​​​​​​លោក​​ តាម​រយៈ​ការ​​ចាក់​តន្ត្រី​​ខ្លាំង​ៗ និង​ការ​​ប្រើ​រថយន្ដ​ដឹក​ទំនិញ​ជា​ច្រើន​គ្រឿង​ ដើម្បី​ រាំង​ផ្លូវ​របស់​លោក​។

លោក កឹម សុខា បាន​មាន​ប្រសាសន៍​ថា  “ ខេត្ត​កណ្ដាល​មាន​សកម្មភាព​ខ្លាំង​ក្លា​ជាង​នៅ​ខេត្ត​​ផ្សេងៗ​ នេះ​ប្រហែល​ជា​ដោយ​សារតែ​​លោក​​​នាយក​រដ្ឋ​មន្ត្រី​ ជា​បេក្ខជន​តំណាង​រាស្ត្រ​នៅ​ទី​នោះ​ហើយ​។ សំណាង​ណាស់​ដែល​នៅ​ទីនោះ​មាន​អ្នក​គាំ​ទ្រ​របស់​យើង​ជាង​១.០០០​នាក់ ដែល​បានជួយ​​នាំ​ខ្ញុំ​ចេញ​ពី​ទីនោះ។ នេះ​ជា​ល្បិ ច​ដ៏​​អាក្រក់​ និង​ថោក​ទាប​”។

លោក​បានមាន​​​ប្រសាសាន៍​​​បន្ថែម​ថា “ ខ្ញុំ​ និង​គណបក្ស​សង្គ្រោះ​ជាតិ​សូម​អំពាវ​នាវ​ឲ្យ ​រដ្ឋាភិបាល​រក្សាស្ថិរភាព​នយោបាយ​ និង​សន្ដិសុខ​ ដើម្បីឲ្យ​​​​​មាន​ការ​បោះ​ឆ្នោត​ដោយ​សេរី និង​យុត្តិធម៌​… ​​​និង​ឲ្យ​ទប់​ស្កាត់​ការ​ប៉ះ​​​ទង្គិច​និង​ការ​ប្រើ​អំពើ​ហិង្សា​​​ព្រម​ទាំង​ធានា​ឲ្យ​បាន​ថា ​គណបក្សទាំង​​​​អស់​អាច​ប្រកួត​ប្រជែង​ដោយ​ស្មើ​ភាព​គ្នា​”​​​។

លោក​បាន​ថ្លែងបន្ត​ទៀត​​​ថា “ យើង​ព្រួយបាម្ភ​អំពី​សន្ដិសុខ​របស់​យើង ហើយ​រដ្ឋាភិបាល​ដាច់​ខាត​ត្រូវ​តែ​ទទួល​ខុស​ត្រូវ​ចំពោះ​រឿង​នេះ”។

ខណៈ​លោក​ កឹម សុខា កំពុង​ថ្លែង​នៅ​ក្នុង​ទី​ស្នាក់​ការ​បក្ស​ អ្នក​ស្រី​ កែវ សុផាណ្ណារី បាន​មក​ដល់​មុខរបង​​ទី​ស្នាក់​ការ​នេះ​ ជាមួយ​ម្ដាយ​របស់​ខ្លួន​​ឈ្មោះ សម ផល្លា។

អ្នក​ស្រី​បាន​ប្រកាស​ប្រាប់​ក្រុម​អ្នក​​យក​ព័ត៌មាន​ ដែល​កំពុង​​ប្រមូល​ផ្ដុំ​គ្នា​​ថា អ្នក​ស្រី​ និង​មេដឹក​នាំ​គណបក្ស​ប្រឆាំងរូប​នេះ​​ បាន​ចាប់​ផ្ដើម​មាន​ទំនាក់​ទំនង​​​ស្នេហា​​​​លួច​លាក់​នេះ​ នៅ​ក្នុង​ឆ្នាំ​១៩៩៨​ ហើយ​​ថែម​ទាំង​បាន​សុំ​កូន​គេ​មក​ចិញ្ចឹម​ចំនួន​ពីរនាក់​ ដែល​ឥឡូវ​នេះ​ម្នាក់​មាន​អាយុ​៦​ឆ្នាំ និង​ម្នាក់​ទៀត​​អាយុ​៨​ឆ្នាំ​ទៀត​ផង​។

អ្នក​ស្រី​បាន​និយាយ​ថា “ គាត់​បាន​ចាក​ចេញ​​​​ពី​ខ្ញុំ​កាលពី​ប្រាំ​ឆ្នាំ​មុន​ ហើយ​​បាន​សន្យា​  ផ្ដល់​​​ប្រាក់​មួយ​ចំនួន​​ឲ្យ​ខ្ញុំ​”។  អ្នក​ស្រី កែវ សុផាណ្ណារី អះអាង​​ថា អ្នក​ស្រី​​​​បាន​ព្យា  យាម​ទាក់​ទង​លោក កឹម សុខា ជា​ច្រើន​លើក​ច្រើន​សាមក​ហើយ​ ប៉ុន្ដែ​គ្មាន​បាន​ផល​អ្វី​ឡើយ។ ​អ្នក​ស្រី​បាន​បដិសេធ​ថា មិន​ត្រូវ​បាន​គេ​បង្ខំ​ឲ្យទម្លាយ​រឿង​នេះ​​ជា​សាធារណៈ​ទេ​។

អ្នក​ស្រី​បាន​និយាយ​ថា “ គ្មាន​នរណា​​ជួល​ខ្ញុំ​ឲ្យ​ធ្វើ​ដូច្នេះ​ទេ​។ ខ្ញុំ​មក​ទីនេះ​ដោយ​សារ​កំហឹង​របស់​ខ្ញុំ”។  អ្នក​ស្រី​បាន​បន្ថែម​ថា “ ខ្ញុំ​មក​ទីនេះ ទាម​ទារ​ឲ្យ​គាត់​​ផ្ដល់​ប្រាក់​ឧបត្ថម្ភ​ដល់​ខ្ញុំ​ខ្លះ​ ព្រោះ​ខ្ញុំ​បាន​វះកាត់​បេះដូង​ និង​បាក់​ដៃ​ម្ខាង​” ទោះ​​​បី​​​ជា​ដៃ​ទាំង​ពីរ​របស់​អ្នកស្រី​​មើល​ទៅ​មិន​ឃើញ​កើត​អ្វីក៏ដោយ​ចុះ​។

អ្នក​ស្រី កែវ សុផាណ្ណារី បាន​ឲ្យ​ដឹង​ថា អ្នក​ស្រី​ក៏​បាន​ដាក់​ពាក្យ​បណ្ដឹង​ប្ដឹង​លោក កឹម សុខា នៅ​សាលាដំបូង​រាជ​ធានី​ភ្នំពេញ​កាល​ពី​ដើម​ឆ្នាំ​នេះ​ផង​ដែរ​ ដោយ​បាន​ទាម​ទារ​ប្រាក់​ចំនួន​​១០.០០០​ដុល្លារ​ ហើយ​ត្រូវ​បា​ន​សាក​សួរ​ដោយ​ចៅក្រម​ស៊ើប​សួរ​គឺ​លោក​​ ពេជ្រ ម៉ារ៉េន រួច​ហើយ​។ លោក​ចៅក្រម​ ពេជ្រ ម៉ារ៉េន បាន​បដិសេធ​មិន​ធ្វើ​អត្ថា​​​ធិប្បាយ​​​​​ទេ នៅ​ពេល​ត្រូវ​បាន​ស្នើ​ឲ្យ​បញ្ជាក់​ពី​រឿង​នេះ។

លោក កឹម សុខា ដែល​បាន​រៀប​អាពាហ៍​ពិពាហ៍​រួច​ហើយ និង​មាន​កូន​ពេញ​វ័យ​ពីរ​នាក់​ក្នុង​បន្ទុក​ផង​នោះ​ បាន​ចាក​ចេញ​ពី​ទី​​​ស្នាក់ការ​បក្ស​តាម​ផ្លូវ​ក្រោយ​ ដោយ​មិន​បាន​​ជួប​ជាមួយ​អ្នកស្រី កែវ សុផាណ្ណារី ឡើយ​។

ពេល​​ទាក់​ទង​បាន​​នៅ​ពេល​ក្រោយ​មក​ លោក កឹម សុខា បាន​អះអាង​​ថា លោក​មិន​​ដឹង​រឿង​ពាក្យ​បណ្ដឹង​​នេះសោះ​​ ហើយ​បាន​បដិសេធ​ថា លោក​មិន​ទាំង​ស្គាល់​ស្ត្រី​ដែល​អះអាង​ថា ជា​ស្រី​កំណាន់​​របស់​លោក​ផង​ទេ​។

លោក​បាន​មាន​ប្រសាសន៍​ថា “ ខ្ញុំ​គ្មាន​ទំនាក់​ទំនង​​ជាមួយ​ស្ត្រី​រូប​នេះ​ទេ​ ខ្ញុំ​មិន​​ស្គាល់​​គាត់​ទាល់​តែ​សោះ​”។ លោក​បាន​បន្ថែម​ថា  “ ​ដូច​ដែល​​ឃើញស្រាប់​​ហើយ [គណបក្ស​ប្រជាជន​កម្ពុជា​] កំពុង​តែ​បង្កើត​បញ្ហា​ដោយ​ប្រើ​គ្រប់​វិធីទាំង​អស់​ក្នុង​គោល​បំណង​រំខាន​សកម្មភាព​នយោបាយ​របស់​ខ្ញុំ​ ហើយ​នឹង​មាន​បញ្ហា​ច្រើន​​ទៀត​​ចំពោះ​ខ្ញុំ​”។

លោក ឈាង វុន អ្នក​នាំ​ពាក្យ រដ្ឋ​​សភា​ និង​ជា​សមាជិកសភាមក​ពី​គណបក្ស​ ប្រជាជន​កម្ពុជា​បាន​បដិសេធ​ថា គណបក្ស ​របស់​លោក​មិន​ជាប់​ពាក់​ព័ន្ធ​​ក្នុង​​ការ​ប្រើ​ល្បិច​ស្មោក​គ្រោក​​​​ឲ្យ​​ អ្នកស្រី កែវ សុផាណ្ណារី ប្រឌិត​រឿង​ចោទ​ប្រកាន់​​លោក កឹម សុខា ​ទេ។

លោក​បាន​មាន​ប្រសាសន៍​ថា “ ​នេះ​គឺ​ជា​រឿង​ផ្ទាល់​ខ្លួន​របស់​គាត់​ យើង​មិន​បាន​ធ្វើ​ដូច្នេះ​ឡើយ”។  លោក ឈាង វុន ក៏​បាន​បដិសេធ​​ការ​ពាក់​ព័ន្ធ​របស់​គណបក្ស​ ប្រជាជន​កម្ពុជា​ ​ក្នុង​ការ​ប្រមូល​ផ្ដុំ​​មនុស្ស​ជា​ច្រើន​ក្រុម​ឲ្យ​​​រារាំង​យុទ្ធនាការ​របស់​លោក កឹម សុខា ផងដែរ​​ ដោយបាន​​លើក​ឡើង​ថា នេះ​គឺ​ជា​កំហឹង​របស់​សាធារណជន​​ចំពោះ​​ការ​លើក​ឡើង​របស់​លោក កឹម សុខា​ អំពី​គុក​ទួល​ស្លែង​។ ​លោក​ កឹម សុខា បាន​បដិសេធ​ថា មិន​ដែល​និយាយ​ដូច​ការ​ចោទ​ប្រកាន់​ទេ ហើយ​មិន​ធ្វើ​ការ​សូមទោស​ឡើយ​​។

មន្ត្រី​រដ្ឋាភិបាល​ក៏​បាន​បដិសេធ​ថា មិន​បាន​រៀប​ចំ​មហា​បាតុកម្ម​ដែល​មាន​​មនុស្ស​ចូល​រួម​ប្រមាណ​១០.០០០​នាក់​ ​ក្នុង​រាជ​ធានី​ភ្នំពេញ កាល​ពី​ថ្ងៃ​អាទិត្យ​ប្រឆាំង​លោក កឹម សុខា ដែរ បើ​ទោះ​​ជា​អ្នក​ចូល​រួម​បាន​លា​ត​​​ត្រ​​​ដាង​ថា អាជ្ញាធរ​មូល​ដ្ឋាន​បាន​ផ្គត់​ផ្គង់​អ្វី​ៗគ្រប់​យ៉ាង​ឲ្យ​ខ្លួន​ចាប់​ពី​​ចំណីអាហារ រហូត​ដល់​មធ្យោ  បាយ​និង​ការ​ធ្វើ​ដំណើរ​ទៅ​កាន់​កន្លែង​ធ្វើ​បាតុកម្ម​ និង​ថែម​ទាំង​បាន​បោះពុម្ព​​បដា​តវ៉ា​​ថ្មី​ប្រឆាំង​​មេដឹក​នាំ​គណបក្ស​សង្គ្រោះ​​​ជាតិ​ ក៏ដោយ​ចុះ​៕

ប្រែសម្រួល​ដោយ ស៊ា ស៊ុយឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស