គណៈប្រតិភូជាង១.៣០០នាក់មកពី១២៥ប្រទេស គ្រោងនឹងជួបជុំគ្នានៅក្នុងរាជធានីភ្នំពេញ នៅប៉ុន្មានថ្ងៃទៀតនេះ ដើម្បីចូលរួមក្នុងកិច្ចប្រជុំលើកទី៣៧របស់គណៈកម្មាធិការបេតិកភណ្ឌពិភពលោកដែលនឹងចាប់ផ្តើមនៅថ្ងៃអាទិត្យ នេះ។
មុនកិច្ចប្រជុំ ដែលនឹងមានការពិភាក្សា អំពីការបញ្ចូលឬមិនបញ្ចូលបេតិកភណ្ឌប្រវត្តិសាស្ត្រនិងបេតិកភណ្ឌធម្មជាតិ ទៅក្នុងបញ្ជីបេតិកភណ្ឌពិភពលោករបស់អង្គការយូណេស្កូនេះ លោកឧបនាយករដ្ឋមន្ត្រី សុខ អាន បានធ្វើសន្និសីទកាសែតមួយកាលពីម្សិ លមិញដើម្បី ជូនដំណឹងប្រាប់បណ្តាញព័ត៌មានអំពីកិច្ចប្រជុំនៅពេលខាងមុខនេះ និងឱកាសសម្រាប់កម្ពុជាក្នុងការដើរតួនាទីសំខាន់លើឆាកអន្តរជាតិ។
ប៉ុន្តែ មុនពេលឆ្លើយតបនឹងសំណួររបស់ក្រុមអ្នកយកព័ត៌មានខ្មែរ មួយផ្នែកធំនៃសន្និសីទកាសែតជាភាសាអង់គ្លេស ដែលបានធ្វើឡើងនៅក្នុងទីស្តីការគណៈរដ្ឋមន្ត្រីនេះ បានផ្តោតយា៉ងចម្លែកលើសំណួរចំនួនបីរបស់អ្នកយកព័ត៌មានបរទេសម្នាក់មកពីកាសែតចេញផ្សា យជាភាសាអង់គ្លេសមួយក្នុងរាជធានីភ្នំពេញ។
លោក សុខ អាន បានឆ្លើយតបនឹងសំណួរថា តើលោកចង់ផ្ញើសារអ្វីដល់គណៈប្រតិភូមកចូលរួមក្នុងកិច្ចប្រជុំនេះថា “កន្លងមក យើងធ្លាប់បាននិយាយរួចហើយថា ប្រទេសកម្ពុជាហាក់ដូចជាមានពីរ មួយគឺប្រទេសកម្ពុជាពិតប្រាកដ ហើយមួយទៀតគឺប្រទេសកម្ពុជាក្នុងខ្សែ ភ្នែកប្រព័ន្ធផ្ស ព្វផ្សា យ ដែលខុសគ្នាពីប្រទេសកម្ពុជាពិតប្រាកដ។
ប៉ុន្តែនៅពេលនេះ គណៈប្រតិភូទាំង១.៤០០នាក់ និងអ្នកយកព័ត៌មានពីបីទៅបួនរយនាក់កំពុងមកមើលឲ្យ ឃើញផ្ទាល់ភ្នែក និងឆ្លៀតឱកាសទស្សនាប្រទេសកម្ពុជា និងស្វែងយល់ពីវប្ប ធម៌របស់យើង និងតម្លៃនៃបេតិកភណ្ឌរបស់យើង”។
នៅចុងបញ្ចប់នៃសន្និសីទសារព័ត៌មាន អ្នកយកព័ត៌មានរូបនេះបានបន្ស ល់ទុកក្រដាសមួយសន្លឹកដែលមានសំណួរបោះពុម្ពនៅលើនោះថា “លោក ស្ទូអាត អាឡាន បេកឃ័រ (Stuart Alan Becker) បានប្រាប់ខ្ញុំថា គាត់នឹងកត់ត្រាទុករាល់អ្វីដែលឯកឧត្តមឧបនាយករដ្ឋមន្ត្រី សុខ អាន ថ្លែងស្វាគមន៍ពេលបើកកិច្ចប្រជុំគណៈកម្មាធិការបេតិកភណ្ឌ
ពិភពលោក និងគូសបញ្ជាក់ពីសារៈសំខាន់ក្នុងការទទួលរៀបចំកិច្ចប្រជុំនេះ”។
លោក ឯក ថា អ្នកនាំពាក្យ របស់អង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី បានឲ្យដឹងថា លោកបានរួមចំណែកសរសេរសំណួរទាំងបីដែលអ្នកយកព័ត៌មានរូបនោះបានសួរ។
លោកបានមានប្រសាសន៍ថា “ ខ្ញុំមិនបានសរសេរឲ្យ គាត់ទេ ប៉ុន្តែគាត់បានទូរស័ព្ទមកខ្ញុំកាលពីយប់មិញ [ថ្ងៃពុធ]។ គាត់ជិះមូ៉តូមួយគ្រឿង និងគ្មានពេលត្រៀមសំណួរទេ ដូច្នេះខ្ញុំក៏ជួយគាត់ទៅ”។
សំណួរទាំងពីរទៀតគឺ ហេតុអ្វីបានជាកិច្ចប្រជុំនេះមានសារៈសំខាន់សម្រាប់កម្ពុជា និងអំពីសារៈសំខាន់នៃ “បេតិកភណ្ឌរូបិយ និងអរូបិយ”៕
ប្រែសម្រួលដោយ ចេវ ប៊ុននី