29 C
Phnom Penh

អ្នក​រួច​ជីវិត​ពី​មន្ទីរ​ឃុំឃាំង​ស-២១​ប្តឹង​លោក​ កឹម សុខា​ មេដឹក​នាំគណ​បក្ស​ប្រឆាំង​ពី​បទ​បង្ខូច​កេរ្តិ៍​​ឈ្មោះ

ដោយ ឌឹ ខេមបូឌា ដេលី

បទវិភាគ

​ក្នុង​រយៈ​ពេល​មួយ​សប្តាហ៍​​នេះ​ ស្ថាន​ភាព​កាន់​តែ​​តាន​តឹង​ឡើងៗ​​ ​សម្រាប់​លោក កឹម សុខា​ មេដឹក​នាំ​គណ​បក្ស​ប្រឆាំង​ដែល​មាន​បញ្ហា​ច្រើន​ ពោល​គឺ​កាលពី​ថ្ងៃសុក្រ នៅ​ពេល​ដែល​​លោក ជុំ មុី អ្នក​រួច​​ជីវិត​ពី​មន្ទីរ​ឃុំ​ឃាំង​ស-២១ ក្រោម​របប​ខ្មែរ​ក្រហម​បាន​ដាក់​ពាក្យ​បណ្តឹង​ ចំពោះ​ពាក្យ​សម្តី​របស់​លោក​ កឹម សុខា ដែល​បាន​និយាយ​ថា មណ្ឌល​ធ្វើ​ទារុណកម្ម​នេះ​​ត្រូវ​​បាន​វៀតណាម​ប្រឌិត​ឡើង​​។

ពាក្យ​បណ្តឹង​ដែល​បាន​ប្តឹង​កាលពី​ថ្ងៃ​សុក្រ ​នៅ​សាលាដំបូង​រាជធានី​ភ្នំពេញ ដោយ​លោក ​ជុំ មីុ អាយុ​៨៣ឆ្នាំ ​និង​ជំនួស​ឲ្យ​អ្នក​រួច​ជីវិត​ពី​មន្ទីរ​ឃុំឃាំង​ស-២១ បី​នាក់​ផ្សេង​ទៀតនោះ បាន​ទាម​ទារ​​សំណង​​ជំងឺ​ចិត្ត​​​ចំនួន​១.០០០​ដុល្លារ​​ពី​លោក កឹម សុខា ប្រធាន​ស្តីទី​គណ​បក្ស​​សង្គ្រោះ​ជាតិ​។

លោក ជុំ មីុ​ បាន​មាន​ប្រសាសន៍ថា លុយ​នេះ​នឹង​ប្រើដើម្បី​រៀប​ចំ​ពិធីបុណ្យ​​ប្រមូល​កុសល​ឧទ្ទិស​ដល់​វិញ្ញាណ​ក្ខន្ធអ្នក​ដែល​ស្លាប់​នៅ​មន្ទីរ​ឃុំ​ឃាំង​នៃ​របប​ខ្មែរ​ក្រហម​នេះ​។

លោក​ ជុំ មីុ​ បាន​បន្តថា “ យើង​បាន​ទទួល​ការ​​ឈឺចាប់​​ ព្រោះ​យើង​គឺជា​ជន​រង​គ្រោះ​ដែល​ត្រូវ​​គេ​ឃុំខ្លួន​ ធ្វើ​ទារុណកម្ម​នៅ​ឯ​គុក​ទួលស្លែង​នេះ អំឡុង​របប​ខ្មែរក្រហម។ ប្រសិន​បើ​លោក កឹម សុខា យល់​ព្រម​តាម​សំណើ​របស់​ខ្្ញុំ​ គ្រាន់​តែអុជធូបបី​សរសៃ​ សូម​អភ័យ​ទោស​ចំពោះ​វិញ្ញាណ​ក្ខន្ធ​​របស់​ជន​រង​គ្រោះ​នៅ​ឯគុក​ទួលស្លែង​នោះ​ ម្លេ៉ះ​ក៏​គ្មាន​ពាក្យ​បណ្តឹង​បរិហារ​​កេរ្តិ៍​​ប្រឆាំង​គាត់​ដែរ”។

កំហឹង​នេះ​បាន​ផ្ទុះ​ឡើង​​ដោយ​សារ​​ខ្សែ​អាត់​សំឡេង​ពីរ​ផ្សេង​គ្នា ដែល​បាន​ចាក់​ផ្សាយ​​កាលពីថ្ងៃទី​១៨ ខែឧសភា ដែលក្នុង​នោះ​លោក កឹម សុខា បាន​ចោទ​ប្រកាន់​វៀត​ណាម​ថា បាន​សាងសង់​សាលា​រៀនមួយ​ខ្នង​​ ដែល​មើល​ទៅ​ដូច​ជា អតីត​ពន្ធនាគារ​ និង​មណ្ឌល​ធ្វើ​ទារុណ​កម្ម​​របស់​​ខ្មែរក្រហម​។

​    នៅ​ក្នុង​ខ្សែអាត់​សំឡេង​មួយ​ លោក កឹម សុខា បាន​លើក​ឡើង​ថា “ វៀតណាម​បាន​បង្កើត​​កន្លែង​នេះដោយ​មា​ន​តាំង​រូប​ថត [របស​់​ជន​រង​គ្រោះ]​ ។ ប្រសិន​បើ​កន្លែងនេះ​ពិត​​ជា​​របស់​ខ្មែរក្រហម​មែន​ ពួកគេ​ពិត​ជា​បាន​វាយ​កម្ទេច​ចោល​មុន​ពេល​ចាក​ចេញ​ទៅ​ហើយ”។

នៅ​ក្នុង​ខ្សែអាត់​សំឡេង​មួយ​​ទៀត​ គាត់​បាន​លើក​ឡើង​ថា “ ហេតុ​អ្វី​បាន​ជា​ខ្មែរ​ក្រហម​​ល្ងង់​ដល់​ថ្នាក់​ទុក​គុក​ទួល​ស្លែង​បន្ទាប់​ពី​សម្លាប់​មនុស្ស​ជា​ច្រើន​នាក់​ និង​ទុក​វា​ជា​សារមន្ទី​រ​ដើម្បី​បង្ហាញ​ភ្ញៀវ​ទេសចរ​យ៉ាង​ដូច្នេះ? ​រឿង​​នេះ​ត្រូវ​បាន​គេ​ប្រឌិត​ឡើង​។ ខ្ញុំ​ជឿថា​ គេ​​បាន​​​ប្រឌិត​ឡើង មែន​ទេ?”។

ចាប់​តាំង​ពីរដ្ឋាភិបាល​បាន​ចាក់​ផ្សាយ​ខ្សែ​អាត់សំឡេង​មក លោក ជុំ មុី ខ្លួន​ឯង​បាន​ឲ្យ​លោក កឹម សុខា ទទួល​ខុស​ត្រូវ​ចំពោះ​ពាក្យ​សម្តី​របស់​គាត់ និង​បាន​ដឹក​នាំ​ការ​តវ៉ា​ដ៏​ធំ​មួយ​នៅ​ក្នុង​រាជធានី​ភ្នំពេញ កាលពី​ថ្ងៃអាទិត្យ ដែល​​មាន​អ្នក​ចូ​លរួម​តវ៉ា​ចំនួន​១.០០០​នាក់ ហើយ​ត្រូវ​គណ​បក្ស​ប្រឆាំងនិយាយថា ការតវ៉ា​នេះ​គាំទ្រ​ដោយ​គណបក្ស​កាន់​អំណាចរបស់​លោក ហ៊ុន សែន។

ច្បាប់​ថត​ចម្លង​នៃពាក្យ​បណ្តឹង​របស់​លោក ​ជុំ មីុ​ មួយ​ច្បាប់​ដែល​មាន​ត្រារបស់​ព្រះ​​​រាអាជ្ញា​ បាន​បង្ហាញថា នង ចាន់​សុផល ជា​អ្នក​​រួច​ជីវិត​ពី​មន្ទីរឃុំ​ឃាំង​ស-២១ កាល​ពីវ័យ​កុមារ និង​បង​ប្រុស ​នង ចាន់​ផន និង​បងប្អូន​បង្កើត​ឈ្មោះ នង ចាន់ថន ព្រម​ទាំង​ ជិន ម៉េត​ ​គឺ​ជា​សហ​ដើម​បណ្តឹង​​។

លោក កួយ ធុន​ណា មេធាវី​របស់​លោក ជុំ មីុ បាន​មាន​ប្រសាសន៍​ថា ប្រសិន​បើ​លោក​ កឹម សុខា ត្រូវ​​បាន​រក​ឃើញ​ថា មាន​ពិរុទ្ធភាព​ពី​បទ​​បរិហារ​កេរ្តិ៍​ជា​​សាធារណៈនោះ​ គាត់​នឹង​​​ត្រូវ​វិន័យ​ជាប្រាក់​​​រហូត​ដល់​២.៥០០ដុល្លារ​តាម​មាត្រា​៣០៥នៃ​​ក្រម​​ព្រហ្មទណ្ឌ។

លោក កួយ ធុនណា បាន​មាន​ប្រសា​សន៍ថា “ នៅ​ក្នុង​ពាក្យ​បណ្តឹង​របស់​យើង​ យើង​ចោទ​ប្រកាន់​គាត់​ពី​បទ​​បរិហារ​​កេរ្តិ៍​​សាធារណៈ​ ប៉ុន្តែ​ យើង​មិន​ដឹង​ថា តើគាត់​ត្រូវ​ប្រឈម​នឹង​​បទ​ល្មើស​​ផ្សេង​ទៀត ឬអត់​នោះ​ទេ​ នៅ​ពេល​ដែល​តុលាការ​ស៊ើប​អង្កេត​បញ្ហានេះ​រួច​”។

កាលពី​ថ្ងៃពុធ ​មាន​ស្ត្រីម្នាក់​​អះ​អាង​ថា ខ្លួន​ ​ជា​​ប្រពន្ធចុង​​របស់​​លោក​នោះ ​​ក៏​ប្តឹង​ទារ​ប្រាក់​១០.០០០​ដុល្លារពី​​លោក​​ដែរ។ អ្នកស្រី កែវ សុផាណ្ណារី អាយុ​៤១ឆ្នាំ ​​លើក​​ឡើង​ថា គាត់​កំពុងប្តឹង​​ទាមទារ​​សំណង​​ជំងឺ​ចិត្ត​ពី​លោក កឹម សុខា ​ហើយ​លោក​​និង​អ្នក​ស្រី​មាន​កូន​​ចិញ្ចឹម​ពីរនាក់​​​។

ក្រៅ​ពី​បណ្តឹង​​ទាម​ទារ​​ប្រាក់​​នេះ​ អ្នកស្រី សុផាណ្ណារី ក៏​បាន​ដាក់​ពាក្យ​បណ្តឹង​ប្រឆាំង​នឹង​មេដឹក​នាំ​គណ​បក្ស​​ប្រឆាំង​រូប​នេះដែរ ​​បន្ទាប់​ពី​មាន​ការ​​អះអាង​ថា អង្គរក្ស​របស់​លោក កឹម សុខា បាន​វាយ​​ម្តាយ​របស់​គាត់​ កាលពី​ថ្ងៃព្រហស្បតិ៍​រហូត​ត្រូវ​ចូល​ពេទ្យ​។

​    បញ្ហា​ផ្លូវ​ច្បាប់​​របស់​លោក កឹម សុខា នៅ​មិន​ទាន់​ចប់​ត្រឹម​នេះ​ទេ​។​កាលពី​ថ្ងៃ​ព្រហ​ស្បតិ៍ ​លោកនាយករដ្ឋមន្ត្រី​ ហ៊ុន សែន បាន​គំរាម​ប្តឹង​លោក កឹម សុខា ពី​បទ​ចោទ​ប្រកាន់​គណ​បក្ស​ប្រជាជន​កម្ពុជា​ថា បានធ្វើ​យុទ្ធនាការ​ស្មោក​​គ្រោក​ ដើម្បី​រំខាន​មិន​ឲ្យ​មេដឹក​នាំ​គណ​បក្ស​ប្រឆាំង​ចុះ​ទៅ​ជួប​អ្នក​គាំទ្ររបស់​ខ្លួន​នៅ​តាម​តំបន់​ដាច់​ស្រយាល​។​

លោក ហ៊ុន សែន បាន​ចោទ​ប្រកាន់​លោក កឹម ​សុខា ថា បាន​ចំណាយ​លុយ​​ដើម្បី​​រួម​ភេទ​ជា​មួយ​ក្មេង​ស្រី​អាយុ​១៥ឆ្នាំ​ម្នាក់​ ​ប៉ុន្តែ​ លោក​​នាយក​រដ្ឋ​មន្ត្រី​​មិន​បាន​ផ្តល់​ភ័ស្តុតាង​ពាក់​ព័ន្ធ​នឹង​ការ​ចោទ​ប្រកាន់​ដ៏​គួរ​ឲ្យ​ភ្ញាក់​ផ្អើល​​នេះ​ទេ។ នៅ​ក្នុងសេចក្តី​ថ្លែង​ការណ៍​មួយ​កាល​ពី​ម្សិល​មិញ លោក សម រង្សុី ​បាន​​រិះ​គន់​ចរិត​​វាយ​ប្រហារ​​​របស់​លោក ហ៊ុន សែន មក​លើ​លោក កឹម សុខា ដោយ​លោក​បានលើក​ឡើង​​ថា ​ទាំង​អស់​នេះ​​​បាន​​បង្ហាញ​​ពី “ ភាព​ទន់​ខ្សោយ​នៃ​ក្រប​ខណ្ឌ​ប្រជា​ធិប​តេយ្យ​​នៅ​ក្នុង​ប្រទេស​​កម្ពុជា”។

លោក​បាន​បន្ត​ថា​ នៅក្នុង​ប្រទេស​ប្រជា​ធិបតេយ្យ​ដែល​មាន​តុលាការ​ឯក​រាជ​្យលទ្ធ​ភាព​​នៃការ​ប្តឹង​ពី​បទ​​បរិហារ​កេរ្តិ៍ ​មាន​រឹត​ត្បឹត​ណាស់​​ចំពោះ​អ្នក​មាន​​គោល​បំណង​រុកកួន​អ្នក​​​​នយោ​បាយ​ប្រឆាំង​​។ ចំណែក អត្ថិភាព​​នៃ​សេរីភាព​សារព័ត៌មាន​ និង​សិទ្ធិ​ក្នុង​ការ​ឆ្លើយ​តប ​មាន​ន័យ​​ថា វា​ជា​ការ​សម​ហេតុ​ផល​​ក្នុង​ការចោទ​ប្រកាន់​​ចំពោះ​អ្វី​ដែល​​មាន​ភ័ស្តុតាង​ប៉ុណ្ណោះ​”។

លោក​ សម រង្សុី បាន​បន្ត​ថា នៅ​ក្នុង​ប្រទេស​​កម្ពុជា​ពុំមាន​ការ​ដាក់​កម្រិត​បែប​នោះ​ទេ​ ហើយ​​លោក​ ហ៊ុន សែន អាច​ធ្វើការ​ចោទ​ប្រកាន់​ជា​ហូរហែប្រឆាំង​លោក កឹម សុខា ដោយ​មិនបាន​ផ្តល់​ភ័ស្តុតាង​ទៀត​ផង​៕

(រាយការ​ណ៍​បន្ថែមដោយ Lauren Crothers)

ប្រែសម្រួលដោយ ហម សុផាណ្ណា

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស