អ្នកនាំពាក្យគណបក្សសង្គ្រោះជាតិ បានលើកឡើងថា សមាជិកជាន់ខ្ពស់របស់គណបក្សសង្គ្រោះជាតិ បានជួបប្រជុំគ្នាកាលពីយប់ថ្ងៃសុក្រ ដើម្បីពិភាក្សាថា តើគណបក្សរបស់ខ្លួនគួរតែបន្ដប្រកួតប្រជែងនៅក្នុងការបោះឆ្នោតជាតិនាថ្ងៃទី២៨ ខែកក្កដា ឬក៏ត្រូវដកខ្លួនចេញ ឬក៏យ៉ាងណា បន្ទាប់ពីរងការវាយប្រហារផ្ទួនៗ កាលពីសប្ដាហ៍មុន។
លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ និងជាអតីតសមាជិកសភាមកពីគណបក្សសិទ្ធិមនុស្ស បានលើកឡើងថា “ យើងទទួលរងការរំខានមួយចំនួន នៅគ្រប់ទីកន្លែង នៅពេលដែលយើងបើកវេទិកា”។
លោកបានមានប្រសាសន៍ថា “ យើងគួរតែទទួលបានការប្រកួតប្រជែងដោយយុត្ដិធម៌ ប៉ុន្ដែយើងមិនមានប្រព័ន្ធផ្សព្វផ្សាយផ្ទាល់ខ្លួនឡើយ ពីព្រោះប្រព័ន្ធផ្សព្វផ្សាយគឺត្រូវគ្រប់គ្រងដោយ [គណបក្សកាន់អំណាច]។ ហេតុដូច្នេះហើយមានតែមេដឹកនាំជាន់ខ្ពស់ប៉ុណ្ណោះ នៅក្នុងគណបក្ស នឹងចូលរួមនៅក្នុងកិច្ចប្រជុំ ដើម្បីសម្រេចថា តើត្រូវប្រកួតប្រជែងក្នុងការបោះឆ្នោតជាតិ ឬក៏អត់”។
នៅពេលសួរអំពីកិច្ចប្រជុំមុនពេលការលើកឡើងរបស់ខ្លួននៅល្ងាចថ្ងៃសុក្រ លោក សម រង្ស៊ី ប្រធានគណបក្សសង្គ្រោះជាតិ ដែលបាននិរទេសខ្លួនឯងទៅរស់នៅប្រទេសបារាំង បានលើកឡើងតាមអុីម៉េលថា គណបក្សរបស់លោកកំពុងស្ថិតនៅត្រង់ចំណុចបកក្រោយ។
លោក សម រង្ស៊ី បានមានប្រសាសន៍ថា “ការដកសមាជិកភាពរបស់សមាជិករដ្ឋសភាមកពីគណបក្សប្រឆាំងទាំងអស់ពីរដ្ឋសភាក្នុងពេលថ្មីៗនេះ គឺជាការធ្វើរដ្ឋប្រហាររដ្ឋធម្មនុញ្ញ។ ប្រទេសកម្ពុជាកំពុងតែធ្វើដំណើរទៅរកអស្ថិរភាពផ្នែកនយោបាយ”។
លោកបានថ្លែងថា “ គណបក្សសង្គ្រោះជាតិកំពុងអំពាវនាវកុំឲ្យសហគមន៍អន្ដរជាតិទទួលស្គាល់ការបោះឆ្នោតមិនយុត្តិធម៌ដែលរៀបចំដោយរដ្ឋាភិបាលរបស់លោក ហ៊ុន សែន និងឲ្យថ្កោលទោសព្រមទាំងទុកឲ្យរដ្ឋាភិបាលណាដែលកើតចេញពីការបោះឆ្នោតមិនយុត្តិធម៌នៅឯកោ”។
បន្ទាប់ពីកិច្ចប្រជុំរយៈពេល១ម៉ោងរបស់សមាជិកជាន់ខ្ពស់នៃគណបក្សសង្គ្រោះជាតិ ក្នុងរាជធានីភ្នំពេញបានបញ្ចប់ លោក សម រង្ស៊ី បានមានប្រសាសន៍ថា “ យើងរក្សាជំហររបស់យើងសម្រាប់ការពិចារណាបន្ថែម។ អ្វីៗអាចនឹងទៅរួច នៅប៉ុន្មានថ្ងៃខាងមុខ”។
ទោះបីជាយ៉ាងណា សមាជិកជាន់ខ្ពស់ផ្សេងៗទៀតរបស់បក្សប្រឆាំងទទួលបានសារសុទិដ្ឋិនិយមច្រើនពីកិច្ចប្រជុំនេះ ប៉ុន្ដែ ពួកគេបានលើកឡើងថា សន្និសីទកាសែតមួយ នឹងត្រូវធ្វើឡើងនៅសប្ដាហ៍ក្រោយ ដើម្បីបញ្ជាក់ឲ្យបានច្បាស់ពីជំហររបស់គណបក្សប្រឆាំង។
លោក យឹម សុវណ្ណ ដែលក៏ជាអ្នកនាំពាក្យគណបក្សសង្គ្រោះជាតិដែរនោះ បានមានប្រសាសន៍បន្ទាប់ពីកិច្ចប្រជុំនេះថា គណបក្សរបស់លោកនឹងបើកសន្និសីទកាសែតមួយនៅថ្ងៃព្រហស្បតិ៍ ដើម្បីពិភាក្សាអំពីអ្វីដែលលោកបានហៅថា “ បញ្ហារសើប” ដែលលោកមិនអាចបង្ហាញឲ្យដឹងជាមុននោះ។
លោកបានលើកឡើងថា “ យើងត្រូវតែធ្វើដំណើរឆ្ពោះទៅមុខជាមួយអ្វីដែលយើងបានធ្វើជាយូរមកហើយ”។ លោកបន្ថែមថា “ យើងមិនខ្លាចទេ យើងមិនបញ្ឈប់សកម្មភាពរបស់យើងឡើយ។ យើងនឹងបន្ដសកម្មភាពរបស់យើងទ្វេឡើង។ មេដឹកនាំគណបក្សសង្គ្រោះជាតិទាំងអស់បានប្ដេជ្ញាចិត្តប្រឈមគ្រប់បញ្ហាទាំងអស់នៅថ្ងៃអនាគត”។
លោកស្រី មូរ សុខហួរ បេក្ខជនឈរឈ្មោះជាតំណាងរាស្ត្ររបស់គណបក្សសង្គ្រោះជាតិបានលើកឡើងថា “ បរិយាកាសនយោបាយ” មិនធ្វើឲ្យមានការបោះឆ្នោតដោយសេរី និងយុត្តិធម៌នោះទេ ហើយកាលពីប៉ុន្មានថ្ងៃកន្លងទៅមានការវិវឌ្ឍផ្នែកនយោបាយជាច្រើនដែលយើងគិតថា វាមិនមែនជាផលប្រយោជន៍របស់ប្រជាពលរដ្ឋ និងរបស់ជាតិនោះទេ”។
តែទោះយ៉ាងណាលោកស្រី មូរ សុខហួរ បានមានប្រសាសន៍ថា មានមតិស្របគ្នាថា គ្មានអ្វីនឹងមករារាំងយើងមិនឲ្យចូលរួមក្នុងការបោះឆ្នោតជាតិឡើយ”។
កាលពីពីរសប្ដាហ៍មុនសមាជិកចំនួន២៧រូបរបស់គណបក្សសិទ្ធិមនុស្ស និងគណបក្ស សម រង្ស៊ី ត្រូវបានដកសមាជិកសភាពីរដ្ឋសភា ហើយលោក កឹម សុខា ប្រធានស្ដីទីគណបក្សសង្គ្រោះជាតិត្រូវបានប្ដឹងដោយឡែកពីគ្នាពីស្ត្រីម្នាក់ដែលអះអាងថា ជាប្រពន្ធចុងរបស់លោក និងពីលោក ជុំ ម៉ី អ្នករស់រានមានជីវិតពីពន្ធនាគារស-២១ ខណៈលោកនាយករដ្ឋមន្ត្រី ហ៊ុន សែន បានគំរាមប្ដឹងលោក បន្ទាប់ពីការបោះឆ្នោតរួច ពីបទចោទប្រកាន់គណបក្សកាន់អំណាចរបស់លោកថា បានធ្វើយុទ្ធនាការដោយប្រើល្បិចស្មោកគ្រោក៕
ប្រែសម្រួលដោយ ស៊ា ស៊ុយឈាង