29 C
Phnom Penh

ឧបករណ៍​តន្ត្រី​បុរាណ​ខ្មែរ​នឹង​យក​មក​ប្រគំ​​សម្រាប់​ស្វាគមន៍​កិច្ច​ប្រជុំ​គណៈកម្មាធិការ​បេតិកភណ្ឌពិភពលោក

ដោយ ឌឹ ខេមបូឌា ដេលី

បទវិភាគ

នៅ​ថ្ងៃ​អង្គារ​ គណៈប្រតិភូ​ដែល​​មក​ចូល​រួម​​ក្នុង​សម័យ​ប្រជុំ​របស់​គណៈកម្មាធិការ​​បេតិ​ក​ភណ្ឌ​​​ពិភពលោក​ក្នុង​រាជធានីភ្នំពេញ នឹង​ត្រូវ​​ស្វាគមន៍មុន​ពេល​កិច្ច​ប្រជុំដោយ​តន្ត្រី​ករ​ប្រគំ​​តន្ត្រី​ដោយ​ប្រើ​ឧបករណ៍​ យក​​គំរូ​​តាម​​​ឧប​ករណ៍​​មាន​នៅ​លើ​ជញ្ជាំង​ប្រាសាទ​ខ្មែរ​ ដែល​មាន​អាយ​ុកាល​ជាច្រើន​សតវត្សរ៍​មក​ហើយ​នោះ។
ឧកបរណ៍​មួយ​ក្នុង​ចំណោម​ឧបករណ៍​បុរាណ​​ទាំង​នោះ​ គឺ​ពិណដ៏​ស្រស់​ស្អាត​ ដែល​រចនាឡើង​ផ្អែក​លើ​ចម្លាក់​សត​វត្សរ៍​ទី​៧ នៅ​ឯប្រាសាទ​សម្បូរ​ព្រៃគុក ដែល​ជា​តំបន់​​ដ៏​សំខាន់​​តាំង​ពី​មុន​សម័យ​អង្គរ​ស្ថិត​នៅ​ចំកណ្តាល​ប្រទេស​កម្ពុជា​។

លោក បា៉ទ្រិក ឃើសែល (Patrick Kersale) តូរ្យ​តន្ត្រី​វិទូ​បារាំង​ ដែល​បាន​រក​ឃើញ​ឧបករ​ណ៍​​ទាំាង​នេះ​ នឹង​មាន​វត្តមាន​នៅ​ថ្ងៃអង្គារ​​ ដើម្បី​លេង​ពិណ​ជាមួយ​នឹង​តន្ត្រីករ​បុរាណ​ខ្មែរ​មួយ​​ចំនួន​ទៀត​ដែល​លេង​ឧបករណ៍​តន្ត្រី​បុរាណ​ផ្សេងៗនោះ​បាន​មាន​ប្រសាសន៍​ថា ការ​ប្រើ​ប្រាស់​ពិណ ប្រហែល​ត្រូវ​បាន​គេ​បោះ​បង់​ចោល​នៅ​ក្នុង​អំឡុង​​​ឆ្នាំ​១.៣០០។

បន្ទាប់​ពី​ការ​ប្រគំតន្ត្រី​រយៈពេល​ខ្លីនេះ គណៈប្រតិភូ​មក​ពី​២១ប្រទេស​ ដែល​បង្កើត​គណៈកម្មាធិការ​បេតិក​ភណ្ឌ​ពិភព​លោក​​នេះ​ នឹង​ចាប់​ផ្តើម​សម័យ​ប្រជុំ​ប្រចាំ​​ឆ្នាំ​លើក​ទី​៣៧​របស​់​ខ្លួននៅ​ថ្ងៃអង្គារ​ ដើម្បី​ពិនិត្យ​មើល​ស្ថាន​​ភាពនៃ​​ទី​តាំង​​ធម្មជាតិ​​​និង​​ប្រវត្តិសាស្ត្រ​​ដែល​​សំខាន់​​បំផុត​​នៅ​​លើ​ពិភព​លោក និង​សម្រេច​ថា​ តើទីតាំងជា​ច្រើន​ទៀត​គួរ​តែ​​ចុះ​បញ្ជី​​ជា​បេតិកភណ្ឌ​ពិភព​លោក​​ឬ​យ៉ាង​ណា​។

ឧបករណ៍តន្ត្រី​បុរាណ​ខ្មែរ​ដែល​នឹង​​ត្រូវ​បង្ហាញ​មុន​កិច្ច​ប្រជុំ​​នេះ​គឺ​ជា​ផ្នែក​មួយ​នៃ​​ការ​តាំង​ពិព័រណ៍​​នៅ​ឯសណ្ឋាគារ​សូហ្វីតែល​អង្គរ​​ភោគីត្រា ក្នុង​ខែនេះ​ ដែល​ផ្តោត​លើ​ការ​ស្រាវ​ជ្រាវ​របស់​លោក​ ឃើ​សែល​។

លោក ឃើសែល​ បាន​មាន​ប្រសាសន៍ថា “ ឧបករណ៍​តន្ត្រី​មួយ​ចំនួន​គឺ​ស្រដៀង​គ្នា​នឹង​ឧបករណ៍​តន្ត្រី​បុរាណ​ ដូច​ជា ឧបករណ៍​ខ្សែ​មួយ ​ហៅសាដៀវ។ ឧបករណ៍​នេះ​ឃើញ​មាន​តាំង​ពី​សតវត្សរ៍​ទី​៧​ ហើយ​កម្រ​មាន​គេ​កែ​ប្រែ​​ណាស់​។ ចំណែក​ឧបករណ៍​តន្ត្រី​ដ៏​ទៀត​គេ​បាន​កែប្រែ​​ទ្រង់​ទ្រាយ​បន្តិច​បន្តួច ដើម្បី​ឲ្យ​​មាន​លក្ខណៈ​ទំនើប​”។

លោក ឃើសែល បាន​​ប្រមូល​​ឧបករណ៍​តន្ត្រី​សម័យ​អង្គរ​និង​មុន​សម័យ​អង្គរ​​បាន​ចំនួន​​៥០គ្រឿង​តាម​រយៈ​ការ​សិក្សា​រូប​ចម្លាក់​នៅ​លើ​ជញ្ជាំង​ប្រាសាទ​ខ្មែរ​​មួយ​ចំនួន ដូចជា ប្រាសាទ​បន្ទាយ​ឆ្មារ​ ដែលមាន​អាយុ​កាល​៨០០ឆ្នាំ​នៅ​ភាគ​ពាយព្យនៃ​ប្រទេស​កម្ពុជា​ និង​ប្រាសាទ​បាយ័នព្រមទាំង​ប្រាសាទ​អង្គរ​វត្តក្នុង​ខេត្ត​សៀម​រាប។​​​

​គោលបំណង​របស់​គាត់​គឺ​ដើម្បី​ចងក្រង​រូប​ភាព​នៃ​ឧបករណ៍តន្ត្រី​ឲ្យ​បាន​ច្រើន​ដើម្បី​កំណត់​ថា តើ​ឧបករណ៍មួយ​ណា​ត្រូវ​​គេ​ប្រើ​ប្រាស់​ញឹក​ញាប់​ជាង​គេ​ កាលពីសម័យ​បុរាណ​​ ហើយ​បន្ទាប់​មក​លោក​បង្កើត​វា​ឡើង​​វិញ​។

លោក ឃើសែល​ ​មាន​ប្រសាសន៍ថា ការ​ស្វែង​រក​អ្នក​​ផលិត​ឧបករណ៍តន្ត្រី​ដើម្បី​ផលិត​ស្គរ​បុរាណ​និង​ឧបករណ៍តន្ត្រី​​ខ្សែឡើង​វិញ​​ មិន​មែន​ជា​រឿង​ពិបាក​ទេ​។ ប៉ុន្តែ ការ​បង្កើត​ឧបករណ៍​តន្ត្រី​ពិណដែល​គេ​បំភ្លេច​ចោល​ជា​យូរ​យារ​មក​ហើយ​នោះ​មិន​មែន​ជា​រឿង​ងាយ​​នោះ​ទេ​ ​ដូច្នេះ​ហើយ​លោក ឃើសែល ធ្វើ​ដំណើរ​​​​ទៅ​ប្រទេស​ភូមា ដែល​​នៅ​ទី​នោះ​គេ​នៅ​តែ​ប្រើ​ប្រាស់​ពិណ​ជា​សំខាន់​​ក្នុង​វង់​ភ្លេង​បុរាណ​។

លោក​បាន​បន្ត​ថា “ ខ្ញុំ​បាន​ទៅ​ធ្វើការ​នៅ​ប្រទេស​ភូមា​ជាមួយ​ [ជន​ជាតិ​ភាគ​តិច​] ការ៉េន ព្រម​ទាំង​ភូមា បន្ទាប់​មក​ក៏​បាន​នាំ​យក​បច្ចេក​ទេស​ភូមា​មក​ផលិត​ពិណ​នៅ​ក្នុង​ប្រទេស​កម្ពុជា​”។ លោក​បាន​បន្ថែម​ថា លោក​បាន​ចម្លង​​វិធី​ធ្វើ​ពិណ​ទៅ​ឲ្យ​លោក កែវ សុណន់​កវី​ ដែល​​ជា​តន្ត្រីករ​បុរាណ​ និង​ជា​អ្នក​ធ្វើ​ឧបករណ៍​តន្ត្រី​​នៅ​ក្នុង​រាជធានីភ្នំពេញ។

លោក​បាន​មាន​ប្រសាសន៍​បន្ថែម​ថា “ ក្នុង​​ចំណោម​កិច្ច​ការ​ដទៃ​ទៀត​ ការ​ងារ​របស់​ខ្ញុំ​រួម​មាន​ការ​ប៉ុន​ប៉ង​​​ធ្វើ​ឲ្យ​​ពិភពលោក​ស្គាល់​​ពី​​តន្ត្រី​​នៅ​ក្នុង​តំបន់​អាស៊ី​អាគ្នេយ៍​អំឡុង​ពេល​២០​ឆ្នាំ​ចុង​ក្រោយ​ និង​ដើម្បី​​ចង់​ដឹង​ថា ​​តន្ត្រី​​មាន​ការ​វិវឌ្ឍ​យ៉ាង​ដូចម្តេច​ ពី​ព្រោះ​យើង​ស្ថិត​នៅ​​​ក្នុង​ពិភពមួយ​ដែល​ឆ្ពោះ​ទៅ​មុខ​ក្នុង​ដំណាក់​កាលមួយ​ដែល​មាន​ល្បឿន​លឿន”។

លោកស្រី គែល ប៊ីហ្គៀត (Gaelle Bigeard) អ្នក​សម្រប​សម្រួល​ទី​ផ្សារ​​នៅ​សណ្ឋារ​គារ​នេះ​​មាន​ប្រសាសន៍​ថា “ ក្រៅ​ពី​ការ​សម្តែង​​នៅ​ថ្ងៃអង្គារ​នេះ​ តន្ត្រី​ករ​ទាំង​អស់​នឹង​ប្រើ​ប្រាស់​ឧបករណ៍​តន្ត្រី​មួយ​ចំនួន​ក្នុង​ចំណោម​ឧបករណ៍​តន្ត្រី​សម័យ​អង្គរ​និង​មុន​សម័យ​អង្គរ​របស់​លោក ឃើសែល នៅ​ក្នុង​ការ​ប្រគំ​តន្ត្រី​នៅ​ថ្ងៃទី​២១ ខែមិថុនា នៅ​ឯសណ្ឋាគារ​សូហ្វី​តែល​អង្គរ​ភោគីត្រា​ក្នុង​ខេត្ត​សៀមរាប ។​

ចាប់​តាំង​ពី​ដើម​ទសវត្សរ៍​ឆ្នាំ​១៩៨០មក​ បារាំង​បាន​ប្រារព្ធទិវា​បុណ្យ​តន្ត្រី​រៀង​រាល់​ថ្ងៃទី​២១ ខែ​មិថុនា ហើយ​ចាប់​តាំង​ពី​ពេល​នោះ​មក​ប្រពៃ​ណីទិវា​បុណ្យ​តន្ត្រី​នេះ​បាន​រីករាល​ដាលដល់​​ប្រទេស​ជាង​១០០ប្រទេស​នៅ​លើ​ពិភព​លោក​។​

ចំណែក​ឯ​ការ​ប្រគំ​​តន្ត្រី​នៅ​ឯ​សណ្ឋាគារ​សូហ្វីតែល​ក្នុង​ខេត្ត​សៀមរាប ចាប់​ផ្តើម​នៅ​ម៉ោង​៦ល្ងាច​​ នឹង​បើក​​ចំហជូន​សាធារណជន​ចូល​ទស្សនា​។​ ពិព័រណ៍​​តន្ត្រី​នេះ​នឹង​បន្ត​រហូត​ដល់​ដំណាច់​ខែនេះ៕

ប្រែសម្រួលដោយ ហម សុផាណ្ណា

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស