29 C
Phnom Penh

គណបក្ស​សង្គ្រោះ​ជាតិ​​មិន​ទាន់​​សម្រេច​ចិត្ត​​​រឿង​​​ធ្វើ​ពហិការ​មិន​​ចូល​រួម​​​​ក្នុងការ​​​បោះ​ឆ្នោត​​​ជាតិ​​​​

ដោយ ឌឹ ខេមបូឌា ដេលី

បទវិភាគ

អ្នក​នាំ​ពាក្យ​​​​​​​គណបក្ស​សង្គ្រោះ​ជាតិ​បាន​ឲ្យ​ដឹង​កាល​ពីម្សិលមិញថា ​​គណបក្ស​នេះ​​​បាន​បន្ត​​​​​​​ការ​ពិភាក្សា​​​​​​កាល​ពី​ចុង​សប្ដាហ៍​​ស្ដី​ពី​​​​​​ការ​​​ដក​ខ្លួន​​​ចេញ​ពី​ការ​បោះ​ឆ្នោត​ជាតិ​នៅ​​​ខែ​ក្រោយ​ដោយ​សារ​​ការ​រំខាន​ជា​បន្ដ​បន្ទាប់​​លើ​ការ​ជួប​ជុំ​គ្នា​របស់​គណបក្ស​ នេះ​​​និង​​​ដោយសារ​តែ​រដ្ឋាភិបាល​មិន​បាន​កែ​ទម្រង់​​ដំណើរការ​បោះ​ឆ្នោត​ ​។
លោក​​​ យឹម​​​ សុវណ្ណ​​​ អ្នក​នាំ​ពាក្យ​គណបក្ស​សង្គ្រោះ​ជាតិ​ បាន​ឲ្យ​​​ដឹង​​​​ថា ការ​ធ្វើ​ពហិការ​មិន​ចូល​រួម​​ក្នុង​ការ​បោះ​ឆ្នោត​ជាតិ​ គឺ​នៅ​តែ​ជា “ ជម្រើស​​​មួយ” នៅ​ឡើយ​ ហើយ​ថ្នាក់​​​ដឹក​នាំ​គណបក្ស​ប្រឆាំង​នឹង​ប្រកាស​​​អំពី​សេចក្តី​​​សម្រេច​ចុង​ក្រោយ​របស់​ខ្លួន​ថា តើ​នឹង​ចូល​រួម​​ក្នុង​ការ​បោះ​ឆ្នោត​ជាតិ​នាថ្ងៃ​ទី​២៨​ ខែ​កក្កដា​​​ខាងមុខ​​​នេះ​​​ឬ​​​អត់ អំឡុង​​​​សន្និសីទ​កាសែត​មួយ​ដែល​នឹង​ធ្វើ​ឡើង​នៅ​ថ្ងៃ​ព្រហស្បតិ៍​​​សប្តាហ៍​​​នេះ​​​។

លោក យឹម​ សុវណ្ណ ​មាន​ប្រសាសន៍​ថា “ យើង​​មិន​អាច​សម្រេច​ចិត្ត​​​ក្នុង​ពេល​នេះ​បាន​ទេ យើង​ត្រូវ​តែ​សម្រេច​ថា​​​ តើ​​​សមាជិក​សភា​របស់​យើង​ចង់​បាន​អ្វី​​​ជាមុន​សិន​ ព្រោះ​ពួក​គេ​ [គណបក្ស​ប្រជាជន​កម្ពុជា] បាន​រំខាន​ការ​​​ជួបជុំ​របស់​យើង​ និង​បាន​បំផ្លិច​បំផ្លាញ​ស្លាក​សញ្ញា​​​​គណបក្ស​របស់​យើង​។​​​ វា​​​ជា​​​ការ​​​​​​រួមចំណែក​​​បង្ក​​​​បរិយាកាសអាប់អួសម្រាប់​ការ​បោះ​ឆ្នោត​”។

លោក​បាន​បន្ថែម​ថា ការ​សម្រេចចិត្ត​​​របស់​គណបក្ស​សង្គ្រោះ​ជាតិ​​​​ក្នុងការ​​​​​​​មិន​ចូល​រួម​​ក្នុង​ការ​បោះ​ឆ្នោត​ជាតិ​ នឹង​បង្កើន​​​សម្ពាធ​​​អន្ដរជាតិ​​លើ​គណបក្ស​​​​គណបក្ស​ប្រជា​ជន​កម្ពុជា​​​ដែល​​​កំពុង​​​កាន់​អំណាច​​​។  លោក​បាន​មាន​ប្រសាសន៍​ថា“ ប្រសិន​បើ​យើង​មិន​ចូល​រួម​ក្នុង​ការ​បោះ​ឆ្នោត​ជាតិ​ សហគមន៍​អន្តរជាតិ និង​អង្គការ​សហ​ប្រជា​ជាតិ​នឹង​មិន​ទទួល​ស្គាល់​រដ្ឋាភិបាល​បែប​នេះ​ឡើយ​ ដូច្នេះ​​​ ប្រជា​ពល​រដ្ឋ​ខ្មែរ​នឹង​ចោទសួរ​ពី​​​​ភាព​ស្រប​ច្បាប់​របស់​រដ្ឋាភិបាល​ ហើយ​​គណ​បក្ស​ប្រជាជន​កម្ពុជា​នឹង​​​ក្លាយ​​​ជា​​​អ្នក​​​ចាញ់​​​​”។

ទោះជាយា៉ងណា​​​ ​លោក យ៉ែម បុញ្ញឫទ្ធិ អ្នក​នាំ​ពាក្យ​​​​​រង​​​របស់​​​​គណបក្ស​​សង្គ្រោះ​ជាតិ​ ​លើកឡើង​​​ថា វា​ជា​ឱកាស​ល្អ​​​​មួយ​​​សម្រាប់​គណបក្ស​សង្គ្រោះ​ជាតិ​ក្នុងការ​​​ប្រកួត​ប្រជែង​​​​ក្នុង​ការ​បោះ​ឆ្នោត​ជាតិ​។

លោក​ បុញ្ញឫទ្ធិ​​​ បាន​​ឲ្យ​​​ដឹង​​​ថា​​​ លោក​​​ កឹម​​​ សុខា​​​ ប្រធាន​ស្ដីទី​គណបក្ស​សង្គ្រោះ​ជាតិ​​​​ដែល​​​​​កំពុង​ស្ថិត​​​នៅ​​​នៅ​​​​ក្នុង​ទីក្រុង​តូក្យូ និង​លោក សម រង្ស៊ី ប្រធាន​គណបក្ស​ដែល​កំពុង​​​​និរទេស​ខ្លួន​ឯង​នៅ​ប្រទេស​បារាំង​ បាន​ជួប​​​ពិភាក្សា​​​គ្នា​​​តាម​ទូរស័ព្ទ​កាល​ពី​ថ្ងៃ​សៅរ៍​ ហើយ​​បាន​សម្រេច​ថា សមាជិក​ភាគ​ច្រើន​របស់​គណ​​​​បក្ស​សង្គ្រោះ​ជាតិ​​​គាំទ្រ​ការ​​ចូលរួម​​​ប្រកួត​ប្រជែង​​ក្នុង​ការ​បោះ​ឆ្នោត​ជាតិ​​​នាពេល​​​ខាង​មុខ​​​នេះ​​​។

លោក បុញ្ញឫទ្ធិ ​មានប្រសាសន៍​ថា “​គណ​បក្ស​សង្គ្រោះ​ជាតិ​នឹង​ចូល​រួម​​ក្នុង​ការ​បោះ​ឆ្នោត​ជាតិ​នា​ថ្ងៃ​ទី២៨ ខែ​កក្កដា ប៉ុន្តែ​ចាប់​ពី​ពេល​នេះ​​​ទៅ​ ប្រសិនបើ​មាន​ការ​រំខាន ​​​​និង​ការ​រើស​អើង​​​​ទៀត​​​ យើង​នឹង​មិន​ទទួល​យក​លទ្ធផល​នៃ​ការ​បោះ​ឆ្នោត​ឡើយ​។

​ថ្លែង​តាមរយៈ​វីដេអូ​ខន់ហ្វើរិន​​ទៅ​កាន់​អ្នក​ចូលរួម​​​ស្តាប់​​​នៅ​​ទី​ស្នាក់​ការ​កណ្ដាល​​​​របស់​គណបក្ស​សង្គ្រោះ​ជាតិ​​​​ក្នុង​រាជ​ធានី​ភ្នំពេញ​​​កាល​​ពី​ម្សិលមិញ លោក​ សម រង្ស៊ី បាន​បញ្ជាក់​​​​ថា លុះត្រា​តែ​រដ្ឋាភិបាល​​​យល់ព្រម​​​កែទម្រង់​ការ​​​បោះ​ឆ្នោត​​​ ដែល​​​រួមមាន​​​​ទាំង​​​ការ​​​​បើកផ្លូវ​​​ឲ្យ​លោក​វិល​​​ត្រឡប់​មក​កាន់​ប្រទេស​កម្ពុជា​វិញ​​ បើ​​​ពុំដូច្នោះ​​​ទេ គណបក្ស​សង្គ្រោះ​ជាតិ​​​​​​​នឹង​​​មិន​​​ទទួល​ស្គាល់​​ភាព​ស្រប​ច្បាប់​នៃ​លទ្ធ​ផល​​​​​ក្នុង​ការ​បោះ​ឆ្នោត​​​​ឡើយ​​​។

លោក សម រង្ស៊ី បាន​មាន​ប្រសាសន៍​ថា “យើង​នឹង​មិន​ចូល​រួម​ក្នុង​ការ​បោះ​ឆ្នោត​ជាតិ​ដែល​គួរ​ឲ្យ​អស់​សំណើច​​ជាមួយ​គណបក្ស​ប្រជាជន​កម្ពុជា​​ទេ​​​ ប្រសិន​​​បើ​​​ [គណៈ​កម្មា​ធិ​ការ​​ជាតិ​រៀបចំ​ការ​បោះ​ឆ្នោត] ​​មិន​​​ធ្វើ​​​កំណែ​ទម្រង់​​​នោះ​​​។​​​ សម រង្ស៊ី​ នឹង​មិន​គាំ​ទ្រ​​​ឬ​​​ទទួល​ស្គាល់​លទ្ធផល​នៃ​ការ​បោះ​ឆ្នោត​ឡើយ​​​​ហើយ​យើង​នឹង​ទាម​ទារ​ឲ្យ​មាន​ការ​បោះ​ឆ្នោត​ឡើង​វិញ​ តាម​អនុសាសន៍​របស់​អង្គការ​សហប្រជាជាតិ​”។

ជាការ​​​​បំភ្លឺ​​​​អំពី​គោល​ជំហរ​របស់​ខ្លួន​​​ លោក សម រង្ស៊ី បាន​លើកឡើង​​​តាម​រយៈ​អុីម៉េល​​​​ថា គណបក្ស​សង្គ្រោះ​ជាតិ​នៅ​តែ​“បើក​ចំហ​រាល់​ជម្រើស​ទាំង​អស់​” ប៉ុន្ដែ ទំនង​ជា​នឹង​​រង់ចាំ​​ធ្វើ​ពហិការ​មិន​ទទួល​ស្គាល់​លទ្ធផល​​​​​នៃ​​​ការ​បោះ​ឆ្នោត ​ជាជាង​មិន​ចូល​រួម​​ក្នុង​ការ​បោះ​ឆ្នោត​។

លោក​​​បាន​ថ្លែង​ថា “ ទោះ​បី​ជា​អាច​​​មាន​​​ការ​​​លួចបន្លំ​​​សន្លឹក​​​ឆ្នោត​​​នៅ​​​ថ្ងៃ​ទី​២៨​ ខែ​កក្កដា​​​​ក៏​​​ដោយ​​​ ក៏​​​យើង​​​​នៅតែ​​​ជឿជាក់​ថា ​​ប្រជា​ប្រិយ​​​​​ភាព​​​​​មិនធ្លាប់​​​មាន​​​ពីមុនមក​​​ដោយសារ​​​ការ​​​រួបរួម​​​គ្នា​​​​​​ជា​​​ធ្លុងមួយ​​​របស់​​​គណបក្ស​ប្រឆាំង​​​និយម​​​ប្រជាធិបតេយ្យ​​​​នឹង​ជួយ​​​ឲ្យ​​​យើង​​​មាន​​​ទឹកមាត់​​​ប្រៃ​​​​”។

លោក​បាន​បន្ថែម​ថា “ យើង​កំពុង​ធ្វើ​​​ឲ្យ​​​ប្រាកដ​​​​ថា សហគមន៍​អន្តរជាតិ​នឹង​មិន​ទទួល​ស្គាល់​ភាព​ស្រប​ច្បាប់​របស់​​​​រដ្ឋាភិបាល​ណា​ដែល​កើត​ចេញ​ពី​ការ​បោះ​ឆ្នោត​​មិន​ស្រប​ច្បាប់​បែប​នេះ​”។

លោក ផៃ ស៊ីផាន អ្នក​នាំ​ពាក្យ​ទី​ស្ដីការ​គណៈ​​រដ្ឋ​មន្ត្រី​ បាន​លើកឡើង​​​​ថា ការ​សម្រេច​​ចិត្ត​របស់​គណបក្ស​ប្រឆាំង​ក្នុងការ​​​​ធ្វើ​ពហិការ​មិន​ចូល​​រួម​ក្នុង​ការ​បោះ​ឆ្នោត​ជាតិ​ គឺ​​​បាន​​​ត្រឹមតែ​​​ធ្វើ​ឲ្យខូច​​​​ដំណើរ​ការ​ប្រជាធិបតេយ្យ​​​​ដែល​កំពុង​​វិវឌ្ឍទៅ​មុខ​​​​​​​នៅ​​​ក្នុង​​​ប្រទេស​​​នេះ​​​​​​​​​ប៉ុណ្ណោះ​​​។

លោក​បាន​មាន​ប្រសាសន៍​ថា“ ប្រសិន​បើ​​ពួក​គេ​សម្រេច​​​​ចិត្ត​​​មិន​ចូល​រួម​​ក្នុង​ការ​បោះ​ឆ្នោត​ជាតិ​ ការ​សម្រេច​នេះ​នឹង​ធ្វើ​ឲ្យ​អ្នក​គាំ​ទ្រ​​របស់​ខ្លួន​ខក​ចិត្ត​។ ពួកគេ​​​បាន​ខិតខំ​យ៉ាង​លំបាក​​​​​ក្នុងការ​​​ប្រកួតប្រជែង​​​​​​​និង​ចូលរួម​​ក្នុង​ដំណើរ​ការ​ប្រជាធិបតេយ្យ​នេះ​។

ប្រជា​ពល​រដ្ឋ​ខ្មែរ​ក្នុងនាម​​​ជា​​​ប្រទេស​​​មួយ​​​ ក្នុងនាម​​​ជា​​​​​​ប្រជាជាតិ​​​មួយ គឺ​​​ពិតជា​​​​ចង់​ឲ្យ​​​​​លទ្ធិ​​​ប្រជា​ធិប​តេយ្យ​​​​បន្ត​​​វិវឌ្ឍទៅ​មុខ​​​ទៀត​​​​​។ យើង​ចង់​បាន​ប្រព័ន្ធ​បោះ​ឆ្នោត​​ត្រឹមត្រូវ​​​និង​​​យុត្តិធម៌​​​​មួយ​​​ ដែល​​​​មាន​​​ការ​​​ចូល​រួម​​​​ពី ​​​​គណបក្ស​ប្រឆាំង​​​​​ក្នុង​ការ​បោះ​ឆ្នោត​ជាតិ​”។

លោក​​បន្ត​ថា “ ​ក្រុម​​​​​​ប្រឆាំង​កំពុង​​​ស្វែង​រក​​​​​អំណាច​របស់​​​ខ្លួន​​​​ឯង​​​។ ពួក​គេ​កំពុង​​​បាត់បង់​​​អំណាច​របស់​​​ប្រជា​ពល​រដ្ឋ​​​​ក្នុងការ​​​ចេញ​ទៅ​បោះ​ឆ្នោត​​​​ហើយ​​​។ យើង​ដាច់​ខាត​ត្រូវ​តែ​គោរព​ពួក​គាត់”។

ក្នុង​ការ​ទាមទារ​របស់​ខ្លួន​​ឲ្យ​​​មាន​​​​​កំណែ​ទម្រង់ គណបក្ស​សង្គ្រោះ​ជាតិ​បាន​ចង្អុល​​​ទៅ​​​របាយការណ៍​​​​របស់​លោក សុរិយា ស៊ូបេឌី (Surya Suedi) ប្រេសិត​ពិសេស​របស់​អង្គការ​សហ​ប្រជាជាតិ​ទទួល​បន្ទុក​​សិទ្ធិ​មនុស្ស​នៅ​ក្នុង​ប្រទេស​កម្ពុជា​ ដែល​មុននេះ​​​​បាន​អំពាវ​នាវ​​ឲ្យ​មាន​ការ​ផ្លាស់​ប្ដូរ​ក្នុង​ជួរ​​​គណៈ​កម្មា​ធិការ​​ជាតិ​រៀបចំ​ការ​បោះឆ្នោត​​​ ដែល​បច្ចុប្បន្ន​​​នេះ​​​ពោរ​ពេញ​ទៅ​ដោយ​សមាជិក​​​​គណបក្ស​ប្រជា​ជន​កម្ពុជា​ និង​ឲ្យ​មាន​ការ​​ផ្តល់​​​ឱកាស​​ស្មើ​​​គ្នា​​​​​​​​​​​​​​​​​ក្នុងការ​​​ចេញមុខ​​​តាម​​​​​ប្រព័ន្ធ​​ផ្សព្វ​ផ្សាយ ដែល​ស្ទើរតែ​ត្រូវបាន​​​គ្រប់​គ្រង​ទាំង​ស្រុង​ដោយ​គណបក្ស​កាន់​អំណាច​​​​ទៅហើយ​​​នោះ។

កំណែ​ទម្រង់​ផ្សេងៗ​ទៀត​​​​ដែល​គណ​បក្ស​​ប្រឆាំង​បាន​​​ទាម​ទារ​ រួម​មាន​ការ​បង្កើត​បញ្ជី​​ឈ្មោះ​អ្នក​បោះ​ឆ្នោត​ថ្មី​​  ព្រោះ​​​​វិទ្យាស្ថាន​ជាតិ​​ប្រជា​​​ធិបតេយ្យ​ ហៅកាត់ថា​​​ NDI​​​ បាន​រក​ឃើញ​​​កាល​ពី​ខែ​​​មីនា​ថា ​ប្រជា​ពល​រដ្ឋ​ជាង​មួយ​លាន​​នាក់​ដែល​មាន​សិទ្ធិ​បោះ​ឆ្នោត​​​​ពុំ​​​មាន​​​ឈ្មោះ​​​ក្នុង​​​​បញ្ជី​ឈ្មោះ​​​​អ្នក​​​បោះឆ្នោត​​​ផ្លូវការ​​​ និង​​​​​​​ឲ្យ​មាន​ការ​អនុវត្ត​ច្បាប់​​​​ដែល​ហាម​ឃាត់​​​ការ​​​ប្រើ​ធន​ធាន​រដ្ឋ​សម្រាប់​​​ធ្វើ​​​យុទ្ធនាការ​ឃោសនា​បោះឆ្នោត​។

លោក គល់ បញ្ញា នាយក​ប្រតិបត្តិ​នៃ​​​គណៈ​កម្មាធិការ​សម្រាប់​ការ​បោះ​ឆ្នោត​ដោយ​សេរី​ និង​យុត្តិធម៌​ នៅ​ក្នុង​ប្រទេស​កម្ពុជា​ បាន​​​លើក​​ឡើង​​​ថា តាម​លក្ខណៈ​​​​បច្ចេកទេស ​គណបក្ស​សង្គ្រោះ​ជាតិ​មិន​អាច​ដក​ខ្លួន​ចេញ​​​​​​​ពីការ​​​បោះឆ្នោត​​​នៅ​ក្នុង​ដំណាក់កាល​​​​​​​នេះ​​​បាន​ទេ ប៉ុន្តែ​​​អាច​អំពាវ​នាវ​កុំ​​​ឲ្យ​អ្នក​បោះ​ឆ្នោត​ចេញ​​​​ទៅ​​​បោះឆ្នោត​បាន។

លោក​បាន​មាន​​​ប្រសាសន៍​​​​ថា“ ​ពួក​គេ​មិន​អាច​ស្នើ​ឲ្យ​គណៈកម្មាធិការ​ជាតិ​រៀបចំ​ការ​បោះ​ឆ្នោត​​លុប​ឈ្មោះ​របស់​​​​គណបក្ស​​​ខ្លួន​ចេញ​ពី​សន្លឹក​​​​ឆ្នោត​​បាន​ឡើយ​។ ពួក​គេ​បាន​ធ្វើ​សេចក្តី​​​សម្រេច​ចុង​ក្រោយ​​​​ក្នុងការ​​​​ចូល​រួម​​​ហើយ​​​​ ប៉ុន្តែ​ពួក​គេ​ចង់​ផ្ញើ​​​សារ​ព្រមាន​មួយ​ទៅ​​គណបក្ស​កាន់​អំណាច​​​​​ថា ពួក​​​គេ​​​យល់​​​ថា​​​ ការ​បោះ​ឆ្នោត​​​នេះ​​​​គឺ​​​មិន​សេរី​ និង​យុត្តិធម៌​ទេ​​​​”។

លោកស្រី​​​ ឡូរ៉ា ថនថុន​​​ (Laura Thornton) នាយិកា​​​ប្រចាំ​​​ប្រទេស​​​​​​នៃ​​​វិទ្យាស្ថាន​​​​ NDI ​ដែល​​​មាន​មូលដ្ឋាន​នៅ​សហរដ្ឋ​អាមេរិក​ ​លើក​ឡើង​​​​​ថា ខណៈ​​​ដែល​​​គណបក្ស​សង្គ្រោះ​ជាតិ​ទំនង​ជា​នឹង​​​មិន​​ទទួល​បាន​​​​​​​ផល​​​ប្រយោជន៍​​​អ្វី​​​​ពី​​​​ការ​ធ្វើ​ពហិការ​មិន​ចូល​រួម​ក្នុង​ការ​បោះ​ឆ្នោត​នោះ​ ​ពួក​គេ​​​​ប្រហែល​​​ជា​​​អាច​ដាក់​​​​​​សម្ពាធ​លើ​​រដ្ឋា​ភិបាល​​​​តាមរយៈ​​​​​​​ការ​​​គំរាម​ធ្វើ​ពហិការ​​​​នេះ​​​។

លោក​ស្រី​បាន​មាន​​​ប្រសាសន៍​​​ថា ប៉ុន្តែ​​​“ ​វា​​​​អាច​មាន​​​ហានិភ័យ​ ព្រោះ​ប្រសិន​បើ​អ្នក​ប្រាប់​អ្នក​បោះ​ឆ្នោត​​ថា អ្នក​ប្រហែល​ជា​ធ្វើ​ពហិការ​មិន​ចូល​រួម​​​ក្នុង​​​​ការ​បោះ​ឆ្នោត​នោះ​ វា​អាច​ធ្វើ​ឲ្យ​​​​ពួកគេ​​​​យល់​ច្រឡំ​បាន​”។

​ក្នុង​​​​ឯកសារស្តីពី​​​គោល​នយោបាយ​​​​​​មួយ​​​​​​​​​​​​ក្រោម​​​ចំណង​ជើង​ថា “ គំរាម​ ប៉ុន្តែ​​​​នៅតែ​​​ចូល​​​រួម ៖ មូលហេតុ​ដែល​​​ការ​​ធ្វើ​ពហិការ​មិន​ចូល​រួម​​​ក្នុង​​​​ការ​បោះ​ឆ្នោត​ គឺ​ជា​គំនិត​មិនល្អ​​​”​ លោក​​​​ម៉ាតធីវ ហ្វ្រេនកែល​ (Matthew Frankel) បាន​គូស​​​បញ្ជាក់​​​ពី​​​ស្ថានភាព​​​​លំបាក​ដែល​គណបក្ស​ប្រឆាំង​ត្រូវ​​​ប្រឈម​​ក្នុង​ក្របខណ្ឌ​​​​នយោ​បាយ​​ដែល​​​​គ្រប​ដណ្ដប់​​​​ដោយ​​​គណបក្ស​កំពុង​​​កាន់​អំណាច។​​​ វា​​​ជា​ស្ថាន​ភាព​មួយ​​ដែល​លោក​ស្រី​ ​ថនតុន​​​ ​​​កត់សម្គាល់​​​​​​​ឃើញ​​​ថា ​ពាក់​ព័ន្ធ​​​​នឹង​គណ​​បក្ស​សង្គ្រោះ​ជាតិ​ក្នុង​​​ការ​បោះ​ឆ្នោត​នេះ។

លោក​ ម៉ាតធីវ ហ្វ្រេនកែល បាន​សរសេរ​ថា “​ ប្រសិន​បើ​គណបក្ស​ប្រឆាំង​សម្រេចចិត្ត​​​​ចូល​រួម​​​​ក្នុង​​​ការ​​​បោះឆ្នោត​​​ វា​មិន​ទំនង​សោះ​ឡើយ​​​ថា​​​  ពួកគេ​​​នឹង​​​ទទួល​​​បាន​​​​​​ជ័យជម្នះ​​​​​ មូល​ហេតុ​​​គឺ​​​ដោយសារ​​​កម្រិត​ខ្ពស់​​​នៃ​​​​ការ​ក្លែង​បន្លំ​​​​​​​និង​ការ​​​ភ័យខ្លាច​​​ ​ដែល​ច្រើន​​​តែ​អម​​​ជាមួយ​​​នឹង​​​ការ​បោះ​ឆ្នោត​​ក្នុង​ប្រទេស​ទាំង​នេះ​។ លើសពី​នេះ​ទៅ​ទៀត​ ការ​ចូល​រួម​របស់​គណ​បក្ស​ប្រឆាំង ​​​​​គឺ​​​ជួយ​ផ្តល់ភាព​​​​ស្រប​ច្បាប់​​​​​​សម្រាប់​​​​ការ​បោះ​ឆ្នោត​​​​ក្នុង​​​កែវភ្នែក​​​របស់​​​មជ្ឈដ្ឋាន​​​ខាងក្រៅ​​​ មិន​​​ថា​​​ការ​​​បោះឆ្នោត​​​នេះ​​​មាន​​​ភាព​​​យុត្តិធម៌​​​​​​​ប៉ុណ្ណា​​​ក៏​​​ដោយ​​​ចុះ​​​”។

លោក​បាន​បន្ថែម​ថា ផ្ទុយ​​​ទៅវិញ​​​ ការ​សម្រេច​​​ចិត្ត​​​​ធ្វើ​ពហិការ​​​​គឺ​​​ជា​​​ការ​​​ធានា​​​​​ជ័យ​ជម្នះ​​​​សម្រាប់​​​គណបក្ស​កាន់​អំណាច ​​​ក្នុង​ការ​បោះ​ឆ្នោត​​​នេះ​​​​​។ ការ​ធ្វើ​ពហិការ​នេះ​ប្រហែល​​​ជា​​​​​​អាច​ធ្វើ​ឲ្យ​​​​បាត់បង់​​​ភាព​ស្រប​ច្បាប់​​​​​របស់​គណបក្ស​​​​កំពុង​​​កាន់​អំណាច​​​មែន​​​​ ប៉ុន្តែ​ដូច​យើង​ធ្លាប់​បាន​ឃើញ​​​ស្រាប់ហើយ​​​​ វា​មិន​ផ្លាស់​ប្ដូរ​​​តថភាព​​​ជាក់ស្តែង​​​​ឡើយ​”។

​ទោះ​ជា​យ៉ាង​ណា​ លោក ឡៅ ម៉ុងហៃ អ្នក​វិភាគ​នយោបាយ​ឯករាជ្យ​ បាន​​លើក​ឡើង​​​កាល​ពី​ម្សិលមិញ​ថា គណបក្ស​ប្រឆាំង​នៅ​ក្នុង​ប្រទេស​កម្ពុជា​​​​ទទួលបាន​​​ផ្លែផ្កា​​​តិច​តួច​​​ណាស់​​​ក្នុង​​​ការ​​​ជំរុញ​​​ឲ្យ​​​មាន​​​ការ​​​ធ្វើ​​​​កំណែ​ទម្រង់​ប្រជាធិបតេយ្យ​​​​​​​តាម​រយៈ​ការ​ចូល​រួម​​​​​ក្នុង​ការ​បោះ​ឆ្នោត​ក្នុង​​​ពេល​​​កន្លង​​​មក​​​ ​ដូច្នេះ​​គណបក្ស​សង្គ្រោះ​ជាតិ​អាច​​​​ពិចារណា​ឲ្យ​បាន​ហ្មត់​ចត់​អំពី​ការ​ធ្វើ​ពហិការ​​​​នៅពេល​​​ដែល​​​ពួកគេ​​​ “ អស់ជម្រើស​​​” ហើយ​​​​។

លោក​បាន​មាន​ប្រសាសន៍​ថា “ បើ​​​យើង​​​គិតពី​​​ទំហំ​​​នៃ​​​ស្ថានភាព​​​​ដែល​មិន​អំណោយ​ផល​​​ដល់​​​​ការ​បោះ​ឆ្នោត​ដោយ​សេរី​ និង​យុត្តិធម៌​ រួម​ទាំង​​​ការ​ដាក់​សម្ពាធ​លើ​គណបក្ស​ប្រឆាំង​​​​ផង​​​នោះ​​​ ការ​ធ្វើ​ពហិការ​ប្រហែល​ជា​អាច​​​​ជួយ​​​ធ្វើ​​​ឲ្យ​​​​បាត់បង់​​​ភាព​ស្រប​ច្បាប់​​​​នៃ​​​ដំណើរ​ការ​បោះ​ឆ្នោត​ដែល​នៅ​​​មាន​​​ភាព​​​​ខ្វះ​ចន្លោះ​ច្រើន និង​ដែល​​ប្រាកដ​​​ជា​​​គ្មាន​​​លក្ខណៈ​​​សេរី​ និង​យុត្តិធម៌​​។លោក​បន្ថែម​ថា “ ​តាម​រយៈ​​​ការ​ចូល​រួមរបស់​​​គណបក្ស​ប្រឆាំង​​ក្នុង​ការ​បោះ​ឆ្នោត​​​​រយៈពេល​​​​​​២០​ឆ្នាំ​ចុង​ក្រោយ​​​​នេះ​​​ លទ្ធិ​​​​​​ប្រជាធិបតេយ្យ​មិនបាន​​​​រីក​ចម្រើន​​​ឡើយ​​​​​​។ វា​កាន់តែ​​​​ខ្សោយ​ទៅៗ​​​ទៅវិញ​​​​ទេ​​​”​៕

ប្រែ​សម្រួល​ដោយ ស៊ា ស៊ុយឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស