មន្ត្រីនគរបាលបានឲ្យដឹងកាលពីម្សិលមិញថា រថយន្ដតួរីសមួយគ្រឿងដឹកកម្មករកម្មការិនីកាត់ដេរ១៦នាក់បានបុកជាមួយរថភ្លើងដឹកទំនិញរបស់ក្រុមហ៊ុនថូល រ៉ូយ៉ាល់ រ៉េលវ៉េ ខណៈពេលរថយន្តនេះបើកឆ្លងកាត់កំណាត់ផ្លូវជាតិលេខ ៣ក្នុងខេត្តកណ្តាល កាលពីយប់ថ្ងៃសៅរ៍ បណ្តាលឲ្យស្ត្រី១២នាក់រងរបួស។
លោក ហាស់ សារឿន នាយប៉ុស្តិ៍នគរបាលឃុំបានមានប្រសាសន៍ថា ខណៈពេលរថភ្លើងដឹកទំនិញ២០ទូនេះកំពុងធ្វើដំណើរឆ្លងកាត់ឃុំត្រពាំងវែង ស្រុកកណ្តាលស្ទឹង កាលពីយប់ថ្ងៃសៅរ៍ ដោយមានបើកភ្លើងជាសញ្ញា និងស៊ីផ្លេឲ្យមានការប្រុងប្រយ័ត្ន ពេលរថភ្លើងនេះទៅជិតដល់ចំណុចឆ្លងកាត់ ប៉ុន្តែ រថយន្ដតួរីសនេះមិនបានប្រុងប្រយ័ត្នចំពោះការផ្តល់សញ្ញាព្រមាននេះទេ។
លោក សារឿន បន្តថា “ អ្នកបើករថយន្ដតួរីសបើកបរបណ្តើរនិយាយទូរស័ព្ទបណ្តើរ ហើយទោះបីជាមានម៉ូតូនិងរថយន្តផ្សេងៗទៀតឈប់ក៏ដោយ ក៏អ្នកបើកបររូបនេះមិនឈប់ឡើយ ហើយក៏បើកបុករថភ្លើងតែម្តង”។
លោក ប៉ា វណ្ណនី នាយការិយាល័យនគរបាលសណ្តាប់ធ្នាប់សាធារណៈស្រុកនេះបានមានប្រសាសន៍ថា ស្ត្រី១២នាក់បានរងបួសក្នុងនោះមានពីរនាក់របួសធ្ងន់ និងត្រូវបានបញ្ជូនទៅមន្ទីរពេទ្យកាល់ម៉ែត និងមន្ទីរពេទ្យព្រះកុសុមៈក្នុងរាជធានីភ្នំពេញ ដើម្បីទទួលការព្យាបាល។
លោកមានប្រសាសន៍ថា “ ស្ត្រីម្នាក់បាក់ជើងឆ្វេង ហើយស្ត្រីម្នាក់ទៀតបាក់ឆ្អឹងភ្លៅខាងស្តាំ”។លោកមានប្រសាសន៍ថា តំណាងម្នាក់របស់ក្រុមហ៊ុន ថូល រ៉ូយ៉ាល់ រ៉េលវ៉េ បានទៅសួរសុខទុក្ខជនរងគ្រោះដល់មន្ទីរពេទ្យ។ លោកបានបន្ថែមថា អ្នកបើករថយន្ដតួរីស ដែលសុំមិនបញ្ចេញឈ្មោះ មិនត្រូវបានឃាត់ខ្លួនទេ ហើយប្រាក់សំណងសម្រាប់កម្មការិនីដែលរងរបួស កំពុងស្ថិតក្នុងដំណើរការចរចា។
យោងតាមលោក ម៉ែន ចាន់រិទ្ធ អធិការនគរបាលស្រុកបានឲ្យដឹងថា អ្នកបើកបររថយន្តតួរីសបានយល់ព្រមចេញថ្លៃព្យាបាលជនរងគ្រោះហើយ។
លោកបានបន្តថា“ អ្នកបើកបររថយន្តនឹងចេញថ្លៃព្យាបាលជនរងគ្រោះ ហើយម្ចាស់រថយន្ដក៏នឹងជួយជាប្រាក់ខ្លះដែរ”។
លោក ដេវីដ ឃើរ (David Kerr) នាយកប្រតិបត្តិក្រុមហ៊ុនថូលរ៉ូយ៉ាល់ រ៉េលវ៉េ បានមានប្រសាសន៍កាលពីម្សិលមិញថា គ្រោះថ្នាក់បុកគ្នានេះកំពុងស្ថិតក្នុងការស៊ើបអង្កេតនៅឡើយ ហើយលោកបានបដិសេធមិនធ្វើអត្ថាធិប្បាយទេ។
នេះជាឧបទ្ទវហេតុលើកទី២នៅក្នុងឃុំត្រពាំាងវែង នៅលើកំណាត់ផ្លូវជាតិ៣ កាលពីថ្ងៃសៅរ៍។ លោក សារឿន មានប្រសាសន៍ថា នៅម៉ោងប្រហែល៤ទៀបភ្លឺ រថយន្តមួយគ្រឿងដឹកបុរសបួននាក់ដែលធ្វើដំណើរទៅខេត្តតាកែវ បានបើកទៅបុករថយន្តដែលគេចតចោលតាមបណ្តោយផ្លូវជាតិនេះ។ លោកបន្តថា “ បុរសទាំងបួននាក់នោះបានស្លាប់ភ្លាមៗនៅនឹងកន្លែងកើតហេតុ”៕
(រាយការណ៍បន្ថែមដោយ Dene-Hern Chen)