មន្ត្រីតុលាការម្នាក់បានបញ្ជាក់កាលពីម្សិលមិញថា សាលាដំបូងខេត្តព្រៃវែង កំពុងស៊ើបអង្កេតការអះអាងរបស់ម្តាយស្ត្រីម្នាក់ដែលអះអាងថា ជាអតីតស្រីកំណាន់របស់លោក កឹម សុខា មេដឹកនាំគណបក្សប្រឆាំង ដែលថា អង្គរក្សរបស់លោកបានវាយដំខ្លួន អំឡុងពេលចុះពង្រឹងបក្ស កាលពីសប្តាហ៍មុន។
អ្នកស្រី សំ ផល្លា អាយុ៦២ឆ្នាំ ត្រូវបានបញ្ជូនទៅមន្ទីរពេទ្យកាល់ម៉ែតកាលពីថ្ងៃសុក្រ បន្ទាប់ពីអង្គរក្សរបស់លោក កឹម សុខា ត្រូវគេចោទថា បានវាយគាត់ចំទ្រូង និងពោះនៅក្នុងខេត្តព្រៃវែង។ អំឡុងហេតុការណ៍នេះ អ្នកស្រី ផល្លា មានវត្តមានជាមួយកូនស្រីរបស់ខ្លួនឈ្មោះ កែវ សុផាណារី អាយុ៤១ឆ្នាំ ដែលបានប្តឹងលោក កឹម សុខា ប្រធានស្តីទីគណបក្សសង្គ្រោះជាតិ ទាមទារប្រាក់ចំនួន១០.០០០ដុល្លារ ដែលអ្នកស្រីនិយាយថា លោក កឹម សុខា ជំពាក់ថ្លៃចិញ្ចឹមកូនពីរនាក់ដែលអ្នកទាំងពីរយកមកចិញ្ចឹមរួមគ្នា។
សំដៅដល់ការបង្ករបួសស្នាមលើអ្នកស្រី ផល្លា លោក សុខ កល្យាណ ប្រធានសាលាដំបូងខេត្តព្រៃវែង បានមានប្រសាសន៍ថា “ វាជារឿងក្តីព្រហ្មទណ្ឌ។ ប្រសិនបើតុលាការរកឃើញថា លោក កឹម សុខា បានបញ្ជាឲ្យអង្គរក្សរបស់លោកប្រើអំពើហិង្សាមែន លោកអាចជាប់ពន្ធនាគាររយៈពេលពីមួយឆ្នាំទៅបីឆ្នាំ”។ លោកបន្ថែមថា តុលាការនឹងសម្រេចថាតើត្រូវបន្តរឿងក្តីនេះឬអត់នៅត្រឹមចុងសប្តាហ៍ក្រោយនេះ។
ពាក្យបណ្តឹងប្តឹងលោក កឹម សុខា នេះគឺស្ថិតនៅក្នុងចំណោមការវាយប្រហារថ្មីបំផុតលើមេដឹកនាំគណបក្សប្រឆាំងនេះមុនការបោះឆ្នោតជ្រើសតាំងតំណាងរាស្ត្រនៅថ្ងៃទី២៨ ខែកក្កដា ខាងមុខនេះ។
អ្វីដែលកាន់តែមានផលអាក្រក់សម្រាប់លោក កឹម សុខា នោះគឺថា កាលពីថ្ងៃសុក្រ ជនរងគ្រោះពីរបបខ្មែរក្រហមក៏បានធ្វើពាក្យបណ្តឹងបរិហារកេរ្តិ៍ប្តឹងលោកចំពោះការអត្ថាធិប្បាយក្នុងពេលថ្មីៗដែលត្រូវបានចោទថា ជាការបដិសេធមិនទទួលស្គាល់ឧក្រិដ្ឋកម្មនៅគុកទួលស្លែងក្នុងរាជធានីភ្នំពេញ។
លោក កឹម សុខា មិនត្រឹមតែត្រូវបានចោទប្រកាន់ថា មានទំនាក់ទំនងស្នេហាលួចលាក់ជាមួយអ្នកស្រី សុផាណ្ណារី ប៉ុណ្នោះទេ ប៉ុន្តែលោកក៏ត្រូវលោកនាយករដ្ឋមន្ត្រី ហ៊ុន សែន ចោទប្រកាន់កាលពីថ្ងៃព្រហស្បតិ៍ថា បានទិញរួមភេទជាមួយក្មេងស្រីអាយុ១៥ឆ្នាំម្នាក់នៅក្នុងឆ្នាំ២០១១ផងដែរ។ លោក កឹម សុខា បានច្រានចោលការចោទប្រកាន់នេះ។
ថ្លែងទៅកាន់ប្រជាពលរដ្ឋអំឡុងពិធីសម្ពោធបណ្ណាល័យថ្មីមួយនៅក្នុងស្រុកក្រូចឆ្មារ ដែលជាស្រុកកំណើតរបស់ភរិយាលោក ក្នុងខេត្តកំពង់ចាម កាលពីថ្ងៃសៅរ៍ លោក ហ៊ុន សែន បានបន្តរិះគន់លោក សុខា និងបានលើកឡើងម្តងទៀតអំពីទំនាក់ទំនងស្នេហាលួចលាក់របស់លោកជាមួយអ្នកស្រី សុផាណ្ណារី។
លោកបានមានប្រសាសន៍ថា “ សូម្បីតែស្រីកំណាន់របស់ខ្លួនឯងសោះក៏បដិសេធមិនទទួលស្គាល់ដែរ។ ពេលនេះ មានពាក្យបណ្តឹងប្តឹងគាត់[លោក កឹម សុខា] ពីបទវាយដំម្តាយស្រីកំណាន់របស់ខ្លួនហើយ។ គាត់គួរតែនិយាយថា ខ្ញុំមិនដឹងថាមានរឿងអីទេ ជាជាងមកចោទគណបក្សប្រជាជនថា បានប្រឌិតរឿងនេះឡើង។ ស្មោកគ្រោកណាស់ទៅមានរឿងអាស្រូវផ្លូវភេទបែបនេះ”។
លោកបន្ថែមថា “ បងប្អូនជនរួមជាតិទាំងឡាយគួរគិតអំពីបញ្ហានេះ។ បើគាត់មិនទាំងអាណិតអាសូរប្រពន្ធរបស់ខ្លួនឯងផង ធ្វើម៉េចនឹងអាចអាណិតអាសូរបងប្អូនកើតទៅ”។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ លើកឡើងថា ការវាយប្រហារលោក កឹម សុខា ក្នុងពេលថ្មីៗនេះ ត្រូវបានរៀបចំឡើងដោយគណបក្សកាន់អំណាចទាំងស្រុងដើម្បីបំផ្លាញមុខមាត់របស់លោក កឹម សុខា មុនការបោះឆ្នោត។
លោកបានបន្តថា “ ការចោទប្រកាន់ទាំងអស់នេះគឺសុទ្ធតែគ្មានការពិតទេ ហើយត្រូវបានប្រឌិតឡើងដើម្បីដាក់បន្ទុកលើលោក កឹម សុខា នៅតុលាការ ដែលប្រាកដជាមិនផ្តល់យុត្តិធម៌នោះ។ ការចោទប្រកាន់ទាំងអស់នេះត្រូវបានប្រឌិតឡើងដើម្បីបង្កបញ្ហាអំឡុងពេលបោះឆ្នោតប៉ុណ្ណោះ”៕
ប្រែសម្រួលដោយ ចេវ ប៊ុននី