32 C
Phnom Penh

បក្ស​​​នយោបាយ​​​ដេញ​​​ដោល​​​គ្នា​​​​​​​​​​​​ពី​​​ បញ្ហា​​​ធំៗ​​​ដោយ​​​គ្មាន​​​កា​​​រ​​​ចូល​​​រួម​​​​​​​​​​​​ពី​​​ខាង​​​គណបក្ស​​​ប្រជា​​​ជន​​​កម្ពុជា​​​

ដោយ ឌឹ ខេមបូឌា ដេលី

បទវិភាគ

កាល​ពី​​ថ្ងៃ​អាទិត្យ​ ស្ថានីយ​វិទ្យុ​ជាតិ​ បាន​​ដក​​​​កម្មវិធី​​ដែល​សមាជិក​សភា​មួយ​ក្រុម​បាន​មក​ជួប​ជុំ​គ្នា​ ដើម្បី​ពិភាក្សា​ពី​បញ្ហា​របស់​ស្ត្រី​ ព្រោះ​​គ្មាន​បេក្ខជន​មក​ពី​គណបក្ស​ប្រជាជន​កម្ពុជា​ម្នាក់​ណា​បាន​មក​ចូល​រួម​ក្នុង​កិច្ច​ពិភាក្សា​នេះ​ឡើយ​។

គណបក្ស​កាន់​អំណាច​បាន​បដិសេធ​ចំពោះ​ការ​អញ្ជើញ​ឲ្យ​ចូល​រួម​វេទិកា​នយោ​បាយ​ចំនួន​ពីរ​ដែល​រៀប​ចំ​ក្នុង​រាជ​ធានី​ភ្នំពេញ​ កាល​ពី​ពីរ​សប្ដាហ៍​មុន​ និង​ពិធី​​សន្យា​ប្រយុទ្ធ​​ប្រឆាំង​អំពើ​ពុក​រលួយ​។ អង្គការ​ក្រៅ​រដ្ឋា​ភិបាល​ក៏​បាន​លើក​ឡើង​ដែរ​ថា តំណាង​មក​ពី​គណបក្ស​ប្រជាជន​កម្ពុជា​ ក៏​មិន​បាន​មក​ចូល​រួម​ក្នុង​កិច្ច​ពិភាក្សា​ដេញ​ដោលតូចៗ​មួយ​ចំនួន​​ដែល​រៀប​ចំ​ឡើង​នៅ​ទូទាំង​ប្រទេស​ផង​ដែរ​​​។

ទោះ​បី​​មាន​កិច្ច​ខិត​ខំ​ប្រឹង​ប្រែង​ពី​អង្គការ​ក្រៅ​រដ្ឋាភិបាល និង​អង្គការ​សង្គម​ស៊ីវិល​ ដើម្បី​បង្កើត​វេទិកា​សម្រាប់​គណបក្ស​នយោ​បាយ​សំខាន់ៗ​ ក្នុង​ប្រទេស​កម្ពុជា​ ពិភាក្សា​អំពី​គោល​នយោបាយ​របស់​ខ្លួន​មុន​ការ​បោះ​ឆ្នោត​​​​ជាតិ​នា​ថ្ងៃ​ទី​២៨ ខែ​កក្កដា​ក៏ដោយ​ ក៏​គណ​បក្ស​ប្រជា​ជន​កម្ពុជា​ដែល​សព្វ​ថ្ងៃ​មាន​អាសនៈ​​​​ចំនួន​៩០​ ក្នុង​ចំណោម​អាសនៈ​សរុប​ចំនួន​​១២៣​នៅ​ក្នុង​រដ្ឋ​សភា​ នៅ​តែ​បដិសេធ​មិន​ចូល​រួមដែរ​។

សម្រាប់​អ្នក​ខ្លះ​គិត​ថា ការ​បដិសេធ​របស់​គណបក្ស​កាន់​អំណាច​មិន​ព្រម​ចូល​រួម​នៅ​ក្នុង​កិច្ច​ពិភាក្សា​ដេញ​ដោល​ជា​សាធារណ​​ៈនេះ​ គឺ​​ហាក់ដូច​ជា​គោល​នយោបាយ​មួយ​អ៊ីចឹង​។

លោក វ៉ន ពៅ ប្រធាន​សមាគម​សេដ្ឋកិច្ច​ក្រៅ​ប្រព័ន្ធ​ ដែល​រៀប​ចំ​វេទិកា​មួយ​ក្នុង​ខេត្ត​កំពង់​ឆ្នាំង​ កាល​ពី​ថ្ងៃ​ព្រហស្បតិ៍​ ដោយ​មាន​សមាជិក​មក​ពី​គណ​បក្ស​នយោបាយ​សំខាន់​ៗ ត្រូវ​បាន​អញ្ជើញ​ឲ្យ​មក​ចូល​រួម​ពិភាក្សា​អំពី​បញ្ហា​ដី​ធ្លី សិទ្ធិ​មនុស្ស​ និង​អំពើ​ពុក​រលួយ​ បាន​មាន​ប្រសាសន៍ថា “ ខ្ញុំ​គិត​ថា​ [គណបក្ស​ប្រជា​ជន​កម្ពុជា​]មិន​ចង់​ចូល​រួម​​កិច្ច​ពិភាក្សា​ទេ ពី​ព្រោះ​ពួក​គាត់​ខ្លាច​ប្រជាជន​សួរ​”។

លោក វ៉ន ពៅ ​លើក​ឡើង​ថា លោក​បាន​បញ្ជូន​លិខិត​មួយ​ផ្សេង​ទៀត​ ដើម្បី​អញ្ជើញ​គណបក្ស​ប្រជា​ជន​កម្ពុជា​ឲ្យ​បញ្ជូន​​តំណាង​របស់​ខ្លួន​មក​ចូល​រួម​វេទិកា​មួយ​ស្ដី​ពី​បញ្ហា​ស្រដៀង​គ្នា​​នេះ​ នៅ​ក្នុង​ខេត្ត​ព្រះសីហនុ​ នៅ​​​ថ្ងៃ​ទី​១៩ ខែ​មិថុនា។

លោក​​​បន្ដ​ថា “ ពួកគាត់​ឆ្លើយ​ថា  ​យើង​​នឹង​ពិចារណា​អំពី​រឿង​េនះ។​​​​​ខ្ញុំ​​គិត​ថា ពួក​គេ​នឹង​មិន​​​មក​ចូល​រួម​ទេ។​ពួក​គេ​មិន​ដែល​មក​ចូល​រួម​​ទេ”។

លោក ឈិត សំអាត នាយក​ប្រតិបត្តិ​អង្គការ​​​វេទិកា​នៃ​អង្គការ​មិន​មែន​​រដ្ឋាភិបាល​ ​រួម​ជាមួយ​អង្គការ​សង្គម​ស៊ីវិល​១៤​ផ្សេង​ទៀត​ ដែល​បាន​ឧបត្ថម្ភ​វេទិកា​នយោបាយ​​មួយ​កាល​ពី​ថ្ងៃ​ទី​៦ ខែ​មិថុនា ស្ដី​អំពី​ការ​អប់រំ សិទ្ធិ​ដីធ្លី និង​អភិបាល​កិច្ច​ បាន​លើក​ឡើង​ថា វា​មាន​​​សារៈសំខាន់​ណាស់​ចំពោះ​អ្នក​បោះ​ឆ្នោត​​ក្នុង​​​​ការ​ស្តាប់​​គោល​នយោបាយ​របស់​គណបក្ស​កាន់​​អំណាច​ ប៉ុន្តែលោក​ និង​​អ្នក​ផ្សេង​ទៀត​នៅ​ក្នុង​​​អង្គការ​សង្គម​ស៊ីវិល​​​មិន​អាច​អញ្ជើញ​គណ​បក្ស​ប្រជា​ជន​កម្ពុជា​ឲ្យ​មក​ចូល​រួម​បាន​ទេ​​។

លោក​បាន​លើក​ឡើង​ថា “ ប្រជា​ពល​រដ្ឋ​ និង​អង្គការ​ក្រៅ​រដ្ឋាភិបាល​ពិត​ជា​ចង់​ឲ្យ​គណ​បក្ស​ប្រជា​ជន​កម្ពុជា​​ចូល​រួម​ក្នុង​វេទិកា​នេះ​ខ្លាំង​ណាស់។ ប្រជា​ពល​រដ្ឋ​បោះ​ឆ្នោត​ឲ្យ​គណ​បក្ស​​នេះ​ ហេតុដូច្នេះ​ហើយ​គណបក្ស​នេះ​​ត្រូវ​តែ​ឆ្លើយ​តប​ចំពោះ​​ប្រជា​ពល​រដ្ឋ​វិញ​”។
លោក​បាន​ថ្លែង​ថា “យើង​បាន​​ផ្ញើ​​លិខិត​​​​អញ្ជើញ​​ពួកគាត់​ និង​ស្នើ​​សុំ​ជួប​ពួក​​គាត់​ ប៉ុន្តែ​ពួក​គាត់​​មិន​មក​ចូល​រួម​ឡើយ។ យើង​នឹង​រៀបចំ​វេទិកា​មួយ​ផ្សេងទៀត​នៅ​ក្នុង​ខេត្ត​មណ្ឌល​គិរី [នៅ​ថ្ងៃ​ទី​១៩ ខែ​មិថុនា]។​ខ្ញុំ​សង្ឃឹម​​​ថា ពួក​គេ​នឹង​មក​ចូល​រួម​ជាមួយ​យើង​ ប៉ុន្តែ​​ខ្ញុំ​មាន​សង្ឃឹម​​តិច​​​ណាស់​​”។

លោក​ស្រី ធីតា ឃឹស ​ប្រធាន​គណៈ​កម្មា​ធិការ​ដើម្បី​លើក​កម្ពស់​ស្ត្រី​នៅ​ក្នុង​នយោ​បាយ ​​ដែល​រៀប​ចំ​វេទិកា​មួយ​ស្ដី​ពី​បញ្ហា​ស្ត្រី​ កាល​ពី​ថ្ងៃ​ពុធ​ ក្នុង​រាជ​ធានី​ភ្នំពេញ លើក​​​ឡើង​​​​​​​ថា​ ហេតុផល​មួយ​ផ្សេង​ទៀត​នៃការ​មិន​ចូល​រួម​​របស់​គណបក្ស​ប្រជា​ជន​កម្ពុជា​​ប្រហែល​មក​ពី​អង្គការ​សង្គម​ស៊ីវិល​​មិន​សូវ​ជា​មាន​សារៈសំខាន់​សម្រាប់​​គណបក្ស​កាន់​អំណាច។

លោក​ស្រី​បាន​លើក​ឡើង​ថា “ មនុស្ស​នៅ​ក្នុង​គណបក្ស​ប្រជា​ជន​កម្ពុជា​មិន​ហ៊ាន​មក​ចូល​រួម​ ពីព្រោះ​ពួក​គាត់​ខ្លាច​មាន​កំហុស​ នៅ​ក្នុង​ការ​បក​ស្រាយ​ និង​ការ​ឆ្លើយ​សំណួរ​ពាក់​ព័ន្ធ​នយោបាយ​ដែល​អ្នក​ចូល​រួម​ផ្សេងៗ​ទៀត​​​សួរ​។ សម្រាប់​ពួក​គាត់​ មិន​និយាយ​ គឺ​ប្រសើរ​ជាង​និយាយ​ខុស ​ដែល​អាច​ធ្វើ​ឲ្យ​ពួក​គាត់​​បាត់​​បង់​តំណែង​​”។

លោក គឹម ឡី អ្នក​ពិគ្រោះ​ផ្នែក​ស្រាវ​ជ្រាវ​​​នៅ​មជ្ឈមណ្ឌល​សិទ្ធិ​មនុស្ស​កម្ពុជា​ បាន​លើក​ឡើង​ថា ដោយ​មាន​ការ​គ្រប់​គ្រង​យ៉ាង​ច្រើន​លើ​ប្រព័ន្ធ​ផ្សព្វ​ផ្សាយ​ វា​មាន​ហេតុផល​តិច​តួច​​​ណាស់​សម្រាប់​គណបក្ស​ប្រជា​ជន​កម្ពុជា​​ក្នុង​ការ​មក​ចូល​រួម​នៅ​ក្នុង​ការ​​​​ផ្លាស់​​​ប្ដូរ​​​មតិ​យោ​បល់​​ជាមួយ​គណ​បក្ស​នយោបាយ​ផ្សេងៗ​ទៀត​​ ឬក៏​អ្នក​បោះ​ឆ្នោត​។

លោក​​លើក​ឡើង​ថា“ គណបក្ស​ប្រជា​​​ជន​កម្ពុជា​មាន​ស្ថានីយ​ទូរទស្សន៍​ វិទ្យុ និង​កាសែត​ ព្រម​ទាំង​ប្រព័ន្ធ​ផ្សព្វផ្សាយ​ជា​ច្រើន​ទៀត ដើម្បី​ផ្សព្វ​ផ្សាយ​ព័ត៌មាន​របស់​ខ្លួន​។ ខ្ញុំ​គិត​ថា ប្រសិន​បើ​ពួក​គាត់​​មក​ចូល​រួម​នៅ​ក្នុង​វេទិកា​ទាំង​នេះ​ ពួក​គាត់​​នឹង​ប្រឈម​ការ​លំបាក​ជា​ច្រើន​ ដោយ​អ្នក​ចូល​រួម​នឹង​សួរ​អំពី​ផល​​ប៉ះ​ពាល់​ពី​មួយ​ថ្ងៃ​ទៅ​មួយ​ថ្ងៃ​នៃ​​គោល​នយោ​បាយ​របស់​ខ្លួន​”។

លោក ជាម យៀប​ សមាជិក​សភា​ជាន់​ខ្ពស់​​​មក​ពី​គណបក្ស​ប្រជា​ជន​កម្ពុជា​ មាន​ប្រសាសន៍​​​ថា ទោះ​បី​ជា​គណបក្ស​កាន់​អំណាច​បាន​ទទួល​​​ការ​អញ្ជើញ​ឲ្យ​ចូល​រួម​នៅ​ក្នុង​វេទិកា​ និង​កិច្ច​ពិភាក្សា​ដេញ​ដោល​ផ្សេងៗ​ក៏​ដោយ ក៏​​​សមា​ជិក​របស់​ខ្លួន​​មិន​អាច​ចូល​រួម​បាន​​ដែរ ​ដោយ​សារ​កំពុង​តែ​ជាប់​រវល់​យ៉ាង​ខ្លាំង​នៅ​ក្នុង​ការ​​ត្រៀម​​​ខ្លួន​សម្រាប់​ការ​បោះ​ឆ្នោត​នា​ខែ​កក្កដា​​។

លោក​លើកឡើង​​​ថា“ ខ្ញុំ​មិន​បាន​ទាក់​ទង​ជាមួយ​ពួក​គេ​ច្រើន​នោះ​ទេ​ ព្រោះ​យើង​មាន​​​​ពេល​វេលា​តិច​តួច​ឥឡូវ​នេះ។ យើង​ជាប់​រវល់​រៀបចំ​​យុទ្ធនាការ​​ឃោសនា​បោះ​ឆ្នោត​ ពីព្រោះ​ការ​បោះ​ឆ្នោត​ជិត​មក​ដល់​ហើយ​”​​​។

លោក​​បន្ថែម​ថា“ ​ខ្ញុំ​ចង់​ជម្រាប​ប្រាប់​ពួក​គេ​ ​[អង្គការ​ក្រៅ​រដ្ឋាភិបាល] ថា យើង​បាន​ធ្វើ​​កិច្ច​ការពាក់​ព័ន្ធ​នឹង​ប្រជាធិបតេយ្យ​ហើយ​”។
ប៉ុន្តែ ទោះ​បី​ជា​គណបក្ស​ប្រជា​ជន​កម្ពុជា​មិន​បាន​ចូល​រួម​ក្នុង​កិច្ច​ពិភាក្សា​ដេញ​ដោល​​​ពី​មុន​ក៏​ដោយ ក៏​​លោក​ស្រី ឡូរ៉ា ថនតុន (Laura Thornton) ​​នាយិកា​វិទ្យាស្ថាន​ជាតិ​ប្រជាធិប​​​តេយ្យ​​ប្រចាំ​ប្រទេស​កម្ពុជា ដែល​មាន​មូល​​​ដ្ឋាន​នៅ​សហ​រដ្ឋ​អាមេរិក​ បាន​លើក​ឡើង​ថា លោក​ស្រី​មាន​សុទិដ្ឋិនិយម​ថា  គណបក្ស​ប្រជា​​​​ជន​កម្ពុជា​នឹង​ចូល​រួម​កិច្ច​ពិភាក្សា​ដេញ​ដោល​តាម​កញ្ចក់​ទូរទស្សន៍ និង​កិច្ច​ពិភាក្សា​ដេញ​ដោល​តាម​ស្ថានីយ​វិទ្យុ​មួយ​ចំនួន​ ដែល​នឹង​រៀប​ចំ​ឡើង​ដោយ​អង្គការ​របស់​លោក​ស្រី អំឡុង​យុទ្ធនា​ការ​ឃោសនា​បោះ​ឆ្នោត​ ដែល​នឹង​ចាប់​ផ្ដើម​នៅ​ថ្ងៃ​ទី​២៦ ខែ​មិថុនា។

លោក​ស្រី​បាន​លើក​ឡើង​ថា “ នៅ​ថ្ងៃ​នេះ​ ​​​យើង​បាន​ជួប​ជាមួយ​គណបក្ស​នយោ​​​បាយ​ទាំង​អស់​ ហើយ​ពួក​គាត់​​សុទ្ធ​តែ​បាន​ចុះ​ហត្ថ​​​លេខា​​យល់​ព្រម​ចូល​រួម​ពី​គណបក្ស​នយោ​​​បាយ​ទាំង​ប្រាំបី​​រួម​ទាំង​គណបក្ស​ប្រជា​ជន​កម្ពុជា​ផង​”។ លោក​ស្រី​បាន​បន្ថែម​ថា ការ​ពិភាក្សា​ដេញ​ដោល​តាម​កញ្ចក់​ទូរទស្សន៍ ​នឹង​ត្រូវ​ធ្វើ​ឡើង​នៅ​​តាម​ទូរទស្សន៍​ជាតិ រីឯ​ការ​ពិភាក្សា​ដេញ​ដោល​តាម​ស្ថានីយ​វិទ្យុ​ នឹង​ផ្សព្វ​ផ្សាយ​តាម​រយៈ​ស្ថានីយ​វិទ្យុ​មួយ​​ចំនួន​នៅ​​​​ក្នុង​ប្រទេស​កម្ពុជា​។

ដើម្បី​ជួយ​សម្រួល​ដល់​ការ​ចូល​រួម​របស់​គណបក្ស​ប្រជា​ជន​កម្ពុជា​ វិទ្យា​ស្ថាន​ជាតិ​ប្រជាធិបតេយ្យ​ ដំបូង​ត្រូវ​តែ​ដាក់​ជូន​​រចនា​សម្ព័ន្ធ​នៃ​កិច្ច​ពិភាក្សា​ដេញ​ដោល​​ទៅ​ឲ្យ​គណៈ​​​កម្មាធិការ​ជាតិ​រៀបចំ​ការ​បោះ​ឆ្នោត​ ដែល​ទាម​ទារ​ឲ្យ​មាន​​ការ​ចូល​រួម​ពី​គណបក្ស​ទាំង​អស់​ មិន​មែន​តែ​គណបក្ស​ដែល​មាន​​អាសនៈ​នៅ​ក្នុង​រដ្ឋសភា​នោះទេ ប៉ុន្តែ​​លោក​ស្រី ថនតុន បាន​លើក​ឡើង​ថា ​លោក​ស្រី​ចង់​ឲ្យ​គណបក្ស​ដែល​មាន​អាសនៈ​នៅ​ក្នុង​រដ្ឋ​សភា​ចូល​រួម​ច្រើន​ជាង​។

លោក​ស្រី​បាន​មាន​ប្រសាសន៍​ថា “ រឿង​តែ​មួយ​គត់​ដែល​យើង​ត្រូវ​ធ្វើ​ [សម្រាប់​កិច្ច​ពិភាក្សា​ដេញ​ដោល​តាម​កញ្ចក់​ទូរទស្សន៍] គឺ​ចង់​បាន​ម៉ោង​ដែល​ល្អ​ ហើយ​ខ្ញុំ​ខ្លាច​ក្រែង​ថា ម៉ោង​ភាគ​ច្រើន​នៅ​ក្នុង​ទូរទស្សន៍​ជាតិ​​សុទ្ធ​តែ​ជាប់​រវល់​។ហេតុដូច្នេះ​ហើយ​​ខ្ញុំ​គិត​ថា យើង​នឹង​រៀប​ចំ​កម្មវិធី​ពិភាក្សា​ដេញ​ដោល​នៅ​ពេល​​យប់​​ជ្រៅ​បន្តិច​ ដែល​ជា​ម៉ោង​មិន​សូវ​​ល្អ​​”៕

ប្រែ​សម្រួល​ដោយ ស៊ា ស៊ុយឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស