កាលពីថ្ងៃសៅរ៍ អ្នកភូមិជាង១០០នាក់ក្នុងខេត្តកំពង់ធំ បានតវ៉ាប្រឆាំងនឹងក្រុមហ៊ុនចម្ការកៅស៊ូមួយរបស់វៀតណាម ចំពោះការបន្តកាប់ឈើក្នុងព្រៃសហគមន៍ការពារមួយក្នុងព្រៃឡង់ ដែលតាមការចោទប្រកាន់ថា ក្រុមហ៊ុននេះមិនបានផ្តល់ប្រាក់សំណងសមរម្យដល់អ្នកភូមិឡើយ។
លោក ហឿន សុភា តំណាងសហគមន៍ព្រៃឡង់បានមានប្រសាសន៍ថា ប្រជាពលរដ្ឋមកពីភូមិឈូក ស្រុកសណ្តាន់ ដែលជាច្រើនឆ្នាំមកនេះបានចោទប្រកាន់ក្រុមហ៊ុនស៊ីអាស៊ីខេ ថា បានកាប់ឈើនៅខាងក្រៅព្រំប្រទល់តំបន់ដីសម្បទានរបស់ខ្លួនដែលមានទំហំ៦.០០០ហិកតានោះ រកឃើញថា ក្រុមហ៊ុនចម្ការកៅស៊ូនេះបានកាប់ឆ្ការដីព្រៃអស់ទំហំ៥០០ហិកតានៃដីចម្ការរបស់ពួកគាត់ កាលពីខែឧសភា។
លោក សុភា មានប្រសាសន៍ថា “ កម្រិតជីវភាពរបស់អ្នកភូមិពឹងផ្អែកលើព្រៃនេះ ដូច្នេះពេលនេះពួកគាត់នឹងជួបការលំបាក ដោយសារតែក្រុមហ៊ុននេះបានកាប់ឆ្ការអស់ជាង៥០០ហិកតាទៅហើយនៃដីព្រៃសហគមន៍ដោយមិនបានផ្តល់ប្រាក់សំណងសមរម្យឡើយ”។
លោក អ៊ុច សំអុន អភិបាលខេត្តកំពង់ធំ បានមានប្រសាសន៍ថា អ្នកភូមិទាំងនេះនឹងទទួលបានដីសម្បទានសង្គមកិច្ចនៅក្រៅតំបន់ដែលពួកគាត់ទាមទារ ។
លោកបានមានប្រសាសន៍ថា“ យើងមានគម្រោងផ្ដល់ដីសម្បទានសង្គមកិច្ចដល់អ្នកភូមិទាំងនេះ ប៉ុន្ដែមិនមែនដីស្ថិតក្នុងតំបន់ដដែល ដែលពួកគាត់បានទាមទារទុកសម្រាប់ឲ្យកូនចៅជំនាន់ក្រោយនោះទេ”៕
ប្រែសម្រួលដោយ ហម សុផាណ្ណា