មន្ត្រីនគរបាលបាននិយាយថា កងរាជអាវុធហត្ថក្នុងខេត្តព្រះសីហនុកាលពីម្សិលមិញបានចាប់ខ្លួនជនជាតិតៃវ៉ាន់ចំនួន២៦នាក់ រាប់ទាំងស្រី្តចំនួនពីរនាក់ផង ដែលជាប់សង្ស័យថាបានចូលរួមក្នុងក្រុមជំរិតទារប្រាក់តាមប្រព័ន្ធទូរគមនាគមន៍មួយ។
លោកវរសេនីយ៍ទោ ហេង ប៊ុនទី មេបញ្ជាការរងកងរាជអាវុធហត្ថខេត្ត មានប្រសាសន៍ថា មនុស្សចំនួន២៦នាក់ត្រូវបានចាប់ខ្លួននៅក្នុងវីឡាជួលមួយក្នុងសង្កាត់លេខ៣ ក្រុងព្រះសីហនុ ជាទីដែលពួកគេបាននិងកំពុងតែមានគម្រោងជំរិតទារប្រាក់ ដោយប្រើប្រព័ន្ធបច្ចេកវិទ្យា Voice over Internet Protocol (VoIP) ដើម្បីទាក់ទងទៅអ្នកនៅក្នុងប្រទេសចិន និងតៃវ៉ាន់ ដើម្បីជំរិតទារប្រាក់ពីពួកគេ។
លោក ប៊ុនទី មានប្រសាសន៍ថា “ ពេលនេះ ពួកគេស្ថិតនៅក្នុងបញ្ជាការដ្ឋានកងរាជអាវុធហត្ថខេត្តដើម្បីធ្វើការសាកសួរ”។
រយៈពេលប៉ុន្មានខែចុងក្រោយនេះ អាជ្ញាធរបានចាប់ខ្លួនជនជាតិចិននិងជនជាតិតៃវ៉ាន់បានច្រើននាក់ ដែលជាប់ពាក់ព័ន្ធនឹងការជំរិតទារប្រាក់តាមប្រព័ន្ធ VoIP ក្នុងរាជធានីភ្នំពេញដូចគ្នានេះ និងនៅក្នុងខេត្តមួយចំនួនទៀត ហើយបានបណ្តេញពួកគេត្រឡប់ទៅស្រុកកំណើតរបស់ពួកគេវិញ។
លោកឧត្តមសេនីយ៍ត្រី ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេស បានមានប្រសាសន៍ថា លោកជឿជាក់ថា មនុស្សដូចគ្នានេះ បានរៀបចំគម្រោងជំរិតទារប្រាក់ទាំងអស់។
លោកឧត្តមសេនីយ៍ត្រី ទីតូ បានថ្លែងថា “ ទាំងជនជាតិចិននិងតៃវ៉ាន់ មានក្រុមជាច្រើនប៉ុន្តែពួកគេមានមេដឹកនាំតែម្នាក់ប៉ុណ្ណោះ”។លោកមិនបានមានប្រសាសន៍លម្អិតបន្ថែមទៀតទេ។ ជនសង្ស័យនឹងត្រូវបញ្ជូនទៅតុលាការថ្ងៃនេះ៕
ប្រែសម្រួលដោយ ចេវ ប៊ុននី