លោក ហ៊ុន ហ៊ាន អតីតស្នងការនគរបាលខេត្តបន្ទាយមានជ័យ ដែលត្រូវបានដោះលែងកាលពីខែមុនតាមព្រះរាជ ទានលើកលែងទោស បន្ទាប់ពីត្រូវបានផ្តន្ទាទោសឲ្យជាប់ពន្ធនាគាររយៈពេលបួនឆ្នាំក្នុងឆ្នាំ២០១១ ពីបទទទួលសំណូកពីក្រុមជួញដូរគ្រឿងញៀន បានមានប្រសាសន៍កាលពីម្សិលមិញថា លោកបានវិលត្រឡប់ទៅជួបជុំគ្រួសាររបស់លោកនៅក្នុងខេត្តវិញហើយ។
លោក ហ៊ុន ហ៊ាន បានមានប្រសាសន៍ថា លោកមិនទាក់ទងជាមួយអតីតមេដឹកនាំរបស់លោកនៅក្រសួងមហាផ្ទៃទេ ចាប់តាំងពីការដោះលែងគាត់ ប៉ុន្តែនឹងរីករាយត្រឡប់ទៅធ្វើការឲ្យរដ្ឋាភិបាលវិញ ប្រសិនបើត្រូវបានស្នើ។
លោកបានមានប្រសាសន៍ថា “ ប្រសិនបើរដ្ឋាភិបាលហៅខ្ញុំទៅធ្វើការជាមួយពួកគេ ខ្ញុំនឹងទៅ មិនបញ្ហាទេសម្រាប់ខ្ញុំ។ ខ្ញុំនឹងសម្រេចទៅធ្វើស្រែចម្ការជាមួយប្រជាជន”។ លោកបានមានប្រសាសន៍បន្ថែមទៀតថា លោកមានស្រែពីរហិកតា និងមានច្រើនហិកតាទៀតជួលពីអ្នកជិតខាង។
ក្នុងខែវិច្ឆិកា ឆ្នាំ២០១១ លោក ហ៊ុន ហ៊ាន ត្រូវបានផន្ទាទោសឲ្យជាប់ពន្ធនាគារព្រៃស ក្នុងរាជធានីភ្នំពេញរយៈពេលបួនឆ្នាំ តាមការចោទប្រកាន់ពីបទទទួលសំណូកពីក្រុមជួញដូរគ្រឿងញៀន។លោកត្រូវបានដោះលែងរួមជាមួយអ្នកទោស១១៦នាក់ទៀតដោយព្រះរាជក្រឹត្យរបស់ព្រះមហាក្សត្រ នរោត្តម សីហមុនី អំឡុងពិធីបុណ្យចម្រើនព្រះជន្មព្រះអង្គ។
លោក ជា ដារ៉ា មេធាវីរបស់លោក ហ៊ុន ហ៊ាន បានមានប្រសាសន៍ថា ចាប់តាំងពីកូនក្តីរបស់លោកបានទទួលព្រះរាជទានលើកលែងទោសមក មិនមានរឿងណាមួយប្រឆាំងលោកទៀតទេ មានន័យថា ពេលនេះលោកអាចវិលត្រឡប់ទៅបម្រើការងារជាមន្ត្រីរាជការវិញបានហើយ។
លោក ដារ៉ា បានថ្លែងថា “ ខ្ញុំគិតថា នៅពេលលោកទទួលបានព្រះរាជទានលើកលែងទោស និងមិនត្រូវបានរកឃើញពិរុទ្ធភាពពីបទល្មើសណាមួយនោះ ប្រសិនបើរដ្ឋឬអង្គភាពនគរបាលរបស់លោកចង់ឲ្យលោកវិលត្រឡប់ទៅធ្វើការវិញ មិនមានបញ្ហាទេ”។
ទោះជាយ៉ាងណា លោក សុក សំអឿន នាយកប្រតិបត្តិក្រុមអ្នកច្បាប់ការពារសិទ្ធិកម្ពុជា ដែលជាអង្គការក្រៅរដ្ឋាភិបាលជំនួយផ្នែកច្បាប់ បានមានប្រសាសន៍ថា លោក ហ៊ុន ហ៊ាន ទំនងជាមិនអាចវិលត្រឡប់ទៅធ្វើការក្នុងរដ្ឋាភិបាលវិញបានទេ ពីព្រោះព្រះរាជទានលើកលែងទោសមិនធ្វើឲ្យអ្នកទោសដែលត្រូវបានដោះលែងរួចផុតពីរួចផុតពីលិខិតថ្កោលទោសឡើយ ហើយការិយាល័យរដ្ឋាភិបាលភាគច្រើនមានលក្ខន្តិកៈប្រឆាំងនឹងការយកឧក្រិដ្ឋជនមកធ្វើការ។
លោក សុក សំអឿន បានមានប្រសាសន៍ថា “ បើទោះជាមានព្រះរាជទានលើកលែងទោសក៏ដោយ ក៏បទល្មើសនៅតែមានក្នុងលិខិតថ្កោលទោសរបស់គាត់ដែរ”៕
(រាយការណ៍បន្ថែមដោយ Colin Meyn)
ប្រែសម្រួលដោយ ចេវ ប៊ុននី